Te tufaa ahuru : Te hoê tamataraa no te faaroo e te mau haamaitairaa mure ore
A aufau i ta outou tufaa ahuru. A iriti i te mau uputa o te raʻi. E haamaitai-rahi-hia mai outou no to outou haapaʻo e to outou faaroo i te mau ture e te mau faaueraa a te Fatu.
E tamataraa te tufaa ahuru no te faaroo e te mau haamaitairaa mure ore1. I roto i te Faufaa Tahito, ua tamatahia te faaroo o Aberahama na roto i te aufauraa i taʼna mau tufaa ahuru i te tahuʻa rahi ia Melehizedeka2. Ua fafau Iakoba, te mootua a Aberahama i te Fatu e : «E te ahuru o te mau mea atoa ta oe e ho mai naʻu nei, e hopoihia ïa e au na oe3. »
Ua faatiʻahia te tufaa ahuru i teie anotau hopea nei ei ture faufaa no te mau melo o te Ekalesia i faahoʻihia mai a te Fatu. E raveʻa tumu teie no te faaiteraa i to tatou faaroo i roto Iaʼna e to tatou haapaʻo i Taʼna mau ture e Taʼna mau faaueraa. Te tufaa ahuru o te hoê ïa faaueraa no te faataa ia tatou, na roto i to tatou faaroo, ia tomo i roto i te hiero, te fare o te Fatu.
Toru avaʻe i muri mai i te taparahi-pohe-raa-hia te Peropheta Iosepha Semita, i te taime a patu ai te Feia Moʻa i te Hiero o Navu, ua papaʻi Brigham Young i te Pŭpŭ no te Tino Ahuru Ma Piti Aposetolo : «A tomo itoito e te tamau i roto i te hoê haapaʻoraa etaeta i te ture no te tufaa ahuru, … : i reira, a haere mai i te Fare o te Fatu, e ia haapiihia i toʼna ra eʻa, e ia haere na toʼna ra mau haere a… 4 »
Te haapaʻo etaetaraa i te ture no te tufaa ahuru eita te reira e faataa noa ia tatou ia farii i te mau oroʻa faaoraraa o te hiero, e faatiʻa atoa râ ia tatou ia farii i te mau oroʻa no to tatou mau tupuna. Ia uihia e nehenehe anei te mau melo o te Ekalesia ia bapetizohia no tei pohe mai te mea aita ratou e aufau nei i ta ratou mau tufaa ahuru, ua pahono te peresideni John Taylor, e aposetolo ïa i te reira tau : « Te hoê taata aita e aufau i taʼna tufaa ahuru e ere ïa oia i te mea tiʻamâ no te bapetizoraa i toʼna feia i pohe … Mai te mea aita to teie taata e faaroo iti no te haapaʻo i teie mau mea iti, aita ïa toʼna faaroo e ravaʻi no te faaora iaʼna iho e i toʼna mau hoa5. »
E faatupu te tufaa ahuru e e tamata mai hoʻi i to tatou faaroo. Na roto i te faatusiaraa i te Fatu i te mea o ta tatou e titau e aore râ, e hinaaro no tatou iho, ua haapii ïa tatou i te tiʻaturi Iaʼna. Na roto i to tatou faaroo Iaʼna, e nehenehe ïa tatou e haapaʻo i te mau fafauraa o te hiero e i te farii i te mau haamaitairaa mure ore o te hiero. Ua papaʻi te hoê feia omua o Sarah Rich, e vahine na Charles C. Rich, i roto i taʼna buka haamanaʻoraa i muri mai i toʼna faaruʻeraa i Navu : «E rave rahi o te mau haamaitairaa o ta matou i farii i roto i te Fare o te Fatu, o [tei] faatupu i te oaoa e te tamahanahanaraa i rotopu i te mau oto rahi atoa i fariihia e matou, tei horoʻa i te faaroo i te Atua, ma te ite e arataʻi Oia ia matou e e paturu hoʻi ia matou i to matou tere i te vahi tei ore e iteahia ia matou6. »
Mai te mau feia omua, te haapaʻoraa i te ture no te aufauraa i te tufaa ahuru e haapuai ïa i to tatou faaroo, e na taua faaroo ra e paturu ia tatou i roto i te mau tamataraa, i te mau ati rahi, e te mau oto o to tatou oraraa.
