Kapai en Kaudiahl Poatoapoat ong Soukohp kan oh Pein Atail Kaudiahl kin Kaweid Atail Mour kan
Kaudiahl kin wiewiawihte oh e kin lalahldi sang ni tanel kan me Kauno kin wiahda.
Rahn wet I pahn kosoia duwen kaudiahl poatoapoat ong soukohp kan oh pein atail kaudiahl poatoapoat kin kahluwa atail mour kan.
Ekei ansou kitail kin ale kaudiahl mendahte ma kitail sohte ese kahrepe sang Kauno. Mwohnte en Elder Jeffrey R. Holland eh malipilipda pwehn wiahla emen Wahnpoaron ni Suhn en 1994, [kid duwepwiki duweisek pahieu] I alehdi ehu kaudiahl kaselel me ohlo pahn malipilipda. I wia emen welipen ehu wasa oh sohte kilang kahrepen ahi alehdi kamaraino. Ahpw se pehsehla sang ni aht patpene wia aht misin nan England nan tepin 1960, [kid duwepwiki woneisek] oh I inenen poakpoake ohlo. I kin wiahki irairo ehu kalahngan lap ong ie. Sounpar kei samwalahr, I medemedewehier ma Kauno ketin kaukaunop ie ien wia emen wahnpoaron tikitik ong iengei misineri kaselel nan meh Ehk-riemenko me wia iengei tikitik ni aht wia misineri pwulopwul kei.1 Ekei ansou I kin kaparki misineri pwulopwul kan en kin kadek ong iengarail me tikitik kan pwehki irail sohte kak ese me ehu rahn irail pahn wia iengarail laud.
I ahneki kadehde kehlail ehu me Sounkomour Sises Krais me kin kakahluwa Mwomwohdiso kopwurpuwrdo wet. E ketin mwahngi ihs me e pahn malipe ong Sapwellime Wahnpoaron kan oh songen pwukoa da me re pahn ale. E pil ketin mwahngi wiepen kaunopada Sapwellime Wahnpoaron laud pwehn wiahla soukohp oh Presiden en Mwomwohdiso.
Kitail kapaida ni mensengo ni atail rong atail soukohpo, President Russell M. Nelson, kalohkihda kalohk en pahr ke-riepwiki en kalohk ong sampah me pid Kopwurpwurdohn rongamwahu unseko en Sises Krais.2 Keieun kalohk wet sang Presiden Nelson kasalehdahr me en Mwomwohdiso en Sises Krais ah tepin kokouda, momour, oh kaweid ong ansou kohkohdo pwilsang ni kamarain sang kaudiahl poatoapoat. Kalohk kapw wet kasalehda en Sahm limpoako ah kin ketin mahmahsendohng Sapwellime kan.
Ni ansou iou mwowe, Presiiden Spencer W. Kimball pil kasalehda dahme I pepehmm rahnwet. Ohlo kosoia: “Ong mehkoaros, me … kitail anahne keieu kaping kalahgan [ki] iei me nanleng kan ni mehlel kin langalang oh mwomwohdiso en Sises Krais kopwurpwurdohu kokoudahr pohn poahsoan en kaudiahl. Kaudiahl poatoapoat iei me wie kamkamaur rongamwahu en Kauno oh Sounkomouro, Sises Krais.”3
Soukohp Enoch mahsaniher mwomwen rahn pwukat me kitail momour loale. Kauno kasalehiong Enoch duwen dihp laud me pahn pweida oh kohpada duwen “kahpwal laud” me pahn pwarada. Ahpw, Kauno pil inoukihda, ”Ahpw I pahn doarehla nei aramas akan.”4 “Oh I pahn kadarewei me pwung sang nanleng; oh I pahn kapwarehda me mehlelo pohn sampah, pwehn kadehdeki sapwellimei Ieroso.”5
Presiden Ezra Taft Benson padahngki ni manaman laud me Pwuken Mormon, me wia kih en atail palien lamalam, pwarada sampah pwehn kapwaiada kehkehlik en Kauno ong Enoch. Sahmo oh Naho oh tongleng kan oh soukohp kan me pwarohng Joseph Smith ale “kaweid sang nanleng en kapwurehdo manaman me anahnepe mie ong wehio.”6
