ຂ່າວສານທີ່ເປັນການແນະນຳ
ພວກເຮົາໃຫ້ກຽດທິດາຂອງພຣະຜູ້ເປັນເຈົ້າໃນການປະຊຸມພາກພິເສດນີ້ໂດຍການສຸມໃສ່ຂໍ້ກັງວົນຂອງເຂົາເຈົ້າ ແລະ ອົງການຂອງເຂົາເຈົ້າ.
ເອື້ອຍນ້ອງທີ່ຮັກແພງຂອງຂ້າພະເຈົ້າ, ຂະນະທີ່ພວກເຮົາເລີ່ມກອງປະຊຸມໃຫຍ່ສາມັນພາກສະຕີທີ່ພິເສດນີ້, ຂ້າພະເຈົ້າຍິນດີທີ່ຈະນຳສະເໜີຂ່າວສານທີ່ເປັນການແນະນຳ ຈາກຝ່າຍປະທານສູງສຸດ.
ກອງປະຊຸມພາກວັນເສົາຂອງພວກເຮົາແມ່ນມີປະຫວັດຂອງຈຸດປະສົງທີ່ແຕກຕ່າງກັນ ແລະ ຜູ້ຟັງທີ່ແຕກຕ່າງກັນ. ໃນຕອນແລງນີ້ພວກເຮົາກໍເພີ່ມເຂົ້າໄປໃນປະຫວັດສາດນັ້ນເມື່ອເຮົາໄດ້ດຳເນີນຕາມຈຸດປະສົງ ແລະ ຂັ້ນຕອນໃໝ່ສຳລັບອະນາຄົດທີ່ຄາດໄວ້. ພຣະກິດຕິຄຸນຂອງພຣະເຢຊູຄຣິດບໍ່ມີການປ່ຽນແປງ. ຄຳສອນພຣະກິດຕິຄຸນບໍ່ມີການປ່ຽນແປງ. ພັນທະສັນຍາສ່ວນຕົວຂອງເຮົາບໍ່ມີການປ່ຽນແປງ. ແຕ່ໄລຍະຫລາຍປີຜ່ານມາ, ການປະຊຸມຕ່າງໆທີ່ພວກເຮົາໄດ້ຈັດຂຶ້ນເພື່ອສື່ສານຂ່າວສານຂອງພວກເຮົາແມ່ນມີການປ່ຽນແປງ ແລະ ມີແນວໂນ້ມວ່າຈະປ່ຽນແປງຕໍ່ໄປໃນອີກຫລາຍປີ.
ສະເພາະປະຈຸບັນນີ້, ການປະຊຸມວັນເສົາພາກຄ່ຳນີ້ແມ່ນພາກໜຶ່ງຂອງກອງປະຊຸມໃຫຍ່ສາມັນ, ບໍ່ແມ່ນພາກຂອງອົງການໃດໆ. ເຊັ່ນດຽວກັນກັບທຸກພາກຂອງກອງປະຊຸມໃຫຍ່ສາມັນ, ການວາງແຜນ, ຜູ້ກ່າວປາໄສ, ແລະ ເພງໄດ້ຖືກກຳນົດໂດຍຝ່າຍປະທານສູງສຸດ.
ພວກເຮົາຂໍໃຫ້ປະທານຈີນ ບີ ບິງກຳ, ປະທານສະມາຄົມສະຕີສົງເຄາະສາມັນ, ເປັນຄົນດຳເນີນພາກນີ້. ວັນເສົາພາກຄ່ຳໃນອະນາຄົດອາດຈະຖືກດຳເນີນການໂດຍເຈົ້າໜ້າທີ່ສາມັນຂອງສາດສະໜາຈັກຄົນໃດຄົນໜຶ່ງ, ເຊັ່ນວ່າສະມາຊິກໃນຝ່າຍປະທານສະມາຄົມສະຕີສົງເຄາະສາມັນ, ຍິງໜຸ່ມ, ແລະ ປະຖົມໄວ, ທີ່ຖືກກຳນົດໂດຍຝ່າຍປະທານສູງສຸດ.
