Tumau e oo i le Amataga
E fitu tausaga na alu ai, ae na aoga lava le faatalitali.
“O ai e faiaoga?” na ou fesili ai i la’u uo a o ma savavali i le alatele i le taeao o se Aso Toonai o Fepuari 2000. O le taimi lena a o tai 14 o ma tausaga.
“O i latou o au uo ma o loo iinei i se mea e pei o se misiona,” o lana tala lea. Ma te le’i talanoa muamua lava i mea tau lotu, e ui o i maua o se uo mamae lava. Na fai mai o ia, o le a ma o i vasega Igilisi na faiaoga fua ai ana uo. Na ia iloaina o le a ou fiafia i ai aua o loo ou alu i se aoga maualuga e faaIgilisi.
Ina ua ma ulu atu i le falelotu, na ou faataupupula atu i ata na i luga o le puipui. O se lotu ea le mea nei? Sa le foliga o se Lotu Masani i Palekeria, na pau lea o le lotu na ou asiasi muamua i ai. Na manatu le toatele o tagata Palekeria o soo se isi lava lotu o se faalapotopotoga pepelo. Ma le isi, a o i ai Palekeria i faiga faakomunisi seia oo i le 1989, na faasaina ai talitonuga faalelotu, ma o le toatele lava o tagata e vaai atu pea i tapuaiga o se mea e le sao.
Na fesili mai la’u uo pe ou te fia sau i le lotu i le aso na sosoo ai. Na ou tali atu ioe, e mafua ona o le fia iloa nai lo le faamaoni i mea tau lotu. Na ou iloaina afai na alu o ia i le lotu, ailoga la e i ai se mea e leaga ai.
Na amata ona ou alu soo i le lotu. Na ou fia iloa atili e uiga i ona aoaoga. Na ou fia iloa pe aisea na tuua ai e na tagata talavou ma pine o o latou igoa ia o latou atunuu ae o mai i Palekeria ma siomia i latou lava i le siosiomaga saua faalelotu iinei. E ui ina e le’i avea au o se tagata lotu i lena taimi, ae na i ai se mea na mafua ai ona ou saga alu pea i gaoioiga a le Ekalesia. Na ou fiafia i le agaga faauo o faifeautalai ma le laumata ataata o tagata o le ekalesia.
Na amata ona ou faauo i tamaitai talavou o le paranesi. Na ou maofa i lo latou faatuatua ma le fiafia tele e auauna atu i isi. Ou te manatua le taimi muamua na ou tatalo ai i le vasega a Tamaitai Talavou. Ou te le’i tatalo lava muamua, ma ou te le’i iloaina le malosi e mafai ona oo i ai le tatalo. Ou te le’i lagonaina le sootaga malosi ma lo tatou Tama Faalelagi lea e aumaia e se tatalo. Ou te le’i iloaina o au o Lona afafine. E le’i toe taofia lava lo’u tatalo talu mai lena taimi. Soo se taimi lava e tatau ai ona ou faatoilaloina se faafitauli, na ou iloaina e mafai ona ou ole atu i lo’u Tama Faalelagi mo le taitaiga. O na tatalo, e masani ona maligi ai o’u loimata aua na mafai ona ou lagonaina le faamautinoaga a le Agaga Paia e alofa le Atua ia te au. Na amata ona ou faatuatuaina le Alii.
Ina ua oo mai faaosoosoga o le avea ma se tupulaga talavou, ua mausali lo’u faatuatua ia Iesu Keriso, lea na aumaia ai ia te au le malosi e faatoilalo ai nei faaosoosoga. Na mafai ona ou iloa auala na faaosoosoina ai e Satani la’u tupulaga i mea a le lalolagi ma auala na avea ai le gauai atu i faaosoosoga laiti ma mea na oo atu ai i faaosoosoga tetele. Na faigata ona ou tu atu mo o’u tulaga faatauaina, ae o le ma sootaga ma lo’u Tama o i le Lagi e ala i le tatalo na fesoasoani ou te aloese ai mai faaosoosoga. Na ou filifili ou te ola i mataupu faavae o le ata o le faaolataga. Na ou iloaina e aunoa ma se masalosalo e i ai se aso o le a faamanuiaina ai au.
O le mea e faanoanoa ai, na le mafai ona ou auai i le Ekalesia i lena taimi. Na tetee malosi o’u matua, aemaise lava o lo’u tama. Ae na ou malamalama lava ia te ia. Sa le’i aveina lava o ia e ona matua i se lotu; na ola ae o ia i le taimi na i ai le atunuu i taitaiga faakomunisi. Ae ui i lea, na ou iloaina na saunia e le Alii se auala mo au ou te auai ai i le Ekalesia i se aso. Na uma ona ou iloaina o lena auala o le a matuai faigata lava. Ae na ou aoao mai tusitusiga paia o tofotofoga e mafai ona avea ma o tatou lelei.
