Un Búskeda Fiel Premiá
Mi ta invitá nos tur pa kontinuamente alsa nos fe den Cristu, ku ta sigui kambia e bidanan di tur ku ta buskÉ.
Kuminsando den 1846, miles di hòmbernan, muhénan, i muchanan pionero a dirigí nan mes bayendo wèst na Sion. Nan fe grandi a move nan kurashi sin límite. Pa algun, e biahe nunka a kaba i nan a muri kantu di kaminda. Otronan, enfrentando gran atversidat, a sigui pa dilanti ku fe.
Dor di nan, generashonnan despues, mi famia a disfrutá di e bendishonnan di e evangelio berdadero di JesuCristu.
Meskos ku un otro hóben, ku lo mi menshná despues, mi tabatin 14 aña ora mi a kuminsa ta kestioná religion i mi fe. Mi tabata asistí e iglesia di un otro denominashon serka di mi kas, pero mi tabatin e deseo di bishitá hopi otro iglesianan.
Un atardi, mi a ripará dos hóben den trahe skur i kamisa blanku drenta kas di mi bisiña. E hòmbernan yòn aki ta parse—special.
E siguiente dia mi a topa mi bisiña, Leonor Lopez, i a puntr’é pa e dos hòmbernan aki. Leonor a splika mi ku nan ta misionero di E Iglesia di JesuCristu di e Santunan di Delaster Dianan. Elwòrdu a konta mi alegremente ku su famia a boutisá den Iglesia un aña pasá. Mirando mi interes, Leonor a invitá mi pa reuní ku e misioneronan i siña tokante e Iglesia.
Dos dia despues, mi a uni na famia Lopez pa reuní ku e misioneronan. Nan a introdusí nan mes komo Elder John Messerly for di Ogden, Utah, i Elder Christopher Osorio di Walnut Creek, California. Nunka lo mi lubidá nan.
Dor ku mi tabatin solamente 14 aña, Elder Messerly a insistí pa nos bai mi kas p’asina mi mama por sa kiko nan ta siñando mi. Einan, nan a splika enkaresidamente ku nan a bin pa kompartí un mensahe tokante JesuCristu i a pidi su pèrmit pa siña mi. Mama a bai di akuerdo i asta a uni ku nos miéntras nan ta siña mi.
Promé e misioneronan a pidi Leonor pa ofresé un orashon. Esaki a toka mi hopi profundo pasobra su orashon no tabata un repetishon di palabranan memorisá pero un ekspreshon di su kurason. Mi a sinti ku e tabata papia realmente ku su Tata Selestial.
E misioneronan a siña nos tokante JesuCristu. El a mustra nos un portrèt di DjE ku a impreshoná mi pasobra tabata un portrèdi e Cristu resusitá bibiente.
Nan a kontinuá, siñando nos kon Jesus a establesé Su Iglesia den tempunan di antaño, ku E na kabes huntu ku Su Diesdos Apòstelnan. Nan a siña nos tokante e Apostasia—kon bèrdat i e outoridat di Cristu a wòrdu kitá for di tera despues ku Su Apòstelnan a muri.
Nan a konta nos di un hóben di 14 aña yamá José Smith kende, durante e promé añanan di 1800 a bishitá diferente iglesia buskando e bèrdat. Miéntras tempu tabata bai, José a bira mas konfuso. Despues di a lesa den e Beibel ku nos por “pidi Dios”1 pa sabiduria, José, aktuando ku fe, a bai den un arboleda pa hasi orashon i puntra kua iglesia e mester uni su mes na dje.
Un di e misioneronan a lesa e relato di José di loke a pasa miéntras e tabata hasi orashon:
“Mi a mira un pilá di lus eksaktamente riba mi kabes, ku mas klaridat ku e solo, kua a bini gradualmente riba mi.
“…Ora e lus a kai riba mi mi a wak dos personahe, kénde nan briyo i gloria no tin deskripshon, pará riba mi na lairia. Un di nan a papia ku mi, yamando mi na mi nòmber, mustrando na e otro—Esaki ta Mi Yu Stimá. Skucha E!”2
Durante di e lès, e Spiritu a konfirmá varios bèrdat na mi.
