O Le Iloa Faitau ma Tusitusi e Alualu ai i Luma Olaga

Ua faasoa mai e ni tagata se toalua o le Au Paia o Aso e Gata Ai le ala na fesoasoani ai le iloa faitau ma tusitusi e suia ai olaga.

I le lalolagi atoa, e faaleleia e tagata o latou lava olaga ma olaga o isi e ala i le aoaoina o tomai faavae o le faitau ma tusitusi.

O Se Fiafia e Aoao

O Shirley Florence Sainz, o le na fanau i Mekisiko, na faamatalaina le tala i le tauiviga a lona tina ina ia iloa faitau ma tusitusi, na avea ma se faamanuiaga i isi:

“I le lua tausaga o lo’u tina o Anita Valenzuela Mendoza, na maliu ai lo’u tamamatua i se faalavelave a o galue o ia i le maina, ma tuua ai lo’u tinamatua ma le la fanau e toavalu ma ni nai mea laiti e tausia ai i latou. Sa le mafai e lo’u tinamatua ona faitau, tusitusi, pe malamalama i fuainumera.

“Ina ua ono tausaga o lo’u tina, sa ia maua le avanoa e alu ai i le aoga e ui ina sa le’i i ai ni ana penitala, pepa, po o ni tusi. Ae ui o lea, sa fiafia lava o ia e aoao, o lea na ia suilimaina ai ni napekini, salu le potuaoga, ma lau atu fafie e avea o se auala e maua ai ni pepa. I le fale, na suiina faatasi ai e lo’u tinamatua ia laupepa o nusipepa e fai ma tamai api mo lo’u tina.

“Sa fiafia faiaoga i le naunautai o lo’u tina. I le le amanaiaina o ona ofu masaesae ma lona ulu veuveua, sa latou faafaileleina ai lona matelaina mo le atamai. I le faaiuga o ona tausaga aoga i le aoga tulagalua, na ofoina mai ai i lo’u tina e le aiga o se tasi o ona faiaoga se avanoa mo le faaauauina o ana aoaoga. Ae peitai, sa le mafai ona alu o ia ma faapea ona faamutaina ai ana aoaoga.

“O tausaga mulimuli ane, ina ua 27 tausaga o lo’u tina, na toe fotua’i mai ai ana aoaoga ina ua feiloai ma lo’u tama ma na ia faailoaina atu o ia i le talalelei. Sa fiafia o ia e aoao e ala i le faitauina o tusitusiga paia. O le Aualofa foi na ia maua ai le tele o avanoa e faateleina ai lona atamai.

“Na totoina e lo’u tina ia te au se fiafia i le aoaoina, ma ua ou faauu mai i le kolisi ma ua avea au ma se faiaoga i le aoga tulagalua. E lua augatupulaga ua matuai faamanuiaina ai lo’u aiga aua, a o laitiiti lo’u tina, sa aoaoina o ia ia iloa faitau ma tusitusi. O ona tomai i le tusitusi ma le faitau na tatalaina ai le faitotoa mo ia e malamalama ma taliaina ai le talalelei a Iesu Keriso. O le taunuuga, ua faamanuiaina uma ai e ua tupuga mai i lo’u tina.”

O Se Vasega o le Talalelei e Aoao ai le Faitau ma le Tusitusi

E le tulaga ese le tala a Sister Sainz. A iloa e tagata ona faitau ma tusitusi, ua mafai ona faatupula’ia lo latou malamalama i le talalelei ma faamanuia ai olaga o isi. O le aoaoina o tomai faavae o le faitau ma tusitusi na fesoasoani ia Paul Imietehe o Nigeria, o se tagata liliu mai i le Ekalesia, e malamalama lelei ai ma faasoa atu le talalelei. Na ia faamatalaina:

“Na ou auai i le Ekalesia a Iesu Keriso o le Au Paia o Aso e Gata Ai i Warri, Nigeria. O lo’u auai i le Ekalesia na ou iloaina ai le manaomia ona iloa faitau ma tusitusi. A tuuina mai e ou taitai perisitua ni tofiga e tuuina atu lauga ma tatalo, ou te le alu i le lotu. Na avea ma pogai o lo’u maasiasi.

“Ina ua ou alu atu i Abuja, na ou vaaia ai tusi ma mekasini a le Ekalesia, ma na ou maua se lagona malosi ina ia ou iloa faitau ma tusitusi. Sa ou manao ia ou iloa faitau nei lomiga na faapea ona faitauina e isi tagata o le ekalesia ma sa latou fiafia i ai. O le toatele o tagata o le Ekalesia iina na faaali mai ma le fiafia o latou lagona, faasoa mai a latou molimau e uiga i le talalelei, ma sa ou manao foi ia mafai ona ou faailoa atu ia lagona malolosi na ou maua e uiga i le moni o le talalelei. Na ou iloaina i lena taimi e tatau ona ou aoao e faitau ma tusitusi.

