E haamaitaihia te Ekalesia taatoa o te ao nei na roto i te reo o te mau peropheta
A faaroo anaʻe i te mau peropheta o to tatou nei anotau a tauturu ai ratou ia tatou ia faatano i te mau mea tei niuhia i niʻa i te faanahoraa a tei Hamani.
Aue i te oaoa e te fanaʻo ia riro ei tufaa no teie Ekalesia rahi e te aano e ia haapiihia e ia faateiteihia e te mau peropheta, te mau hiʻo, e te mau heheu parau ! E haapurorohia teie amuiraa i roto e 68 fenua e e iritihia i roto e 55 reo. E Ekalesia rahi mau teie e ua purara toʼna mau melo i roto i te mau nunaa o te fenua nei. E mau tamarii anaʻe tatou na te hoê Atua ora e te here rahi, to tatou Metua Here i te Ao ra. Te faatae atu nei au i toʻu tapaʻo aroha ia outou, e toʻu mau taeaʻe e toʻu mau tuahine here.
A toru avaʻe i mairi aeʻnei ua amui atu matou i raro aʻe i te faatereraa a te peresideni Gordon B. Hinckley i te oroʻa haamoʻaraa o te Hiero no Navu i patu-faahou-hia. Ua faahoʻi mai te reira ia matou i te tau o te Peropheta Iosepha e ua haamanaʻo faahou â matou i te parau no te Feia Moʻa matamua ; ta ratou mau tusia, to ratou mau mauiui, e te mau roimata ; e to ratou atoa ra itoito, te faaroo, e te tiʻaturi i te Fatu. Aita toʻu e tupuna i rotopu i te mau feia omua o te tenetere 19. Tera râ, mai te mahana matamua mai â o toʻu riroraa ei melo no te Ekalesia, ua tupu i roto iaʻu te hoê auhoaraa fatata roa i taua mau feia omua ra tei ratere mai na niʻa i te mau mouʻa. Ua riro ratou ei mau tupuna pae varua noʻu, oia atoa no te mau melo tataʻitahi o te Ekalesia, noaʼtu toʼna tiʻaraa nunaa, te reo e aore râ, te ihotumu. Ua haamau ratou i te pae Tooa o te râ te hoê vahi eiaha râ ei vahi noa no te parururaa ei vahi atoa râ no te haamauraa i te niu no te paturaa i te basileia o te Atua i roto i i te mau nunaa atoa o te ao nei.
A parare ai te poroʻi no te Evanelia a Iesu Mesia i faahoʻi-faahou-hia mai i te ao nei, ua riro tatou paatoa ei mau melo tumu no to tatou ra mau tuhaa fenua. I muri noa mai i te mau arepurepuraa – o te Tamaʻi II o te Ao nei i te fenua Heremani to toʻu utuafare faaroo matamuaraa no niʻa i Te Ekalesia a Iesu Mesia i te Feia Moʻa i te Mau Mahana Hopea Nei . O Georges Albert Smith te peresideni i te reira tau. E tamaiti apî roa vau i reira, e ua moʻe to matou mau tauihaa e piti taime i roto noa i na matahiti e hitu. Mea tapuni mai matou mai te ite ore i te mea e tupu i muri mai. Area râ, i roto i taua na matahiti e hitu ra, ua roaa ia matou te hoê mea eita e roaa i te moni ia hoo. Ua roaa ia matou te hoê vahi nohoraa hanahana, te hoê vahi paruruhia i te peʻapeʻa : oia te Evanelia a Iesu Mesia i faahoʻi-faahou-hia mai e Taʼna Ekalesia, arataʻihia e te hoê peropheta ora e te parau mau.
I roto i te tau no toʻu tamariiraa ua hauti-haere au na roto i te mau fare i tupitahia e ua paari mai au i roto i te mau hopea no te hoê tamaʻi i pau e i te ite hoʻi i te mau haamauiuiraa rahi tei faatupuhia e toʻu fenua i te tahi atu mau fenua i roto i teie Tamaʻi II o te Ao nei.
Te parau apî oaoa o ta Iesu Mesia i faatupu na roto i te taraehara, te faaoraraa i te mau taata atoa mai te pohe mai e te horoʻaraa i te utuʻa na te taata tataʻitahi mai te au i taʼna mau ohipa i rave, na te reira mana faaora i hopoi mai te tiʻaturi e te hau i roto i toʻu oraraa.
