Fesili & Tali

“O se tasi aso na ou faitau ai i le 1 Nifae 7:12 lea e faapea mai, e mafai ona faia e le Alii mea uma mo i tatou pe afai e faaali atu lo tatou faatuatua ia te Ia. E faapefea ona faaali atu lo tatou faatuatua ia Keriso?”

• O le faaalia o le faatuatua ia Iesu Keriso o lona uiga o le faatuatuaina ma le i ai o lagona mautinoa ia te Ia.

• O le faatuatua o le mana lea e faailoa mai ai Lona finagalo i lou olaga.

• O le faatuatua, o se meaalofa mai le Atua, e oo mai pe a e amiotonu.

• O mataupu e tolu e tatau lava ona faitauina e uiga i le faatuatua o le Eperu 11, Eteru 12, ma le Moronae 7.

Liahona

O le faatuatua o le talitonuina ma le i ai o le lagona mautinoa i le Alii. O lou faatuatua ia te Ia o se mana lea e taitaiina atu ai oe e usitai i Lana talalelei, ma o lou usiusitai o le a fesoasoani e te maua ai le faatuatua sili atu, o se meaalofa lea mai le Atua.

E pei ona taua i tusitusiga paia, afai e ia te oe le faatuatua i le Alii, e mafai ona Ia faia mea uma mo oe, e pei o le faamalolo, faamagalo, faamafanafana, ma liuaina oe. Ae o le i ai o le faatuatua e le faapea e ta’u atu ai i le Atua le mea e tatau ona fai. O lona uiga o le faatuatuaina o Ia ma malamalama o faamanuiaga uma e oo mai “e tusa ma Lona finagalo” (1 Nifae 7:12) ma “i Lona lava aso tatau, ma i Lona lava ala” (MFF 88:68). Mo se faataitaiga, atonu e te le maua se tali vave i au tatalo. Ae o lou faatuatua e faamautinoaina atu ia te oe e faapea, o loo faafofogaina e le Tama Faalelagi au tatalo ma o le a tali mai i le taimi tatau.

Ina ia atiina ae ma faaaoga lou faatuatua, (1) aoao le afioga a le Atua, e ala i le faitauina o tusitusiga paia po o le faalogo foi ia i latou o e ua i ai le pule e aoao atu ai afioga a le Atua (tagai Roma 10:17). O le iloaina o le afioga [a le Atua] o le a fesoasoani ai ia te oe e te iloa ai e tausia lava i taimi uma e le Atua ia Ana folafolaga.

(2) Galue i mea ua e iloa, po o le e pei ona fai mai Alema, tofotofo i le upu. O le upu e pei o se fatu. Afai e lelei, o le a tupu i lou loto, faamalamalamaina ai lou mafaufau, ma amata ona suamalie ia te oe (tagai Alema 32:28). O lau faamaoniga faaleagaga lena e moni le upu, o le a faapea ona fausia ai lou faatuatua.

(3) Usitai i poloaiga. O lou amiotonu o le a mafai ai ona tupu le fatu o le faatuatua i lou olaga. Faaali atu lou talitonu ia Iesu Keriso e ala i le mulimuli i Ana faataitaiga ma aoaoga. Fai le mea ua Ia fetalai mai ai ia te oe e ala i tusitusiga paia, o aoaoga a perofeta soifua, ma uunaiga a le Agaga Paia. Mo se faataitaiga, pe na e taliaina le valaaulia a Peresitene Gordon B. Hinckley ina ia oo atu i le faaiuga o le 2005 ua e faitauina le Tusi a Mamona? O i latou na faitauina na galulue ma le faatuatua ma maua faamanuiaga folafolaina. (Ioe, afai e te le’i faamaeaina le faitauina o le Tusi a Mamona i lena taimi, o loo mafai lava ona e faamaeaina!)

E ui ona o le toatele o tagata e ola lava i le olaga e aunoa ma le faatuatua i le Alii, e le mafai lava ona latou mautofi i le ola faavavau e aunoa ma le faatuatua ia te Ia. E na o le talalelei a Iesu Keriso—faatasi ai ma le faatuatua ia te Ia o le mataupu faavae muamua lea—e mafai ai ona tatou fiafia i le “olaga faavavau, o le mea alofa sili lea i lo mea alofa uma a le Atua” (MFF 14:7).

Au faitau

Ou te talitonu o lo tatou faamaoni ia Keriso ma Lana talalelei, o le auala sili lea e faaali atu ai lo tatou alolofa ma le faatuatua ia te Ia. A tatou ola i Ana mataupu faavae ma tulaga faatauaina ma savavali mausali i le ala ua Ia faaali mai ia i tatou, o loo faapea ona tatou molimau atu e le gata ia te Ia ae faapea foi i isi tagata i o tatou olaga. Tatou te molimau atu i lo tatou agaga faafetai mo Lana taulaga mo i tatou faapea foi ma le Toefuataiga o le talalelei.