E haapii atoa te tufaa ahuru ia tatou ia faatitiʻaifaro i to tatou mau hiaai no te mau mea o teie nei ao. E faaitoito te aufauraa i te tufaa ahuru ia tatou ia vai parau-tiʻa i roto i ta tatou mau faaauraa e to tatou mau taata tupu. E haapii tatou i te tiʻaturi e, o ta tatou i horoʻa ra, na roto i te mau haamaitairaa a te Fatu e ta tatou iho mau tautooraa, ua ravaʻi ïa no to tatou mau hinaaro.
E tumu taaê to te tufaa ahuru ei ture faaineineraa. I te haamataraa o teie nei tau tuuraa o te Evanelia, ua faaue te Fatu i te tahi mau melo o te Ekalesia ia ora i te ture teitei no te haamoʻaraa – te hoê ture tei fariihia na roto i te fafauraa. I te oreraa teie ture e haapaʻohia, ua tae mai te mau ati rahi i niʻa i te Feia Moʻa7. I reira, ua faaorehia teie ture no te haamoʻaraa. E ua monohia mai te reira e te Fatu na roto i te heheuraa mai i te ture no te tufaa ahuru no te Ekalesia taatoa8. I te 8 no tiurai 1838, teie Taʼna i parau :
« E e riro teie te haamataraa i te ahururaa a taʻu mau taata.
«… O ratou o tei aufau i te ahururaa mai te reira e aufau ïa ratou i te tufaa ahuru no ta ratou apî e noaa mai i te mau matahiti atoa ; e e riro teie ei ture tumu ia ratou ra e a muri noaʼtu9. » E faaineine te ture o te tufaa ahuru ia tatou ia ora i te ture teitei o te haamoʻaraa – no te haamoʻa e no te horoʻa i te taatoaraa o to tatou taime, ta tatou mau taleni, e ta tatou mau faufaa no te ohipa a te Fatu. Tae noaʼtu i te tau e titauhia tatou ia ora i teie nei ture teitei, ua titauhia tatou ia ora i te ture o te tufaa ahuru, oia ïa te horoʻaraa ma te tapeʻa-ore10 i te hoê i niʻa i te ahuru o ta tatou apî o te matahiti.
I te feia atoa o te ora nei ma te faaroo e te parau-tiʻa i te ture no te tufaa ahuru, ua fafau mai te Fatu i te mau haamaitairaa rahi. Te tahi o teie mau haamaitairaa no te hoê taime poto, mai te tufaa ahuru atoa. Tera râ, ia au i te mau oroʻa no te bapetizoraa e no te oroʻa moʻa, te faaueraa no te aufau i te tufaa ahuru e titau atoa ïa i te faatusiaraa i te pae tino, o te ninii mai i te mau haamaitairaa no te pae varua.
Ua matau vau i te hoê na taata o te noho tauasini maile i te atea i te hiero fatata aʻe. Noaʼtu e mea iti ta ratou moni, ua aufau raua ma te faaroo i ta raua tufaa ahuru e ua faaherehere i te moni ia nehenehe raua ia tere i te Fare o te Fatu. Hoê matahiti i muri mai, ua pûpû mai te taeaʻe o taʼna tane faaipoipo, e ere i te melo no te Ekalesia, ma te manaʻo-ore-hia, e piti titeti manureva na raua. Na teie haamaitairaa no te pae tino i faatupu i te mau haamaitairaa no te pae varua no to raua na oroʻa hiero e te taatiraa. Ei faahauraa i teie haamaitairaa no te pae varua, teie taeaʻe, tei faaurûhia na roto i te faaroo haehaa o teie nei na taata, ua faafariuhia mai ïa i roto i te Ekalesia.
