O Mai i le Malumalu
I le latalata i le amataga o le seneturi lona luasefulu, sa galulue ai ni faifeautalai se toalua i itu maugā o le itu i saute o le Iunaite Setete. I se tasi aso, a o la savavali atu i se nuu maotua mauga, sa la vaaia ai ni tagata o faapotopoto i se vaega taalaelae i tafatafa o se fale e fai si mamao i lalo o se auvaemauga.
Na la iloaina ai o le a faia le sauniga o se maliu. Na malemo se tamaitiiti laitiiti. Na feau e ona matua ia le faifeau e “lauga” i le falelauasiga o lea alii laitiiti. Na tutu mai tua faifeautalai e matamata i taualumaga o le maliu. O le a lagomau si alii laitiiti i le tuugamau na avanoa i autafa o le fale. Na tulai le faifeau i luma o le tama ma le tina faavauvau ma sa potopoto atu isi ma amata loa lana lauga. Afai na faamoemoe matua e maua se faamafanafanaga mai lenei faifeau, o le a la matuai faanoanoa lava.
Sa ia matuai otegiaina i laua ona o le le papatisoina o le tamaitiiti laitiiti. Sa la tolopoina ona o se isi mea po o se isi, ae o lenei ua leai se aoga. Sa ia tauina atu sa’o ia i laua ua alu le la tamaitiiti i seoli. Na ia fai atu ia i laua, o i laua e sese ma e tuuaia i laua—o i laua ua mafua ai ona oo le la atalii i le faasalaga e le iu.
Ina ua uma le lauga ma ua ufitia foi le tuugamau, na tuua e uo, tuaoi ma aiga le vaaiga. Na o atu alii faifeautalai i matua faavauvau. “O i maua o auauna a le Alii,” na la fai atu ai i le tina mafatia, “ma ua ma oo mai ma se savali mo oulua.”
A o faalogologo ia matua faavauvau, na faailoa atu e alii faifeautalai talavou e toalua ia i laua se vaaiga i le tulaga o le a i ai le faavavau. Sa laua faitau atu mai faaaliga, ma na la tuuina atu i nei matua lotomaualalo ma le faavauvau a laua molimau e uiga i le toefuataiga o ki mo le faaolataga uma o tagata soifua ma e ua maliliu.
Ou te le faitioina le faifeau failauga. O le mea moni, ou te alofa ia te ia, aua sa ia faia le mea sili na ia iloaina e fai ai ia ituaiga o malamalama ma atamai e pei ona ia mauaina. Ae e tele atu isi mea nai lo mea na ia tuuina atu. O loo i ai le atoaga o le talalelei.
O le auala na faailoa atu e faifeautalai i na matua lotomaualalo na sili atu nai lo le liua ma le salamo ma le papatisoga; aua, ia i latou o e o le a mulimuli i ai, i le taimi tatau, o lena auala o le a taitaiina atu i potu paia o le malumalu paia. O iina e mafai ai e tagata o le Ekalesia o e agavaa ona auai i sauniga faaola aupito faaeaina ma le paia ua faapea ona faaalia mai i tagata. O iina e mafai ona mulumuluina ma faauuina ma aoaoina ma faaeeina ma faamauina ai i tatou. Ma a tatou maua nei faamanuiaga mo i tatou lava, e mafai ona tatou faia mo i latou o e ua maliliu e aunoa ma le mauaina o lena avanoa e tasi.
Ou te faamoemoe e faalautele lou malamalama i le mafuaaga tatou te fausia ai malumalu ma le mafuaaga e faia ai iina ia sauniga ma faatinoga.
Faamanuiaga o le Alu i le Malumalu
O se faamanuiaga le ulu atu i le malumalu paia. Afai e te agavaa i tulaga faatauaina ua faatulagaina, o le mea mautinoa e tatau ona e sau ia maua ou lava faamanuiaga; ma a uma, e tatau ona e toe foi mai ma saga foi mai ina ia maua na lava faamanuiaga e isi o e ua maliliu e aunoa ma le avanoa e maua ai i le olaga faaletino.
E le tatau ona e sau i le malumalu seiloga e te agavaa, seiloga e te ausia uma tulaga e manaomia ua faatulagaina e le Alii. Ae e tatau ona e sau, afai e le o le taimi nei, o se taimi vave lava e mafai ona e agavaa ai.