Jan V., 17, Moravia, Czech Republic

O le i ai o le faatuatua ia Iesu Keriso o lona uiga o le talitonuina atoa o Ia ma mautinoa i lou mafaufau ma lou loto o loo i ai o Ia ma o Ia o lo tatou Faaola. E tatau ona tuu atu lo tatou talitonuga ia Keriso aua Na te silafia le ala e fesoasoani ai ia i tatou e foia ai faigata o o tatou olaga. O le leai o so tatou faatuatua ia te Ia e mafua ai ona tatou popole i lo tatou tulaga faaleagaga ma masalosalo ai i folafolaga a le Atua. O le taulai atu i le Faaola ua fesoasoani ou te tumau mausali ai i le talalelei, taulima ou popolega, ma foia ai ou faafitauli.

Natalia N., 19, Chimborazo, Ekuatoa

Faaali le faatuatua ia Keriso e ala i le usiusitai. E mate lava le faatuatua pe a leai ni galuega. O le usiusitai ae tatou te le iloa pe aisea, e faaali atu ai lo tatou talitonu ma faatuatua ia te Ia. O le usiusitai i poloaiga e iloa ai tatou te faatuatuaina o Ia, ma i ai le faatuatua i mea Na te poloaiina i tatou e fai. O le tatalo ma le faitauina o tusitusiga paia i aso uma e faamalosia ai lau mafutaga ma le Tama Faalelagi, e tuuina mai ai ia te au le faatuatua sili atu ia te Ia. Ma le isi, e tatau ona e faamoemoeina ni tali i au tatalo. Tatalo mo se fesoasoani ina ia [e] maua le faatuatua.

Meghan S., 18, Misuri, ISA

E mafai ona tatou faaali atu le faatuatua e ala i le faatagaina o le Alii e taitaiina o tatou olaga. O le talitonuina o le Atua, mulimuli ia te Ia, ma le galue maelega i le tausiga o poloaiga, e mafai ai ona tatou faaali atu le faatuatua ia te Ia. A uma ona gauai atu o tatou loto i Lona finagalo, e mafai ona tatou molimauina ni vavega maoae i o tatou olaga faapea ma olaga o i latou e siosiomia i tatou.

Dmitriy Z., 21, Donetsk, Ukraine

E tele auala e faaali atu ai lo tatou faatuatua i le Atua, e pei o le faitauina o tusitusiga paia ma tatalo i aso uma, tausia o le aso Sapati ia paia, tuuina atu o sefuluai ma taulaga anapogi, auauna atu i isi, ma ia naunau e tausia isi poloaiga.

Seng S., 18, Battambang, Kemupotia

A tatou talitonu i le fesoasoani ma le mana o le Alii, e mafai ona tatou agai i luma i le talitonuina o Ia. O lo tatou usiusitai i poloaiga e faaalia ai tatou te faatuatua ia te Ia. Ou te iloa ma lo’u loto atoa e finagalo o Ia e tuuina mai ni faamanuiaga silisili ia i tatou, ma o le faatuatua ma le usiusitai e taua mo le mauaina o ia faamanuiaga.

Marco C., 18, Liguria, Italia

A i ai so tatou malamalamaaga e uiga i le talalelei ma i ai le faatuatua i lona moni, e tatau ona tatou faataitai e ola ai ina ia maua ai ia faamanuiaga. E mate le faatuatua pe a leai ni galuega. Afai e i ai le faatuatua i galuega, o le a mausali atili ai pea lava pea le faatuatua. I le 1 Nifae 7:12, ua faamanatu mai ai ia i tatou e tatau ona tatou faamaoni i le Atua. O le faamaoni o le vaega muamua lea o le atiina ae o le faatuatua.

Otgonchimeg B., 15, Töv, Monokolia

E mafai ona tatou faaalia le faatuatua ia Iesu Keriso e ala i le faalagolago atu ma le faatuatuaina atoa o Lona atamai ma Lona mana e le gata mai. O se auala lelei e faia ai lenei mea o le totogiina o le sefuluai, aua o le faia o lea tulaga e faaali atu ai tatou te naunau e lafoai mea a le lalolagi mo faamanuiaga silisili ua folafola mai.

Samantha L., 15, Zamboanga del Sur, Filipaina

E faaali atu lo tatou faatuatua ia Keriso e ala i le o mai i le lotu, faia o a tatou tatalo, faitauina o tusitusiga paia, taliaina o tofiga, salamo i a tatou agasala, aai ma feinu i le faamanatuga, ma le faalauteleina o o tatou valaauga.

Adam N., 18, Georgia, ISA

O tali o loo faamoemoe o se fesoasoani ma ni manatu, ae le o se faasilasilaina atu o ni aoaoga faavae o le Ekalesia.

“Soo se taimi lava e te tofotofoina ai lou faatuatua, o le galue lena ma le agavaa i se musumusuga, o le a e maua ai se molimau faamaonia a le Agaga. O na lagona o le a faamalosia ai lou faatuatua. A e toe faia lena mamanu o le a saga faamalosia lou faatuatua… . O le saga faaaogaina pea o le faatuatua o le a avea lea ma malosiaga susulu, mamana, faagaeetia, ma le musuia i lou olaga.”

Elder Richard G. Scott o le Korama a Aposetolo e Toasefululua, “O Le Mana Fesoasoani o le Faatuatua i Taimi o le Le Mautonu ma Tofotofoga,” Liahona, Me 2003, 76.