Pene testimónio ñemongakuaa ha ñekomparti
Hermano ha hermana-kuéra, poinvita peheka hag̃ua oportunida peme’ẽ hag̃ua pene testimónio ñe’ẽ ha tembiapópe.
Ñepyrũmby
Umi moménto idesisivovéva tekovépe og̃uahẽ py’ỹi térã oñeha’arõ’ỹre, jepe penemitãite jave. Pehejami chéve takomparti peteĩ historia peteĩ secundaria-gua estudiante, Kevin, ojeiporavova’ekue oje’ói hag̃ua pe estádo okaháre peteĩ líderes estudiantiles evéntope, ha’e omombe’uháicha iñe’ẽtépe.
“Og̃uahẽ che turno fílape, ha pe registro-gua mba’apohára apariencia oficial rehegua oporandu che réra. Omaña ilísta ha he’i: ‘Nde ha’éra’e pe mitãrusu Utah-gua.’
“‘Ereséva chéve piko che’añónteha?’ Aporandu che.
“‘Héẽ, neañónte.’ Ome’ẽ chéve pe pláka che réra reheve he’íva ’Utah’ che réra guýpe. Añemoĩmbávo, añandu chemarkaha hikuái.
“Añeamontona upe hotel ascensor-pe ambue cinco secundaria estudiantekuéra ndive orekóva che etikétaicha. ’Nde, nde Utah-gua. Ndépiko mormón?’ oporandu peteĩ estudiánte.
“Añeñandu che renda’ỹvaicha opa umi líderes estudiantiles tetãgua ndive. ‘Héẽ,’ amoneĩ mbeguemi.
“‘Peẽ hína umi mitãrusu pegueroviáva José Smith-pe, he’iva’ekue ohechaha anhelkuéra. Añetehápe ndereroviái upéva, ajépa?’
“Ndaikuaái pe ha’étava. Umi estudiante-kuéra pe ascensor-pe omaña porã cherehe. Ag̃uahẽ ramo, ha opavave opensáma cheambueha. Añemoĩ’imi añedefende hag̃uáicha, ha katu ha’e upe rire: ‘Aikuaa José Smith ha’ehague peteĩ Tupã proféta’.
“‘Moõguipa ou upéva?’ Añeporandu. Ndaikuaáikuri arekoha chepype. Ha katu umi ñe’ẽ oñeñandu añeteguaha.
“‘Héẽ, oje’e chéve opavave peẽ ha’eha tavyrai irrelihiósova, he’i.
“Upévare, ou peteĩ páusa naikómodoiva ojepe’ávo upe ascensor rokẽ. Rombyaty aja ore ekipáhe, ha’e oguata pe pasíllore opukaitévo.
“Upémarõ, peteĩ ñe’ẽpu che atukupépe oporandu, ‘Nde, ndoguerekói piko mormon-kuéra ambue Biblia-ichagua?’
“Oh nahániri. Ani jeýmana. Ajere ha ahecha ambue estudiante oĩva’ekue ascensor-pe chendive, Christopher”.
“‘Héra Mormón Kuatiañe’ẽ,’ ha’e, ahejasévoma upe téma. Ambyaty che maléta ha añepyrũ aguata upe pasíllore.
“‘Upéva piko kuatiañe’ẽ ombohasava’ekue José Smith?’ oporandu.
“‘Héẽ, ha’e,’ ambohovái. Aguatánte ahávo, amboykesévo pe ñemotĩ.
“‘Néi, reikuaápiko mba’éichapa ikatu akonsegi peteĩ?’
“Ou sapy’a che akãme peteĩ Escritura-kuéra pasáhe umi aikuaava’ekue semináriope. ‘Natĩri Jesucristo evanhéliogui.’1 Upéva ou jave che akãme atĩ, aĩ haguére ñemotĩme.
“Pe semána hembývape upe escritura ndacherejái. Ambohovái heta umi porandu Tupao rehegua ikatuháicha ha heta añemoamígo.
“Ahechakuaa aĩha orgullóso che rreligiõre.