O le aoaoga faavae o loo faavae ai le galuega i totonu o malumalu paia, e sili atu nai lo se isi lava mea, ua tulaga ese mai ai le Ekalesia a Iesu Keriso o le Au Paia o Aso e Gata Ai ma sili atu ai ona paia i isi faapotopotoga faalelotu uma i luga o le fogaeleele. O loo i ai se mea ia i tatou e leai lava se isi ekalesia o i ai. E i ai se mea e mafai ona tatou tuuina atu e le mafai ona latou tuuina atu.
O le tiga na i ai i loto o na matua faavauvau e na o aoaoga faavae lava o lenei Ekalesia e mafai ona faamalieina ai. O nei aoaoga faavae e faaautu i sauniga o le malumalu paia.
Faatulagaga i Mea Uma
Ina ia faamalamalamaina teisi le taua o sauniga, ou te amataina i le mataupu faavae o le faatuatua lona tolu: “Matou te talitonu e faaolaina tagata uma lava i le Togisala a Keriso, pe a tausia poloaiga ma sauniga o le Talalelei.”
O le uiga o le upu sauniga “o se faatinoga po o se sauniga faalelotu,” “o se sauniga ua faatuina.” Ia, ae faapefea sauniga o le talalelei? O le a se taua ia i tatou o tagata o le Ekalesia? Pe mafai ona e fiafia, pe mafai ona faaolaina oe, pe mafai ona faaeaina oe e aunoa ma ia sauniga? O le tali: O sauniga e sili atu nai lo le fautuaina po o le manaomiaina, po o le alagatatau foi. E sili atu foi nai lo le tatau po o le aoga, e taua ia i tatou taitoatasi.
E tatau i tagata taitoatasi o le Au Paia o Aso e Gata Ai ona fesili ifo ia te ia lava i le fesili: Pe o faatulagaina lelei ea lo’u olaga? Pe ua ou maua uma ea sauniga o le talalelei lea e tatau ona ou maua i le taimi lenei o lo’u olaga? Pe o aoga ea?
Afai e mafai ona e taliina nei fesili i le ioe, ma afai o sauniga e oo mai i le aafiaga o le mana faamauina ma le pule, o le a tumau ai pea le aoga e oo i le faavavau. I lena la itu, o lou olaga i lena tulaga, o loo i le tulaga tatau. Ma o se manatu lelei foi mo oe ia e mafaufau i lou aiga, o e soifua ma e ua maliliu, faatasi ai ma na lava fesili e tasi i lou mafaufau.
O Sauniga o le Malumalu
O sauniga tatou te faataunuuina i totonu o malumalu e aofia ai mulumuluga, faauuina, o le faaeega paia, ma le sauniga o le faamauga—o le faamauina uma o fanau i matua, ma le faamauina o ulugalii, lea e masani ona taua o le faaipoipoga i le malumalu.
O se otootoga puupuu lenei o faamatalaga o loo maua ua lomiaina e faatatau i sauniga o le malumalu.
O sauniga o le mulumuluga ma le faauuina e masani ona faatatau i ai i totonu o le malumalu o sauniga o le mulumuluga. O le a lava mo o tatou faamoemoega le na o le faapea: O le mulumuluga ma le faauuga e o faatasi ma le faaeega paia—e tele lava ina faatusa o latou natura, ae o loo folafola mai ai faamanuiaga i le taimi lava lena faapea ma faamanuiaga i le lumanai. Na fetalai le Alii e faatatau i nei sauniga, “Ou te fai atu ia te outou, pe faapefea ona aoga ia te au a outou mulumuluga, sei vagana ona outou faia i totonu o se fale ua outou fausia i lo’u igoa?” (MFF 124:37).
E fesootai atu i nei sauniga, o le a faaofuina aloaia outou i le ofusa ma folafola atu faamanuiaga ofoofogia e faatatau i ai. E taua lou faalogo totoa a o faataunuuina nei sauniga ma ia outou taumafai e manatua ia faamanuiaga folafolaina ma tulaga o le a faataunuuina ai ia faamanuiaga.
