Tala Faamamai o le Talalelei
E Muamua le Papatisoga
Ae a faapefea le faitau miliona o fanau a lo tatou Tama Faalelagi o e, ana faapea ua papatisoina, ua mafai ona maua faamanuiaga e mafai ona taitaiina atu ai i le avea ma se aiga e faavavau?
O le tusi lesona o afiafi faaleaiga … o loo i ai se lesona muamua e sili ona musuia. O le autu “E Faavavau Aiga.” Ua fautuaina aiga ia tuu ni aitema i luga o se laulau, e pei o se pepa faamaonia o le faaipoipoga, se pepa faataga mo le malumalu, se ata o se malumalu, ma se pepa faamaonia o le papatisoga. …
Ua iloa e tagata o le ekalesia o nei aitema uma na tuu i luga o le laulau e i ai se sootaga i le faaipoipoga i le malumalu, ma le avanoa o le avea ma se “aiga e faavavau.” … Sei ou faapupula atu se tasi o na aitema o loo i luga o le laulau—o le pepa faamaonia o le papatisoga.
O se “aiga e faavavau” e manaomia ai le i ai i ulugalii o ni pepa faamaonia o papatisoga, ia avea o ni tagata agavaa o le Ekalesia e faamaonia mo ni pepa faataga o le malumalu, ma umia se pepa faamaonia o le faaipoipoga o ta’ua ai se faaipoipoga faaselesitila. Ae a faapefea le faitau miliona o fanau a lo tatou Tama Faalelagi o e, ana ua papatisoina, e mafai ona maua faamanuiaga o le a taitaiina atu ai i le avea ma se aiga e faavavau?
Ua faateleina le faamanuiaina [o le galuega] a o tatou faifeautalai faamisiona i itu uma o le lalolagi i le aumaia o agaga i le vai o le papatisoga. Peitai, e mafai ona faaopoopoina atili lo latou faamanuiaina pe a latou maua mai i tagata o le Ekalesia le naunautai e galulue faatasi. E foliga mai o loo i ai i le toatele o tagata o le Ekalesia se lagona musua e faasoa atu le talalelei i a latou uo ma tuaoi. O le toatele o i tatou e mitamita lava pe a ta’ua le tuputupu ae o le Ekalesia, po o le faamanuiaina foi o taumafaiga a faifeautalai i le lalolagi atoa, ae tatou te le’i faaaumeaina lava se uo po o se tuaoi. A fesiligia ia peresitene o misiona ua maea mai galuega, “E mafai faapefea ona e maua ni tagata liliu mai se tele atu i lau misiona?” matou te faalogoina le tali lava e tasi: “Maimau pe ana mafai ona matou aumaia le au paia e lagolago atu i faifeautalai e ala i le saunia o a latou uo ma tuaoi e feiloai atu i alii faifeautalai.”
Pe ua galo ea ia i tatou lo tatou tiute? Pe ua galo ea ia i tatou le fetalaiga a le Alii?
“Faauta, na ou auina atu outou e molimau ma lapata’i atu i tagata, e tatau foi i tagata uma ua uma ona lapataiina ona lapatai i lona tuaoi. O lea ua tuua ai i latou e aunoa ma le alofaga” (MFF 88:81–82). …
Ua aoaoina [a tatou faifeautalai] e aoao atu le talalelei, e aoao atu i auala faatulagaina, ma musuia, lea e faamoemoe e taitaiina atu ai i le papatisoga. I se faifeautalai, o itula uma lava e taua ma e tatau lava ona aoga. Pe ua outou silafia ea e tasi le tagata e papatisoina e faifeautalai mai le 1,000 o aiga latou te tuitui atu i ai? O faifeautalai lava nei latou te papatisoina le 600 o tagata mai le tai 1,000 o tagata e aoaoina i totonu o fale o tagata o le au paia—e 600 taimi e sili ai tagata liliu mai pe a fesoasoani tagata o le ekalesia ma le agaga tautino [i le galuega faafaifeautalai].
Ua toatele atu nei auauna talavou ma le fiafia a le Alii i o outou uarota ma paranesi nai lo se isi lava taimi muamua. Ua malaga atu ia faifeautalai ua sili atu ona aoaoina, sili atu ona saunia, faatasi ai ma ni faamoemoega maualuluga atu ma ni agaga naunauta’i. O aiga uma lava ua taliaina le talalelei, ua i ai se tiute o le faasoa atu i ona tuaoi. E mafai ona tatou faatosina mai tagata i le talalelei i le na o le faaalia o uiga masani ma faaali faamaoni atu lo tatou alolofa ia i latou. …
I se faigamalaga i se vaalele, na faia ai e sa’u uo se talanoaga ma se tasi o tamaitai. Sa ia faamatala atu i le tamaitai e uiga i lana malaga i Anderson, i Carolina i Saute, e asiasi atu i sona tausoga o le tupulaga lona fa, ona sa ia sailia ni faamatalaga e uiga i nisi o ona tuaa. Na ia fesili atu i le tamaitai sa nofo i ona tafatafa, “E te fia iloa le mafuaaga o lo’u manao ia ou iloa o’u tuaa ua maliliu i le tele o tausaga ua mavae?”
Sa ia tali mai, “Ioe, ou te fia iloa.”
“Sa ou taumafai e saili faamatalaga e uiga i o’u augatama ina ia mafai ona ou faia ni galuega faapitoa mo i latou i le malumalu. E te silafia o fea na i ai le Faaola i aso e tolu a o i ai Lona tino i le tuugamau ina ua mavae le Faasatauroga?”