Noaʼtu te huru o te mau tamataraa i roto i te oraraa, e nehenehe e mâmâ ta tatou mau hopoiʻa mai te mea e tiʻaturi tatou i te Mesia e i Toʼna atoa ra puai e Toʼna mana no te tamâ e te tamahanahana i to tatou oraraa e ia farii i Toʼna ra hau.
I toʻu taureʻareʻaraa, o David O. McKay ïa te peropheta. Mai te mea ra e ua matau roa vau iaʼna : E ite au i toʼna here, toʼna aroha, e toʼna hanahana ; ua horoʻa mai i te tiʻaturi e te itoito i roto i toʻu oraraa taureʻareʻa. Noaʼtu â ïa e ua paari au i te hoê vahi tauatini maile i te atea i Europa, ua ite râ vau e ua tiʻaturi oia iaʻu, e aita roa vau e hinaaro ia faainoino iaʼna.
Te tahi atu tumu no te puai i roaa iaʻu maori râ, te hoê ia rata tei papaʻihia e te Aposetolo Paulo i roto i te fare tapeʻaraa, taʼna i faatae atu ia Timoteo ra, toʼna tauturu tiʻaturihia e e hoa hoʻi. Ua papaʻi oia :
« E ere hoʻi i te aau taiâ ta te Atua i horoʻa mai no tatou, i te aau itoito râ e te aroha, e te haapaʻo maitai.
Eiaha oe e haama i te parau o to tatou Fatu » (2 Timoteo 1:7-8).
Ua taʻi teie mau parau a teie Aposetolo i tahito ra no niʻa i to tatou Faaora ma te faufaa rahi noʻu i muri mai i te tamaʻi, e tae roa mai â i teie nei mahana. Ehia o tatou e vaiiho nei i te mătaʻu ia faatere i teie nei tau umeumeraa i te ao nei, te tereraa faufaa e te tereraa poritita papu ore, e te mau tamataraa i te taata.
Te parau mai nei te Atua ia tatou na roto i te hoê reo tuutuu ore. E ohipa te Atua i pihai iho i te utuafare taata nei hoê a faito. Tei roto anei tatou i te hoê paroita rahi e aore râ, i te hoê amaa naʻinaʻi, e mea taaʻe paha te ahuaraʻi e aore râ te tupuraa o te heeuri o to tatou mau fenua, mea taaʻe paha te ihotumu e tae noaʼtu i te reo, e mea taaʻe paha to tatou iri. Area râ, te mana e te mau haamaitairaa no te Evanelia i faahoʻi-faahou-hia mai tei te taatoaraa ïa noaʼtu te huru o te ihotumu, te hau fenua, te faatereraa poritita, te peu tumu, te reo, te tereraa faufaa, e aore râ, te huru no te haapiiraa.
I teie mahana, te vai faahou nei te mau aposetolo, te mau hiʻo, e te mau heheu parau o te riro ei feia hiʻo, ei mau veʻa hanahana, te parau faaora. E parau mai te Atua ia tatou na roto ia ratou. Ua ite hohonu ratou i te mau mea taaʻe e orahia nei e tatou te mau melo. Tei roto tatou i teie nei ao, e ere râ i to teie nei ao.
E peropheta ora to tatou i niʻa i te tino o te fenua nei, oia te peresideni Gordon B. Hinckley. Ua ite oia i to tatou mau tamataraa e to tatou mau mătaʻu. Te vai nei taʼna pahonoraa faaurûhia. Hoê matahiti i teie nei ua haapii mai oia ma te maramarama. Ua parau oia :
« Aita e faufaa ia mătaʻu. Ia vai te hau i roto i to tatou aau e te hau i roto i to tatou mau fare. E riro tatou ei mau hiʻoraa maitai i roto i te ao nei, tatou tataʻitahi …
« … To tatou paruru tei roto ïa i te tatarahaparaa. E tupu mai to tatou puai na roto i te haapaʻo i te mau faaueraa a te Atua » ( « The Times in Which We Live » Liahona, tenuare 2000, 86).
E paraparau mai te mau peropheta ia tatou na roto i te iʻoa o te Fatu e ma te ohie. Te haapapu mai nei te Buka a Moromona e, « Te horoʻa maira hoʻi te Fatu te Atua ra i te maramarama i te aau o te taata nei, i te mea te parau maira oia i te taata nei mai te au i to ratou reo e mai te au hoʻi i to ratou ite » (2 Nephi 31:3).