Ina ia faaeeina o lona uiga ia faatamaoaigaina, ia tuuina atu i se isi tagata se mea e umi ona tumau ma e tele sona taua. I totonu o le malumalu o sauniga o le faaeega paia, “e faaeeina ai i tagata latou te mauaina sauniga i le mana mai luga,” ma “latou te maua se aoaoga e faatatau i faamoemoega ma fuafuaga a le Alii.”2
Na saunoa Peresitene Polika Iaga (1801–77) e uiga i le faaeega paia: “Sei ou tuuina atu se faamalamalamaga puupuu. O o outou faaeega paia o le, mauaina lea o na sauniga uma i totonu o le maota o le Alii, lea e taua mo outou, pe a tea atu ma lenei olaga, e mafai ai ona outou savavali atu i le afioaga o le Tama, e pasi atu i agelu o loo tutu o ni leoleo, ma mafai ona tuuina atu ia i latou upu tatala, o faatusa ma faailoga, e faatatau i le Perisitua paia, ma maua o outou faaeaga e faavavau, e aunoa ma le faalavelaveina ai e le lalolagi ma seoli.”3
E manaomia faamanuiaga o le faaeega paia mo le faaeaina atoatoa. E tatau i tagata uma o le Au Paia o Aso e Gata Ai ona saili ina ia agavaa ma ia latou mauaina lenei faamanuiaga.
O le sauniga o le faamauga, o le sauniga lea e fusia faatasi ai aiga e faavavau. O le faaipoipoga i le malumalu o se sauniga o le faamauga. O fanau e fananau mai i ulugalii ua faamauina i le malumalu e fananau mai i le feagaiga. Afai e faaipoipo se ulugalii i se sauniga faalemalo ona faamauina lea i le malumalu i se tausaga pe sili atu foi mulimuli ane, o fanau e le’i fananau i le feagaiga e faamauina i le ulugalii i se sauniga puupuu ma le paia.
E masani lava ona ou lagona le ootia ona o sauniga o le malumalu e faataunuuina i le faaaloalo ma le faaeteete. E le o ni sauniga faigata pe maoae foi ae e pei lava le faigofie o mataupu faavae o le talalelei.
I totonu o le Ekalesia tatou te umia le pule tatau e faataunuuina ai sauniga uma e alagatatau ina ia faaola ma ia faaeaina ai le aiga atoa o tagata soifua. Ma talu ai ona ua ia i tatou ki o le mana faamauina, o mea tatou te fusifusia i le faatulagaga tatau iinei o le a fusifusia foi i le lagi. O na ki—o ki e faamauina ma fusifusia i le lalolagi ma ia fusifusia ai i le lagi—e faatusaina i le meaalofa silisili mai lo tatou Atua. O lena pule e mafai ai ona tatou papatiso ma faamanuia, e mafai ai ona tatou faaeeina ma faamauina, ma o le a faamamaluina e le Alii a tatou tautinoga.
E Tatau Ona Ofoina atu Sauniga i e ua Maliliu
O le faifeau failauga na taua muamua na leai sana tali i le fesili po o le a le mea e tupu ia i latou o e ua maliliu ae le’i papatisoina. O le a le mea e tupu ia i latou? Afai e leai lava se isi igoa i lalo o le lagi e mafai ona faaolaina ai le tagata (ma e moni lava lena mea), ma na latou feola ma maliliu e aunoa ma le faalogo i lena igoa, ma afai e tatau le papatisoina (ma e tatau), ma ua latou maliliu e aunoa ma le valaaulia e taliaina ai, o fea nei o i ai i latou?
E faigata ona malamalama i lena fesili, ae ua faamatalaina ai le toatele o le aiga o tagata soifua. I se isi faaupuga, ia fesili po o le a le pule e faavaeina ai le Alii e tasi ma le papatisoga e tasi ona faatagaina lea ina ia tupu, lea o le toatele o le aiga o tagata soifua e le taitai oo mai i aafiaga o aoaoga faavae o lena mana? Faatasi ai ma lena fesili e le’i taliina, o le toatele lava o le aiga o tagata soifua e tauau ina faapea ua leiloloa, e aofia ai le tamaitiiti laitiiti lea na malemo—ma e feteenai ai ma soo se faatatauga talafeagai o le tulafono o le faamasinoga tonu po o le alofa tunoa foi.
