Jesucristo ha’e mitãrusukuéra pu´aka
Pejerovia Jesucristo-re. Ha’e pendegueraháta tape porãre. Ha’e niko pene mbarete.
Añembosako’ívo ko mensaherã ko árape, añandu mbaretékuri añe’ẽva’erãha umi mitãkuña ha mitãkaria’ykuérape.
Avei añe’ẽ hína umi imitãva’ekuépema, jepe umi naimandu’avéimava imitã hague.
Ha añe’ẽ opa umi ohayhúva ñane mitãrusukuérape ha oipotava ohoporãmba chupekuéra hekovépe.
Ko generasiõ pyahúpe ĝuarã, che areko peteĩ mensáhe ñande Salvador Jesucristo-gui peẽme g̃uarãite.
Pe Salvador mensáhe ndeve g̃uarã
Che angirũnguéra pohayhuetéva, pe Salvador oĩramo ko’ápe ko’aĝaite, mba’épa he’íne peẽme?.
Che ha´e oñepyrũneha omombe´úvo peẽme mba’eichaitépa penderayhu. Ha’e ikatu he’i upéva ñe’ẽme rupive, ha katu avei osyry mbareténe – Ipresensiaitéguivoi– ojejavy’ỹ hag̃uaicha, og̃uahẽvo pene korasõ pypukuvehápe, omyanyhẽvo opa pene ánga!
Upevére, opavave ñanekangy ha ñane´imperfecto rupi, ikatu ou pene akãme mayma jepy’apy. Ikatu penemandu’a umi jejavy pejapova’ekuére, umi ára peñeme’ẽva’ekuépe jeipy’ara’ãme, umi mba’e ikatúva raka´e ndapejapói - térã pejapoporãsevévakuri.
Pe Salvador oñandúne upéva ha he’íne, umi ñe’ẽ reheve he’iva’ekue escriturakuérape:
“Ani pekyhyje”1
“Ani reduda.”2
“Tanekyre´ỹke.”3
“Ani ojepy’apy pene korasõ.”4
Ndaroviái Ha’e ohustifikaneha umi mba´e pejavýva. Ha’e nomomichĩmo’ãi umíva. Nahániri, ha katu Ha’e ojeruréne peẽme tapeñe’arrepenti, tapeheja tapykuépe pene angaipakuéra, tapeñemoambue, Ha’e ikatuhag̃uáicha peneperdona. Penemomandu’áta ojapo 2.000 ary Ha’e ojagarra hague Ijehe umi angaipa ikatu hag̃uáicha peẽ peñe’arrepenti. Upéva niko oike pe plan vy´a rehegua ñande Ru Yvagagua ñanderayhuetéva ome’ẽva’ekuépe ñandéve.
Jesús ikatu oseñala umi konvénio Hendive, pejapova’ekue peñemongaraívo ha pembopyahu kada peparticipa Santa Cena-gui, ome’ẽ peẽme peteĩ conexión especial Hendive. Conexión umi Escritura odescrivíva pejoajurõguáicha yugo-pe, Ipytyvõ reheve, peguerahakuaa hag̃ua oimeraẽichagua mba’e pohýi.5
Aguerovia pe Salvador Jesucristo oipotáne pehecha, peñandu ha peikuaa Ha’eha pende mbarete. Ipytyvõ reheve ndaipóri mba’eve ndaikatúiva pehupyty. Pene potencial ndaijapýrai. Ha’e oime oipota pejehecha pendejupe Ha’e penderechaháicha. Ha upéva ojoavy ko múndo penderechaháicha.