E hopoiʻa na tatou i te faaroo i te Fatu e i te ohipa i niʻa i Taʼna parau, ia nehenehe tatou ia titau i te mau haamaitairaa no te mau oroʻa e te mau fafauraa no te Evanelia i faahoʻi faahouhia mai. Ua parau Oia : « Ua ruuruuhia vau, o te Fatu, ia rave outou i te mea taʻu i parau ra ; ia ore ra outou ia rave i taʻu i parau ra, e ore ïa ta outou fafauraa i reira » (PH&PF 82:10).
Te vaira te taime e teimaha tatou, e mauiui, e aore râ, tei te hiti o te tarapaperaa o te aau a tamata ai tatou ia riro ei mau melo maitai roa no te Ekalesia. Ia ite outou, te vaira te raau i Gileada. A faaroo anaʻe i te mau peropheta o to tatou nei anotau a tauturu ai ratou ia tatou ia faatano i te mau mea tei niuhia i niʻa i te faanahoraa a tei Hamani no te ora mure ore o Taʼna mau tamarii. Ua ite te Fatu ia tatou, ua here Oia ia tatou, te hinaaro nei Oia ia manuïa tatou, e te faaitoito nei Oia ia tatou mai te parauraa e : « Ia ravehia teie mau mea… ma te paari e ma te nahonaho ; aita hoʻi i hinaarohia ia horo [te taata] i te oioi e au ore i [toʼna] ra puai… [E tena na] ia ravehia te mau mea atoa ma te au maitai e tiaʻi » (Mosia 4:7).
E mea peepee anei tatou i te oraraa i te mau faaueraa a te Atua, ma te horo haere noa hau atu i to tatou puai ? E aore râ, te faaea haere noa ra tatou ma te haapeʻapeʻa ore ? Te faaohipa ra anei tatou i to tatou taime, te mau taleni, e te mau faufaa ma te paari ? Te hiʻo ra anei tatou i te mau mea faufaa aʻe ? Te haapaʻo ra anei tatou i te mau arataʻiraa faaûru a te mau peropheta ?
Hoê hohoʻa faufaa roa na te taata oia te haapuairaa i to tatou iho mau utuafare. Ua horoʻahia mai te parau tumu no te pô utuafare i te matahiti 1915. Ua faahaamanaʻo faahou te peresideni McKay i te mau metua i te matahiti 1964 e « e ore te hoê noaʼtu manuïaraa e nehenehe e mono i te manuï ore i roto i te utuafare » (no roto mai J. E. McCulloch, Home : The Savior of Civilization [1924], 42 ; i roto i te Conference Report, eperera 1964, 5). I te matahiti 1995 ua pii te mau peropheta o to tatou nei anotau i te ao atoa nei ia haapuai i te utuafare o te niu hoʻi no te sotaiete. A toru noa matahiti i teie nei to te Peresideniraa Matamua e te Pŭpŭ no te Tino Ahuru Ma Piti Aposetolo parauraa i teie parau : « Te aʻo nei matou i te mau metua e i te mau tamarii ia haafaufaa na mua roa i te pureraa utuafare, te pureraa pô utuafare, te haapiiraa i te Evanelia e te arataʻiraa, e te faatupuraa i te mau ohipa amui na te utuafare. Teie râ, e nehenehe atoa i te tahi atu mau aniraa maitai e aore râ, mau ohipa e ravehia, eiaha râ te tiʻaraa hanahana o te mau hopoiʻa e mauhia e te mau metua e to te mau utuafare atoa ia faateahia » ( « Rata na te Peresideniraa Matamua », Liahona, ditema 1999, 1).
Na roto i te haehaa e te faaroo a vaiiho ia tatou ia faaapî i ta tatou fafauraa i te pee i te mau peropheta, te mau hiʻo, e te mau heheu parau i roto i te mau mea atoa. Ia faaroo tatou e ia haapiihia e ia haapuaihia e te feia e mau nei i te mau taviri no te basileia. A haere mai ai tatou i teie nei amuiraa, ia tauihia to tatou aau, ia tupu mai te hoê hinaaro rahi ia rave i te maitai (hiʻo Alama 19:33), e ia riro ei mau melo tumu i roto i te paturaa i te hoê niu varua o te faatiʻa i te Ekalesia i roto i to tatou tuhaa fenua i te ao nei. Na roto i te iʻoa o Iesu Mesia ra, amene.