Afai e leai se tali a se ekalesia i lenei faafitauli, e mafai faapefea la ona tautino mai o le ekalesia lea a le Alii? E mautinoa lava o le a le finagalo o Ia e faagalo le toatele o le aiga o tagata soifua ona sa le’i papatisoina i latou a o i ai i le lalolagi.
O i latou o e faapea mai ma le le fiafia ma le le mautonu latou te le iloa se tali i lenei fesili, e le mafai ona latou mauaina le pule e faataunuu ai fegalegaleaiga a le Alii i le lalolagi po o le faatautaiga foi o le galuega ina ia faaolaina uma ai tagata.
O le tasi o tulaga ua tulaga ese ai i tatou mai isi tagata uma o le lalolagi ma iloa ai i tatou o le Ekalesia a le Alii ona, tatou te faia papatisoga ma isi sauniga mo o tatou augatama ua maliliu.
Soo se taimi ou te talanoa ai i le fesili e faatatau ia i latou o e ua maliliu e aunoa ma le papatisoina, ou te faia lava i le ava ma le migao tele, aua ua faatatau i se galuega paia. E le silafia tele e le lalolagi, o lenei galuega e ofoofogia i ona faamoemoega, e sili atu le matagofie nai lo le mea e mafai ona mafaufauina e le tagata, e faalelagi, e musuia, ma e moni. O le tali lea.
Faatasi ai ma le pule tatau, e mafai ai e se tagata faaletino ona papatisoina e fai ma sui o se tasi e le’i mauaina lena avanoa a o le’i maliu. Ma o lena tagata e mafai ona ia taliaina pe teenaina le papatisoga i le lalolagi o agaga, e tusa ai ma lona lava manao.
O lenei galuega na oo mai o se faamautinoaga maoae o se mea e sili ona taua—o loo i ai se olaga pe a mavae le oti. O le oti o le tino e le o le mutaaga lea nai lo le fanau mai o le amataga. O le galuega maoae o le faaolataga e oo atu i tua atu o le veli faapea foi ma iinei i le olaga i le tino.
Ua faatagaina i tatou e faataunuu papatisoga ma isi sauniga o le malumalu e fai ai ma sui mo e ua maliliu, a faapea e oo i le taimi latou te faalogo ai i le talalelei ua talaiina atu ma mananao ai e taliaina, ae ua uma ona faataunuuina na sauniga talafeagai.
O Mai i le Malumalu
O tagata uma o le Au Paia o Aso e Gata Ai e nafa ma lenei galuega. Atonu e leai se aoaoga faavae ua tulaga ese ai lenei Ekalesia mai isi ekalesia nai lo lenei aoaoga faavae. Ua ia i tatou faaaliga. Ua ia i tatou na sauniga paia.
Ou te faapea atu ia te outou uma, “O mai i le malumalu.” Atonu o loo e tulimatai atu i le avanoa e tasi i le olaga o le alu atu i le malumalu e maua ai ou lava faaeega paia, ia maua ai ou lava faamanuiaga, ma e ulu atu i au lava feagaiga ma le Alii. Atonu ua uma ona e alu atu faatasi pe faalua foi i le malumalu. Atonu foi e masani ona e alu atu soo i ai. Ia atonu foi o oe o se tagata e taitai i sauniga. Po o le a lava le tulaga o loo i ai, ia o mai i le malumalu.
Afai e manaomia, ia faatulaga lelei o outou olaga; ia tatalo e le aunoa. Ia amata nei loa lena malaga sili ona faigata ma faalotovaivai tagata i nisi o taimi, o le salamo lea. Ia faamautuina lau faaiuga faapea o le a outou faia mea uma e mafai ona outou faia e fesoasoani ai i galuega faalemalumalu ma galuega o talafaasolopito o aiga o loo lagolagosua i ai, ma fesoasoani i tagata soifua uma ma soo se tagata ua i talaatu o le veli, i soo se auala e mafai ona outou faia, faatasi ai ma soo se punaoa e mafai ona outou maua.
O mai i le malumalu!
Sii mai le O Le Malumalu Paia (1980).