E Manatua Ai: O Se Faaopoopoga i le Liahona
Peresitene James E. Faust
Leoleo Mamoe Pele
31 IULAI, 1920–10 AOKUSO, 2007
E manatua pea e James E. Faust le faatetetete o le tagi a lana tamai mamoe matafefe. A o laitiiti o ia sa galo ona ia tuuina lana fagafao i totonu o le pa i se tasi o po na agi atu ai se afā.
“Na ou iloa sa tatau ona ou fesoasoani i la’u fagafao, ae sa ou manao ia ou saogalemu, mafanafana, ma mago ai pea i luga o lo’u moega. Ou te le’i tu i luga e pei ona sa tatau ai ona ou faia,” na ia toe manatuaina ai i se sauniga a le perisitua i le konafesi aoao. “O le taeao na sosoo ai na ou mauaina ai la’u tamai mamoe ua mate. Na lagona foi e se taifau lana tagi ma sa alu atu ma faaumatia o ia.”
“Sa momomo lo’u loto,” o lana tala lea. Sa ia iloaina e le’i avea o ia ma se leoleo mamoe lelei. Ae sa sili atu ona tiga o ia i le aoaiga alofa a lona tama: “Atalii, pe le mafai ea ona ou faatuatuaina oe i le tausiga o se tamai mamoe e tasi?”1
O lena aso na faia ai le faaiuga a James o le a ia taumafai i le mea sili e aua ne’i toe le amanaiaina lana matafaioi pe afai ae toe maua se avanoa e avea ai ma se leoleo mamoe. I le avea ai ma se faifeautalai faamisiona i Pasila, o se tane ma se tama naunautai, o se loia faamanuiaina, o se taitai o faiga faaupufai, o se sui o le Korama a Aposetolo e Toasefululua, ma le Fesoasoani Lua i le Au Peresitene Sili, sa ia manatuaina lana faaiuga. I le faaiuga o lana auaunaga, lea na faamutaina i le aso 10 o Aokuso, 2007, ina ua tuumalo o ia ona o le matua o lona soifua, sa tumau pea le tuuto o Peresitene Faust i le apoapoaiga a le Alii: “Ia fafaga i a’u tamai mamoe” (Ioane 21:15).
Aiga ma le Faatuatua
Na soifua mai James Esdras Faust i Delta, Iutā, i le aso 31 o Iulai, 1920, o se tasi o atalii e toalima o George A. ma Amy Finlinson Faust. Na siitia atu mulimuli ane le aiga i le Aai o Sate Leki, lea sa galue ai George o se loia ma se faamasino i le faamasinoga faaitumalo. I le fale ma faatoaga a ona matua matutua i le ogatotonu o Iutā, sa ‘ae’ae ai le taulealea o James i le alofa ma le lagolago a se aiga e tutotonu ia Keriso ma faaleleia ai uiga taua o le faamaoni, galue malosi, ma le auauna atu.
“E leai se tagata na ia maua se tama e sili atu ona lelei nai lo a’u,”2 o lana saunoaga lea. Na te manatuaina lona tina, “E loloto lona faaleagaga, o se tamaitai paia o lē sa faataitaia atoatoa le olaga faaKeriso.”3
I le avea ai ma se tagata matua sa tauivi ai Peresitene Faust e faamamalu ma faataitai i ona matua, i le ave pea lea o le faamuamua i le aiga ma le Ekalesia. “E leai se isi tiutetauave e sili atu nai lo le avea ma se tane ma se tama,”4 sa ia aoao atu ai. I le Ekalesia ma lana misiona, na ia faailoa mai, “E leai se mea i le lalolagi e faatusatusa i lenei galuega.”5
Ina ua maea le aoga maualuga, lea sa matuai tulagaese ai lava o ia i le lakapi faaAmerika ma le tuuga tamoe, sa valaauina loa o ia e auauna atu i le Misiona a Pasila mai le 1939 i le 1942. A o i ai o ia i Pasila, sa tupu lona alofa mo fanau a le Atua ma lo latou soifua manuia. “Na ou fanau mai e tau le mafai ona ou iloa se eseesega o lanu,” o lana saunoaga lea. “Sa ou aoao e alofa atu i tagata uma i atunuu sa avea ai a’u ma se faifeautalai, fitafita, po o se Pulega Aoao, e tusa lava po o le a le lanu o o latou pa’u. Ou te faamoemoe ia avea ma se soo … aemaise lava mo e lotomaualalalo, o e lotonutimomoia, o e matitiva, o e mafatia, o e le tagolima, ma e matitiva i la le agaga. Ua ou malamalama afai tatou te faagalo ia i latou nei, e le mafai ona avea i tatou ma ni soo [o le Alii].”6
I le ono vaiaso talu ona taliu mai lana misiona, sa auai atu loa ia Peresitene Faust i le U.S. Army Air Corps (Fitafita i le Ea a le Ami a le Iunaite Setete). A o faimalologa mai i le 1943, sa faaipoipo atu o ia i a Ruth Wright, o lē sa ia masani i ai talu mai le aoga maualuga, i totonu o le Malumalu o Sate Leki. A o toesea i le taimi o le taua Lona II o le Lalolagi, sa ia tusiaina atu se tusi ia te ia i aso uma taitasi.7 I fegalegaleaiga a Faust, na saunoa ai Elder Joseph B. Wirthlin o le Korama a Aposetolo e Toasefululua, “O le la mafutaga o se faataitaiga sili lea o se faaipoipoga matagofie.”8
O lona tuuto ia Ruth ma le la fanau e 5, o le fanau a le la fanau e 25, ma fanau a fanau a le la fanau e 27 ma lona lagolago e le faavaivai mo ia sa matuai iloga lava ia i latou uma o e iloaina i laua.
