No Tin Ungwente na Gilead?
E Salbador Su poder di sanashon no ta solamente Su kapasidat pa sana nos kurpa pero, kisas ainda mas importante, Su kapasidat pa sana nos kurason.
Poko tempu despues di mi mishon, miéntras mi tabata un studiante na Brigham Young University, mi a risibí un yamada di mi tata. El a bisa mi ku el a wòrdu diagnostiká ku kanser di pánkreas i ku ounke su chènsnan pa sobrebibí no tabata bon, e tabata determiná pa wòrdu saná i regresá na su aktividatnan normal di bida. E yamada di telefòn aki tabata un momentu serio pa mi. Mi tata tabata mi obispu, mi amigu, i mi konsehero. Ora mi mama, mi rumannan, i ami a pensa riba e futuro, e tabata parse skur. Mi ruman hòmber mas yòn Dave tabata sirbiendo mishon na New York, i a partisipá na distansia largu den e eventonan difísil aki di famia.
Esnan ku ta duna servisio médiko di e dia a sugirí operashon pa purba redusí e plamamentu di e kanser. Nos famia a ayuná i [hasi] orashon sinsero pa un milager. Mi a sinti ku nos tabatin sufisiente fe ku mi tata por a wòrdu saná. Djis promé di e operashon, mi ruman hòmber mas grandi, Norm i ami a duna mi tata un bendishon. Ku tur e fe ku nos por a reuní, nos a hasi orashon pa e por wòrdu saná
E operashon tabata planiá pa dura hopi ora, pero despues di djis un tempu kòrtiku, e dòkter a bini na e sala di espera pa reuní ku nos famia. El a bisa nos ku ora nan a kuminsá e operashon, nan por a mira ku e kanser a plama den henter mi tata su kurpa. A base di lokual nan a opservá, mi tata tabatin solamente algun luna di bida. Nos tabata kibrá.
Ora mi tata a spièrta for di e operashon, e tabata ansioso pa sa si e prosedimentu tabata eksitoso. Nos a kompartí e mal notisia kuné.
Nos a sigui ku ayuno i orashon pa un milager. Segun mi tata su salú a bai atras lihe, nos a kuminsá hasi orashon pa e por ta liber di doló. Eventualmente, ora su kondishon a empeorá, nos a pidi Señor pa permití pa e muri lihé. Solamente algun luna despues di e operashon, manera pronostiká pa e siruhano, mi tata a fayesé.
Hopi amor i kuido a wòrdu demostrá na nos famia pa e miembronan di bario, famia i amigunan. Nos tabatin un bunita entiero ku a honra e bida di mi tata. Sinembargo, segun tempu a pasa, nos a eksperensiá e doló di mi tata su ousensia, mi a kuminsá puntra mi mes di kon mi tata no a haña sanashon. Mi a puntra mi mes si mi fe no tabata sufisiente fuerte. Di kon algun famianan ta risibí un milager, pero nos famia no? Mi a siña na mi mishon pa bai den e skrituranan pa kontesta, i asina mi a kuminsá buska den e skrituranan.
E Tèstamènt Bieu ta siña di un speserei òf ungwente aromátiko uzá pa sanashon di heridanan,ku tabata trahá di un mata ku tabata krese na Gilead. Den tempu di Antiduo Tèstamènt e ungwento a wòrdu konosí komo e “ungwento di Gilead.”1 E profeta Yeremías a lamentá tokante e kalamidatnan ku el a opservá entre su pueblo i a spera pa sanashon. Yeremías a puntra, “No a sobra mas ungwento na Gilead; no tin niun dòkter aya?”2 Pa medio di literatura, músika, i arte, hopi biaha a referí na e Salbador JesuCristu komo e ungwento di Gilead pa motibu di Su poder di sanashon. Meskos ku Yeremías, mi a puntra mi mes, “No tin ungwento na Gilead pa e famia Nielson?”
Den Marko kapítulo 2 di e Tèstamènt Nobo, nos ta haña e Salbador na Capernaum. Papiamentu tokante E Salbador Su poder di sanashon a plama rònt den e pais, i hopi hende a biaha pa Capernaum pa haña sanashon di e Salbador. Tabatin asina hopi [hende] reuní rònt di e kas kaminda e Salbador tabata situá ku no tabatin lugá pa E por a risibí nan tur. Kuater hòmber a karga un hòmber lam pa haña sanashon serka e Salbador. Nan no por a logra pasa entre e grupo di hende, p’esei nan a kibra e dak di e kas i a baha e hòmber na suela pa topa e Salbador.
Ora mi tabata lesa e relato aki, mi tabata sorpresá pa lokual e Salbador a bisa ora El a topa e hòmber aki: “Mi yu, bo pikánan ta pordoná.”3 Mi a pensa ku si mi tabata un di e kuater hòmbernan ku a karga e hòmber aki, lo mi por a bisa e Salbador, “Nos a tres’é aki pa e haña sanashon.” Mi ta pensa ku e Salbador por a kontestá, “ Mi a dun’é sanashon.” Tabata posibel ku mi no a komprendé kompletamente—ku e Salbador Su poder di sanashon no tabata solamente Su abilidat pa sana nos kurpa, pero kisas ainda mas importante, Su abilidat pa sana nos kurason i e kurasonnan kibrá di mi famia?
