Savali a Faiaoga Asiasi

Avea ma se Tufugaaao o le Atua e ala i le Saunia mo le Afio Mai Faalua o lo Tatou Alii

Filifili ma faitau ma le agaga tatalo mai lenei savali ni mau ma aoaoga e fetaui ma tulaga o loo manaomia e uso o loo e asia. Fetufaai atu i ai ou aafiaga ma molimau. Valaaulia foi i latou o loo e aoaoina ia faapena foi ona fai.

E Faapefea Ona Ou Saunia mo le Afio Mai Faalua o Iesu Keriso?

MFF 38:30:“Afai ua saunia outou o le a outou le matatau ai lava.”

Elder Dallin H. Oaks o le Korama a Aposetolo e Toasefululua: “E fa mataupu e matua mautinoa lava e le Au Paia o Aso e Gata Ai: (1) O le a toe foi mai le Faaola i le fogaeleele i le mana ma le mamalu tele, e nofo tupu ai i le meleniuma o le amiotonu ma le filemu. (2) I le taimi o Lona afio mai, o le a i ai se faatafunaga o e amioleaga ma se toetutu o e amiotonu. (3) E leai se tasi na te iloa le taimi o Lona afio mai, peitai (4) ua aoaoina le au faatuatua ina ia suesue i faailoga [o le Afio Mai Faalua] ma sauniuni i ai… . E ao ina tatou taufai faia sauniuniga faaletino ma le faaleagaga, mo mea ua valoia i le taimi o le Afio Mai Faalua” (“Sauniuniga mo le Afio Mai Faalua,” Liahona, Me 2004, 7, 9).

Kathleen H. Hughes, sa avea talu ai ma fesoasoani muamua i le au peresitene aoao o le Aualofa: “‘O loo oulua faataatia le faavae o le galuega tele. O mea iti foi e tutupu mai ai mea tetele’ (MFF 64:[33]; ua faatusilima mea e faamamafa)… . O galuega lelei o loo tatou mananao e fai o le a tutupu mai ‘mea iti.’ O se tasi o na mea iti, na ou aoaoina, o le tatau lea ona ou sailia le taimi e faatumuina ai lo’u olaga faaleagaga i aso taitasi”(“O Mea Iti Foi,” Liahona, Nov. 2004, 109).

Elder Robert D. Hales o le Korama a Aposetolo e Toasefululua: “E finagalo le Alii ina ia pei lo tatou faamaoni, lo tatou naunau, lo tatou lototetele, o i latou o e na muamua atu ia i tatou. Na valaauina i latou e tuuina atu o latou ola mo le talalelei. Ua valaauina i tatou ina ia ola i o tatou olaga mo le faamoemoe lava lea e tasi… . O tisipenisione uma na saunia ai le ala mo le afio mai muamua o le Alii ma Lana Togiola. E faapena foi, o le talafaasolopito ma valoaga na faataatia ai le faavae mo le Toefuataiga o le talalelei e ala mai i le Perofeta o Iosefa Samita. Pe o i ai ni o tatou mata e vaai ai, o mea na tutupu ma valoaga mo o tatou taimi, o loo sauniuni ai i tatou mo le Afio Mai Faalua o le Faaola?” (“Sauniuniga mo le Toefuataiga ma le Afio Mai Faalua: ‘E i Ou Luga Ai Pea Lo’u Lima,’” Liahona, Nov. 2005, 91–92).

E Mafai Faapefea Ona Avea Au ma se Tufugaaao o le Atua i le Fesoasoani Atu i Isi ina ia Saunia?

MFF 34:6: “Ia sii ae lou leo … ma ia alaga atu le salamo … , saunia le ala o le Alii mo lona afio mai faalua.”

Peresitene Spencer W. Kimball (1895–1985): “Ina ia avea ma se tamaitai amiotonu i le vaitau o mea mulimuli e tutupu i lenei lalolagi, a o lumanai le afio mai faalua o lo tatou Faaola, o se valaauga e faapitoa le paia. O le malosiaga ma aafiaga o se tamaitai amiotonu i aso nei e mafai ona faasefuluina le mea e mafai ona oo i ai i taimi e sili atu ona lagilelei. Ua tuuina mai o ia iinei ina ia fesoasoani e faatamaoaiga, e puipui, ma ia malupuipuia le aiga—o le faalapotopotoga autu lea ma le aupito sili ona paia i le lalolagi. O isi faalapotopotoga i le lalolagi e ono le mautu ma iu lava ina toilalo, ae o tamaitai amiotonu e mafai ona fesoasoani e laveai le aiga, lea e ono avea ma sulufaiga mulimuli ma na o le pau foi lea, e iloa e nisi tagata i le totonugalemu o faigata ma faafitauli” (“Privileges and Responsibilities of Sisters,” Ensign, Nov. 1978, 103).