Soukohp Joseph Smith kin alahle kaudiahl mwurin kaudiahl. Ekei kaudiahlko pakairdahr nan kapokon wet. Tohto kaudiahl kan me alahldi rehn Spukohp Joseph ntingdier ong kitail nan Doctrine and Covenants. Pwuhk sarawi kan koaros en Mwomwohdiso wet audaudki erepit oh kupwuren Kauno ong kitail ni keimwseklan dih wet.7
Me patehng kaweid kan nan pwuhk sarawi kan, kitail pil kapaikidahr kaudiahl poatoapoat kan ong soukohp ieias kan. Soukohp kan iei “weliepen Kauno, me kolokol manaman en koasoiki Ih.”8
Ekei kaudiahl kan me inenen kesempwal, oh mehteikan kin kalaudehla atail wehwehkila me mehlel kan oh kin kaweid kitail nan rahn pwukat.9
Kitail inenen kaping kalahnganki kaudiahl me kohieng Presiden Spencer W. Kimball me mweidada prihsduhd oh kapai en tehnpas sarawi kan en kohieng ohl koaros me wia tohn Mwomwohdiso wet ni Suhn 1978.10
I iangehr ekei meh Ehk-riemenko papah oh me wie doadoahk ansou me kaudiahl kesempwalo alahldi. Emenemen irail, ni aht koasoi pene, kasalehda manaman oh ehupenehn ngehno me kaweid Presiden Kimball oh irail nan irairo. Tohto irail nda me e wia kaudiahl keieu manaman me irail alehdi mwohn oh mwurin ansouo.11
Kitail kan me wie papah nan Pwihn en Wahnpoaron Ehk-riemenko kapaikidahr kaudiahl kehlail kan me alahldier rehn soukohp kan nan atail ansou kan.12 Presiden Russell M. Nelson wiahier emen weliepen Kauno mehlel ong me pid kaudiahl kan me kin sewese peneinei kan kauwada pehi sarawi en pwoson nan imwarail kan, kapwurepene Israel nan pali koaros, oh kapaiada towehkan me alehier kapai sarawi en nan tehnpas sarawi oh tiahk sarawi kan.
Ansou me wekdekla kesempwal kei pwehn kapaiada nimwatail kan pakairda nan kapokon lap en Oaktohpe 2018, I kadehde “me nan doadoahk kan en Kaunsel en Presdensi Keieu oh Pwihn en Wahnpoaron Ehk-riemenko nan tehnpas sarawi, … mwurin atail soukohpo pekiehr rehn Kauno en kadaredo kaudiahl … , koaros alehdi pasapeng manaman ehu.”13
Ni ansouo, kaudiahl teikan me pid tiahk sarawi kan en nan tehnpas sarawi pil alahldier ahpw sohte pakairda de saik doadoahk.14 Kaweid wet tepkihda kaudiahl en kokohp me kohdo rehn Presiden Russell M. Nelson oh pasapeng manaman oh mehlel ong irail kan me wiewia mwekido. Presiden Nelson ni mehlel alehki lih akan me kakaun Pwihn en Sawas en Lih, Peinakapw akan, oh pwihn en Praimeri kan. Keimwseklahn kaweid, nan tehnpas sarawi ong Presidensi Keieu oh Pwihn en Wahnpoaron Ehk-riemenko inenen manaman oh ngenin. Emenemen kiht ese me se alehier eripit, kupwure, oh kepitien Kauno.15
I kalohkihda ni mehlel me kaudiahl poatoapoat kin wie alahldi oh kin alahldi nan songen wiepe kan me Kauno ketin kauwadahr. I kadehde me kalohk kapw me Presiden Nelson wiahier ni mensengo wia ehu kaudiahl pwehn kapaiada aramas koaros.
Se Luke Koaros ong Kamadipwo ni Tehpel en Kauno.