“Ma lo’u loto atoa ou te manao ia iloa e la’u fanau e le mafai ona faamanuiaina a’u i lenei valaauga seiloga ou te faamanuiaina i le avea ai ma o latou tama, ma o le a faatumutumuina pea i latou i lo’u olaga,”9 na ia saunoa i ai ina ua faatoa mavae ona valaauina o se Fesoasoani i le Korama a Aposetolo e Toasefululua i le 1972. Ina ua maea ona lagolagoina o ia i le Korama a Aposetolo e Toasefululua i le ono tausaga mulimuli ane, o lona manatu muamua lava o le sailia lea o Ruth,10 o lē na ia saunoa o “se vaega tele lea o a’u e pei lava o lo’u fatu ma lo’u agaga.”11
O Se Tapasa O Mea Mama
E le’i leva ona talosaga e avea ma se tagata auai i le aoga e avea ai ma se taitai i le militeli i le 1942, ae valaaulia Peresitene Faust i luma o se komiti e suesueina ai. E toetoe lava o fesili uma na tuuina atu e le komiti ia te ia sa faaautu i ana faatulagaga ma ona talitonuga. Pe ulaula o ia? Pe inu pia o ia? Pe tatalo o ia? E ui i le fefe ina ne’i faatiga atu i ai, ae sa taliina e Peresitene Faust ia fesili taitasi e aunoa ma se tautoai. Ona fesiligia lea o ia pe le tatau ona tuumamaina le faatulagaga o amioga mama i taimi o le taua.
“Na ou iloaina o se avanoa lenei atonu e faamatala atu ai nisi o manatu ma faafoliga e taliaina ni manatu eseese,” na ia saunoa ai. “Sa ou masalosalo o nei alii o loo tuuina mai lenei fesili ia te au e le o ola i faatulagaga ia sa aoaoina ai au. Na oso mai se manatu i lo’u mafaufau faapea atonu e mafai ona ou fai atu i ai e i ai o’u lava talitonuga, ae ou te le manao e faamalosia i luga o isi. Ae na foliga mai na muamua oso mai i lo’u mafaufau ia foliga o le toatele o tagata o e sa ou aoaoina i le tulafono o le legavia a o avea ai ma se faifeautalai. I le faaiuga sa na ona ou faapea atu lava, ‘Ou te le talitonu e faaluaina se faatulagaga o amioga mama.’ ”12
O le mea na ia ofo ai, sa pasi lana suega ma sa filifilia o ia mo le aoga mo taitai.
“I tausaga uma o lo’u olaga umi, ou te le’i taumafai lava e nanaina po o ai a’u ma mea ou te talitonu i ai,” na ia saunoa ai i le konafesi aoao mulimuli sa ia auai ai. “E le mafai ona ou manatuaina se taimi e tasi na afaina ai sa’u galuega pe leai ai ni a’u uo ona o le faailoaina atu ma le faamaulalo o a’u o se tagata o lenei Ekalesia.”13
O le faamaoni, lea sa ta’ua e Peresitene Faust “o se tapasa o mea mama,” sa lelei ona tautuaina o ia i tausaga e 24 o lana galuega faaloia. O lona amio sao—e o faatasi ma se uiga o le le faaituau, faia o faaiuga atamai, ma le faaalia o le agaalofa ma le popole mo isi—na iloagofie ai o ia e ana paaga ma tau atu ai i avanoa faalegaluega, faalemalo, ma le auaunaga i le afioaga. Sa ia tautua i le ofisa faitulafono a Iutā mai le 1949 e oo i le 1951, o le peresitene o le Asosi a Loia a Iutā mai le 1962 e oo i le 1963, o le Komiti a Loia mo Aia Tatau Faaletagata ma Feteenaiga i le Faailogalanu a le peresitene o le Iunaite Setete o John F. Kennedy, ma o se sui o le Komisi a Iutā e Iloiloina le Faavae.
