Ua Saunoa Atu Elder Hafen i le Konekaresi mo le Aiga

Na saunoa le Susuga a Elder Bruce C. Hafen o le Au Fitugafulu i sui auai mai le lalolagi i le taua o le toefuataiina o le uiga o le faaipoipoga. O lana saunoaga sa faia i le Konekaresi Lona IV a le Lalolagi mo Aiga na faia i Warsaw, Polani, mai le aso 11 e oo i le 13 o Me, 2007.

I le talafaasolopito o le lalolagi e i ai lava se “tala o le alofa aoao” lea e feiloai ai se teine ma se tama, ua ulu le alofa, ona faaipoipo lea, na saunoa ai Elder Hafen. O le noataga o le faaipoipoga e le faapea e aafia ai na o le ulugalii e tasi, ae o le lalolagi i lona atoaga e i ai sona naunautaiga sili i le manuia o lena sootaga.

“O le mafuaaga lena e sami ai e malo valaaulia ma uo ia faaipoipoga o ni faatasiga lautele,” na saunoa ai Elder Hafen. “O le faaipoipoga o le nonoa taua lea o le ie lea e taofiofia faatasi ai le aiga tagata. O faaipoipoga uma taitasi e aafia ai i latou o loo i totonu o li’o eseese o aafiaga lea e galugalu atu mai le ulugalii, e oo atu i a la fanau seia oo atu lava i le lautele… .

“E auai le nuu i faaipoipoga e le ina ia tuufesilisili ai i ni mataupu patino, ae ona o le tele o lona sao i le taunuuga ma fanau a faaipoipoga taitasi. O le faaipoipo atu o le faia lea o se tautinoga faalauaitele e faapea ua taliaina e se tasi ia tiutetauave faaletagata mo fanau a se tasi ma lo latou aafiaga i le ituaiga nuu tatou te fatuina i lea taimi ma lea taimi,” na ia faamalamalama mai ai.

O nei faamoemoega masani ma faaletagata e avea ai le faaipoipoga ma pogai autu o le feaveaiina atu o tulaga taua mai le isi augatupulaga i le isi, na ia saunoa ai. Ae peitai o lenei faapogai taua o le umi ona mautu o le lalolagi, ua faiifo.

E silia ma le 80 pasene o tagata Europa ma le 46 pasene o tagata Amerika ua malilie e taliaina le nonofo faatasi o se ulugalii e aunoa ma le faamoemoe e faaipoipo, na saunoa ai Elder Hafen. I Scandinavia lava ia e tusa ma le 82 pasene o ulumatua e fananau i fafo atu o le faaipoipoga—e ui i le anoanoai o sailiiliga o loo faaalia ai le tulaga matautia faalemafaufau ma isi tulaga o loo feagai ma tamaiti o loo nonofo faatasi. O loo i ai taunuuga ogaoga faalauaitele o nei ituaiga suiga.

E faaopoopo atu i ai, o le siisii i luga o le tatalaina o faaipoipoga talu mai le 1960 i le Iunaite Setete—lea ua avea nei ma atunuu i le lalolagi ua sili ona taatele ai le tatalaina o faaipoipoga—ua sili atu ma le faaluaina, o lona uiga o le afa o faaipoipoga i le taimi nei o le a taunuu atu i le tetea. Semanu e maualuga atu le fuainumera pe ana fai e aofia ai ma ulugalii o loo nonofo faatasi ae le’i faaipoipoina, o lo latou aofaiga ua faateleina i le 760 pasene i le Iunaite Setete talu mai le 1960.

“E mafai ona tatou vaaia le malosi o se tetee i le faaipoipoga i na faamaumauga lea o loo faaalia ai le saoasaoa o pepe e fananau i ni matua e le’i faaipoipoina, faapouliuli, ma faaipoipoga ua tatala,” na saunoa ai Elder Hafen. “I le 40 tausaga ua mavae e toatele tagata … ua le toe talitonu faapea o le faaipoipoga o se fegalegaleaiga faalauaitele e umi… . Ua misia e tagata i aso nei le ‘aano’ o le tala o le alofa aoao.”

