Ñembojoajúpe Ñandejárandi
Upe Jesucristo evangelio restaurado omombe’u kuña ha kuimba’e ñembojoaju rehegua principio oĩva’erãha tekove yvy ariguápe yvagapeguáicha.
Umi romenda rire mése ñepyrũme, che rembireko ahayhuetéva he’i oestudiaseha músika. Ame’ẽsévo chupe pe oipotáva, ambosako’i peteĩ ñeha’ãrõ’ỹ tuicháva che mborayhúpe g̃uarã. Aha peteĩ oñevendehápe umi instrumento musical ha ajogua chupe jopóiramo peteĩ piáno. Kyre’ỹme amoĩ kuatia jejogua rehegua peteĩ kaha’ípe peteĩ ñemosãha porãitére ha ame’ẽ chupe, aha’ãrõvo peteĩ ñemboaguyje mbohovái kyre’ỹ iménape tuicha oporohayhukuaa ha horývare.
Oipe’ávo upe kaha’i ha ohecha oĩva ipype, omaña cherehe mborayhu reheve ha he’i, “Oh, che mborayhu, nderechapyrãite! Ha katu ehejami taporandu ndéve: kóvapa peteĩ jopói térã peteĩ ojedevéva?” Roñemongeta rire upe oñeha’ãrõ’ỹvare, rodesidi rokansela upe jejogua. Roiko peteĩ presupuesto estudiantil reheve, ojapoháicha heta umi imitãva omendaramóva. Ko experiencia chepytyvõ ahechakuaa hag̃ua ko principio importancia oĩva’erãha opa ñembojoaju peteĩ relación matrimonial-pe ha mba’éichapa ojejapóramo, ikatu orepytyvõ che rembireko ha chéve peteĩnte hag̃ua korasõ ha apytu’ũme.1
Upe Jesucristo evangelio restaurado omombe’u kuña ha kuimba’e ñembojoaju rehegua principio oĩva’erãha tekove yvy ariguápe yvagapeguáicha. Peteĩteĩ oguerekóramo jepeve umi atributo ha responsabilidad imba’e teéva, kuña ha kuimba’e ojoja imba’eguasu ha iñesencial umi ojapova’erãme Tupã plan de felicidad-pe ita’yrakuérape g̃uarã.2 Kóva ojehecha ñepyrũmby guie Ñandejára he’ívo “noiporãiha pe kuimba’e oĩ ha’eño; upévare, [Ha’e ojapotaha] chupe peteĩ pytyvõhára iporãmbajepéva.”3
Pe Ñandejára plan-pe, peteĩ “pytyvõhára iporãmbajepéva” ha’ékuri peteĩ iñirũ oguata jojátava Adán-ndi ñopytyvõme.4 Upéicha, Eva ha’ékuri peteĩ yvága jehovasa Adán rekovépe. Umi naturalesa divína ha ij-atributo espiritual rupive, ojapo Adán omba’apo joja hag̃ua hendie ohupytývo oñondive upe Tupã plan de felicidad opa humanidad-pe g̃uarã.5
Jahechami mokõi principio fundamental omombaretéva pe kuimba’e ha kuña ñembojoaju. Upe principio peteĩha ha’e opavave peteĩcha Tupã rovái.6 Pe evanhélio doctrina-pe he’iháicha, kuña ha kuimba’e ojojogua’ỹ ndoipe’ái umi promesa eterna Tupã oguerekóva Ita’ýra ha Itajyrakuérape g̃uarã. Peteĩva ndorekohetavéi gloria celestial posibilida ambuévagui pe eternidad-pe.7 Pe Salvador-ete ñaneinvita opavavépe, Tupã ra’ykuérape, “tajaju Hendie ha japartisipa Imarangatúgui, ha avavégui nombotovéi ou hag̃ua Hendápe.”8 Upéicha, ko situasiõme, opavave ñandejoja Hovake.
Umi omendáva oikuaa ha omoingéramo ko principio, ndojehechái upe hogapy presidente térã vicepresidente ramo. Ndaipóri tuichave ni michĩvéva upe relación matrimonial-pe, ha avave ndoguatái tenonde térã ambue tapykuépe. Oguata hikuái ojoykére, ojojáva, pe Tupã lináhe divínoicha. Oiko chuguikuéra oñopeteĩnte, potapy ha propósito-pe Ñande Ru Yvagagua ha Jesucristo-ndi,9 odirihi ha oguerahávo oñondive pe ogapy ñembojoaju.