Ame’ẽ Christopher-pe peteĩ Mormón Kuatiañe’ẽ. Areve rire ohai chéve he’ívo oinvitahague misionero-kuérape hógape.
“Aikuaa natĩriva’erãha akomparti hag̃ua che testimónio”2
Cheinspira upe Kevin py’aguasu okompartívo itestimónio. Kóva py’aguasu ojerrepetíva opa ára umi tupaogua miembro ijeroviarekóvare múndo jerére. Akomparti aja umi apensáva, poinvita pejepy’amongetami hag̃ua ko’ã irundy ñeporandúre:
-
Aikuaa ha hesakãpa chéve mba’épa peteĩ testimónio?
-
Aikuaa mba’éichapa ame’ẽva’erã che testimónio?
-
Mba’épa umi apañuãi akomparti hag̃ua che testimónio?
-
Mba’éichapa añongatuva’erã che testimónio?
Aikuaa ha hesakãpa chéve mba’épa peteĩ testimónio?
Pene testimónio ha’e peteĩ posesiõ hepyetéva, py’ỹi oñembojáva umi ñeñandu espiritual ikyrỹivare. Ko’ã mba’e’andu oje’éjepi ñe’ẽ mbeguépe ha oje’e hese peteĩ ñe’ẽpu asy ha ipy’aguapýva.3 Ha’e pe añetegua jeguerovia térã jeikuaa, oñeme’ẽva testimónio espiritual-ramo Espíritu Santo influencia rupive. Ko testimónio jeguereko omoambuéta umi pejéva ha pejapóva. Umi pene testimonio elemento kláve, oñekonfirmáva Espiritu Santo rupi, oinklui ko’ãva:
-
Tupã ha’e pende Ru Yvagagua; peẽ ita’ýra. Ha’e penderayhu.
-
Jesucristo oikove. Ha’e Tupã Oikovéva Ra’y ha pende Salvador ha Redentor.
-
José Smith ha’e peteĩ Tupã proféta oñehenoiva’ekue orrestaura hag̃ua Jesucristo Tupao.
-
Jesucristo Tupao Santokuéra Ára Pahapegua ha’e pe Tupã Tupao rrestaurádo ko yvy ári.
-
Jesucristo Tupao rrestaurádo oñeisãmbyhy peteĩ proféta oikovévare ko’ã árape.
Aikuaápiko mba’éicha ame’ẽva’erã che testimónio?
Peẽ pekomparti pene testimónio pekompartívo umi peñandúva espiritual-mente ambuekuéra ndive. Tupaogua miembro-icha, peguereko umi oportunida pekomparti hag̃ua pene testimonio oral oñepresenta Tupaópe umi reunion formal-pe térã umi ñomongeta personal iformal’ivéva umi ñande rogaygua, amigo-kuéra ha ambue tekovekuéra ndive.
Ambuéicha pekompartiha pene testimonio ha’e tekojoja reko rupive. Pene testimonio Jesucristo-gui ndaha’éi pejévante, ha katu peẽ ha’éva.
Káda peme’ẽ testimonio oral térã pehechauka umi pejapóva rupive pene compromiso pesegívo Jesucristo-pe, peinvita ambuévape “ou hag̃ua Cristo-pe.”4
Umi tupaogua miembro-kuéra ha’e Tupã testígo opa moméntope, opa mba’épe ha opa tendápe.5 Umi oportunida pejapo hag̃ua kóva universo digital-pe peipurúvo ñane contenido inspirador térã pekompartívo contenido inspirador oñembosako’íva ambuévare nda’ipahái. Jatestifika jahayhúvo, ñakompartívo ha japoroinvitávo, jepe en línea. Umi ñande tweet, mensáhe directo ha publicasiõ orekóta peteĩ propósito yvate ha marangatuve jaiporúrõ umi redes sociales jahechauka haĝua mba’éichapa Jesucristo evanhélio omoldea ñande rekove.
Mba’épa umi apañuãi ñakomparti hag̃ua ñane testimónio?