Pe Salvador he´i va´eramo´ã, ñe’ẽ añete reheve, Peẽ ha’eha Tupã Ipu’akapáva rajy térã ra’ykuéra. Pende Ru Yvagagua niko pe teko igloriosovéva ko yvagapýpe, henyhẽva mborayhu, vy’apavẽ, potĩmbyre, marangatu, tesape, grásia ha añetégui. Ha Ha’e niko oipota peteĩ ára peẽ pehupyty opa mba’e Ha’e orekóva.6
Upévare niko peẽ peime ko yvy ári; peñemoarandu, pekakuaa ha peprogresa hag̃ua, ha oiko hag̃ua pendehegui opa mba’e pende Ru Yvagagua oipotáva´ekue pendejapórõ guare.
Oikokuaa hag̃ua upéva, Ha’e ombou Jesucristo-pe pende Salvador ramo. Upéva ha´e propósito tuichaite oĩva Iplan salvasiõ rehegua rapykuéri, Itupao, Isacerdocio, Escriturakúera ha opa mba’épe.
Upéva ha´e peg̃uahẽtahápe. Upéva penerenonderã. Upéva niko pende decisión!
Añetegua ha jeporavo
Tupã plan pende vy´arã korasõ niko ha´e pu’aka peiporavo hag̃ua.7 Añetehápe, pende Ru Yvagagua niko oipota peiporavo pe vy’apavẽ opave’ỹva Hendive, ha Ha’e penepytyvõta pehupyty hag̃ua upéva, ha katu araka’eve Ha’e napeneforsamo’ãi.
Upévare Ha’e oheja peẽme peiporavo: Tesakã térã pytũmby? Iporãva térã Ivaíva? Vy’apavẽ térã ñembyasy? Tekove ijapyra’ỹva térã ñemano espirirtual?8
Ndahasýivaicha upe jeporavo ajépa? Ha katu ko yvy ári, oimeháicha, hasyve hasyva’erãgui.
Pe problema ha’e ndajahechaporãiha jepi umi mba’e jaipotaháicha. Apóstol Pablo ombojoja ñamañarõguáicha “peteĩ váso rupive, pytũmbýpe.”9 Oĩ tuicha ñemoapañuai ko múndope mba’épa oĩ porã ha mba’épa oĩ vai. Añetegua oñemokarẽ ivaíva ojogua haĝua iporãha ha iporãva ivaiha.10
Ha katu peheka añetérõ pe añetegua – pe añetegua ijapyra’ỹva ha oñemova’ỹva – pende jeporavo hesakãve. Heẽ, peguerekota gueteri jeipy’ara’ã ha ñeha’ã. Ojehu gueteri mba’e vaieta. Umi mba’e oñeimo’ã’ỹva. Umi mba’e ñambyasýva. Ha katu peẽ peisãmbyhykuaa umíva peikuaávo mávapa peẽ, mba’érepa peime ko’ápe ha pejeroviárõ Tupãre.
Upéicharõ, moõpa pejuhukuaa añetegua?
Oĩ Jesucristo evanhéliope. Ha pe evanhélio plenitud oñembo’e Jesucristo Tupao Santokuéra Ára Pahapeguápe.
Jesucristo he’i, “Che ha’e tape, añetegua ha tekove; avave ndoúi Che Ru rendápe ndaha’éiramo Che rupive.”11
Peguerekórõ jeporavo iñimportánteva, Jesucristo ha Iñevanhélio restaurádo niko jeporavo iporãvéva. Peguerekórõ umi porandu, Jesucristo ha Iñevanhélio ningo ha´e ñembohovái iporãvéva. Peñandurõ penekangyha, Jesucristo ha’e pende mbarete.
Ha’e ome’ẽ pu’aka ikane’õvape; umi oñandúvape ndaipu’akaiha, Ha’e omombarete.
Umi oha’arõva Ñandejárape oñembopyahúta Ipu’aka rupive.12
Mitãrusukuéra Oñemombarete Hag̃ua
Penepytyvõ hag̃ua pejuhúvo pe Tape ha pehejávo Cristo doctrina toisãmbyhy pende rekove, Jesucristo Tupao Santokuéra Ára Pahapegua ombosako’i peteĩ tembiporu pyahu, peteĩ Para la fortaleza de la Juventud (Mitãrusukuéra Oñemombarete Hag̃ua) versiõ ojerrevisapyréva.