O le tulagaese o le tuufaatasiga e Peresitene Faust o le malamalama ma le gafatia na fesoasoani foi ia te ia e auauna lelei ai o se epikopo, fautua maualuga, peresitene o le siteki, sui risone, Fesoasoani i le Toasefululua, Fitugafulu, ma se Aposetolo. “I nei valaauga uma taitasi,” na matauina ai e Elder Neal A. Maxwell (1926– 2004) o le Korama a Aposetolo e Toasefululua, “na ia faatinoina ai e faapea, o se taitai lelei o se tagata e faalogo lelei.”14
Fausiaina o Sootaga
E ui i le tauagafau ma le vave ona tuu atu ni faaviiviiga i isi, ae sa faia e Peresitene Faust le anoanoai o sao taua i le Ekalesia i tausaga e tele o le auaunaga. I le avea ai ma se sui o le Komiti o le Va i Fafo a le Ekalesia, sa ia aumaia ai lona tomai faaletulafono e fetaui i le tele o mataupu faaupufai lea e i ai ni aafiaga i amioga mama, e aofia ai le manatu na faatu mai mo ni petipetiga i solofanua i totonu o Iutā. Na ia fautuaina foi le suia o le tagavai a le Ekalesia ina ia faamamafaina ai Iesu Keriso. E le gata i lea, sa ia fesoasoani foi i le taialaina o le faaiuga a le Ekalesia ina ia faakonakarateina ia auaunaga a se ofisa o le va fealoai faavaomalo lea sa fesoasoani i le Ekalesia i le faasalalauina o lana savali, faasa’oina manatu sese, ma le faaleleia o sootaga i ala o faasalalauga.
Sa ia galue foi i le fausiaina o sootaga ma tagata ma taitai o isi ekalesia. I na taumafaiga uma sa telegese ai lona lototiga ae sa vave ona faaali atu le onosai, agalelei, ma le malamalama.
I se tasi faatasiga a le alalafaga sa auai atu ai o ia ma Sister Faust, sa faitioina ai e se taitai o se isi faatuatuaga ia le Ekalesia. Sa toe manatua e Sister Faust, “sa faateleina lo’u ita a o faaauau ai pea ana tala, ae sa na o le faalogologo lelei lava ma le onosai ia Jim. Ina ua uma, sa ia alu atu i lenei tamaloa ma faapea atu i ai, ‘Ua lelei, lau susuga a le Faifeau, afai o lou lagona lena, e tatau la ona sese se mea o loo matou faia. Ou te manao ta te fai taumafataga faatasi i se aoauli ina ia mafai ai ona e faailoa mai ia te a’u ou atugaluga.’ Sa la faia, ma na avea le toalua lea ma se uo lelei talu mai lena taimi.”15
I le vaitau o le 1980 sa galulue soosootauau ai Peresitene Faust ma Peresitene Howard W. Hunter (1907–95), a o i ai lena i le Korama a Aposetolo e Toasefululua, ma Elder Jeffrey R. Holland, a o avea lena ma peresitene o le Iunivesite a Polika Iaga, ina ia liliu le latou fuafuaga mo le Nofoaga Autu a le BYU i Ierusalema mo Suesuega i Sasae Lata Mai e avea o se mea moni. Sa tauivi pea Peresitene Faust ma Peresitene Hunter ma faigata o feutagaiga ma le faifaiumi o faafatiatamai i le lisiina mai o le laueleele ma le vaaia o le fausiga o le nofoaga tutotonu.
