Ñandejeroviareko Tupã ha Hembiapóre
Opavave jahekava’erã ñane testimónio tee Jesucristo-gui, jajoko ñane pasiõkuéra, ñañearrepenti ñane angaipakuéragui ha ñandejeroviareko Tupã ha Hembiapóre.
Octubre ohasava’ekuépe, añehenói, presidente M. Russell Ballard ha élder Jeffrey R. Holland ndive, rovisita hag̃ua Reino Unido, mbohapyvéva roservihaguépe misionero ramo ore mitãme. Roguerekókuri privilegio rombo’e ha rotestifikávo, ha avei rovivi jeývo umi tupao rembiasakue Islas Británicas-pe, che tatarabuelo Heber C. Kimball ha iñirũnguéra ha’e haguépe umi misionéro peteĩha.1
Presidente Russell M. Nelson, opukávo ko asignasiõre, he’i napy’ỹi oñehenoiha mbohapy apóstol-pe ovisita haĝua upe área oservi haguépe hikuái misionero ramo imitãme. Ohechakuaa opavave oñehenoiseha ovisita haĝua imisiõ ypykue. Tuicha pukavy hováre reheve omyesakã mbykymi pe precedente. Oĩrõ ambue mbohapy apóstol oserviva’ekue oñondie upe misiõme ojapo 60 áño, upéicharõ ikatúta avei ohupyty peichagua asignasiõ.
Añembosako’i haĝua pe asignasiõrã, amoñe’ẽ jey Heber C. Kimball rekove ojehaiva’ekue inieto Orson F. Whitney-re, areve oñehehoiva’ekue apostolado-pe. Ko aranduka ome’ẽ’akue chéve che sy marangatu arekorõguare 7 áño. Roñembosako’íkuri hína roho haĝua pe monuménto “Kóva ha’e pe tenda” dedikasiõrã 24 de julio 1947-pe, presidente George Albert Smith rupive.2 Ha’e oipota che aikuaave che ypykue Heber C. Kimball-gui.
Ko aranduka oreko peteĩ momarandu hypy’ũva oñembojáva presidente Kimball rehe imba’eguasúva ko’ã ñande ararã. Akomparti mboyve penendive ko momarandu, pehejami tame’ẽ peteĩ contexto’imi.
Profeta Joseph Smith oĩ aja Liberty ka’irãime, umi apóstol Brigham Young ha Heber C. Kimball oreko responsabilida, umi circunstancia vaiete guýpe, osupervisa haĝua Santokuéra je’ói Misuri-gui. Hetave tekotevẽkuri upe je’ói gobernador Lilburn W. Boggs ome’ẽ haguére upe exterminio orden.3
Haimete 30 áño upe rire, Heber C. Kimball, upérõ Primera Presidencia-pe, oñemongetávo ko tembiasakuére peteĩ generasiõ pyahu ndie, ombo’e, “Ha’emíta peẽme, heta pende apytépe pehechataha ára peguerekotahápe opaichagua problema, prueba ha ñemuña ikatúva pegueropu’aka, ha heta oportunida pehechauka haĝua peẽ pendejeroviarekoha Tupã ha Hembiapóre.”4
Heber he’ive: “Pegueropu’aka hag̃ua umi jehasa’asy oúva hína, tekotevẽta peikuaa pendejeheguiete ko tembiapo añeteguaha. Umi jehasa’asy ha’e ho’átahápe umi kuimba’e térã kuña ndoreikóva pe kuaapy térã testimonio personal. Ndapeguerekóirõ gueteri upe testimónio, pejapo oĩporãva ha pehenói Tupã réra ha ani pepyta [pehupyty peve] pe testimónio. Ndapejapóirõ upéva ndapepytamo’ãi. … Oĝuahẽta ára ni peteĩ kuimba’e ni kuña ikatutaha opersevera tesape imba’ẽ’ỹva reheve. Opavave oñeisãmbyhyva’erã upe tesape rupi orekóva hi’ángape. … Ndapeguerekóirõ, ndaikatumo’ãi pepyta; upévare peheka Jesús testimonio ha pejejagarra hatã hese, oĝuahẽ vove umi prueba ára ani hag̃ua peñepysãnga ha pe’a.”5
Opavave ñaikotevẽ peteĩ testimonio personal Tupã rembiapo-gui6 ha Jesucristo función fundamental-gui. Doctrina ha Konveniokuéra sección 76 oñe’ẽ umi mbohapy grado de gloria rehe ha ombojoja pe gloria celestial kuarahy rehe. Upéi ombojoja rréino terrestre jasy rehe.7
Iñinteresánte kuarahy orekoha hesape tee, ha katu jasy ohupyty hesape ambuévagui ha ohechaukánte upe tesape, térã oreko “tesape porupyréva” Oñe’ẽvo Rréino terrestre rehe, versículo 79 he’i, “Koʼãva haʼe umi ndaipyʼaguasúiva Jesús testimóniope.” Ndaikatúi jahupyty pe Rréino Yvagagua ha jaiko Tupã upe Túvandi tesape porupyréva reheve; ñaikotevẽ ñane testimónio tee Jesús ha iñevanhéliogui.