Na ou alu i le seminare ma mulimuli ane i le inisitituti, na ou auai i gaoioiga a le Ekalesia, ma na faapea foi ona ou amatalia la’u lava Tusi Alualu i Luma o le Tagata Lava Ia. Na le mafai ona tatali lo’u fia alu i gaoioiga a Tamaitai Talavou. O le a le galo lava ia te au le tele o itula na matou faaaluina i le faiga o kuka, faiga o kata po o faailoga tusi, teuteuina o le matou potuaoga, po o le taaalo i taaloga, faapea ai ma le agaga matagofie o le faauo ia i matou. O gaoioiga taitasi na fesoasoani ou te malamalama ai i lo’u tulaga paia ma la’u matafaioi i le olaga.
O se tasi o gaoioiga faatino o le Alualu i Luma o le Tagata Lava Ia na sili ona faigata o le taulotoina “O Le Keriso Soifua.”1 Ina ua ou tilotilo i le tusiga, na ou manatu o se luitau tele le taulotoina. Ina ua mavae ni vaiaso se lua, na ou iloa ai le mafuaaga na i ai lena galuega faatino i le tulaga faatauaina o le Faatuatua. Na avea ma se tofotofoga o le faatuatua ma le onosai, o se tofotofoga ma ni taunuuga faamanuiaina. O le molimau a le au Aposetolo na fesoasoani e faamalosia ai lo’u faatuatua ma la’u molimau. O le manatuaina o a latou saunoaga musuia e uiga i le soifuaga ma le galuega paia a Keriso, na ou maua ai e au lava le lototele e molimau atu ai e uiga ia te Ia.
Ina ua pe tusa ma le 16 o’u tausaga, na faia ai sa matou gaoioiga e faatatau i le avea ma se faifeautalai faamisiona. Na matou vaevae taitoalua ma ola e pei o faifeautalai mo se vaiaso. O le taimi muamua lena na ou iloa ai le taua o le faasoa atu o a tatou molimau i isi. O lenei gaoioiga na fesoasoani ou te iloa ai e le gata i le faigata ona auauna i le Alii, ae faapea foi le fiafia tatou te lagonaina e ala i le faasoa atu o le talalelei ma le vaaia o suia le olaga o se tasi e aoaoga a Keriso. Na fesoasoani ou te malamalama ai pe faapeī le “laulaututu e fai ma molimau a le Atua i aso uma, ma mea uma, atoa ma nuu uma” (Mosaea 18:9).
I le avea ai ma se “tagata toaga e le’i lotu,” e pei ona valaau ai au e tagata uma, na ou aoao ia onosai ma faamoemoe o le a i ai se aso o le a avea ai au ma se tagata o le Ekalesia. Na ou iloaina o se tofotofoga lea o lo’u faatuatua ma lo’u onosai. Na ou mafaufau pe o le a le umi e manaomia ina ia faamamaina ma amata ai se olaga fou.
Na oo mai lena aso i le toeitiiti atoa le fitu o tausaga talu ona ave atu au e la’u uo i le lotu i lena taeao malulu o Fepuari 2000. Na papatisoina au i le 21 o o’u tausaga i le ofisa o le misiona i Sofia. O le aso o lo’u papatisoga o se tasi lea o aso aupito sili ona fiafia o lo’u olaga. O le taimi lena, na ou lagonaina ai le maoae o le alofa faaola o le Tama Faalelagi mo au. Na atili ona ou lagonaina lena lagona ina ua ou ai i le faamanatuga i le aso na sosoo ai. Na le mafai ona taofiofi o’u loimata. O le Agaga na mu i totonu ia te au na tau mai ai na aoga lava le faatalitali. Na iu ina mafai ona ou olioli i le meaalofa o le Agaga Paia ma isi faamanuiaga o le avea ma se tagata o le Ekalesia.
Ou te faafetai ona o le faamanuiaina o au i le malamalama o le talalelei toefuataiina. Ou te iloa e mafai ona tatou faatoilaloina tofotofoga o le olaga e ala i le faatuatua ma le onosai. E leai se isi o tatou faamanuiaga tauia e sili atu ona maoae ma tele nai lo le avea ma se tagata o le Ekalesia moni e tasi i luga o le fogaeleele. E leai se mea e sili atu ona aumaia ai le fiafia tele nai lo le malamalama ua tatou maua i le avea ai o ni tagata agavaa o le Ekalesia, e mafai ona tatou toe mafuta faatasi ma le Atua.