“Leai. O fea?”
Sa faaauau lana tala, “Fai mai le Aposetolo o Peteru, sa talai atu Keriso i agaga sa i le falepuipui, o e na le usiusitai i le vaitaimi o Noa.” Ona ia faapea atu lea, “Ia, e te manatu e mafai e le Faaola o le lalolagi ona faaalu ni aso se tolu e talai atu ai i na ituaiga o tagata, pe afai e le mafai ona latou faia i ai se mea?”
Sa ia fai mai, “E leai. Ou te le’i mafaufau lava i lena mea.”
Na faaauau ona ia faamalamalama atu le papatisoga mo e ua maliliu ma le Toetu. Na ia sii atu upu a Paulo: “A faapea, pe faapefea e ua papatisoina ma sui o e ua oti, pe a faapea e le toe tutu e ua oti? ona o le a ea ua papatisoina ai i latou ma sui o e ua oti?” (1 Korinito 15:29).
“E te manatua le fuaitau ‘e tumau seia oo i le oti’ lea na faaaogaina ina ua e faaipoipo? E muta noataga o le lua faaipoipoga pe a maliu se tasi o oulua.”
Sa tali mai o ia, “Ou te masalo lava e sa’o, a e ou te lei mafaufau muamua i ai faapena.”
Sa faaauau lana tala, “Na maliu lo’u toalua i le amataga o le masina ua te’a, peitai o ia lava o lo’u toalua e faavavau. Sa faaipoipoina i maua e se tasi ua i ai le pule o le perisitua e fusifusia ai i le lagi lea faaipoipoga na faia i le lalolagi. E faavavau lava ona ma faatasi; ae le gata i lea, e tumau foi e faavavau le ma fanau ia i maua.”
A o le’i tu laueleele le vaalele na ia faapea atu i le tamaitai, “E te silafia le mafuaaga ua ta feiloai ai? Ina ia mafai ona e aoao e uiga i le talalelei ma faamauina i lau tane, i lau fanau, ma ou augatama e faavavau—ma ia avea o se aiga e faavavau.”
E le’i leva talu ona tupu lea talanoaga, ae ona lafoina atu se kopi o le tusi a Elder LeGrand Richards, O le Galuega Taua ma le Ofoofogia, i lenei tamaitai ma lona aiga ma momono ai i totonu le kata o lona igoa. Sa iu ina oo atu le igoa o lenei tamaitai i nisi o tamaitai faifeautalai faamisiona na talai i le aai o lona alalafaga i Pennsylvania. Ina ua mavae le feiloaiga muamua a faifeautalai ma lenei tamaitai, na tusia e [faifeaualai], “O le tamaitai na ma feiloai i ai sa matua tamalii tele. Maimau pe ana outou tagai i ona foliga fiafia ina ua matou feiloai. Na totoina [e le tamalii sa la feiloai i luga o le vaalele] se fatu na sili ona lelei i lana molimau ma le mautinoa o le a mafai ona faatasia o ia ma e pele ia te ia pe a mavae lenei olaga. I le avea ai o ni faifeautalai, na ma lagonaina le toafilemu. Na ma lagonaina le faagaeetia i le faatasi mai o le Alii i a ma taumafaiga aua na saunia lenei aiga.”
Ia te outou ou te faapea atu, o tou manatua mea e manaomia e se “aiga e faavavau”: o pepa faamaonia o papatisoga, pepa faataga o le malumalu, pepa faamaonia o le faaipoipoga? Ae e tatau ona i ai muamua ni pepa faamaonia o papatisoga o au uo ma tuaoi. …
Ua fetalai mai le Alii:
“Aua e ao i tagata uma ona salamo ma papatisoina. …
“O le a ou faia foi i o oulua lima se galuega ofoofogia i le fanau a tagata, i le faailoaina atu i le toatele a latou agasala, ina ia latou salamo, ma … o mai i le malo o lo’u Tama” (MFF18:42, 44).
Afai o le a e faaaafia ai lou aiga atoa—ia tatalo faatasi o se aiga mo le manuia; filifili se aiga e faaaumea; faatutu ni sini ma aso e ausia ai; faia ni a outou lava tautinoga e fai ai soo se mea e talafeagai; ona anapogi lea ma tatalo, ona tatalo lea ma anapogi—ou te folafola atu ia te outou o le a lagonaina lou leo o le lapataiga. O le aso lenei ua afu ai le saito, ua tumu le mea e soli ai vine. O le a faamanuiaina e le Alii au taumafaiga. O le a e molimauina le ui ifo o au uo i vai o le papatisoga.
E mafai ona galo ia i latou na e pai atu i o latou olaga ia upu na e fai atu, ae o le a le mafai ona galo ia i latou lagona na e tuuina atu ia i latou. E faavavau aiga, ou te tautino atu ia te outou ma le lotomaualalo uma, i le suafa o lo tatou Alii ma le Faaola o Iesu Keriso, amene.
Mai se savali o le konafesi aoao ia Oketopa 1976, ua uma ona faatulagaina ia upusii, faasaoga, faaparakalafa, ma faamataitusi lapopoa.
Ata na tusia e James L. Johnson
Sa fesili atu la’u uo i se isi tagata o le pasese, “E te fia iloa le mafuaaga o lo’u manao ia ou iloa o’u tuaa ua maliliu i le tele o tausaga ua mavae?”
O le a lagonaina lou leo o le lapataiga. O le a faamanuiaina e le Alii au taumafaiga. O le a e molimauina le ui ifo o au uo i vai o le papatisoga.