Peteĩ sosieda jojápe, “mborayhu ndaha’éi posesión, sino participación, … Ko creación joja parte ha’éva ñande vocación humana.”10 “Participación añetépe, ména ha tembireko ojoaju pe unida mba’apojojápe peteĩ ‘domínio ijapyra’ỹvape’ umi ‘medio obligatorio-’ỹme’ ombosyrýtava tekove espiritual chupekuéra ha iñemoñarépe g̃uarã ‘umi siglo aja.’”11
Pe principio mokõiha irrelevánteva ha’e Regla de Oro, ombo’eva’ekue Salvador Sermón del Monte-pe: “Ha peipotaháicha tekovekuéra ojapo penendive, upéicha avei pejapo peẽ hendiekuéra.”12 Ko principio ohechauka peteĩ actitu oñondiverã, reciprocida, joaju ha odepende ojuehe ha oñemboguapy upe mandamiénto mokõiha tuichaitépe: “Rehayhúta nde rapichápe, nde rejehayhuháicha.”13 Ojehe’a ambue umi atributo cristiano ndive, py’aporã, tekoporã, py’aguapy ha marangatu.
Ojeikuaa porãve hag̃ua ko aplicación principio apo, ikatu ñamaña pe vínculo sagrado ha ijapyra’ỹvare Tupã omoĩva’ekue ñande ru ypykue apytépe, Adán ha Eva. Oiko chuguikuéra peteĩ to’ónte,14 ojapóvo peteĩ dimensión joaju rehegua ohejáva oguata joja hikuái respeto, aguyje ha mborayhúpe, hesaráivo ijehegui ha ohekávo ambue ñeimeporã upe iguatápe eternida gotyo.
Umichaguaite característica ha’e umi jahekáva ñemenda ojoajúvape ko árape. Upe témplo sellamiénto rupive, peteĩ kuña ha kuimba’e oike ñemenda santo orden-pe upe konvénio pyahu ha ipaha’ỹvape. Ko orden del sacerdocio rupi, omog̃uahẽ umi tovasapy ijapyra’ỹva ha poder divino ogueraha hag̃ua umi hogagua asuntokuéra oikove aja hikuái umi konveniokuéra ojapova’ekuéicha. Upe guie, oho tenonde interdependiente-háicha ha Ñandejára pytyvõmbaitépe, uvei peteĩteĩ umi responsabilidad divinamente oñeme’ẽva’ekue onutri ha opresidívo hogapýpe.15 Ñeñangareko ha jepresidi ha’e umi responsabilida oñondivegua ha oñembojoapýva, he’iséva sy ha tuvakuéra “oĩha obligado oñopytyvõvo socio jojáramo”16ha okompartívo peteĩ liderazgo joja hogapýpe.
“Ñangareko he’ise ñemongaru, mbo’e ha pytyvõ” umi hogayguápe, ojehupytýva oipytyvõvo chupekuéra “oikuaa hag̃ua umi Evanhélio añetegua ha omongakuaávo upe fe Túva Yvagagua ha Jesucristo-re” peteĩ mborayhu jeikópe. Jepresidi he’ise “umi ogaguápe ñeipytyvõ ojevy hag̃ua oiko Tupã ndive. kòva ojejapo ojeservi ha oñembo’évo py’aguapy ha mborayhu potĩme.” Avei oike ipype “umi ogagua jedirihi ñembo’e memépe, evanhélio estudio ha ambue ñetupãitũme. Tuvakuéra omba’apo peteĩcha,” esegívo Jesucristo ejemplo, “okumpli hag̃ua ko’ã [mokõi tuichaite] responsabilida.”17
Iñimportánte jahechakuaa pe óga jegueraha oguerahaha upe modélo patriarcal, oĩ iñambueha ojuehegui umi Tupao sacerdocio liderazgo aspecto-pe.18 Pe modélo patriarcal-pe oike umi tembireko ha ména ha’eha responsables directamente Tupã rovake umi ogagua responsabilida ñekumplíre. Ojerure peteĩ ñembojoajupaite, peteĩ ñekumpli ojeipotáva opa umi principio rectitu rehegua ha responsabilida, ha ome’ẽva oportunida ñemongakuaápe g̃uarã peteĩ oĩháme mborayhu ha ñopytyvõ ryepýpe.19 Ko’ã responsabilidad especial nde’iséi jerarquía ha ndoipe’ái oimeháichagua abuso térã percepción autorida extralimitación rehegua.