Umi apañuãi pekomparti hag̃ua pene testimóniope ikatu oike pe ojeikuaa’ỹ mba’épa oje’éta. Matthew Cowley, peteĩva umi apóstoles ypykue, okomparti ko experiencia ohóvo peteĩ misión-pe cinco año pukukue Nueva Zelanda-pe 17 año orekóvo:
“Araka’eve ndacheresaraichéne umi che ru ñembo’e upe ahaha árape. Araka’eve nahendúiva peteĩ jehovasa porãve opa che rekovépe. Upéi, umi iñe’ẽ paha chéve g̃uarã estación-pe, ‘Che ra’y, resẽta ko misión-pe; re’estudiáta; reñeha’ãta reprepara umi ne sermón; ha sapy’ánte, reñehenóiramo, repensáta reime porãiteha preparado, ha katu reñembo’ývo, ne akã opytapaitéta nandi.’ Arekova’ekue upe experiencia hetave peteĩ javégui.
“Ha’e chupe, ‘Mba’e rejapo ne akã opytáramo nandi?’
“Ha’e he’i, ‘Nde, eñembo’y upépe ha opa ne ánga kyre’ỹ reheve, eme’ẽ testimónio José Smith ha’ehague Tupã oikovéva proféta, ha umi pensamiénto omyenyhẽta ne akã ha umi ñe’ẽ nde juru … opa umi ohendúva korasõ meve.’ Ha péicha che akã, oĩva jepi nandi che … misiõ … aja , ome’ẽ chéve oportunida ame’ẽ hag̃ua testimónio pe evénto tuichavévagui múndo historia-pe upe Maestro oñemongurusu rire. Pejapomína upéva sapy’ánte, che irũnguéra ha mitãkuñanguéra. Ndapeguerekóirõ mba’eve pejeva’erã, petestifika José Smith ha’ehague Tupã proféta, ha opa Tupao historia omyenyhẽta pene akã.”6
Upéicha avei, presidente Dallin H. Oaks okomparti, “Oĩ umi testimónio ojehupyty porãvéva ojeguerahávo umi py reheve umi tenype’ã rãnguégui oñembo’évo hesekuéra.”7 Pe Espíritu ome’ẽ testimónio oñe’ẽvape pe ohenduvapeguáicha.
Ambue obstáculo, Kevin historia oenfatisava’ekue, ha’e pe kyhyje. Pablo ohaiháicha Timoteo-pe:
“Tupã nome’ẽiva’ekue ñandéve kyhyje espíritu; sino pu’aka, ha mborayhu rehegua. …
“Upévare, ani retĩ ne testimónio Ñandejáragui.”8
Umi kyhyje ñeñandu ndoúi Ñandejáragui ha katu py’ỹi upe adversario-gui. Pe fe jeguereko, orekoháicha Kevin, ohejáta peẽme pesupera ko’ã ñeñandu ha pekomparti sasõme oĩva pene korasõme.
Mba’éicha añongatúta che testimónio?
Aguerovia peteĩ testimónio iñinatoha ñande pype; upevére, opyta ha ñamongakuaa porãve hag̃ua, Alma ombo’e ñamongakuaava’erãha ñane testimónio tuicha ñeñangarekópe.9 Jajapóvo upéicha, “oñembohapóta, okakuaáta ha ome’ẽta yva.”10 Kova’ỹre, “ipirúta.”11
Káda Primera Presidencia-gua miembro ojehayhuetéva he’i ñandéve mba’éichapa ñañongatuva’era peteĩ testimónio.
Presidente Henry B. Eyring ñanembo’e mborayhu reheve “jedeleita Tupã ñe’ẽme, ñembo’e añetegua, ha ñe’ẽrendu Ñandejára mandamiento-kuérare ojejapova’erã ñemopeteĩme ha tapiaite pene testimónio okakuaa ha oñakãrapu’ã hag̃ua.”12
Presidente Dallin H. Oaks ñanemomandu’a ñañongatu hag̃ua ñane testimónio, “tekotevẽ japartisipa Santa Cena-gui káda semána (tojehecha D&C 59:9) ñaime hag̃uáicha pe promesa porãitépe g̃uarã ‘akóinte jaguereko hag̃ua Ijespiritu [ñanendive]’ (D&C 20:77).”13
Ha Presidente Russell M. Nelson tory reheve oñemoñe’ẽ ramoite:
“Emongakuaa [ne testimónio] añetegua. …
“… Peñalimenta umi proféta ymaguare ha ko’ag̃agua ñe’ẽre. Pejerure Ñandejárape tapenembo’e mba’éichapa pehendu porãvéta chupe. Pehasave tiempo témplope ha historia familiar rembiapópe.