Se pil kalohkihda ineng en aht mohngiong kan en patehng irail kan me nannantihong en wia arail kadehde, solahr kalap sarawi, de me ederail kan irihrsangehr nan rekohd en Mwomwohdiso. Se men kitail en kamadipwki, “mahsen kan en Krais“ ni tehpel en Kauno, pwehn esehla dahme kitail anahne wia.16 Se anahnei kumwail!! Mwomwohdisou anahne kumwail! Kauno ketin kupwurkin kumwail. Aht kapakap mwuledek iei me kumwail en iang kiht kaudekiong Sounkomour en sampah. Se ese me ekei kumwail mwein alehier wiewia suwed, kailok de wiewia teikan me sohte mwahu. Se pil ese me ekei kumwail ahneki kahpwal ong arail pwoson me sohte me pwungki, wehwehki, de men kapwungala.
Ekei riatail souleng me keieu kehlail oh pwoson lokolongkiher kahpwal ong arail pwoson nan irair en ansou iou. I kin pwungki soai en W. W. Phelps, me kesehla Mwomwohdisou oh uhiengada Joseph Smith nan ehu mwolehn kopwung en Missouri. Mwurin eh koluhla,, ohlo ntingla rehn Joseph, “I ese ahi mwekido, komwi pil ese, Koht mwahgi, oh I men komourla ma kempoakepahi kan pahn sewese ie.”17 Joseph mahkehng ohlo, kapwurehiong ah doadoahk, oh ntingehdi ni limpoak, “Kempoakepei ni tapio pil pwurehng kempoakepei ni imwio.”18
Riei ohl oh lih akan, sohte lipilipil amwail irehkan, menlau wehwehki me Mwomwohdisoht oh towehkan pahn kasamwo kumwail!
Pein Atail Kaudiahl kin Kaweid Atail Mour kan
Pein atail kaudiahl kin kohieng koaros me kin rapahki ni karakarahk kaweid sang Kauno. E kesempwal duwehte kaudiahl en kokohp. Pein atail kaudiahl en ngehno sang Ngehn Sarawi kahrehdahr miliohn en aramas kei me ale kadehde me anahnepe mie pwehn pepdaisla oh wiahla tohn Mwomwohdiso en Sises Krais en Souleng en Imwin Rahn-akan.
Pein atail kaudiahl iei kapai mwuledek me kin alahldi mwurin pepdais ansou me kitail “kasarawilahr ki alahldi en Ngehn Sarawi.“19 I kak tamataman ehu kaudiahl en ngehno ni ansou me I sounpar 15. Riei pwutako raparapahki kaweid sang Kauno duwen eh kak sapeng aht pahpao, me sohte pwungki riei pwutako en wia ah misin. I pil kapakap ni ineng mehlel oh alehdi pein ahi kaudiahl en me mehlel en rongamwahuo.
Pwukoah en Ngehn Sarawi
Pein atail kaudiahl kin peian me mehlel kan en palingehn me kin alahldi sang Ngehn Sarawi.20 Ngehn Sarawi me wia sounkasalehda oh sounkadehde me mehlel koaros, ahpw mehlel me pid Sounkomouro. Ma sohte Ngehn Sarawi, kitail sohte kak uhdahn ese me Sises iei Krais. Sapwellime pwukoa keieu iei en kin kadehde Sahmo, oh Naho oh Mwarera oh Sapwellimera klohri.
Ngehn Sarawio kak wekidala aramas koaros ki manaman kehlail ehu.21 Manaman wet sohte kin poatoapoat ihte ma aramaso pepdaislahr oh alehier kisakis en Ngehn Sarawi. Ngehn Sarawi pil kin wia sounkamwakel men ni ansoun koluhla oh mahk.
Ngehno kin mahsendo ni mwohmw kaselel kei. Kauno doadoahngki kawehwe kaselel pwukat:
“I pahn padahkihiong kumwail nan amwail madamadau oh nan mohngiongimwail kan, sang ni Ngehn Sarawi, me pahn kohdohng kumwail oh me pahn ket nan mohngiongimwail kan.