50 áño pukukue rupi, Mitãrusukuéra Oñemombarete Hag̃ua ha’ékuri ñesãmbyhy heta Santokuéra Ára Pahapegua mitãrusukuéra generasiõme g̃uarã. Añongatu katuetei peteĩ kópia che bolsillo-pe ha akomparti umi oikuaaséva ñande norma-kuéra ndive. Oñembopyahu ha ko’ág̃agua ombohovake porãve hag̃ua umi py’ara’ã ha ñeha’ã ñande árapegua. Para la fortaleza de la Juventud (Mitãrusukuéra Oñemombarete Hag̃ua) versiõ pyahu oĩma disponible en línea 50 ñe’ẽme ha avei oĩta disponible en forma impresa. Ha’éta pytyvõ mbarete peiporavo porã haĝua pende rekovépe. Peñemomba’emi hese ha pekomparti pene angirũnguéra ndie.
Ko Mitãrusukuéra Oñemombarete Hag̃ua versiõ pyahu ojehero Peteĩ sambyhy ojeporavo hag̃ua.
Ñamohesakã porã hag̃ua, sãmbyhy porãve perekokuaáva peiporavo hag̃ua niko ha´e Jesucristo. Jesucristo niko ha´e mitãrusukuéra mbarete.
Upévare Mitãrusukuéra Oñemombarete Hag̃ua propósito ha´e pendegueraha Hendápe. Penembo’e umi añetegua ijapyra’ỹva Iñevanhélio restaurádogui – añetegua omohesakãva mávapa peẽ, mávapa Ha’e ha mba’emba’épa pehupytykuaa Ipu’aka rupive. Penembo’e mba’éichapa ikatu peiporavo porã peiporúvo umi añetegua ijapyra’ỹva.13
Iñimportánte avei peikuaa mba’épa ndojapói Para la fortaleza de la Juventud (Mitãrusukuéra Oñemombarete Hag̃ua) Ndoiporavói penderehe. Nde’iri peẽme “héẽ” térã “nahániri” opávave jeporavo pembohovakeva’erãme. Mitãrusukuéra Oñemombarete Hag̃ua oñe´enfoka umi fundamento peiporavo porãve hag̃ua. Oñecentra umi valor, principio ha doctrina-kuéra rehe oñe’enfoka rangue opávave umi mba’e pejapokuaávare.
Ñandejára, Iprofetakuéra rupive, ñaneisãmbyhy meme upe dirección-pe. Ha’e ojerure’asy ñandéve “[ña]mbotuichave hag̃ua katupyry espiritual [ja]rekóva [ja]rrecibi hag̃ua revelasiõ.”14 Ha’e ñaneinvita “[ña]hendu Ichupe.”15 Ha’e ñanerenói jasegi hag̃ua Chupe ijyvateve ha imarangatuveháicha.16 Ha péicha avei ñañemoarandu káda semana Eju, Chesegi rupive.
Aguerovia pe ñesãmbyhy ikatuha ome’ẽ peẽme lista puku mba’eichagua aópa pemondeva’erã, mba’e ñe’ẽpa ndapejeiva’erã ha umi película ndapehechaiva’erã. Ha katu upéva oipytyvõtapa añetehápe peteĩ tupao mundial-pe? Peichagua método penembosako’ítapa añetehápe peikove hag̃ua peteĩ tekove Cristo-icha?
