Vaai Oe!

Mark H. Soelberg, Iuta, ISA

I le afiafi o le aso 23 o Iulai, 1991, sa ma toe foi mai ai i le fale ma Elder Charles Larsen mai le Malaevaalele Faavaomalo o Aukilani ina ua uma le momoliina o se faifeautalai ua maea lana misiona. O le taimi o le taumalulu i Niu Sila, ma sa timuga mo ni nai aso.

Sa ou aveina le ma taavale e agai atu i le auala laupapa tele o le Habour Bridge, lea e sosoo ai Aukilani i Takapuna. A o ma oo atu i se afega i le vaega i lalo atu o le auala laupapa, na masau ane se tamai taavale ma pasia i maua. A o amata ona afe le taavale saoasaoa, sa le mafai e le avetaavale ona taofiofi le taavale i le susū o le auala. Sa tifa solo le taavale i le itu tauagavale ma sesee faafuasei atu i le itu taumatau, sa taia i se pa sima, lea sa taofia mai le pau ese mai le auala laupapa ae pau atu i le sami.

O le fetoai malosi i le puipui, na taavalevale ai le taavale ma sesee atu loa ma tu. O le ma tetei tele i le mea na faatoa ma vaaia, sa ou vave faatuina ai loa le taavale i le ogatotonu o le auala ma ki a ma moli o faalavelave faafuasei. O le taimi lava lena, na ma feosofi faatasi ai i fafo ma Elder Larsen e vaai pe mafai ona ma fesoasoani atu. Ae ma te lei oo atu i le taavale, sa pe’a mai i fafo se alii mai se faamalama ua ta’e ma alu ese atu mai le auala laupapa ma agai atu i lalo i le pito o le vai, lea sa nimo atu ai loa o ia i le pogisa. Sa ma valaau atu ia te ia ae sa le tali mai.

Sa ou savali atu i le tamai taavale malepe, o loo taatia faatafa ae ua faasaga i luga le faitotoa i le itu o le pasese. Sa leai se faitotoa, o lea na ou soso teisi atu ai i totonu e vaai pe o i ai se isi tagata i totonu. Sa faafuasei ona ou faalogoina se leo tele ma le manino na fai mai, “Vaai oe!” O lo’u tei tele i le leo, sa ou toe oso ese vave ai i fafo. Na toetoe o le taimi lava lena, na masau mai ai se taavale mai le pioga ma so’a le taavale lavea lea sa le’i leva ona ou faalagolago i ai.

Ona o le pioga i le auala ma le pa sima maualuga, sa le mafai ai ona iloa mai e avetaavale na agai mai le taavale lavea sa i luma. Sa faaopoopo mai nisi taavale i le faaputuga taavale lavevea. Sa ma taufetuli faavave atu ma Elder Larsen i le pioga, ma talotalo atu e taofi ai isi taavale. Sa le’i umi ae taunuu mai leoleo, ma na ma iloaina ai o le taavale muamua o se taavale na gaoia.

A o ma foi atu i le fale, sa ou mafaufau i le mea na semanu ou te oti ai ma faafetai atu ia Elder Larsen mo le lapataiina o au i le taavale na sau. Sa tilotilo mai o ia ia te au ma le te’i ma fai mai, “Elder Soelberg, e leai sa’u tala na fai atu. Ou te lei latalata atu ia te oe ma ou te lei vaai foi i lena taavale o sau mai le pioga.”

Sa ma saofafai mo sina taimi, ma lagonaina se lagona o le agaga faafetai tele. O lena po na ma tootutuli ma faafetai atu i lo tatou Tama Faalelagi mo le lapataiga lea na mautinoa lava na faasaoina ai lou ola. Talu mai lava lena mea na tupu, ua tele taimi ou te faasoaina atu ai lau molimau i le taua o le mataala i le Agaga o le Alii ma le faalogo atu i Lona siufofoga.

Sa faafuasei lava ona ou faalogoina se leo tele ma le manino na fai mai, “Vaai oe!”