Na saunoa se tasi o molimau vaaitino e uiga i lea faagasologa, “e moni lava o Elder Faust o se tagata o le filemu, e tagai pea lava o ia mo ni auala e faatoafilemu ai a matou uo Iutaia inainā o e sa saili ina ia faamutaina lo matou i ai i Ierusalema, po o le faafilemu o fevesiaiga sa i ai i le Au Paia o Aso e Gata Ai i Ierusalema o e sa lototiga i nisi o taimi ona o le fili.”16
Aapa Atu
E tusa po o le galue i Pasila o se Supavaisa o le Eria mo Amerika i Saute mai le 1975 e oo i le 1977, pulefaamalumalu i Misiona Faavaomalo i le 1977 i le avea ai ma se sui o le Au Peresitene o le Korama Muamua a Fitugafulu, auauna atu i tagata o le Ekalesia i le avea ai ma se Aposetolo talu mai le 1978, po o le auauna atu o se Fesoasoani Lua ia Peresitene Gordon B. Hinckley talu mai le 1995, sa tauivi pea lava Peresitene Faust ina ia aapa atu i se agaga o le agalelei ma faaleuso.
O ana saunoaga i konafesi e masani ona atagia ai poloaiga sili e lua a le Faaola: ia alofa ma auauna i le Atua ma ia alofa ma auauna atu i Ana fanau. Faatasi ai ma le mafanafana, uiga malie, ma le atamai, sa aumaia ai e Peresitene Faust se alofa faaletamāmatua i le pulelaa, e faamanuiaina ai olaga o i latou uma o e sa faalogo ma gauai i lana fautuaga.
“O le galuega silisili i galuega uma i le lalolagi [o le] faaolataga lea o fanau taitasi a lo tatou Tama,”17 na ia saunoa ai. “O le faamalieina silisili lava i le olaga e maua mai lea i le tuuina atu o le auaunaga i isi.”18
I lana Savali a le Au Peresitene Sili ia Aokuso 2007, na saunoa ai Peresitene Faust e faamoemoe o ia e “ofo atu ni avanoa mo le alualu i luma ma le fiafia i tagata uma o le ekalesia, pe ua faaipoipo pe nofofua.” I le manatuaina o le faataoto i le leoleo mamoe lelei, na ia faaopoopo atu ai, “O le sailia o le tasi o loo manaomia la tatou fesoasoani e aofia ai le aapa atu i le tele o auala.”19
I lana konafesi aoao mulimuli na saunoa ai, na ia molimau atu ai i le mana faamalolo o le faamagalo atu. “ Mo i tatou uma lava o e faamagalo atu ‘i e ua agaleaga mai ia te i tatou’ [Faaliliuga Iosefa Samita, Mataio 6:13], e oo lava ia i latou sa faia ni solitulafono matuia, o le Togiola e aumaia ai se fuataga o le filemu ma le mafanafana,” sa ia saunoa ai. “Ia tatou manatua e ao ina tatou faamagalo atu ina ia faamagaloina ai… . Faatasi ai ma lo’u agaga ma lo’u loto atoa, ou te talitonu i le mana faamalolo lea e mafai ona oo mai ia i tatou, pe a tatou mulimuli i fautuaga a le Faaola ia ‘faamagalo atu i tagata uma’ [MFF 64:10].”20
Molimau
I le taimi o lana auaunaga sa masani ona molimau atu Peresitene Faust i le Tusi a Mamona, o le Perofeta o Iosefa Samita, ma ki ma le pule o loo umia e Peresitene o le Ekalesia. “O le siufofoga o Peresitene Hinckley e moomia ona tatou faalogo atu i ai i aso nei, e moomia ona tatou mulimuli i lana fautuaga,” na ia faailoa mai ai, “ina ia mafai ona tutupu ia i tatou mea sili ona lelei.”21
Na tuuina atu foi e Peresitene Faust se molimau mausali i le Faaola, i le tusiaina lea o upu o le pese “O le Keriso Lenei” ma molimau atu: “O i matou o e o loo umia le tofi faaaposetolo paia e moomoo pea lava ina ia faataunuuina lo matou tiutetauave e ala lea i le molimau atu i le paia o le Faaola. Ou te lagonaina le uunaia o au ina ia faia faapea. Sa i ai sa’u molimau i lo’u olaga atoa. Ae peitai, talu ai nei na oo mai ai i lo’u agaga se molimau mamana i le paia o lenei galuega mamalu. O lenei molimau mautinoa ua sili atu ona mautu nai lo le taimi muamua i lo’u olaga.”22
E le galo ia Peresitene Faust lana tamai mamoe matafefe i le taimi o lona laitiiti o ia. Ma e le galo lava ia te ia lana faaiuga ina ia avea ma se tausimea i le lafu. O le taumafai e mulimuli i le Leoleo Mamoe Lelei, o lē e le “maluelue”23 lana molimau i ai, sa ia ola ai i se olaga lea sa avea ma ana lauga silisili—o le lauga a se leoleo mamoe alofagia.