Promé, Dios ta skucha tur orashon sinsero di Su yunan, i shelu ta habrí pa nos tur—no djis algun.
Di dos, Dios e Tata, JesuCristu, i e Spiritu Santu ta tres ser separá, uní den Nan propósito “pa logra e inmortalidat i bida eterno di hende.”3
Di tres, nos a wòrdu tkreá den e imágen di Dios. Nos Tata Selestial i Su Yu, JesuCristu, tin kurpanan di karni i wesu manera nos, pero Nan ta glorifika i perfekshoná, i e Espiritu Santu ta un personahe di espiritu.4
Di kuater, pa medio di José Smith, JesuCristu a restorá Su evangelio i Iglesia bèrdadero aki na tera. E outoridat di saserdosio konferí na e Apòstelan di Cristu 2000 aña pasá ta e mesun saserdosio konferí riba José Smith i Oliver Cowdery dor di Pedro, Santiago, i Juan.5
Finalmente, nos ta siña tokante un otro tèstamènt di JesuCristu: E Buki di Mormon. Skirbí pa profetanan di antigwedat, e ta konta nos di un pueblo ku a biba na e kontinente Merikano promé, durante i despues di e nasementu di Jesus. For di dje nos ta siña kon nan tabata konosé, stima, i adorá Cristu, ku a aparesé na nan komo e Salbador resusitá.
E Spiritu a move mi profundamente miéntras mi tabata siña e deklarashon di e Salbador na nan: “Ata’ki, Ami ta JesuCristu, di ken e profetanan a tèstifiká ku lo bin na mundu.”6
E misioneronan a duna nos, nos propio kopia di e Buki di Mormon. Nos a lesa i akseptá e invitashon hañá na final di e Buki di Mormon ku ta bisa:
“I ora boso risibí e kosnan aki, mi lo amonestá boso pa boso puntra Dios, e Tata Eterno, den e nòmber di Cristo, si e kosnan aki no ta bèrdat; i si boso pidi ku un kurason sinsero, ku bèrdadero intenshon, ku fe den Cristo, e lo manifestá e bèrdat di dje na boso, pa e poder di Spiritu Santu.
“I pa e poder di Spiritu Santu boso por sa e bèrdat di tur kos.”7
A pasa kasi 45 aña for di ku mi mama i ami a siña pa promé biaha e goso i poder di tin fé den Cristu. Tabata pa motibu di nan fé den Cristu ku e famia Lopez a kompartí nan fe nobo ku mi. Tabata pa motibu di nan fe den Cristu ku e dos misioneronan aki a laga nan hogar na Merka pa haña mi mama i ami. Tabata e fe di e kerido amigunan aki ku a planta e simia di mòster den nos ku for di e tempu ei a bin ta krese den un palu poderoso di bendishonnan eterno.
Durante di e añanan bendishoná aki, nos a konosé, manera Presidente Russell M. Nelson a deklará: “Tur kos bon den bida - tur bendishon potenshal di nifikashon eterno - ta kuminsa ku fé. Pèrmití Dios pa prevalesé den nos bida ta kuminsá ku fe ku E ta dispuesto pa guia nos. Arepentimentu berdadero ta kuminsá ku fe ku JesuCristu tin e poder pa limpia, sana, i fortalesé nos.”8
Mi ta invitá nos tur pa kontinuamente alsa nos fe den Cristu, ku a kambia e bidanan di mi kerido mama i ami i kontinuamente ta kambia e bidanan di tur ku ta busk’E. Mi sa ku José Smith ta e Profeta di e Restorashon, ku Presidente Nelson ta nos profeta awendia, ku Jesus ta e Cristu bibiente i nos Redentor, i ku Tata Selestial ta kontestá orashon di tur Su yunan. Mi ta tèstifiká di e bèrdatnan aki den e nòmber sagrado di JesuCristu, amèn.