Wak riba e Kaminda
Pone enfoke riba kosnan ku ta mas importante—espesialmente e kosnan “riba kaminda” e kosnan eterno—ta e yabi pa maniobrá dor di e bida aki.
Dia mi a hasi diessinku aña, mi a risibí un pèrmit di studiante, kual ta pèrmití mi kore outo, si un di mi mayornan ta huntu ku mi. Ora mi tata a puntra si mi ke bai pa un kareda, mi tabata emoshoná.
El a stür algun mia sali pafo di siudat bai na un kaminda largu, stret ku dos banda ku masha tiki hende ta usa—mi mester nota, probablemente e úniko kaminda ku e tabata sintié seif. El a para banda di kaminda i nos a kambia di lugá. El a mustra mi algun kos i a bisa mi, “subi kaminda trankil i kore te ora mi bisa bo stòp.”
Mi a sigui su òrdu eksaktamente. Pero despues di 60 sekonde, el a bisa, “Mi yu, hala e outo kantu di kaminda. Bo ta duna mi gana di saka. Bo ta zuai bai bini riba e kaminda.” El a puntra, “Kiko bo ta wak?”
Poko disgustá mi a bisa, “Mi ta wak e kaminda.”
Ora ei el a bisa esaki: “Mi ta wak bo wowonan i abo ta wak solamente na loke ta nèt dilanti e tapa di mashin di e outo. Si bo wak solamente kiko ta nèt dilanti di bo, nunka lo bo no kore outo stret.” Orei el a enfatisá, “Wak riba e kaminda. Esei ta yuda bo kore stret.”
Komo un mucha di diessinku aña, mi a pensa ku e tabata un bon lès di kore outo. Mi a realisá for di e dia ei ku esei tabata un bon lès di bida tambe. Pone enfoke riba kosnan ku ta mas importante—espesialmente e kosnan “riba kaminda” e kosnan eterno—ta e yabi pa maniobrá dor di e bida aki.
Na un okashon den e bida di Salbador, E tabata deseá di ta Su so, pues El a bai riba un seru apart pa hasi orashon.”1 El a manda Su disípulonan bai ku instrukshon pa krusa e laman. Den e skuridat di anochi, e barku ku e disípulonan tabata aden a topa ku un tormenta furioso. Jesus a bai na nan reskate pero di un manera poko konvenshonal. E relato den skritura ta bisa, “I den e di kuater warda di anochi Jesus a bin serka nan, kanando riba laman2 Ora ku nan a mir’E nan a kuminsá haña miedu, pas ónan a kere ku e figura ku ta serkando nan tabata un sorto di spiritu òf fantasma. Jesus, sintiendo nan inkietut i keriendo trankilisá nan mente i nan kurason a papia ku nan, “Tene kurashi, ta Ami; no tin miedu.”3
Pedro no solamente tabata aliviá pero tambe animá. Semper balente i hopi biaha intrankil, Pedro a grita Jesus “Señor, si ta Abo, ordenámi bin serka Bo riba awa. ”4 Jesus a kontest’e ku Su invitashon di semper “Bini”5
Pedro, naturalmente a emoshoná pa e perspektiva, sali for di e boto no den e awa pero riba e awa. Miéntras su enfoké tabata riba e Salbador. e por a hasi loke ta imposibel, hasta kana riba awa. Inisialmente, Pedro no tabata spantá pa e tormenta. Pero e bientu “fuerte6 a distraé i al final el a pèrdè su enfoke E miedu a bini bèk. Konsekuentementen su fe a disminuí, i el a kuminsá senk. “El a grita, bisando: Señor, salbami”7 E Salbador ku semper ta ansioso pa salba, a saka Su man i his‘e i pone na un lugá seif.
Tin hopi lès di siña for di e relato milagroso aki pero mi lo menshoná tres.
Enfoká riba Cristu
E promé lès: enfoká riba JesuCristu. Miéntras Pedro su wowonan tabata enfoká riba Jesus, e tabata por kana riba awa. E tormenta, ola i e bientu no por a strob’é miéntras el a sentrá su enfoke riba Salbador.
Komprendiendo nos propósito final ta yuda nos determiná unda nos enfoke mester ta. Nos no por hunga un wega eksitoso sin sa e meta, tampoko nos no por biba un bida signifikante sin sa e propósito. Un di e bendishonnan grandi di e restorashon di e evangelio di JesuCristu ta ku e ta kontestá entre otro, e pregunta “Kiko ta e propósito di bida?” “Nos propósito den e bida aki ta pa tin goso i prepará pa bolbe bèk den presensia di Dios.”8 Kòrdando ku nos ta aki na mundu pa prepará pa bai biba bèk ku Dios ta yuda nos enfoká riba kosnan ku ta hiba nos na Cristu.