O VAEGA TAUA I LE SOIFUAGA O PERESITENE JAMES E. FAUST
31 Iulai, 1920
Soifua mai i Delta, Iutā, ia George A. ma Amy Finlinson Faust
1937–39
Aoga i le Iunivesite o Iutā i le Aai o Sate Leki
1939–42
Auauna atu i se misiona i Pasila
Ape. 21, 1943
Faaipoipo atu ia Ruth Wright i le Malumalu o Sate Leki
1942–45
Tautua i le taimi o le Taua Lona II a le Lalolagi i le Ami a le Iunaite Setete, sa faamaloloina mai ma le faamamaluina o se lutena muamua
1948
Faauu mai le Iunivesite o Iutā ma faailoga o le tagata malaga ma le Juris Doctor; amata ona galue faaloia i le Aai o Sate Leki
8 Me, 1949
Lagolagoina e avea ma epikopo o le Uarota a Big Cottonwood
1949–51
Tautua i le Maota o Sui a Iutā
18 Mat., 1956
Lagolagoina e avea ma peresitene o le Siteki a Cottonwood
31 Me, 1962
Peresitene filifilia o le Asosi a Loia a le Setete o Iutā
1962
Tofia e peresitene John F. Kennedy o le Iunaite Setete i le Komiti a Loia mo Aia Tatau Faaletagata ma Feteenaiga i le Faailogalanu
14 Tes., 1968
Valaauina e avea ma sui risone
Ian. 1970
Tofia i le aufono faatonu a le Deseret News
6 Oke., 1972
Lagolagoina o se Fesoasoani i le Korama a Aposetolo e Toasefululua
1 Oke., 1976
Lagolagoina i le Au Peresitene o le Korama Muamua a Fitugafulu
Iuni 1977
Valaauina e pulefaamalumalu i le Misiona Faavaomalo
30 Set., 1978
Lagolagoina i le Korama a Aposetolo e Toasefululua
12 Mat., 1995
Vaetofiaina e avea ma Fesoasoani Lua i le Au Peresitene Sili
27 Ape., 1998
Mauaina se taui o le tagatanuu o le malo o Pasila—o se faamamaluga e na o ni nai taitai toaitiiti o le lalolagi e tuuina atu i ai
2000
Faapaiaina malumalu e fitu: Oaxaca Mekisiko, Tuxtla Gutiérrez Mekisiko, Medford Oregon, Memphis Tennessee, Nashville Tennessee, San José Costa Rica, ma Oklahoma City Oklahoma
10 Aok., 2007
Maliu i le Aai o Sate Leki, Iutā, i le 87 o tausaga
SAAFIAFIGA O LE MALIU MAI LE AU PERESITENE SILI
“Sa loloto ma mausali lana faautautaga. Na maua mai le tele o mea sa aoaoina ai. Na sau o ia ma le mafaufau o se loia ma le agaalofa o se taitai o le Ekalesia… . O lona faatuatua i le moni o le talalelei toefuataiina sa le maluelue. Sa leai se masalosalo i lona mafaufau e faatatau i le valaauga faaperofeta o Iosefa Samita. Sa leai sona masalosalo e tusa ai ma le moni o le Tusi a Mamona… .
“O lona maliu o se maliu filemu ma le alofa ma le malamalama. Ia filemu lona manatuaina. O i tatou uma lava ua sili atu ona lelei mai a tatou fegalegaleaiga ma ia.”
Peresitene Gordon B. Hinckley
“O ia o se tagata o le poto masani, o se tagata o le faautauta, o se tagata o le alofa. O ia o se tagata o le faatuatua, o se tagata o le tatalo, ae o le mea silisili o ia o se tagata o le Atua. Sa leai se afaina i lona ofutau; sa leai se tauleagaina i lona agaga; sa leai se sese i lona tagata.
“Sa alofa Peresitene Faust i le Alii ma lona loto ma lona agaga atoa ma sa auauna ia te Ia ma lona malosi atoa seia oo i le mutaaga o lona olaga faaletino… . O ia o se faiaoga o le upumoni. Na ia tuua se tofi o le mamalu ma se talatuu o le alofa. Ia faamanuia e le Atua lona manatuaina.”
Peresitene Thomas S. Monson, Fesoasoani Muamua i le Au Peresitene Sili