“Kilang, met, iei ngehn en kaudiahl.“22
Mendahte ah dodohk ah inenen manaman, e kin ekei pak kohdo ni meleilei ni ngihl malamal, oh tikitik ehu.23 Pwuhk sarawi kan kasalehda karasaras tohto kei me pid mwomwen en Ngehno kin dodohk nan atail madmadau, iangahki kameleilei atail madmadau kan,24patpato nan atail madmadau kan,25kamaraini atail madmadau kan,26oh pil wia ngihl ehu nan atail madmadau kan.27
Ekei koasondi kan me kin kaunop kitail en ale kaudiahl iangahki:
-
Kapakapki kaweid en palingehn. Ni wahu oh karakarahk kitail anahe rapahki oh peki28oh kanengamah oh aktikitik.29
-
Kaunopada ong kamarain. Met anahne kitail en ideidawehn padahk kan en Kauno oh kapwaiada Sapwellime kosonned akan.
-
Warehng alahle kamadipw sarawi, Ni atail kin wia met, kitail kadehde oh inoukihong Koht me kitail pahn alehda mwaren Sapwellime Ieroso oh me kitail pahn tamataman Ih oh kolokol Sapwellime kosonned akan.
Koasondi pwukat kin kaunop kitail en ale, kasawiada, oh idawehn loiloi oh kaweid en Ngehn Sarawi. Met iangahki “iren kameleilei kan … me kin wahdo popohl [oh] … mour soutuk.”30
Atail kaunopadahn palingehn kin kekeirda ni atail kin onohnopki pwuhk sarawi kan oh me mehlel kan en rongamwahuo oh douloalli nan atail madmadau kan kaweid me kitail kin rapahki. Ahpw tamataman en kin kanengamah oh liki sapwellimen Kauno ansou. Kaweid kin kohsang rehn Kaun eripito ni ansou me E “ketin pilada en kasukuhli kitail.”31
Kaudiahl nan Atail Malipilip kan oh Pwukoah kan
Ngehn Sarawi pahn pil ketkihda kaudiahl nan atail malipilip kan oh pwukoah kan. Sang me I pehmehr, kaweid lap en palingehn kin kalap kohdo ansou me kitail songosong en kapaiada mehteikan ni atail kapwaiada atail pwukoah kan.
I kak tamataman ni ei wia emen pisop pwulopwul ahi alehdi ehu pekipeki karuaru sang ehu pwopwoud mwohnte ei pahn iangada oapwoat sompihr pwehn wia ahi pwukoah. I peki ni ngidingid rehn Kauno mwohn en pwopwoudo pahn leleodo pwehn ese mwomwen ei kak kapaiada ira. E kasansalehng ie ara kahpwalo oh dahme I anahne sapengkin ira. Kaweid sang kaudiahlo kahrehda ahi kapwaiada pwukoa sarawi en ahi malipilip en pisop tetehn ahi ansouo inenen mwotomwot. Pisopk kan pohn sampah wet pil ehukihongie songen irehkohte rehi. Ni ei wia steik presiden, I sohte alehdihte kaudiahl kesempwal ahpw pil kaweid en kapwungpwungla me anahnepe mie pwehn kapwaiada kupwuren Kauno.
I kamehleleiong kumwail me emenemen kitail kak alehdi kaudiahl en kaweid ni atail kin doadoahk ni karakarahk nan mwetuwel en Kauno. Pali laud en kaweid kan kin kohdo sang rehn Ngehn Sarawi. Ekei ansou oh pwehki kahrepe teikan, kaweid kin kohdo sang rehn Kauno. I kadehde me met mehlel. Kaweid ong Mwomwohdisou pwon kin kohdo rehn Presiden oh soukohp en Mwomwohdisoht.
Kiht, ni aht wia Wahnpoaron en mwehi kapw wet, ahnekiher ansou mwahu en doadoahk ong oh iang atail soukohp en met Presiden Nelson seilok seli. I kapwurehiong dahme Wilford Woodruff ndahki Soukohp Joseph Smith, me e pil mehlel ong Presiden Nelson. I kilangehr duwen “Dodohk enNgehn en Koht kin mih reh, oh kaudiahl kan me Sises Krais kin ketkihong ih oh pweidahn kaudiahl pwuko.“32
Ahi pekipek karakarahk rahnwet iei me emenemen kitail pahn rapahki kaudiahl poatoapoat pwehn kaweid atail mour kan oh idawehn Ngehno ni atail kin kaudekiong Koht Sahm ni mwaren atail Sounkomour, Sises Krais me I kadehde ni mwaren Sises Krais, amen.