José Smith he’i, “Che ambo’e chupekuéra umi principio oĩporãva, ha ha’ekuéra oñeisãmbyhy ijupe.”17
Ha Rey Benjamín he´i itavayguakuéra Mormón Kuatiañe’ẽme: “ndaikatúi haʼepa peẽme opa mbaʼe ikatuháicha pejapo angaipa; oĩgui heta tape ha mbaʼe ikatuhápe jajapo angaipa, hetaitereígui ndaikatúi aipapa.”18
Réi Benjamín he’ive: “Ha katu péva ikatu haʼe peẽme, … peñangareko pendejeheha pene apytuʼũme oĩvare, ha pene ñeʼẽ ha penerembiapóre, ha pejesareko Tupã rembiapoukapykuérare, ha pepyta jeroviápe … Ñandejára[re], jepe pende rekove opa peve.”19
Oĩ vai piko jareko regla-kuéra? Nahaniriete katu. Opavave ñaikotevẽ umívagui ára ha ára. Ha katu noĩporãi ñañe´enfoka umi réglare añónte ñañecentra rangue ñande Salvador rehe. Peikuaava’erã umi mba’érepa ha mba’éichapa, ha upéi pekonsidera mba’épa oguerúta umi peiporavóva. Pejeroviava’erã Jesucristo-re. Ha’e pendegueraháta tape porãre. Ha’e niko pene mbarete.20
Doctrina añeteguáva pu’aka.
Mitãrusukuéra Oñemombarete Hag̃ua ipy’aguasu omomarandúvo Jesucristo doctrina. Ipy’aguasu pene´invitávo peiporavo porã hag̃ua pesegívo Cristo doctrina. Ha avei omombe’úvo umi jehovasa Jesucristo oprometéva umi Hape osegívape.21
Presidente Russell M. Nelson ombo´e: “Ne rembipota tuichavéva ha’erõ reheja Tupã taipu’akapa [nde rekovépe], … hetaite decisiõ hasy’ỹve. … Hetaite problema ndaha’evéima problema! Reikuaaporãve mba’éicha reje’arregla porãveta; Reikuaa mba’e rema’ẽ ha remoñe’ẽta, moõpa rehasáta ne tiempo ha máva ndive reñemoirũta; Reikuaa mba’épa rehupytyse; Reikuaa mba’eichagua persónapa … reipota oiko ndehegui.”22
Peteĩ norma ijyvvatevéva
Jesucristo oreko umi norma ijyvateitéva Iseguidor-kuérape g̃uarã Ha pe invitasiõ jaheka meme hag̃ua Hembipota ha javivi umi Hi’añetegua rupi niko norma ijyvatevéva!
Umi jeporavo temporal ha espiritual iñimportánteva ningo ndohoiva’erã umi preferencia personal, térã okonveníva térã ipopulárva rehe añónte.23 Ñandejára nde’ígui hína: “Pejapo pejaposéva.”
Ha’e he’i hína, “Eheja Tupã taipu’akapa.”
He’i hína: “Eju, chesegui.”24
He’i hína: “Peiko imarangatuve, ijyvateve ha iporãveháicha.”
Ha’e he’i: “Peneñe’ẽrendu che rembiapoukapykuérare.”
Jesucristo niko ñane rembiecharã oĩporãmbáva ha ñañeha’ãmbaite opa ñane ánga pu’aka reheve jasegui Chupe.
Che angirũnguéra pohayhuetéva, pehejami ta’e jey, pe Salvador oĩ ramo ko’ápe ko árape, Ha’e omombe’úne Imborayhu opave’ỹva ha, Ijeroviapaha penderehe. Ha’e he’íne peẽme ikatuha pejapo ko’ãva. Ikatuha pemopu’ã peteĩ tekove henyhẽva vy’a ha vy’apavẽgui Jesucristo ha’égui pende mbarete. Pejuhukuaa jerovia, py’aguapy, ñemo’ã, vy’apavẽ ha pertenénsia ko’ág̃a ha tapiaite ĝuarã, pejuhútagui opa umi mba’e Jesucristo-pe, Iñevanhélio ha Itupaópe.
Ko’ãvagui ame’ẽ che testimonio marangatu Ñandejára Jesucristo apóstol ramo, ha aguyje pypuku ha mborayhupópe penderehe aheja peẽme che korasõite guive che jehovasa, Jesucristo rérape. Amén.