Ia Mwomwen Prihsduhd eh kin Kapaiada me Pwulupwul kan
Sang ni prihsduhd kitail kak maiauda. Prihsduhd kin wahdo marain nan sampah.
I kapingki ei pato wasaht. Ni ansou me I patohwanda me I pahn ahniki ansou mwahu en patohieng kumwail rahnwet, I patohwan perenikihda ahpw ni ansouohte I pil ahniki karakarahk. I ahniki ansou laud wie medemedewe dahme I pahn kak ehukiheng kumwail oh I koapwoaroapwoariki me Ngehn Sarawi pahn ketin kaweidkin kumwail ai padahk.
Nan Pwuhk en Mormon, Lehi kapaiada nah pwutangkan mwohn eh kapelsalehdala pwehn kak sowese irail kilang arail kehl oh koahiek unsek. Ngei me keieu tikitik nan pwungen seri welimen, oh nan pahr nekiero ehdin ngei seri me kelehpw luwehdi ni imwato. Ni riei kau arail sohte karanihe de kin kalap sohte emen me I kak lokaiahng wia mehkot apwal ohng ie. Mie ekei pwohng me I kin udahn sangatada. I kanpingki mehlel ai pahpa/nohno me kin nantiheng ara kak koaros en sowese ie Ehu karasaras en met iei ni ansou me ai pahpa ndahng ie me e pahn kiheng ie kapai en koaloloamwahu ni ansou ehu me udahn apwal. Mwurin ah kapai, sohte mehkot wekidekla ansouohte, ahpw I kak kehn meleilei oh limpoak sang Semei Nanleng oh sang rehn ai pahpa. I ahniki kapai en ahniki pahpa me warohng me kak kihda kapai kan en prihsduhd ni ansou kan me I anahne oh sewese ien kak kilang ai kehl kan oh koahiek unsek, duwehte Lehi ah wia ansou me e kapaiada nah serih kan.
Sohte lipilipil dahme kumwail kin lelohng, ansou koaros kumwail kak ale kapai kan en prihsduhd. Sang tohn peneinei kan, kempoakepah kan, ohlen papah akan, kaun en prihsduhd kan, oh Sahm Nanleng men me sohte pahn likidmeliehla kumwail, kumwail kak ale kapai kan en prihsduhd. Elder Neil L. Andersen mahsanih: “Kapai kan en prihsduhd udahn laudsang mehlel me kin pwukoahki patohwanda kisakiso. … Ni atail kin warohng, tiahk sarawih kan en prihsduhd kin kakairada atail mour kan.”1
Dehr periki peki kapai ni ansou me kumwail kin anahne kaweid. Ansou me kitail mih nan kahpwal iei ansou me kitail keieu anahne Ngehno en sewese kitail. Sohte me unsek oh kitail koaros kin lelehng kahpwal. Ekei kitail mweihn ahniki lokolok en pwunod, apwal, tengala nan wiewia suwed, de pepehm kan me kitail sohte itar. Kapai kan en prihsduhd kak sewese kitail powehdi kahpwal pwukat oh ahnikihdi meleilei ni atail pahn pousehwei atail mour . I koapwoaroapwoarki me kitail pahn nantiheng momourki mour me warohng ale kapai pwukat.
Ehu ahl me prihsduhd kan kin kapaikitailkihda iei sang ni kapai kan en peitriark. I esehla ei pahn kin tehksapahlih nei kapai en peitriark ni ansou me I kin insensued de sangat. Ai kapai kan kin sewese ie kilang dahme I ahniki koahiek loale oh koasondi pisetik en Koht me E sapwellimaniki ong ie. E kin koalolamwahuihe oh sowese ie kilengla mwohi me tehlap sang dahme I kak wia. E kin katamankin ie ai kisakis kan oh kapai kan me I pahn ale ma I kin momourki mour me warohng E pil sowese ie tamataman oh pehm meleilei me Koht pahn ketin ketkihda pasapeng kan oh ritingada wenihmw kan ong ie ni ansou me I keieu anahne.
Kapai kan en peitriark kin sewese kitail en pwurala kousonla rehn Samatail Nanleng. I ese me kapai kan en peitriark pwilsang rehn Koht oh kak sewese kitail kawekala atail luwet akan ong kehlail. Mepwukat sohte wia mehn kaweid kei sang soun soai kan; ahpw kapai pwukat kasalehiong kitail dahme kitail anahne rong. Irail duwehte Liaohna ehu ong emenemen kitail. Ni atail kin mwohnwarki Koht oh pwoson Ih, E pahn kin ketin kahluwaikitail nan atail apwal akan.
Duwehte en Koht ah ketin kapaiada Joseph Smith ki prihsduhd pwe kapai kan en rongamwahuo en kak kopwurupwurdo, kitail kak alehdi kapai kan en rongamwahuo nan atail mour kan sang prihsduhd. Ehuehu wihk kitail kin ale kapai oh ansou mwahu en ale kamadipw sarawi. Sang ni tiahk sarawi en prihsduhd wet, kitail kak ahniki Ngehno en ketket rehtail ansou koaros, me kak kamwakeleikitailda oh kaminekitailda. Ma kitail kehn me mie mehkot me kitail anahne kihsang nan atail mour, tuhwong emen kaun me kumwail likih me kak sowese kumwail keid nan ahl me pwungo. Amwail kaun akan kak sowese kumwail ale manaman unsek en Tomw en Sises Krais.
Kalahngan ong prihsduhd, kitail pil kak ale kapai kan en tiahk sarawi en tehnpas sarawi. Sangete ansou me I kak pidolong nan tehnpas sarawi, I wiahkihda ai koasondi oh me keieu kesemwpwal ien kin pwarek ansou koaros. Ni ai kin kihda ansou oh wia tohnmetei kan me mie pwe ien kak karanih Semei Nanleng nan Tehnpase, I kin ahnikihdi kapai en ale kaudiahl oh pepehm kan me seweseiehier nan ai mour.
Sang ni prihsduhd kitail kak maiauda. Prihsduhd kin wahdo marain nan sampah. Elder Robert D. Hales mahsanih: “Ma sohte manaman en prihsduhd, ‘sampah pwon pahn sohte katepe’ (tehk D&C 2:1–3). E pahn sohte mie marain, sohte mie koapwoaroapwoar--ihte rotorot.”2
Koht ketin wie ohieidangkin kitail. E ketin kupwurki kitail en pwurala Reh. E ketin mwahngi pein emenemen kitail. E ketin mwahngih ihs kumwail. E ketin poakohng kitail. E kin ketin tetehk kitail oh kapaikitailda tetehn kitail kin pehm me kitail sohte warohng. E kin ketin mwahngih dahme kitail anahne oh ahnsou me kitail kin anahne.
“Peki, a ke pahn ale; rapahki, a ke pahn diar; letelet, a e pahn ritida:
“Pwe koaros me kin peki pahn ale; oh me kin rapahki pahn diar; oh me kin letelet, e pahn ritida.” (Madiu 7:7–8).
Ma saik mie amwail kadehde duwen prihsduhd, I koangoangoahkin kumwail en kapakap oh peki pwe kumwail en pein ese ah manaman oh kumwail eri wadek pwuhk sarawi kan pwe kumwail en rong mahsen kan en Koht. I ese me ma kitail pahn nantiheng esehla manaman en prihsduhd en Koht nan atail mour kan, kitail pahn kapaida. Ni mwaren Sises Krais, amen.