E Salbador a siña nos un lès importante dor di e eksperensia aki ora ku eventualmente El a sana e hòmber físikamente. A bira kla pa mi ku Su mensahe tabata ku E por a mishi ku e wowonan di esnan ku tabata siegu, i nan por a mira. E por a mishi ku e oreanan di esnan ku tabata surdu, i nan por a skucha. E por a mishi ku e pianan di esnan ku no por a kana, i nan por a kana. E por sana nos wowonan i nos oreanan i nos pianan, pero mas importante di tur, E por sana nos kurason ora e ta limpia nos for di piká i ta elevá nos dor di nos pruebanan difísil.
Ora e Salbador a aparesé na e pueblo den e Buki di Mormon despues di Su Resurekshon, El a papia atrobe di Su poder di sanashon. E Nefitanan a skucha Su stèm for di shelu puntrando Si nan lo regresá na Dje, i arepentí di nan pikánan, i wòrdu kombertí, pa Mi por sana boso.?”4 Despues, e Salbador a siña, “Pasobra boso no sa si nan lo bini bèk i arepentí, i bini na Ami ku propósito berdadero di kurason, i Ami lo kuranan.”5 E Salbador no tabata referí na un sanashon físiko pero mas bien un sanashon spiritual pa nan alma.
Moroni ta trese komprendementu adishonal ora e ta komparti e palabranan di su tata, Mormon. Despues di papia di milagernan, Mormon ta splika, “I Cristu a bisa: Si bo tin fe den Mi lo bo tin poder pa hasi kualke kos ku ta nesesario den Mi.”6 Mi a siña ku e propósito di mi fe mester ta JesuCristu, i mi mester a aseptá lokual tabata nesesario pa E ora mi ehersé fe den DjE. Mi ta komprondé awor ku fayesementu di mi tata tabata nesesario pa Dios Su plan. Awor, ku mi ta pone mi mannan riba e kabes di un otro pa bendishon’é, mi fe ta den JesuCristu, i mi ta komprondé ku un persona por i lo sana físikamente, si ta nesesario den Cristu.
E Salbador Su Ekspiashon, kual ta hasi posibel Su poder redentor i ku ta abilitá, ta e bendishon máksimo ku JesuCristu ta ofresé na tur. Ora nos arepentí ku propósito kompleto di kurason, e Salbador ta limpia nos [for di] piká. Ora nos someté nos boluntat na esun di e Tata, asta den e sirkunstansianan di mas difísil, e Salbador lo elevá nos karga nan i lo hasi nan lihé.7
Pero aki tin e lès di mas grandi ku mi a siña. Mi a kere eroikamente ku e Salbador Su poder pa sana no a funshoná pa mi famia. Awor ku mi ta mira patras ku wowonan mas madurá i ku eksperensia, mi ta mira ku e Salbador Su poder pa sana tabata evidente den e bidanan di kada miembro di mi famia. Mi tabata asina enfoká riba e sanashon físiko ku mi a faya pa mira e milagernan ku a sosedé. Señor a fortalesé i elevá mi mama mas leu ku su kapasidat dor di e prueba difísil aki, i el a hiba un bida largu i produktivo. E tabatin influensia remarkabel positivo riba su yunan i nietunan. Señor a bendishon mi i mi rumannan ku amor, union, fe, i resistensia ku a bira un parti importante di nos bida i ta sigui te ku awe.
Pero kiko tokante mi tata? Meskos ku tur ku lo arepentí, el a wòrdu saná spiritualmente ora el a buska i risibí e bendishonnan disponibel dor di e Salbador Su Ekspiashon. El a risibí un remishon di su pikánan i awor ta spera e milager di e Resurekshon. E Apòstel Pablo a siña, “Meskos ku pa motibu di Adam tur hende ta muri, asina tur hende lo lanta den Cristu.”8 Wak, mi tabata bisa na e Salbador, “Nos a hiba nos tata serka Bo pa wòrdu saná,” i e ta kla pa mi ku e Salbador a dun’é sanashon. E unwento di Gilaea funshoná pa e famia Nielson—no na e manera ku nos a suponé, pero den un manera asta mas signifikante ku a bendishon i ta sigui bendishoná nos bida.
Den Juan kapítulo 6 di e Tèstamènt Nobo, e Salbador ta efektuá un milager masha interesante. Ku solamente algun piská i algun pan, e Salbador a alimentá 5,000. Mi a lesa e relato aki hopi biaha, pero tin un parti di e eksperensia aki ku mi a falta ku awor tin gran nifikashon pa mi. Despues ku e Salbador a alimentá 5.000, El a pidi Su disipelnan pa rekohé tur lokual a keda, e sobránan, ku a yena 12 makutu. Mi a puntra mi mes dikon e Salbador a tuma e tempu pa hasi esaki. A bira kla pa mi ku un lès ku nos por siña for di e okashon aki ta esaki: E por a alimentá 5.000 i tabatin sobrá. “Mi grasia ta sufisiente pa tur hende.”9 E Salbador Su poder pa redimí i di sanashon por kubri kualke piká, herida, òf prueba—no ta importá kon grandi òf kon difísil—i ta sobrá. Su grasia ta sufisiente.
Ku e konosementu ei, nos por move pa dilanti ku fe, sabiendo ku ora tempu difísil bini— nan lo bini sigur—òf ora pikánan rondoná nos bida, e Salbador ta para ku “sanashon den Su alanan,”10 invitando nos pa bini na DjE.
Mi ta duna i testimonio na boso di e Ungwentodi Gilead, e Salbador JesuCristu, nos Redentor, i di Su poder maravioso di sanashon. Mi ta duna mi testimonio di Su deseo pa sana boso. Den e nòmber di JesuCristu, amèn.