Ua faaau atoahia teie mau haamaitairaa no te pae tino e no te pae varua no tatou e no to tatou mau utuafare, ia au i te hinaaro o te Fatu. Tera râ, no te farii i te reira, e mea tiʻa ia haapaʻo tatou i te ture i faatumuhiaʻi no te reira11. No te tufaa ahuru, teie ta te Fatu i parau : « Hopoi mai na outou i te ahuru atoa o te mau taoʻa i roto i te fare vairaa, ia maahia taʻu fare nei, e tamataraa te reira iaʻu nei, te parau maira Iehova sabaota ra, i te oreraa vau i te iritiraa i te mau haamaramarama o te raʻi ra, a ninii atu ai i te taoʻa rahi roa ei maitai no outou12. »
E hinaaro anei te hoê o tatou na roto i toʼna iho manaʻo e patoʻi i te mau haamaitairaa rahi a te Fatu ? E mea oto mau, teie o ta tatou e rave ia faaea tatou i te aufau i ta tatou tufaa ahuru. Te parau ra ïa tatou e, aita i te mau haamaitairaa o ta tatou i imi e o ta tatou i pure ia farii. Mai te mea o outou te tahi o tei feaa i te mau haamaitairaa o te tufaa ahuru, te faaitoito nei au ia outou ia farii i te titauraa manihini a te Fatu ia «tamata [Iaʼna]… i teie nei. » A aufau i ta outou tufaa ahuru. A iriti i te mau uputa o te raʻi. E haamaitai-rahi-hia mai outou no to outou haapaʻo e no to outou faaroo i te mau ture e te mau faaueraa a te Fatu.
Ia papu maitai, e niniihia mai teie mau haamaitairaa hoê â faito i niʻa i te feia ravaʻi e te feia veve. Ia au i te mau parau a te himene, «mea na roto i te faatusiaraa te mau haamaitairaa e niniihia mai ai mai te raʻi mai », eiaha râ, no te moni o ta tatou mau aufauraa13. Te mau melo o te horoʻa nei i te hoê ahuru i niʻa i te hanere o ta ratou moni e roaa i te matahiti, e farii ïa i te taatoaraa o te mau haamaitairaa i fafauhia no te tufaa ahuru, noaʼtu hoê ă te moni e ta te vahine ivi ra i tuu e piti lepeta e aore râ, e moni iti rahi.
I te tahi mau matahiti i mairi ua mataʻitaʻi au i te hoê fare pureraa a te tahi atu haapaʻoraa. Papaʻihia i niʻa i te hoê hiʻo nehenehe roa tei afaʻihia mai na Europa te iʻoa o te taata tei pûpû mai i te reira ; ua nanaʻohia i niʻa i te hoê purupiti tei hamanihia i te raau arezi no Lebanona te tiʻaraa iʻoa ïa o te hoê taata horoʻa moni roa ; ua papaʻi-atoa-hia te mau iʻoa o te mau feia faahiahia tei horoʻa mai i te mau parahiraa hinaaro-roa-hia e o tei horoʻaʼtoa mai i te moni no te paturaa i taua fare pureraa ra.
E mea huru ê i roto i te Ekalesia a Iesu Mesia i te Feia Moʻa i te Mau Mahana Hopea Nei, te rahiraa o te aufau i te hoê tufaa ahuru taatoa e haamauruuru aifaitohia e e haamaitaihia e te Fatu, ma te faateitei-ore-hia i mua i te nahoʻa rahi. Aita «Oia e hiʻo i te huru o te taata14. » Taʼna ture no te moni e roaa mai, o te hoê ïa ture tiʻa mau.
Faufaa atu â i to tatou nei anotau te huru ïa no te opereraa o teie nei tufaa ahuru. A hiʻo ai tatou i te mau hohoʻa no te nounou e te hinaaro rahi no te taoʻa o te feia aita e haapaʻo maitai nei i teie mau faufaa, e nehenehe tatou ia oaoa i te Fatu tei horoʻa mai i te hoê raveʻa no te faatereraa i te tufaa ahuru i raro aʻe i Taʼna arataʻiraa.
