O Se Tatalo ma Lo’u Faiaoga o Aiga
Ou te matamuli e tau atu, ae na i ai se taimi na ou mafaufau ai o faiaoga o aiga sa sili atu ona fai ma faalavelave nai lo se faamanuiaga. I taimi faapena ou te sueina ai ni auala ou te aluese ai mai a latou asiasiga ina ia mafai ona fai au feau.
O le mea lena na atili ai lo’u le fiafia ina ua avea Lincoln ma o matou faiaoga o aiga. E le’i misia lava sa na asiasiga. Na i ai i taimi uma sa na lesona sa sauniaina, ma sa ia faataunuuina ma le faamaoni ona tiute o faiaoga o aiga. Ou te talisapaiaina ana taumafaiga ae na le lava lea e tuu atu ai ia te ia ma lana soa ia lo’u gauai le mavavaeeseina pe a laua o mai i a laua asiasiga faalemasina. O Lincoln e tamalii i taimi uma lava; ae o taimi uma sa fai si o’u le mafaufau.
O se tasi tausaga i le amataga o le tautotogo, sa ou galue ai i fafo o le fanua. O se aso lagilelei ma le mafanafana. Sa masani ona ou avea le faiga o togalaau o se faamalologa, ae o le aso lenei sa ou le fiafia. E le’i leva talu ona faia se taotoga ogaoga o lo’u toalua i lona papatua, ma i le avea ai o se aiga sa matou feagai ma ni filifiliga faigata.
I le manaomiaina o ni tali, na iu ai ina ou tootuli i le togalaau. Na maligi ou loimata a o ou tatalo faamaoni mo se taitaiga mai le Alii. Ou te fia lagonaina sina toafilemu. Ou te fia maua lava sina faamautinoaga o le a le popole o matou olaga e pei ona foliga mai ai i le taimi nei. Sa ou tatalo faatauanau, ma tautala leotele i isi taimi, ma augani atu i le Alii mo le faamoemoe aemaise lava mo le toafilemu.
Ina ua ou toe foi atu i le fale ina ua mavae ona augani atu i le Alii, na ou lagonaina le vaivai tele. Sa ou fiafia na leai se tasi i le fale ina ia mafai ona toe lelei ou lagona. Peitai e le’i umi lava ona talai ou seevae faigaluega ae tatagi mai le logo o le faitotoa. O Lincoln le tagata mulimuli lava na ou mafaufau i ai, ae ina ua ou tatalaina le faitotoa, na tutu mai i laua ma lona faletua, ae leai ni mea mo se lesona.
Mo le taimi muamua lava, na ou lagona moni ai le fiafia i le vaai atu ia te ia. Na ou valaauliaina i laua e o mai i totonu. Sa matou talanoa, ma na fesili mai Lincoln e uiga i le galuega a lo’u toalua, le ma fanau teine e toalima, ma isi mataupu faaleaiga. E le’i nonofo umi i laua, ae ina ua tutu i luga e tuumuli, na fesili mai Lincoln pe mafai ona ia tuua se faamanuiaga i luga o lo’u aiga. Sa ou lagonaina le agaga faafetai, ma mafaufau pe na faapefea ona ia iloa o le a matuai talisapaiaina se tatalo. Sa matou tootutuli, ma a o ou faalogologo i ana upu faamafanafana, na faapitoa ona ia talosagaina le toafilemu i totonu o le matou aiga.
O le taimi lena na ou lagonaina ai le pai mai o le mafanafana lea na faatumulia ai lo’u agaga. Na ou iloaina o le Alii o loo taitai ma o le a toe lelei mea uma.
Na taliaina au talosaga i le manino ma le mautinoa e ala mai ia Lincoln, o lo matou faiaoga o aiga faamaoni. I le faamamaluina o lona avea ma tausi mea ma le mulimuli ai i uunaiga a le Agaga Paia, na ia tuua ai au ma se molimau i le paia o lona valaauga.