“Bo Ta Stima Mi Mas Ku Esakinan?”
Kiko ta e kosnan ku bo por hasi den bo propio bida pa mustra ku bo ta stima Señor promé?
Den novèmber 2019, mi amigu i ami a bishita e Pais Santu. Miéntras nos tabata einan, nos a revisá i studia skrituranan tokante JesuCristu Su bida. Un mainta nos tabata pará na e parti nortwèst di e kosta di e laman di Galilea na un lugá ku por ta kaminda Jesus a topa Su disípulonan despues di Su Resurekshon.
Despues di Jesus Su Resurekshon, nos ta lesa den Juan kapítulo 21, Pedro i e otro disípulonan a piska hinter anochi sin éksito.1 Den mainta, nan a mira un hòmber pará na e kosta ku a bisa nan pa tira nan nèt na e otro banda di e boto, Pa nan sorpresa, e nèt tabata yená milagrosamente.2
Mesora nan a rekonosé ku e hòmber tabata Señor, i nan a pura pa salud’É.
Miéntras nan tabata lastra e nèt [pa] hib’é kantu, yen di piská, Jesus a bisa, “Bin i sena,”3 Juan ta relatá ku “ora nan a kaba di kome nan sena, Jesus a bisa na Simon Pedro, Simon, yu di Jonas, bo ta stima Mi mas ku esakinan?”4
Miéntras mi tabata pará na e mesun kosta, mi a realisá ku e Salbador Su pregunta tabata un di e preguntanan mas importante ku un dia E lo por puntra mi. Kasi mi por a skucha Su bos puntrando, “Russell, bo ta stima mM mas ku esakinan?”
Bo ta puntra bo mes kiko Jesus tabata referiendo na dje ora El a puntra Pedro, “bo ta stima Mi mas ku esakinan?”
Relashonando e pregunta aki na nos mes den nos dia, Señor por ta puntrando nos kon okupá nos ta i tokante di e tantu influensianan positivo i negativo ku ta kompetí pa nos atenshon. E por ta puntra kada unu di nos si nos ta stima E mas ku e kosnan di e mundu aki. Esaki por ta un pregunta tokante loke nos ta balorá di bèrdat den bida, ken nos ta sigui, i kon nos ta mira nos relashonnan ku miembronan di famia i próhimo. Òf kisas E ta puntrando kiko di bèrdat ta trese goso i felisidat.
E kosnan di e mundu aki ta duna nos e goso, felisidat, i pas ku e Salbador a ofresé na Su disípulonan i ku e ta ofresé nos? Solamente E por trese nos berdadero goso, felisidat i pas dor di stim’É i sigui Su enseñansanan.
Kon nos por kontestá e pregunta “bo ta stima mMi mas ku esakinan?”
Ora nos diskubrí e nifikashon mas kompletu di e pregunta aki, nos por bira mihó miembronan di famia, bisiña, suidadano, miembronan di Iglesia, i yunan di Dios.
Ku mi edat, mi a asisití na hopi entiero. Mi tin sigur hopi di boso a nota loke ami a nota. Ora ta papia di e bida di un miembro di famia òf amigu ku a fayesé, ta poko komun pa un oradó papia di e grandura di persona su kas, e kantidat di su outonan, òf su saldo di su kuenta bankario. Usualmente nan no ta papia di kuantu biaha el a pone algu riba media sosial. Na mayoria entiero, ku mi a bisgitá, nan ta enfoká riba e ser stimá su relashonnan, servisio na otro, lèsnan di bida i eksperensia, i nan amor pa JesuCristu.
No malkomprondé mi. Mi no ta bisando ku tin un kas bunita òf outo bunita ta robes òf ku usa media sosial ta malu. Loke mi ta bisa ta ku al final, e kosnan ei ta importá masha poko kompará ku stima e Salbdador.
Ora nos ta stima i siguiÉ, nos tin fe den DjE. Nos ta arepentí. Nos ta sigui Su ehèmpel i ta wòrdu boutisá i risibí e Spiritu Santu. Nos ta perseverá te na final i nos ta keda riba e kaminda di kombenio. Nos ta pordoná miembronan di famia i próhimo dor di laga rinkor bai ku nos por ta wardando. Nos ta lucha pa warda Dios Su mandamentunan. Nos ta lucha pa ta obediente. Nos ta hasi i warda kombenionan. Nos ta honrá nos tata i mama. Nos ta pone un banda influensia negativo mundano. Nos ta prepará nos mes pa e Segunda Benida.
