O Se Molimau e uiga i Perofeta
O le 12 o o’u tausaga, sa ou faailoaina atu ai faifeautalai i lo’u aiga. Sa ou fetaui ia i laua i le auala, ma sa la talanoa fiafia mai ia te au. Sa la fesoasoani i le Ekalesia i le fausiaina o se falesa i totonu o le matou nuu i Pasila, ma sa la valaauliaina au e fesoasoani atu ia i laua, ma o lea na amata ai ona ou fesoasoani atu ai i o’u taimi avanoa. Ou te le’i faalogo lava i ni alii talavou o filifili e faaalu lo laua taimi i le fauina o se falesa.
Sa matuai ou lagona le faagaeetia ia te i laua, o lea na ou filifili ai e faailoa atu i laua i o’u matua, ma o lea na matou valaauliaina ai i laua e o mai i le matou fale. Na fai e faifeautalai le lesona muamua a lo matou aiga. Matou te le ulaula, ma o lea na tausia lava e lo matou aiga le vaega lena o le Upu o le Poto, ma na fai a matou afiafi faaleaiga i po uma i le matou aiga. Matou te le’i tauina o le afiafi faaleaiga, ae o le mea lena na matou faia. Sa matou [lolotu] Katoliko, ma na masani ona matou o i le matou lotu, o lea na tau atu ai e lo’u tama ia i laua sa matou fiafia lava i le matou ekalesia.
Na malaga ese atu faifeautalai, ae na laua tusia lo matou aiga i le tusi o le eria a faifeautalai lea na tuu ai lava i le fale o faifeautalai, e aofia ai ma o la lagona o le a matou auai i le Ekalesia.
Aoao e uiga i Aiga e Faavavau
O le sefulu tausaga mulimuli ane, sa ou nofo ai i se isi nuu, ae taunuu atu faifeautalai fou i le eria o loo nonofo ai lo’u aiga. E leai ma se tagata e toatasi na la maua e aoaoina o lea na la filifili ai e vaai i le tusi o le eria. Na la maua le igoa o o’u matua ma tonu ai e asiasi atu i ai. Na tatalo muamua faifeautalai ae la te le’i o atu, ma na musuia i laua e le Alii. E ui lava ina sa avea lo’u tama ma se tagata faamaoni o lana ekalesia, ae na i ai sana fesili. Sa le’i talitonu o ia e le mafai ona avea pea lana ava ma ona toalua pe a mavae le oti. Sa ia matuai lagonaina e tatau lava ona faaauau sootaga faaleaiga pe a mavae le oti. Sa fesili foi o ia i faifeau mai ekalesia eseese e uiga i lenei mea, ae na tau atu e tagata uma ia te ia, “E leai, a mavae le oti, o le a avea lau ava e pei o sou tuafafine, ae o lou atalii o le a pei o sou uso.”
Ina ua tuitui atu faifeautalai i le faitotoa o o’u matua, na tatalaina e lo’u tama ma tau atu ia i laua, ua uma ona faalogo muamua i le la savali ma sa le manao i ai. Ae na faapea atu faifeautalai, “O loo ia i maua se isi savali mo oe. E te silafia e mafai ona faatasi lou aiga e faavavau?” O na upu na musuia ai o ia. Na valaaulia i laua e lo’u tama e susu mai i totonu ma aoaoina o ia. I le taitaiina ai e le Agaga, na tau atu ai e faifeautalai i lo’u aiga e uiga i le faaipoipoga e faavavau ma aiga e faavavau. Faatasi ai ma lenei faailoaina atu i le talalelei, na faaauau ai ona feiloai lo’u aiga ma faifeautalai seia oo ina latou maua se molimau ma filifili ai ina ia papatisoina ma faamauina.
Mauaina o Lau Molimau
O le lima tausaga mulimuli ane—o le 27 lena o o’u tausaga—na ou toe foi mai ai i le fale o lo’u tama mo se taimi. Na avea lo’u tama ma taitai misiona a le uarota, ma na aoaoina e tamaitai faifeautalai se isi tagata i totonu o le matou fale. Na ou faalogo atu o la aoao atu e uiga i le Tusi a Mamona ma Iosefa Samita, o lea na ou filifili ai e tatalo e uiga i ai. I lo’u mafaufau, na foliga e sa’o pe afai o Iosefa Samita o se perofeta, o lona uiga foi e moni le Tusi a Mamona ma e moni foi le Ekalesia.
O le po lena na amata ai ona ou faitauina le talafaasolopito a Iosefa Samita ma lana faaaliga i le Vao Paia. Ona ou tuua lea o le faitauga, ae ou tatalo atu i le Alii. Na ou faaaluina le po atoa i lenei faiga, o le faitau ma tatalo e uiga i parakalafa taitasi. E 14 itula na ou faia ai. Na tupu se mea ia te au ina ua amata ona ou mafaufau loloto. Na pei na ou i ai i le togavao faatasi ma Iosefa. O se aafiaga na sili ona manino ma moni. Na pei lava na mafai ona ou vaaia le mea na tupu. Ina ua uma la’u tatalo i le taeao na sosoo ai, sa ou iloaina o Iosefa Samita o se perofeta.
Sa ou faataalise atu loa e sue faifeautalai. I le aoauli, ina ua o mai faifeautalai i le fale mo le taumafataga o le aoauli, sa ou saofai i luma o le la faitotoa e faatalitali i laua. Na ou fai atu ia i laua e fai a’u lesona. Ina ua uma ona laua aoaoina au i lesona e fitu i se taimi puupuu, na papatisoina ma faamauina ai loa au i totonu o le Ekalesia.
O Le Mulimuli i le Perofeta
Pe a ma le tasi le masina talu ona ou auai i le Ekalesia, ae ou feiloai loa i le ua avea ma o’u toalua o Magareth, ma e tasi le tausaga mulimuli ane, ae o ma faaipoipo. A o ma tafafao faamasani, na ou tau atu ia te ia, talu ai ona ua ou iloa o Iosefa Samita o se perofeta, ou te manao ai ina ia fausia lo ma aiga i luga o tuleiga ma aoaoga a perofeta. Mo se faataitaiga, o Peresitene Spencer W. Kimball (1895–1985) na avea ma perofeta i le taimi lena, ma na ia fautuaina tagata o le Ekalesia ina ia aloese mai le nonofo aitalafu. Ua lata i le 29 tausaga o le ma faaipoipoga, ae ma te le’i totogiina lava ma lou toalua se pene se tasi o se tupe tului. E leai lava.
Talu mai ona maua [la’u] molimau e uiga ia Iosefa Samita, ua ou gauai atu ma le totoa i saunoaga taitasi a le Au Peresitene Sili faapea le Au Aposetolo e Toasefululua, ma ou te mulimuli ai i mea ua latou aoaoina mai. Ona ua ou iloa o Iosefa Samita o se perofeta, ua le faigata ai ia te au ona ou mulimuli i le Usoga. E mafai ona latou saunoa mai ia te au e faia soo se mea, ma o le a ou faia aua ua ou iloa o i latou o perofeta, tagatavaai, ma talifaaaliga.
Afai e te galue ina ia e maua se molimau e uiga i perofeta, o le a e maua le malosi sili atu. O le tasi lena o ki i le fiafia. A e faalogo i perofeta ma e faia mea ua latou fautuaina oe e fai, o le a e fiafia i le usitaia o i latou.