Upe Adán ha Eva experiencia, oho rire Jardín del Edén-gui, ohechauka porãite mba’épa he’ise upe oño-dependencia peteĩ sy ha peteĩ túva apytépe oñangareko ha opresidi hag̃ua hogaguápe. Oñembo’eháicha Moisés libro-pe, omba’apo oñondive oñemitỹ hag̃ua yvy isyva ry’áire ome’ẽ hag̃ua hogayguakuérape ñeimeporã hetépegua;20 ogueru mitã múndope;21 ohenói oñondive Ñandejára réra ha ohendu Iñe’ẽpu “Jardín del Edén rape gotyo rire”;22 oguerog̃uahẽ umi mandamiento Ñandejára ome’ẽva’ekue chupekuéra ha oñeha’ãvo oñondive iñe’ẽrendu hag̃ua hesekuéra.23 Upéi “oikuaauka [ko’ã] mba’e imitãguérape kuña ha kuimba’éva”24 ha “ndohejái Tupãme ñembo’e” oñondive oikotevẽháicha.25
Che hermano ha hermana-kuéra pejehayhuetéva, nutri ha jepresidi ha’e oportunida, ndaha’éiva umi limitación exclusiva. Peteĩ tekove ikatu oreko responsabilida peteĩ mba’ére, ha katu, ikatu ndaha’éi ojapóva ha’eño. Tuvakuéra oporohayhúva oikuaa porãvo ko’ã mokõi responsabilida principal, oñeha’ãta oñondive omo’ã ha oñangareko hag̃ua imitãnguéra ñeimeporã físico ha emocional. Avei oipytyvõ ombohovái hag̃ua umi peligro espiritual ñande aragua onutrívo Ñandejára ñe’ẽ porãre ojerrevelava’ekue Iprofetakuérape.
Ména ha tembireko añopytyvõro jepe umi responsabilida divinamente oñeme’ẽva’ekuépe chupekuéra, “pe kapasida’ỹ, ñemano térã ambue circunstancia ikatu oikotevẽ peteĩ adaptación individual.”26 Sapy’ánte, peteĩva umi omendáva orekóta responsabilida hembiapo joja mokõivévaicha, taha’e sapy’a térã akoiete g̃uarã.
Ramoite aikuaa peteĩ hermana ha peteĩ hermano oikóva péicha. Tuvakuéra soltéroramo, peteĩteĩ ha’ekuéra, hogapýpe ha Ñandejára ñepytyvõme, ha odesidi odedikapaite hekove imitãnguéra ñeñangareko espiritual ha temporal-pe. Nomaña’ỹi umi témplo konveniokuéra ojapova’ekue Ñandejára ha lpromesakuéra ijapyra’ỹva uvei umi idivorsio rire. Mokõivéva oheka Ñandejára pytyvõ opa mba’épe oñeha’ã memévo ohóvo ogueraha umi idesafío ha oguata konveniokuéra rapére. Ojerovia Ñandejára ohechataha umi oikotevẽva, ndaha’éi ko tekovépe año sino opa eternidad-re. Mokõivéva onutrívo imitãnguérape ombo’évo kunu’ũme, py’aguapy ha mborayhu potĩme, uvei ohasa aja hikuái umi circunstancia hasýva hekovépe. Aikuaaháicha, ko’ã mokõi tuvakuéra soltero ndokulpái Tupãme ijehasa’asykuérare. Upéva rãngue, oha’arõ peteĩ fulgor perfecto de esperanza ha jerovia umi Ñandejára rovasapy oñongatúva chupekuéra g̃uarã.27
Hermano ha hermanakuéra, pe Salvador omoĩ ehémplo perfecto ñemopeteĩ ha armonía-gui propósito ha doctrina-pe ñande Ru Yvagagua ndive. Ha‘e oñembo‘eva‘ekue Idiscipulokuéra rehe, he’ívo, “Peteĩnte hag̃ua hikuái; nde, Túva, ha‘eháicha chepype, ha che ndepype, ha ha’ekuéra peteĩnte hag̃ua avei ñandepype: … ha’ekuéra peteĩnte hag̃ua, jepe ñandeicha ñanepeteĩ.”28
Atestifika ñande, kuña ha kuimba’ekuéra, ñamba’apórõ oñondive peteĩ sosieda añete ha ijojávape, javy’áta upe ñembojoaju ombo’eva’ekue Salvador ñakumplívo umi responsabilida divina ñande relación matrimonial-pe. Apromete peẽme, Cristo rérape, umi korasõ oĩtaha “joajúpe ñemopeteĩme ha mborayhúpe peteĩva ambuévare,”29jajuhúta vy’ave ñande rekovépe ñande rape eternidad gotyo, ha ñande kapasida jajoservívo oñembohetaitereitaha.30 Ame’ẽ che testimónio ko’ã añeteguágui, Salvador Jesucristo réra marangatúpe, amén.