ໃນຄ່ຳຄືນນີ້ ວັນເສົາພາກຄ່ຳຂອງກອງປະຊຸມໃຫຍ່ສາມັນ ຈະສຸມໃສ່ຂໍ້ກັງວົນຂອງສະຕີໄພ່ພົນຍຸກສຸດທ້າຍ. ໃນນີ້ແມ່ນຈະລວມທັງຄຳສອນຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ນະໂຍບາຍຂອງສາດສະໜາຈັກທີ່ກ່ຽວຂ້ອງກັບສະຕີໂດຍສະເພາະ, ແລະ ໜ້າທີ່ຮັບຜິດຊອບທົ່ວໄປ ແລະ ວຽກງານຂອງອົງການຕ່າງໆລວມທັງສະຕີ ແລະ ເດັກຍິງຂອງສາດສະໜາຈັກ. ເຖິງແມ່ນວ່າພາກນີ້ຈະຖ່າຍທອດໃຫ້ກັບຜູ້ຟັງທົ່ວໂລກໂດຍເຈດຕະນາເຊັ່ນດຽວກັນກັບກອງປະຊຸມໃຫຍ່ສາມັນທຸກພາກ, ແຕ່ຜູ້ຟັງທີ່ໄດ້ຮັບເຊີນໃຫ້ເຂົ້າຮ່ວມໃນສູນກາງປະຊຸມໃຫຍ່ສຳລັບພາກນີ້ແມ່ນສະຕີ ແລະ ເດັກຍິງທີ່ມີອາຍຸ 12 ປີຂຶ້ນໄປ. ພວກເຮົາໄດ້ເຊີນຜູ້ນຳຖານະປະໂລຫິດຈຳນວນໜຶ່ງທີ່ເປັນປະທານໃນອົງການຕ່າງໆໃຫ້ເຂົ້າຮ່ວມນຳ.
ສິ່ງທີ່ພວກເຮົາກຳລັງລິເລີ່ມຢູ່ທີ່ນີ້ແມ່ນການຕອບສະໜອງຕໍ່ແຫລ່ງຂໍ້ມູນການສື່ສານທີ່ປະຈຸບັນມີໃຫ້ກັບການເປັນຜູ້ນຳ ແລະ ການເປັນສະມາຊິກໃນສາດສະໜາຈັກຂອງພຣະເຈົ້າທົ່ວໂລກ. ຄຳສອນແຫ່ງພຣະກິດຕິຄຸນຂອງພຣະເຢຊູຄຣິດແມ່ນສຳລັບທຸກໆຄົນ, ດັ່ງນັ້ນ ນີ້ແມ່ນແຮງຈູງໃຈຫລັກ ແລະ ການເຜີຍແຜ່ຂະຫຍາຍກວ້າງອອກໄປຂອງພວກເຮົາ. ພວກເຮົາໃຫ້ກຽດທິດາຂອງພຣະຜູ້ເປັນເຈົ້າໃນການປະຊຸມພາກພິເສດນີ້ໂດຍການສຸມໃສ່ຂໍ້ກັງວົນຂອງເຂົາເຈົ້າ ແລະ ອົງການຂອງເຂົາເຈົ້າ.
ພວກເຮົາຮູ້ສຶກກະຕັນຍູສຳລັບເທັກໂນໂລຈີຂອງການຖ່າຍທອດທີ່ບັດນີ້ໄດ້ເຮັດໃຫ້ຜູ້ນຳໃນສາດສະໜາຈັກສາມາດດຳເນີນການຝຶກອົບຮົມແບບລະອຽດ ໂດຍການກ່າວເຖິງຜູ້ຟັງແບບສະເພາະເຈາະຈົງໃນໜ້າທີ່ຮັບຜິດຊອບ. ພວກເຮົາດີໃຈທີ່ໂອກາດການເດີນທາງເປີດຂະຫຍາຍກວ້າງຫລາຍຂຶ້ນໃນປະຈຸບັນ. ສິ່ງນີ້ໄດ້ເອື້ອອຳນວຍພວກເຮົາໃຫ້ສົ່ງຜູ້ນຳຂອງສາດສະໜາຈັກໄປດຳເນີນການຝຶກອົບຮົມແບບໜ້າຕໍ່ໜ້າເປັນປະຈຳ ຕາມຄວາມຈຳເປັນໃນສະໜາມ.
ນີ້ແມ່ນວຽກງານຂອງອົງພຣະເຢຊູຄຣິດເຈົ້າ. ເຮົາເປັນຜູ້ຮັບໃຊ້ຂອງພຣະອົງ, ຖືກຊີ້ນຳໂດຍພຣະວິນຍານສັກສິດຂອງພຣະອົງ. ພວກເຮົາອ້ອນວອນຂໍພອນຈາກພຣະຜູ້ເປັນເຈົ້າຂອງພວກເຮົາຈົ່ງມາສູ່ຜູ້ນຳອົງການເຫລົ່ານີ້ ແລະ ສະຕີ ແລະ ເດັກຍິງ ຜູ້ຮັບໃຊ້ພຣະຜູ້ເປັນເຈົ້າໃນອົງການເຫລົ່ານີ້ ແລະ ໃນຊີວິດສ່ວນຕົວຂອງເຂົາເຈົ້າ. ໃນພຣະນາມຂອງພຣະເຢຊູຄຣິດ, ອາແມນ.