Bira Mas den Cristu: E Parábola di e liña di Progreso
Den Señor Su tempu, no ta kaminda nos a kuminsá, pero unda nos ta bai ta importá mas.
Ora mi tabata mucha, mi tabatin aspirashonnan grandi. Un dia despues di skol mi a puntra: “Mama, kiko lo mi mester bira ora mi bira grandi: un hungadó di basket profeshonal òf un estrea di ròk?” Desafortunadamente, Clark e “maravia sin djente” no a duna señalnan di gloria atlétiko òf musikal den futuro. I apesar di múltiple esfuersonan, mi a wòrdu ningá ku frekuensia pa drenta e programa akadémiko avansá di mi skol. Mi maestronan finalmente a sugerí ku mi mester a limitá mi mes na e klas standart. Despues di tempu, mi a desaroyá habitonan di estudio ku a kompensá. Pero ta te na mi mishon na Hapon Mi a sinti ku mi posibilidatnan intelektual i spiritual a kuminsá desaroyá. Mi a sigui traha duru. Pero pa promé bes den mi bida, mi a involukrá Señor sistemátikamente den mi desaroyo, i esaki a hasi tur e diferensha.
Rumannan, den e Iglesia aki, nos ta kere den e potensial divino di tur e yunan di Dios i den nos abilidatnan pa bira algu mas den Cristu. Den Señor Su tempu, no ta kaminda nos a kuminsá pero unda nos ta bai ta importá mas.1
Pa demostrá e prinsipio aki, Mi ta bai hasi uso di un tiki matemátika básiko. Awor, no drenta pániko dor di skucha e palabra matemátika den konferensia general. Nos fakultat di matemátika di BYU-Idaho ta sigurá mi ku asta e prinsipiante lo komprondé e konsepto sentral aki. E ta kuminsá ku e formula pa un liña. E intersepshon, pa nos proposito, ta e komienso di nos liña. E intersepshon por tin sea un punto di komienso haltu òf abou. E progreso di e liña e ora ei por ta inkliná positivo òf negativo.
Nos tur tin diferente punto di partida den bida—nos ta kuminsá na diferente lugánan ku diferente kondishonnan di bida. Algun a nase den situashon ku kondishonnan bon, yen di oportunidat. Algun ta eksperensiá sirkunstanshanan na komienso ku ta un reto i ta mustra inhustu.2 Despues nos ta sigui bai via e direkshon di progreso personal. Nos futuro lo wòrdu determiná ménos dor di nos punto di salida i hopi mas dor di nos liña di progreso. JesuCristu ta mira potensial divino no importá unda nos kuminsá. El a mir’é den e limosnero, e pekadó, i e debil. El a mir’é den e piskadó, e kobradó di impuesto, i asta e fanátiko. No ta importá unda nos a kuminsa, Cristu ta konsiderá loke nos hasi ku loke a duna nos.3 Miéntras e mundu ta enfoká riba nos partida, Dios ta enfoká riba nos progreso den bida. Den Señor Su kalkulo, E lo hasi tur kos ku E por pa yuda nos dirigí nos progreso ku direkshon na shelu.
E prinsipio aki lo mester duna konsuelo na esnan ku ta lucha, i wanta esnan ku ta parse di tin tur bentaha. Laga mi kuminsa dor di dirigí mi mes na individuonan ku a kuminsa ku sirkumstansianan difisil, inkluyendo pobresa, akseso limitá na edukashon, situashonnan familiar desafiante. Otro ta enfrenta desafionan fisiko, limitashon di salú mental, òf predisposishon genetiko fuerte.4 Pa kualkier un ku ta lucha ku un punto di komienso difísil, por fabor rekonosé ku e Salbador konosé nos luchanan. El a “tuma riba dj’E [nos] enfermedatnan, pa su entraña [por] ta yená ku miserikòrdia, … pa e [por] sa … kon pa yuda [nos] di akuerdo ku [nos] enfermedatnan.”5
Laga mi kompartí dos área di enkurashamentu pa esnan ku ta enfrentá sirkunstanshanan difísil na komienso. Promé, enfoká den kua direkshon bo ta bayendo i no unda bo a kuminsá. Lo ta robes pa ignorá bo sirkunstanshanan—nan ta real i mester wòrdu atendé. Pero enfoká dimas riba un punto di komienso difísil por kousa ku e ta definí bo i asta limitá bo abilidatnan pa skohe.6
Hopi aña pasá, mi a sirbi ku un grupo di hóben di barionan marginá na Boston, Massachusetts, kual gran parti tabata nobo den e evangelio i pa e ekspektativanan di Iglesia. Tabata tentativo pa purba konfundí mi empatia i preokupashon pa nan situashon ku un deseo pa baha e normanan di Dios .7 Finalmente mi a realisá ku e manera mas poderoso pa demostrá mi amor tabata pa nunka baha mi ekspektativanan. Ku tur loke mi tabata sa, nos a enfoká huntu riba nan potensial, i kada un di nan a kuminsá elevá nan direkshon di progreso. Nan kresementu den e evangelio tabata gradual pero konsistente. Awe, nan a sirbi mishonnan, a gradua na universidat, a kasa den tèmpel, i ta hiba un bida personal i profeshonal remarkabel.