“O se tasi Aso Sa na ou filifili ai ou te auai i le vasega o le talalelei a le Aoga Sa e aoao ai le faitau ma le tusitusi. O lo’u aso muamua lava i le vasega, na ou vaaia ai o isi tagata aooga na toatele lava o tuafafine ma alii e laiti ifo. Sa na o au lava le alii matua i le vasega. Na faaosoosoina au ou te aluese, ae o le malosi o lo’u manao e aoao na taofia ai au iina. Na faamalosiauina i matou taitoatasi e lo matou faiaoga e auai i faitauga mai le tusi lesona o le talalelei ma mai tusitusiga paia.

“E tele se taumafaiga na ou tuuina i le aoaoina o le faitautusi. Sa ou faitauina tusitusiga paia ma mekasini a le Ekalesia. Na alualu i luma lo’u malamalama ina ua valaauina au o se fesoasoani lua i le au peresitene o le Aoga Sa a le Paranesi o Idu. O le taimi muamua, sa ou le mautonu i o’u tulaga gafatia. Ae a o vaetofiaina au, na saunoa le peresitene o le misiona i se faamanuiaga o le a ou maua le tomai e faalauteleina ai lo’u valaauga. I le taimi o le vaetofiaina, sa ou maua se lagona o le to’a.

“E lua vaiaso mulimuli ane, ae tuuina mai le tofiga ou te faiaoga i le au matutua i le Aoga Sa. E ui ina sa ou popole i ou tulaga gafatia, ou te saunia i le vaiaso atoa pe a ou foi i le fale mai le galuega faapea foi i ou taimi malolo i le galuega. Ina ua oo mai le Aso Sa ma na oo i le taimi e aoao atu ai, sa ou faia se tatalo puupuu le leoa ma ou ole atu ai i le Tama Faalelagi e taitaiina au. Ina ua tatala lo’u gutu e tautala atu, sa ou tei ona sa solo mai upu. Sa ou manatu o le a ou tauto’ai ae leai.

“O le toatele o tagata o le vasega e sili atu le aoaoina nai lo au, ae o a latou tali ma lagona na faaalia i o latou foliga na faamalosiauina ai au. Na ou lagonaina le toafilemu i le taimi atoa o le vasega.

“O le [vasega] o le talalelei e aoao ai le faitau ma le tusitusi na faatupuina ia te au se naunautaiga malosi e faaleleia au aoaoga. Na fesoasoani foi ou te malamalama lelei ai i le talalelei ma mafai ai ona lelei atu la’u auaunaga i isi.

“O la’u galuega o se tagata vane ata ma o loo ou faigaluega i se kamupani faufale, lea ou te faaaogaina ai ou tomai i galuega faakamuta. I totonu o Nigeria, e i ai sa matou muagagana e faapea, ‘E taua tele le to’i tatou te faaaogaina e taina ai laau, lea tatou te uu limaluaina ma amo i o tatou tauau.’ E fai si taua tele o le to’i o lea e le faataatiaina ai i lalo. O ou lagona na e uiga i le Ekalesia ma le vasega o le talalelei e aoao ai le faitau ma le tusitusi. Ou te uu limaluaina ma amo i ou tauau ma e le mafai ona ou tuuina i lalo.

“Ou te faafetai i ou taitai i le paranesi o e na uunaia au e aoao, aemaise lava ia Uso Lawrence Monyei, o lo’u faiaoga o le vasega o le talalelei e aoao ai le faitau ma le tusitusi.”

Na iloa e Uso Imietehe faitau ma tusitusi i lana vasega o le talalelei e aoao ai le faitau ma le tusitusi, o le taunuuga, na tuputupu ae lona lagona mautinoa ma na sili atu le malosi o lana molimau i le talalelei. Ma talu mai lena taimi ua ia faamanuiaina ai olaga o le toatele o tagata o lana paranesi.

Pe Mafai Ona e Fesoasoani Atu?

O le tusi lesona o le vasega o le talalelei e aoao ai le faitau ma le tusitusi, Ye Shall Have My Words (aitema nu. 34476), o loo maua i le Igilisi, faaFarani, faaPotukale, ma le faaSipaniolo. O i latou o e e sili atu le faamanuiaina ai, e le mafai ona latou faitauina ia upu. Pe mafai ona e fesoasoani atu ia i latou?

E MAFAI ONA TATOU FESOASOANI

“E laitiiti se suesuega na ou faia e uiga i le faitau ma tusitusi i le lalolagi. O le piliona mai le [ono] piliona o tagata o le lalolagi e le mafai ona faitau pe tusitusi… . Oka se mala—oka se mala ina a ogaoga, leaga, ma pogisa. O le le mafai ona faitau, malamalama, ma tusitusi—o se matuai mala lava. E mafai ona tatou fesoasoani e aveese lenei malaia. E mafai ona faia ni auala e suia ai lenei tulaga e le taliaina.”

Peresitene Gordon B. Hinckley, Teachings of Gordon B. Hinckley (1997), 314.