Enfoká riba Cristu ta rekerí disiplina, spesialmente den e kustumbernan spiritual chikí i simpel ku ta yuda nos bira mihó disípulonan. No tin disipuladosin disiplina.
Nos enfoke riba Cristu ta bira mas kla ora nos wak e kaminda unda nos ke ta i ken nos ke bira i e ora ei traha tempu tur dia pa hasi e kosnan ku ta yuda nos yega aya nan. Enfoká riba Cristu por simplifiká nos desishonnan i proveé e guia pa sa kon ta e mihó manera pa usa nos tempu i rekursonan.
Ounke tin hopi kos balioso pa nos enfoká, nos ta siña di e ehèmpel di Pedro e importansia di semper keda ku JesuCristu komo sentro di nos enfoke. Ta solamente pa medio di Cristu nos por bolbe biba serka Dios. Nos ta konfia riba e grasia di Cristu miéntras nos ta lucha pa bira manera DjE i buska Su pordon i poder fortifikante ora nos kai chikí.
Kuidou ku Distraishonnan
E di dos lès: kuidou ku distraishonnan Ora Pedro a kita su enfoke for di Jesus i pon’e riba e tormenta i e olanan ku tabata dal na su pia, el a kuminsá senk.
Tin hopi kos “dilanti di e tapa” ku por distraé nos enfoke riba Cristu i kosnan eterno ku ta “riba e kaminda.” Diabel ta e distraido mas grandi. Nos ta siña for di e soño di Lehi ku e stèmnan for di e edifisio grandi i espasioso ta buska pa atraé nos na kosnan ku ta kita nos for di e kurso di prepará pa bolbe biba serka Dios.9
Pero tin otro distraishonnan ménos opvio ku por ta mesun peligroso. Manera ta bisá, “E úniko kos nesesario pa maldat triunfá ta ora hendenan bon no ta hasi nada.” Ta parse ku atversario ta determiná pa laga bon hende no hasi nada òf por lo ménos pèrdè nan tempu riba kosnan ku ta distraé nan for di nan propósitonan i metanan elevá. Por ehèmpel, algun kosnan ku ta divershonnan sano den moderashon por bira distraishonnan no sano si no tin disiplina. E atversario ta komprondé ku distraishon no mester ta malu òf inmoral pa e ta efektivo.
Nos Por wòrdu Salbá
E di tres lès: nos por wòrdu salbá. Ora Pedro a kuminsá senk, el a grita, “Señor salba mi. I inmediatamente Jesus a ekstendé Su man, i a gar’é.”10 Ora nos ta sinti nos mes ta senk, ora nos ta enfrentá aflikshonnan, òf ora nos duda, nos tambe por wòrdu salbá dor di DjE.
Enfrentando aflikshon òf pruebanan, lo bo por ta manera ami i spera ku e salbashon ta bin inmediatamente. Pero kòrda ku e Salbador a bin yuda e Apòstelnan den e di kuater warda di anochi—despues ku nan a pasa gran parti di e anochi luchando ku e tormenta.11 Nos por hasi orashon pa ku si e yudansa no bini imediatamente, maske e por bini den e di dos warda òf asta e di tres warda di e anochi bon konosí. Ora nos ta warda, ta sigur ku e Salbador semper ta wak nos, segurando ku nos no mester soportá mas ku nos por.12 Pa esnan ku ta wardando den e di kuater warda di anochi, podisé ainda meimei di sufrimentu, no pèrdè speransa. Salbashon semper ta bini pa e fielnan ya sea durante mortalidat òf den eternidat.
Tin ora nos senkmentu ta bini pa motibu di nos erornan i transgreshonnan. Si bo ta hañando bo mes ta senk pa e motibunan aki, tuma e desishon di goso di arepentí13 Mi ta kere ta poko kos lo hasi Salbador mas kontentu ku ta salba esnan ku a bini,òf bolbe serka DjE.14 E skrituranan ta yen di storianan di hende ku a kai i tin defekto pero ku a arepentí i bira firme den na fe den Cristu. Mi ta kere e storianan aki ta den e skrituranan pa kòrda nos ku e amor di Salbador pa nos Su poder pa redimí nos ta infinito. No solamente Salbador tin goso ora nos arepentí pero nos tambe lo risibí goso grandi.
Konklushon
Mi ta invita bo pa bo pone atenshon ora di “wak e kaminda” i subi bo enfoke riba e kosnan ku realmente ta importá Laga nos keda ku Cristu den e sentro di nos enfoke. Meimei di tur distraishonnan, e kosnan “dilanti di e tapa di mashin i e bientu fuerte ku tabata rondoná, mi ta tèstifiká ku Jesus ta nos Salbador i redentor i nos salbabida. Den nòmber di JesuCristu, amèn.