Ia au i te heheuraa, ua faatoroʻahia te mau episekopo no te «haapaʻo i to te Fatu fare vairaa faufaa ; ia farii hoʻi i te mau faufaa no te ekalesia15. » E titauhia i te mau episekopo e i te mau papaʻi parau ia riro ei feia aufau tufaa ahuru o tei haapii i te ora ma te paari, i te ora i niʻa i te moni e roaa ia ratou. I roto noa tau rii hora i to ratou fariiraa i te mau moni tufaa ahuru a te mau melo o ta ratou mau paroita e ta ratou mau amaa, e hapono te feia faatere i teie mau moni i te pû faatere rahi o te Ekalesia.
No reira, mai te au i te heheuraa a te Fatu, te haamauʻaraa o te tufaa ahuru e faaotihia ïa e te hoê apooraa faaauhia i te Peresideniraa Matamua, te Pŭpŭ no te Tino Ahuru Ma Piti Aposetolo, e te Episekoporaa Faatere Rahi. Ua haapapu mai te Fatu e, e arataʻihia teie nei Apooraa e, « na toʻu iho reo ia ratou ra16. » Te iʻoa o taua apooraa ra, o te Apooraa no te faanahoraa i te mau tufaa ahuru ïa.
E mea au ia faaite e te haapaʻo nei teie Apooraa i te reo o te Fatu. Ua ite papu te mau melo tataʻitahi e amui ratou i roto i te mau faaotiraa atoa a teie Apooraa. Aita e faaotiraa e ravehia maori râ, ua raeʻahia te rahiraa o teie nei Apooraa. E haamauʻahia te taatoaraa o te tufaa ahuru no te mau tumu o te Ekalesia, oiaʼtoa te ohipa totauturu – te atuaturaa i te feia veve e tei ere, te mau hiero, te paturaa e te tataʻiraa i te mau fare pureraa, te haapiiraa, te mau materia tauturu haapiiraa – ei haapotoraa – te ohipa a te Fatu.
I te uiraa te hoê hoa o te peresideni Georges Albert Smith iaʼna eaha toʼna manaʻo i te opuaraa a toʼna hoa i te hopoi i taʼna tufaa ahuru e ia pûpû i taʼna ahururaa i te hoê atu afata o taʼna i manaʻo, teie ta te peresideni Smith pahonoraa :
«Te manaʻo nei au e taata maitai roa oe i niʻa i ta te tahi faufaa …
« … Ua faatiʻa mai oe iaʻu i te ohipa o ta oe i rave i te moni a te Fatu tera râ, aita oe i faaite iaʻu e aita oe i horoʻa i te hoê noaʻe o ta oe peni na vetahi. O Oia hoʻi to oe hoa maitai aʻe i te ao nei, e horoʻa Oia i te mau meaʼtoa na oe, oia atoa te aho o ta oe e huti nei. Ua parau Oia ia hopoi mai oe hoê i niʻa i te ahuru o te roaa ia oe e ia horoʻa i te reira i te Ekalesia mai te au i te faaueraa a te Fatu. Aita oe i na reira ; ua horoʻa râ oe i ta to oe hoa maitai roaʻe moni i rapae17. »
Na te Fatu te tufaa ahuru a te mau melo o te Ekalesia. Naʼna e opua, na roto i te hoê apooraa a Taʼna mau tavini, nahea ia faaohipa i te reira.
I te mau melo no te Ekalesia e ia vetahi i roto i te ao nei, te faaite nei au i toʻu iteraa papu i te parau-tiʻa o te Apooraa no te faanahoraa i te mau tufaa ahuru. Ua parahi na vau i roto i teie apooraa no na matahiti 17, ei Episekopo Faatere Rahi no te Ekalesia e i teie nei ei melo no te Pŭpŭ no te Tino Ahuru Ma Piti Aposetolo. Ua faaohipa-mau-hia teie nei moni tufaa ahuru a teie Ekalesia no Taʼna mau opuaraa.
