O Le Mafaufau o Gilberto
Ina ua amata ona ou aoao e uiga i sauniga mo e ua maliliu, na musuia au e le maoae o le alofa na faaalia e lo’u toalua mo lona tinamatua i le faamautinoaina lea ua faataunuuina ona sauniga o le malumalu. O lenei mea na faaosofia ai au e aoao atili e uiga i ou lava tuaa. O tausaga talu mai lena taimi, ua toatele tuagane ma uso, e aofia ai i latou o loo i le nofoaga autu o talafaasolopito o aiga e latalata i lo’u fale i Guadalajara, Mekisiko, ua fesoasoani ia te au ina ia ou iloa fai galuega mo ou tuaa.
O le 1991 na maua ai lo’u faamanuiaga faapeteriaka ma na faatonuina ai au e tatau ona ou popole i tagata o lo’u aiga ua maliliu ma ia ou tuuto atu ia i latou. Na ou faatuina se sini ia ou faia lenei mea, lea na oo atu ai i ni talanoaga i aso uma ma ou matua, e le o ni tagata o le Ekalesia. Sa masani ona ou fesili e uiga i lo’u aiga, ae na o ou matua matutua lava na mafai ona faamatala mai e lo’u tina.
I se tasi aso na tau mai ai e lo’u tina na oso faafuasei le ma’i fatu o Gilberto, o le uso o lo’u tama. “Ou te iloa o le a fiafia o ia e talanoa ia te oe,” o le tala lea a lo’u tina. “E ese le lelei o lona mafaufau, ma e mafai ona ia tuuina atu ni faamatalaga se tele e uiga i le aiga.”
Ina ua ou telefoni atu i le fale e tausi ai tagata matutua lea na nofo ai, na tali mai e lona toalua ma fai mai, na tigaina lava si toeaina ma na le mafai ona tautala. Na momoli atu i ai ou moomooga alofa ma fai atu i ai o le a ou tatalo mo i laua ma lo laua aiga.
O le isi aso na sosoo ai, na ou toe telefoni ai i le fale e tausi ai tagata matutua. Sa faateia au ina ua tali mai e le toeaina le telefoni.
“Gilberto!” na ou fai atu ai. “Na ou valaau atu e tau atu na ou tatalo faatauanau ina ia e toe manuia ma ou te alofa ia te oe.”
“Faafetai tele lava, Bibi,” o lana tali lea. “Na ou ala ae i le taeao nei ua ou manuia lava. Tau mai po o a au mea o fai.”
Na ou tau atu ia te ia lo’u naunau tele e fia iloa igoa o tagata o le aiga mai Arapi ma Lepanona. Na sa’o lava lo’u tina e uiga i le mafaufau o le toeaina. Na ia iloaina igoa, aso, ma nuu o le fa o augatupulaga o le aiga o lo’u tama.
Ina ua ou tuuina i lalo le telefoni, na ou lagonaina o le ma talanoaga mulimuli lea o le a ma fefaasoaai ai i lenei olaga. Sa sa’o lava au. Peitai ua faamanuiaina i maua uma e le Alii ina ia mafai ona ou maua faamatalaga na ou manaomia ia faatasia ai lo matou aiga—i le taimi nei ma le faavavau.