Den “E Cristu Bibiente: E Testimonio di e Apòstelnan,” nos ta lesa: “[Jesus] un dia lo regresá na mundu. … E lo goberná komo Rei di Reinan i lo reina komo Señor di Señornan, i tur rudia lo dobla i lenga lo papia den adorashon dilanti DjE. Kada unu di nos lo para pa wòrdu husgá p’É di akuerdo ku nos obranan i e deseonan di nos kurasonnan.”5
Komo un di e Apòstelnan ku a firma e dokumento di “E Cristu Bibiente”, mi por bisa ku sabiendo ku Jesus “ta e lus, e bida, i e speransa di e mundu”6 ta duna mi un deseo mas grandi pa stim’É mas tur dia.
Mi ta tèstifiká ku e Tata Selestial i Jesus ta biba. Mi ta tèstifiká ku Nan ta stima nos. E skritura ta siña ku “[Pasó] Dios a stima mundu asina tantu, El a duna Su úniko Yu, pa tur esnan ku kere den DjE no bai pèrdí, pero haña bida eterno.”7 E skritura tambe ta siña ku Jesus “a stima mundu asina tantu ku El a duna Su propio bida, pa tur esnan ku kere den lo bira e yunan hòmber [ i yunan muhé] di Dios”8
Tata Selestial a stima nos asina tantu ku El a prepará Su plan di salbashon ku un Salbador komo e figura sentral. I Jesus a stima nos asina tantu ku den e gran Konseho di Shelu, ora Tata Selestial a puntra, “Ken lo mi manda?” Jesus, kende tabata e Primogénito di tur e Tata Su yunan spiritual, a kontestá, “Ata Ami aki, manda Ami.”9 El a bisa e Tata, “Tata, Bo boluntat sea hasí, i e gloria lo ta di Bo pa semper.”10 Jesus a ofresé boluntariamente pa ta nos Salbador i Redentor p’asina nos por bira manera Nan i regresá den Nan presensia.
E dos skrituranan aki tambe ta siña nos ku pa regresá den Nan presensia nos mester kere. Nos tin ku kere den Jesus i Dios Su plan di felisidat. Pa kere ta pa stima i sigui nos Salbador i warda e mandamentunan, asta meimei di prueba i lucha.
E mundu djawe ta inkieto. Tin desapuntonan, desakuerdonan, angustia, i distraishon.
Presidente Dallin H. Oaks, diskursando den 2017, a nota lo siguiente: “Esakinan ta tempu yen desafio, yená ku hopi preokupashon, guera i rumornan di guera, posibel epidemia di malesanan infektuoso, sekura, inundashonnan, i kalentamentu global.”11
Nos no por pèrdè nos amor pa i speransa den Jesus, asta ora nos ta enfrentá desafionan abrumador. Tata Selestial i JesuCristu nunka lo lubidá nos. Nan ta stima nos.
Òktober ku a pasa, Presidente Russell M. Nelson a siña nos e importansia di pone Tata Selestial i JesuCristu promé den nos bida. Presidente Nelson a siña nos ku un nifikashon di e palabra Israel ta “laga Dios prevalesé.”12
El a puntra kada un di nos: “Bo ta dispuesto pa laga Dios prevalesé den bo bida? Bo ta dispuesto pa laga Dios ta e influensia di mas importante den bo bida? Lo bo pèrmití Su palabranan, Su mandamentunan, i Su kombenionan pa influensiá lokual bo ta hasi kada dia? Lo bo pèrmití Su stèm pa tuma prioridat riba tur otro? Bo ta dispuesto pa laga loke ku E tin mester pa bo hasi ta mas importante ku otro ambishon? Bo ta dispuesto pa bo boluntat wòrdu gulí den esun di DjE?”13
Semper nos mester kòrda ku nos berdadero felisidat ta dependé di nos relashonnan ku Dios ku JesuCristu, i ku otronan.
Un manera pa demostrá nos amor ta pa uni famia, amigunan i próhimo hasiendo kosnan chikí pa sirbi otro mihó. Hasi kosnan ku ta hasi e mundu aki un mihó lugá.
Kiko ta e kosnan ku bo por hasi den di bo propio bida pa mustra ku bo ta stima Señor promé?
Ora nos enfoká den stima nos próhimonan manera E ta stima nan, nos ta kuminsá na stima di bèrdat esnan rondó di nos.14
Mi ta bolbe puntra, Kon lo bo kontestá E Salbador Su pregunta “bo ta stima Mi mas ku esakinan?”
Miéntras bo ta konsiderá e pregunta aki manera ami a hasi, mi ta resa ku bo por haña15i despues mustra esaki dor di stima i sirbi Dios i esnan ku ta rondó di bo.
Mi ta tèstifiká ku nos ta bendishoná pa ta poseé e evangelio di JesuCristu pa guia nos den e manera ku nos ta trata otro. Den DjE, nos ta diskubrí ku kada yu muhé i yu hòmber di Dios ta masha presiosio pa E.
Mi ta tèstifiká ku JesuCristu ta nos Salbador Stimá. E ta e Yu Unigénito di Dios. I mi ta duna e testimonioaki humildemente den e nòmber sdi JesuCristu, amèn.