Te hinaaro nei te Fatu ia farii Taʼna mau tamarii atoa i te mau haamaitairaa o te tufaa ahuru. Pinepine tatou te mau metua, e haapii-ore-nei e e faaitoito nei i ta tatou mau tamarii ia ora i teie ture no te mea e mea iti roa te moni o ta ratou e horoʻa mai. Tera râ, mai te mea aita o ratou e iteraa papu no te tufaa ahuru, e mauiui ratou. I roto i teie huru matahiti o ratou, e hiaai ratou i te mau ahu nehenehe, te arearea, te tahi mau tauihaa moni, e e mea papu e moʻe ê te parururaa taaê a te tufaa ahuru.
A tere noaʻi te mau tau, e mea tiʻa anei ia faatoroʻahia te hoê tamaiti apî ei peresibutero, tavini ei misionare, e ia haapii i te hoê ture ia vetahi ê mai te mea aita oia e ora ra i te reira ? E ia hoʻi mai oia i te utuafare e a faaruru ai i te mau teimaha o te haapiiraa, te opuaraa i te hoê utuafare, i te hoê ohipa toroʻa, e mea ohie anei iaʼna ia ora i te ture no te tufaa ahuru ? Oia atoa, e tiʻamâ anei te hoê tamahine apî ia tavini i te Fatu e ia farii i te mau fafauraa o te faaipoiporaa tiretiera maite mea aita oia iho i farii i te hoê iteraa papu no te tufaa ahuru ? E ineine anei oia i te haapii i taʼna mau tamarii i te hoê ture mai te mea aita oia iho i tamata ? E mea titauhia te faaroo o te mau metua e o te mau metua vahine no te tiʻaoro i te mau haamaitairaa paruru o te tufaa ahuru i niʻa iho i to ratou ra mau utuafare ! Teie ta te Peropheta Lorenzo Snow i parau : «A haapii i te mau tamarii ia aufau i te tufaa ahuru, ia vai te reira ei ture mure ore. Ia haapaʻo tatou i teie ture, noaʼtu eaha ta to tatou mau enemi raveraa, e faaherehere te Fatu ia tatou18. »
I roto tau rii hebedoma toe, e parahi tatou tataʻitahi na roto i teie raveʻa moʻa, i mua i to tatou episekopo e ia faaafaro i ta tatou tufaa ahuru e te Fatu. E taata maitai e te here to outou episekopo. Ua maramarama oia i te mau tamataraa o ta outou e farerei. Mai te mea aita outou e nehenehe e aufau i te tufaa ahuru te ore i maeʻa ia outou i te aufau, a haere i mua. A haamata i teie nei. A fafau i to outou episekopo i te aufau i te hoê tufaa ahuru taatoa i teie mau mahana i mua nei e a imi i te hoê raveʻa ia hoʻi oioi i te hiero. Ia faaite outou i to outou faaroo na roto i te aufauraa i te tufaa ahuru no te hoê tau e i te haapaʻoraa i te tahi mau faaueraa, e nehenehe ïa outou e oaoa i te mau haamaitairaa o te hiero. Te taparu nei au ia outou, eiaha e vaiiho i teie haamaitairaa ia morohi ê. Eiaha e haamarirau.
E te mau metua tane e te mau metua vahine, a faaineine ai outou i te faaafaro i te tufaa ahuru, te faaitoito atu nei au ia outou ia haaputuputu mai i ta outou mau tamarii i pihaiiho ia outou e a tauturu ia ratou ia taiʻo i ta ratou mau moni iti. A tauturu i ta outou feia apî tamaroa e tamahine ia hiʻopoa i ta ratou mau parau tapaʻoraa e ia ite i te rahiraa o ta ratou moni. Aue ïa raveʻa maitai ia tanu i te huero no te faaroo i roto i te aau o ta outou mau tamarii. Te haamatara ïa outou i te tuu ia ratou i niʻa i te eʻa o te arataʻi ia ratou i te hiero. E tiʻa mai ïa te mau uʻi o to outou mau tupuna i mua ia outou e te mau uʻi atoa i muri i te parau e o te maitai, no outou i faaineine i ta outou mau tamarii no te raveraa i te mau oroʻa faaora no ratou. E ere hoê â tupuraa, e toʻu mau taeaʻe e toʻu mau tuahine, i raro aʻe i te arataʻiraa a te peropheta ora a te Atua i niʻa i te fenua i teie mahana, te peresideni Gordon B. Hinckley, ua parare te mau hiero i te ao taatoa nei. Na roto i te haapaʻoraa i te mau faaueraa, oia atoa te aufauraa i te tufaa ahuru, na te reira e faataa ia tatou ia tomo i roto i taua mau hiero ra, ia taatihia i to tatou mau utuafare, e ia farii i te mau haamaitairaa mure ore.