“… pejapo pene testimóniogui pende priorida tuichavéva.”14
Ñembopaha
Che hermano ha hermana-kuéra pejehayhuetéva, apromete peẽme peikuaa porãvévo pehóvo mba’épa peteĩ testimónio ha pekomparti, pesuperáta umi jeikuaa’ỹ ha kyhyje apañuãi, opermitítava peẽme pemongakuaa ha peñongatu ko peguereko hepyetéva, pene testimónio.
Jajehovasa jarekóre hetaite profetakuéra ymaguare ha ko’ag̃agua ehémplo ome’ẽ kyre’ỹva’ekue itestimónio.
Cristo omano rire, Pedro oñembo’y ha otestifika:
“Pehecha opavave peẽ … Jesucristo de Nazaret rérape, peẽ pemongurusuva’ekue, Tupã omoigove jeyva’ekuépe omanóva apytégui … ko kuimba’e oĩ ko’ápe pene renondépe. …
“… Ndaipórigui ambue téra yvága guýpe oñeme’ẽva kuimba’ekuérape, ikatuhápe jajesalva.”15
Amulek, osegívo upe Alma sermón fe rehegua, he’i mbarete: “Atestifikáta peẽme chejehegui ko’ã mba’e añeteguaha. Péina ápe, che haʼe peẽme, che aikuaaha Cristo outaha yvypóra ra’ykuéra apytépe, ojagarra hag̃ua hi’ári itavayguakuéra rembiapovaikuéra, ha oexpiataha yvóra angaipakuéra; Tupã Ñandejára he’ígui.”16
José Smith ha Sidney Rigdon, ohechávo pe Salvador oikovejeýva visiõ gloriosa, otestifika hikuái:
“Ha ko’ág̃a, heta testimónio oñeme’ẽ rire chugui, kóva ha’e pe testimónio, ipahaitéva opavavégui, rome’ẽva chugui: Oikove!
“Rohechágui chupe, héẽ, Tupã akatúape; ha rohendu pe ñe’ẽpu otestifikáva Ha’e ha’eha upe Túva Unihénito.”17
Hermano ha hermana-kuéra, poinvita peheka hag̃ua oportunida peme’ẽ hag̃ua pene testimónio ñe’ẽ ha mba’e’apópe. Péichagua oportunida og̃uahẽ ramoite chéve, peteĩ aty pahápe peteĩ América del Sur-gua tavaguasu alcalde ndive, idespáchope heta gabinete funcionario ndive. Rombopaharamógui ñeñandu horývarekuri, apensa nungávo akomparti che testimónio. Asegívo pe inspirasiõ, ame’ẽ peteĩ testimónio Jesucristo ha’eha Tupã oikovéva Ra’y ha múndo Salvador. Opa mba’e iñambue upe moméntope. Pe Espíritu upe kotýpe ndaikatúi oñenega. Ha’ete opa mba’e oñeñatõiha. “Pe Moangapyhyhára … omeʼẽ testimónio Túva ha Taʼýragui.”18 Aimete aguyjépe ikatúgui ambyaty py’aguasu ame’ẽ hag̃ua che testimónio.
Og̃uahẽramo moménto peichagua, pejapyhy ha peñañua. Peñandúta pe Consolador hakuvýva pendepype pejapo vove.
Ame’ẽ che testimónio ha ha’e testígo peẽme—Tupã ha’eha Ñande Ru Yvagagua, Jesucristo oikoveha, ha Jesucristo Tupao Santokuéra Ára Pahapegua ha’eha Tupã tupao yvy ári ojegueraháva ko’ág̃a ñande proféta ojehayhuetévare, Presidente Russell M. Nelson. Jesucristo rérape, Amén.