Faamatalaga
O Le Savali a le Au Peresitene Sili
O loo fesoasoani le Liahona i le toatele o tagata e faaatoatoaina o latou olaga. E le mafai ona le amanaiaina le Savali a le Au Peresitene Sili e se tagata e manao i se olaga manuia. O le Savali a le Au Peresitene Sili ua matuai fesoasoani ia te au e faatulaga ai lo’u olaga. E ui lava ina le mafai ona faatau mai sau kopi o le Liahona, ae o lomiga ia e mafai ona ou faitauina ua fesoasoani e avea ai au ma se tagata lelei atu.
Abraham Adaranijo, Kanata
O Lea Mataupu ma lea Mataupu
A o avea au ma se tagata fou faatoa papatisoina i le Ekalesia, sa le mafai ona ou malamalama atoatoa i le talalelei, ae o le faitauina o le Liahona, ua mafai ai ona ou malamalama i lea mataupu ma lea mataupu. E musuiaina au e i latou o loo faasoa mai aafiaga o o latou olaga. Faafetai lava mo le lolomiina o tusiga mananaia e lagolagoina ai mataupu faavae o le talalelei.
Federico G. Balut Jr., Filipaina
Auala o Loo Ola Moni Ai Tagata i le Talalelei
O se faamanuiaga maoae ma atoatoa le mauaina o le Liahona i totonu o o tatou aiga ma faletusi, lea e mafai ai ona tatou faitauina i o tatou taimi avanoa ma taimi faaleagaga. Ou te talisapaia ia tusiga matagofie i le auala o loo ola moni ai tagata o lea atunuu ma lea atunuu i le talalelei. O lenei mea ua fusia ai i tatou. Ua faamalosiauina ai le toatele o i tatou ina ia aua le matatau, ma faamautinoaina foi i tatou e le o tuua na o i tatou.
Elsie Castillo, Ekuatoa
Uunaia e Toe Foi Mai
A o ou laitiiti, na ou le toe toaga i le Ekalesia, peitai o le avea ma se tupulaga talavou na ou toe mafaufau ai e toe foi mai. Ao le’i faia lenei filifiliga taua, na ou tatalo ma mafaufau loloto i le uiga o le toe foi mai i le Ekalesia ma matafaioi o le a aumaia ai.
O le taimi lena na ou filifili ai e faitau nisi o lomiga tuai o le Liahona. Na ou faitau e sue ni tala o le a faapea ona uunaia ai au ma faamalosia ai lo’u manao e toe foi mai i le lotu.
E ala i le faitauina o tusiga e uiga i tagata o e na i ai aafiaga e talitutusa ma au, na ou maua ai le tele o faamalosiauga. Ae maise lava, o tusiga na fesoasoani ou te malamalama ai e leai se tagata o le lotu e atoatoa ma e i ai foi ou sese ma e tatau ona ou faia se mea e faasaoina ai.
O lenei ua ou toe foi mai i le lotu. Ua ou iloaina o sauniga lava nei e pei ona i ai i aso la, ae o le taimi nei ua i ai sa’u vaaiga e sili atu ona mautinoa, o se vaega ona o manatu na ou maua i le Liahona e faatatau i auala e fiafia ai i vasega ma sauniga faamanatuga.
O taimi uma ou te faitau ai i le Liahona, ou te lagona le faamalieina pe a ou mauaina tali i au fesili.
María Pilar Santana, Dominican Republic
O Saunoaga a o Lo Tatou Perofeta Pele
Ou te fia faafetai atu mo le auina mai e le aunoa o le Liahona ia te au. O lenei ua 93 ou tausaga. Talu mai le aso na ou papatiso ma faamauina ai, ua ou mauaina ai lava le mekasini. Sa laitiiti muamua ae e manaia lava i taimi uma. Ou te fiafia i mea uma o loo i le mekasini; ae peitai, e faapitoa lo’u fiafia i saunoaga a lo tatou perofeta pele. E matagofie le faalogo faalua ia te ia i le tausaga i taimi o konafesi aoao.
Lydia Dominguez, ISA