Te taparu nei au ia ore tatou ia faataere e ia faaroo tatou i te mau faaueraa a te Fatu ia ora i te ture o te tufaa ahuru. Ua ite au i te aamu o na misionare toopiti o tei farerei i te hoê utuafare veve. Ua hamanihia te fare o teie nei utuafare i te mau paehaa raau e te apua raau, e tahua repo e aita hoʻi e uira e aore râ, e roʻi. I te mau pô atoa, te metua tane e taata faaapu, e haere oia e hoo mai i te maa i te fare toa i taʼna moni ohipa o te mahana. I te faaruʻeraaʼtu i teie fare haehaa, ua tupu te manaʻo i roto i te orometua paari aʻe, «E riro mau te ture o te tufaa ahuru ei patu-tamataraa no teie utuafare. E mea tiʻa paha ia ore ia faahiti i te reira i teie nei. » Maa taime i muri mai, parau maira te piti o te orometua i toʼna manaʻo – ua ora atoa oia i te hoê oraraa veve i roto i toʼna fenua : «Ua ite au e e haapiihia te parau tumu o te tufaa ahuru i roto i te maharaa o te haapiiraa, tera râ, e nehenehe anei ta taua e haapii i teie farereiraa i mua nei ? E mea tiʻa ia ite ratou i te ture no te tufaa ahuru i teie nei no te mea e mea tiʻa ia farii ratou i Taʼna tauturu. »
Ua maramarama teie mau misionare e «te vaira te hoê ture, o tei faatumu-mau-roa-hia i roto i te ao ra hou roa te faatumuraa o teie nei ao, ei niʻa iho i te reira te mau haamaitairaa atoa i faatumuhiaʻi – e ia noaa mai ia tatou te hoê haamaitairaa no o mai na i te Atua ra,ua na roto ïa i te haapaʻoraa i taua ture i faatumuhiaʻi no te reira19. » Te hinaaro nei te Fatu i te haamaitai mai i teie nei utuafare e te tiaʻi nei ra i to ratou haapaʻo ia nehenehe Oia ia na reira.
E toʻu mau taeaʻe e toʻu mau tuahine here, te mau haamaitairaa mure ore o te tufaa ahuru, e parau mau te reira. Ua ite au i te reira i roto i toʻu oraraa e i roto i te oraraa o toʻu utuafare. Te tamataraa o to tatou faaroo oia ïa, e ora anei tatou i te ture no te tufaa ahuru na roto i to tatou haapaʻo e to tatou faatusiaraa. Na roto mai i te mau parau a te Peropheta Iosepha Semita, «eita te hoê haapaʻoraa e titau i te faatusiaraa no te mau mea atoa e aita atoa e puai nanea no te faatupu i te faaroo e tiʻa no te oraraa e no te ora20. »
Te faaite papu nei au e ua faatusia te Fatu o Iesu Mesia i toʼna ora no te hopoiraa mai i te ora no tatou atoa. Ei ite taaê Noʼna, te faaite papu nei au e te ora nei Oia. Na roto Iaʼna, te faaite nei au i toʻu mauruuru ia outou, te mau tamarii, te mau ivi, te feia apî, te mau utuafare – e tei haapaʻo – no ta outou mau tufaa ahuru moʻa. «Eiaha roa oe e peʻapeʻa ; e haamaitaihia oe21. » Na roto i te iʻoa moʻa o Iesu Mesia, amene.