Di dos, enbolbí Señor den e proseso pa halsa bo progreso den un direkshon positivo. Miéntras mi tabata sirbiendo komo presidente di BYU–Pathway Rònt Mundu, mi a kòrda di tabata sinta den un devoshonal grandi na Lima, Peru, kaminda Elder Carlos A. Godoy tabata e orador. Ora e la wak riba e kongregashon, e la aparentá di ta abrumá opserbando asina tantu studiando fiel di universidat di promé generashon. Kisas reflekshonando riba su propio kaminda dor di tipo di sirkunstanshanan difísil, Elder Godoy a sita emoshonalmente: Señor lo yuda “bo mas di loke bo por yuda bo mes. [Pues] enbolbi Señor den e proseso aki.”8 E profeta Nefi a siña “ku ta pa medio di grasia nos ta salbá, despues di tur kos ku nos por hasi.”9 Nos mester hasi nos parti,10 ku ta inkluí arepentimentu, pero ta solamente dor di Su grasia nos por realisá nos potensial divino.11
Finalmente, laga mi kompartí dos área di konseho pa esnan ku puntonan di komienso elevá. Promé, nos por mustra un tiki humildat pa sirkunstansianan ku no ta nos mes a krea? Komo èks Presidente di BYU Rex E. Lee a sita n su studiantenan, “Nos tur a bebe for di posnan ku nos no a koba i a keinta nos mes ku kandelanan ku nos no a sende.”12 Presidente Lee e ora ei a pidi su studiantenan pa duna bèk i komplementá e fuente di edukashon ku pioneronan anterior a konstruí. Keda sin sembra bèk e kamponan ku a wòrdu plantá dor di otronan por ta meskos ku regresá un talento sin kresementu.
Di dos, enfoká riba un punto di salida haltu por asta laga nos kai den sintimentu ku nos ta prosperá, kaminda defakto, nos kresementu interno por ta basta stagná. Profesor Clayton M. Christensen di Harvard a siña ku e hendenan mas eksitoso ta esnan mas humilde pasó nan tin sufisiente konfiansa pa wòrdu koregí i siña for di ken ku ta.13 Elder D. Todd Christofferson a konsehá nos pa “boluntariamente [haña formanan] pa aseptá i asta buska korekshon.”14 Asta ora kosnan ta parse di ta bai bon, nos mester buska oportunidatnan pa mehorá pa medio di petishon den orashon.
No opstante nos kuminsá den sirkunstanshanan abundante òf difísil, nos lo realisá ku nos potensial máksimo solamente ora ku nos hasi Dios nos partner. Resien mi tabata tin un kombersashon ku un edukadó nashonal prominente ku tabata puntrando tokante éksito di BYU–Pathway. E tabata inteligente i su investigashon tabata sinsero, pero tabata kla ku e tabata ke un reakshon sekular. Mi a kompartí kuné nos programanan di retenshon i esfuersonan pa guia. Pero mi a konkluí bisando, “Esakinan tur ta práktikanan bon, pero e rason real di nos studiantenan su progreso ta pasó nos ta siña nan potensial divino. Imaginá si hinter bo bida, nan a bisa bo ku bo no por logra. E ora ei konsiderá di wòrdu siñá ku bo ta un yu muhé òf yu hòmber di Dios ku posibilidat divino?” El a wanta, i despues a respondé simplemente, “Esei ta poderoso.”
Rumannan, un di e milagernan di esaki, E Iglesia di Señor, ta ku kada un di nos por bira algu mas mihó den Cristu. Mi no sa di ningun otro organisashon ku ta duna su miembronan mas tantu oportunidat di sirbi, duna bèk, arepentí, i bira mihó persona. Sea nos kuminsá den abundansia òf den sirkunstanshanandifísil, laga nos sigui pone metanan i progresonan den direkshon di shelu. Si nos hasié, Cristu lo alsa nos na un lugá mas haltu. Den e nòmber di JesuCristu, amèn.