Jaiko peteĩ múndo tembiapovai hetahápe8 ha korasõkuéra ojere Tupãgui yvypóra tekombo’ekuéra rupive.9 Peteĩ ehemplo porãve Heber C. Kimball jepy’apýgui jahekava’erãha peteĩ testimonio Tupã Rembiapo ha Jesucristo-gui ojehechauka Alma rekombo’épe mbohapy ita’yrakuérape—Helamán, Shiblón ha Coriantón.10 Mokõi ita’yrakuéra ijeroviarekókuri Tupã ha Hembiapóre Ha katu peteĩ ita’ýra oiporavo vai. Chéve ĝuarã pe he’ise tuichaveha Alma rekombo’épe niko ome’ẽha peteĩ túvaicha ita’yrakuéra ñeimeporãrã.
Alma jepy’apy peteĩha, Heber C. Kimball-cha, niko toreko peteĩteĩ hikuái peteĩ testimónio Jesucristo-gui ha taijeroviareko Tupã ha Hembiapóre.
Alma rekombo’e hechapyrãitéva ita’ýra Helamán-pe, ojapo peteĩ promesa pypuku opavave umi “omoĩva ijerovia Tupã rehe ojejokotaha ijepyʼapýpe, ha ijejopy, ha ijehasaʼasýpe, ha oñemopuʼãta ára pahápe.”11
Jepe Alma orekókuri peteĩ manifestasiõ ohechahápe peteĩ ánhel, upéva nameméi. Umi impresiõ ohejáva pe Espiritu Santo ojehechave. Umi impresiõ ikatu iñimportánte avei umi ánhel jehechaukáicha. Presidente Joseph Fielding Smith ombo’e: Umi impresiõ Espirirtu Santo ohejáva ñane ángape tuicha imba’eguasuve peteĩ visiõgui. Pe Espiritu oñe’ẽrõ ñande Espiritu-pe, pe impresiõ ohejáva ñane ángape hasyve oñembogue.”12
Upéva ñandegueraha Alma rekombo’e ita’ýra mokõiha Shiblón-pe. Shiblón hekojoja iñermáno Helamán-cha. Pe tekombo’e ahechaukaséva niko Alma 38:12, he’íva pe parte-pe, “ha eñehaʼã avei ejejoko opa ne rembipotápe, nerenyhẽ hag̃ua mborayhúgui.”
Freno niko peteĩ ñe’ẽ iñinteresánteva. Jaikorõ kavaju ári jaiporu pe freno jagia hag̃ua chupe. Peteĩ sinónimo porã ikatu ha’e, sãmbyhy, mboguata, jejoko. Antiguo Testamento omombe’u ñandéve jasapukaihague vy’águi jaikuaávo jaguerekotaha tete físico.13 Ko tete ndaivaíri – iporãiterei ha iñimportánte – ha katu oĩ tembipota, ndojeporu porãirõ ha ndojejoko porãirõ ñanemomombyrykuaa Tupã ha Hembiapógui ha ikatu ojapovai ñane testimóniore.
Ñañe’ẽmi mokõi tembipota en particular rehe: peteĩha, pochy ha mokõiha luhúria.14 Iñinteresante mokõivéva ndojejoko porãirõ ikatu ogueru tuicha py’arasy, ombogue Espiritu influencia ha ñanemomombyrykuaa Tupã ha Hembiapógui. Pe aña oiporu opa oportunida orekóva omyenyhẽ hag̃ua ñande rekove ñerairõ ha tekovai ra’angakuéra reheve.
Oĩ familia, peteĩ ména térã tembireko ipochy vove ombyepoti jepi iména térã hembirekópe térã peteĩ ta’ýrape. Julio-pe, aĩkuri peteĩ Foro parlamentario-pe oĩháme opa umi partido Reino Unido-gua, Londres-pe.15 Pe ñerairõ kuña ha mitãrusukuéra kóntrape ojehechauka peteĩ problema mundial tuicháva ramo. Ñerairõ ári, ambuekuéra ojapo abuso verbal. Pe proklamasiõ familia rehegua he’i ñandéve: “Umi otrata vaíva iména, hembireko térã ita’ýrape peteĩ ára omombe’uva’erã Tupã renondépe.”16
Presidente Nelson oenfatisa mbarete kóva kuehe pyhareve.17 Pemoĩmi pene akãme, jepe pende tuvakuéra pendeguerekovai térã nahániri ramo, peẽ ndapejapomo’ãiha abuso físico, verbal térã emocional pene ména, tembireko térã ta’yrakuérape.
Ko’ã ñande árape, peteĩ desafio tuicháva niko pe ñorairõ ha abuso verbal ohóva umi tema social rehe. Heta jey, pe pochy ha ñe’ẽ vai omyengovia upe jepy’amongeta, ñemongeta ha civismo-pe. Heta ohejarei pe Salvador Apóstol iñantiguovéva, Pedro, rekombo’e, jahekava’erãha umi cualidades cristianas oikehápe jejoko, paciencia, divinida, py’aporã ha karida.18 Avei oheja rei pe cualidad cristiana ha’éva ñemomirĩ.