O le faaitiitia o faaipoipoga e masani ai na amataina i le taimi o le sailia o aia tatau faaletagata i le vaitau o le 1960. Na moomia ona faia ni suiga i le faailoga lanu ma le faailoga tagata i Amerika, na saunoa ai Elder Hafen. Ae peitai, o nisi o tagata faatautee sa mamao tele le mea na latou oo i ai ma luitauina ia tulafono ma aganuu lea e lagolagoina ai sootaga faaleaiga. A o faatuputupulaia le faateleina o le “saolotoga,” sa faatagaina e faamasino ia tagi o le saolotoga o le tagata matua ina ia sili atu nai lo mea e sili ona fiafia i ai fanau.

“Sa ou vaaia i se tasi taimi se tamaitiiti o tutu na o ia, e foliga mai ua leiloa ma fefe,” na saunoa ai Elder Hafen. “Sa ia ofuina se mitiafu tele o loo tusia ai le faaupuga, ‘Tuua na o a’u.’ O loo ia … aumaia ai se faataitaiga o le faamatalaga faaulaula o le faatagaina lea o ni tagata matutua le faatuatuaina ina ia lafoaia fanau i le latou ‘aia tatau ina ia tuua toatasi’ ona o le faaupuga ia faasaoloto tagata uma o se sosaiete [lea latou te fai mai] o loo noatia i sootaga faaleaiga.”

O loo faaalia foi i sailiiliga e faapea o le leai o ni matua e faaipoipoina o le faapogai masani lea o le toatele o talavou faafitauli, e faatusatusa atu i ulugalii faaipoipo, ae o ulugalii faapouliuli e sili atu le malamalama i le faanoanoa, faafitauli o le ava malosi ma fualaau oona, o le le faamaoni, maualalo o tupe maua, ma le le fiafia, e faapena foi ona faaluaina pe faatoluina le tele o le fasi tagata, na faamalamalama atu ai e Elder Hafen.

Na saunoa foi Elder Hafen i le mataupu matuia o le faaipoipoga a le itupa tutusa. I le sefululima tausaga talu ai e leai se atunuu i le lalolagi sa matuai amanaiaina le faaipoipoga a le itupa tutusa e pei ona i ai nei. O manatu faalefaamasinoga o loo lagolagoina ia faaipoipoga a itupa tutusa e faavae mai le manatu o le saolotoga o le tagata lava ia ma lana faitalia, ae le o tulaga taua o le faaipoipoga, na ia saunoa ai.

“O loo tuuina mai ai la se faafinauga i le faaipoipoga a se alii ma se alii se fesili tuusao: pe tatau ea i le faaipoipoga ona na o se faamaoniga o se filifiliga patino a se tagata matua, po o se faatulagaga o loo i ai le faamoemoega lautele o le faalauteleina lea o naunautaiga o fanau ma le sosaiete e faapea foi i naunauga o le ulugalii?” na saunoa ai Elder Hafen.

Na faaiuina e Elder Hafen i le tauaofaiina lea o mea “lelei” e fa o loo tuuina mai i se faaipoipoga e masani ai: muamua, o manaoga ma aia tatau a fanau o le a sili atu ona manuia le ausiaina; lona lua, o tulaga mama faalemalo o le a aoaoina ma tuufaasolo atu i le isi augatupulaga; lona tolu, e filifili e matua po o a tulaga taua e tatau ona aoaoina ai fanau; ma lona fa, o faamoemoega sili ona mautu i sootaga faaletagata o le a mafai ai.

“O lo’u naunautaiga ina ia faaipoipo, e pei o lo’u naunautaiga ia maua se tamaitiiti, e ta’u atu ai i lo’u aiga ma le lalolagi ua ou matuai tuuto atu i nei sootaga i le umi e mafai ona i ai,” o le saunoaga lea a Elder Hafen. “E mafai foi e lo’u toalua ma la’u fanau ona tuuto i latou lava e aunoa ma le masalosalo pe aoga le latou taumafaiga.”