Jajoko rire ñandepochy ha ambue rembipotakuéra, jaguerahava’erã avei peteĩ vida moral ipotĩva ñaisãmbyhy porãvo umi ñane pensamiento, ñane ñe’ẽ ha jajapóva. Jajehekýiva’erã pornografía-gui, jahecha porã mba’épa jahechauka hína ñande rógape ha ñamboyke opaichagua teko ivaíva.
Kóva ñandegueraha Alma rekombo’e ita’ýra Coriantón-pe. Ojoavývo iñermanokuéra Helamán ha Shiblón-gui, Coriantón ojapókuri peteĩ transgresión moral.
Coriantón oparticipa haguére tekovaípe, tekotevẽkuri Alma ombo’e chupe arrepentimiénto rehegua. Ombo’eva’erãkuri chupe upe angaipa vaikue ha mba’éichapa oñearrepentiva’erã.19
Upéicha, Alma rekombo’e preventivo niko tojejoko umi tembipota, ha katu hekombo’e umi ojapyharava’ekue pe léire ha’e oñearrepentiva’erãha. Presidente Nelson ome’ẽ miembro-kuérape tekombo’e pypuku arrepentimiento-gui Conferencia General Abril 2019-guápe. Ha’e omyesakã porã arrepentimiénto ha’eha parte integral ñande rekovépe. Arrepentimiento ndaha’éi peteĩ mba’e oikóva sapy’aite, ha’e peteĩ mba’e oiko meméva. Péva ha’e kláve jaguereko hag̃ua vy’apavẽ ha py’aguapy mental. “Pe arrepentimiento diario ha’e pureza rape, ha pureza ogueru pu’aka.20 Coriantón ojapo rire presidente Nelson ombo’e’akue oñearrepentiva’erã pya’ete oñepyrũvo oreko umi pensamiento vai. Ndoikoiva’erãmo’ã umi tembiapo vaiete.
Tekombo’e paha Alma ome’ẽva’ekue ita’yrakuérape niko peteĩ doctrina imba’eguasuvéva opa escriturakuérape. Tekombo’e paha Alma ome’ẽva’ekue ita’yrakuérape niko peteĩ doctrina imba’eguasuvéva opa escriturakuérape.
Alma otestifika Cristo oguenohẽtaha umi angaipa.21 Pe Salvador expiasiõ’ỹre, pe hustísia principio eterno oikotevẽtakuri jehavira.22 Salvador expiasiõ rupi poriahuvereko ikatu oprevalese umi oñearrepentiva’ekuépe ĝuarã, ha oheja chupekuéra oho jey Tupã rendápe. Jajapo porãne jajepy’amongetávo upe doctrina hechapyrãvare.
Avavete ndaikatúi oho jey Tupã rendápe hembiapo porã rupivénte; Opavave ñaikotevẽ upe Salvador sacrificio-re. Opavave ojapo angaipa, ha Jesucristo expiasiõ rupive añónte ikatuha jahupyty poriahuvereko ha jaiko jey Tupã ndive.23
Alma avei ome’ẽ tekombo’e iporãmbajepéva Coriantón-pe opavave ñandéve ĝuarã jahasava’ekue térã jahasava’erã pe arrepentimiento proceso rehe, tamichĩ ñane angaipakuéra térã tatuichave Coriantón angaipakuéraicha. Versíkulo 29 kapítulo 42-pe he’i, “Ha koʼág̃a, che raʼy, che ndaipotavéima reheja ndejopy koʼã mbaʼe, ha eheja tandejopy ne angaipakuérante, pe pyʼapy reheve ndeguerahátava arrepentimiéntope.”
Coriantón ohendu Alma rekombo’e ha mokõivéva oñearrepenti ha oservi honorablemente. Pe Salvador expiasiõ rupive, opavave ohupytykuaa ñemonguera.
Alma ha Heber árape ha añetehápe ñande árape, opavave jahekava’erã ñande testimónio tee Jesucristo-gui, jajoko ñane pasiõkuéra, ñañearrepenti ñane angaipakuéragui ha jajuhu py’aguapy Jesucristo Expiasiõ rupive ha ñandejeroviapy Tupã ha Hembiapóre.
Peteĩ mensáhe ramoitévape ha ko pyharevépe presidente Russell M. Nelson he’i kóicha: “Ajerure’asy peẽme tapeñangareko pende testimónio Jesucristo-gui. Pemba’apo pehupyty hag̃ua pe testimonio; Pemba’apo pehupyty hag̃ua pe testimonio; Peñangareko hese. Pemongaru okakuaa haĝuaicha, Upéi pejesareko umi milagro oikótavere pende rekovépe.”24
Cheaguijeterei ko’áĝa ñahendutágui presidente Nelson-pe. Atestifika presidente Russell M. Nelson ha’eha Tupã proféta ñande árape ĝuarã. Aguerohayhu ha añongatu’atã inspirasiõ ha gía jahupytýva ha’e rupi.
Ñandejára Jesucristo apóstol ramo ame’ẽ che testimónio añete pe Salvador divinidágui ha Ijexpiasiõ añeteguágui, Jesucristo rérape Amén.