Pwukoah Lapalap Ehu

Sang Joy D. Jones

Presiden Lap en Primary

Ni atail wia lih pwoson kei, kitail kak alehdi padahk mehlel kan sang ni dahme Soukohp Joseph kehner me kasalehda duwen wen marain me kitail kak ale peihn atail kaudiahl.

I kapingki ei pahn koasoaiada duwen Lih akan arail pwukoa nan Kopwurpwurdohu. E sansal me lih akan kin ahneki pwukoah me inenen kesempwal nan Sapwellimen Samatail Nanleng pilahn. Presiden Russell M. Nelson padahngki, “E pahn apwal en sohngedi wiewiahn lih akan, kaidehn ongete nan peneinei ahpw pil ong nan Sapwellimen Kauno Mwomwohdiso, ni arail kin wia lih pwopwoud men, nohno men, nohno kahlap men; nin duwen lih perien kei oh me kitail pahn nohnoki; ni arail kin wia sounpadahk oh kaun kei; ahpw mehlel arail kin wia mehn karasaras mwahu oh ngong en doarehla irail me pwoson kan.” ¹

Rehn Pwihn en Sawas en Lih en mahs nan Nauvoo, pahr 178 samwalahro, Soukohp Jospeh Smith kangoangehki lih akan en “momouriki arail pwuhng kan.” ² Arail karasaras me kaskuhlih kitailehr rahnwet. Re ehukipene arail idawehn kaweid en soukohpo oh momouriki pwoson tengeteng nan Krais ni arail sewsewese kihda poahsoan me kitail keskesihnenehr powe rahnwet. Riei lih akan, met iei atail ansou. Kitail ahneki pwukoah sarawi sang Kauno, oh mie lapalahn anahnepen doadoahk lelepek en emenemen.

Presiden Spencer W. Kimball kawehwehda: “Pwukoa en wia lih pwung emen nan kaimwseklahn sampah, mwohn ketido keriau en atail Sounkomour, iei pwukoa lapalap ehu. Kehlail oh kaweid en lih pwung emen katapan laud nan rahn pwukat.” ³

Presiden Nelson pil mahsanih: “I koangoangehki riei lih akan en Mwomwohdiso … en wenla mwowe oh wia! Uhkihda ahmw pwukoah pwung oh anahn en nan ihmwomw, ahmw wasahn kousoan, oh nan sapwellimen Kauno wehi—laudsang me ke kin wia mahso.” ⁴

I apwtehn ahneki ansou mwahu, iangahki pwihn en serien Primary kei, en iang mihting ehu rehn Presiden Russell M. Nelson nan imwen peneinei an Smith nan Palmyra, New York. Rong ni atail soukohp a pahn padahkiong seri kan dahme irail kak wia en wenla mwowe oh wia.

Sister Jones: “Udahn I men ese ma e sou mie ahmw iren peidek me ke pahn men idek rehn Preseden Nelson. Ke wie mwomwohd me rehn soukohp. Mie mehkot me ke kin mentehn idek rehn soukohp? Ei maing, Pearl.”

Pearl: “E apwal wia soukohp men? Komw kin, duwehte, kediropw douluhl?”

Preseden Nelson: “Ei udahn e apwal. Soahng koaros me kitail kin wia en song en duwehla Sounkomouro udahn apwal. Ni karasepe, ni ansou me Koht men ketkihong Kosonned Eiseko rehn Moses, iawasa me E mahsanihong Moses en patohla ie? Pohn dohl lap ehu, pohn dohl en Mount Sinai. Eri Moses patohwan alu kohdahla pohn dohl lapo pwehn ale Kosonned Eiseko. Met, Samatail Nanleng kakete mahsanih, ‘Moses, ke tepda wasahu, oh I pahn tep wasaht, oh I pahn tuhwong uhk nan werenge.’ Soh, Kauno kupwurpereniki atail doadoahk, pwehki atail doadoahk me kin wahdo kapai kan ma sohte. Ni karasepe, mie pak kumwail ale kaskuhl en piano?”

Serih kan: “Ei maing.”

Pearl: “I ale paiolihn.”

Preseden Nelson: “A ke kin pirakdis?”

Serih kan: “Ei maing.”

Preseden Nelson: “Dahme pahn wiawi ma kumwail sohte pahn pirakdis?”

Pearl: “Ke pahn manekehla.”

Preseden Nelson: “Ehng, kumwail sohte pahn pweida e? Eri pasapengo pahn ei, Pearl. E anahne en mie ngoang, doadoahk laud, kalapw onopki, oh e sohte mie imwi. Eri mwahu! Eri mwahu, pwe se kin kilang aht kin mwamwahula ansou koaros. Pil nan mour mwurin mour wet se pil wie mwamwahula.”

En Presiden Nelson eh pasapeng ong seri kaselel pwukat pil doke emenemen kitail. Kauno kupwurpereniki atail doadoahk, oh atail doadoahk me kin wahdo kapai kan. Kitail kin kapwaiada ekis ekis. Ansou koaros kitail wie mwamwahula ihte ma kitail nanantieng idawehn Kauno. ⁵ E sohte ketin kaskasik kitail en unsek rahnwet. Kitail kin nantihla mwowe dadaur pein atail Nahna en Sainai. Ni ansou kan me nekier, atail seiloak anahne mie ngoang en doadoahk, doadoahk laud, oh onopki, ahpw wen atail kin nantieng mwahula ihme kin wahdo kapai soutuk kan. ⁶

Dahme kitail pil esehla sang Soukohp Jospeh Smith oh Keieu en Kaudiahl duwen ngoang en doadoahk, doadoahk laud, oh onop? Keieu en Kaudiahl kihong kitail kaweid nan atail pwukoah kan me kitail kin wihwia kohkowei. Ni atail wia lih pwoson kei, kitail kak alehdi padahk mehlel kan sang ni dahme Soukohp Joseph kehner me kasalehda duwen wen marain me kitail kak ale peihn atail kaudiahl. Ni karasaras:

Kitail kin doadoahk pahn kahpwal kan.
Kitail kin wadek pwuhk sarawi kan pwehn alehda kaweid en mwekid.
Kitail kin kasalehda atail pwoson oh koapwoaroapwoar.
Kitail kin kihla wen atail kak koaros rehn Koht en sewesei kitail powehdi atail imwintihtih kan.
Kitail kin sakarakidahng Koht nsenen nan mohniongatail kan.
Kitail kin ahne Sapwellime marain me kin kaweid kitail kamarainih kitail ansou me kitail soupeihng Ih.
Kitail wehwehkier me E ketin mwahngih emenemen kitail oh kin ketkihong kitail pwukoa kesempwal kan. ⁷

Pil ehu, Jospeh Smith kapwurehdo erepit me kitail ahneki kahrepe soutuk inenen kesempwal. Pwehki sang ni ehupenehu ong Samatail Nanleng, I kamehlele me E ketin kaskasik kitail en rapahki kaudiahl sang Ih.

Kauno kaweidki Emma Smith en “alehda Ngehn Sarawi,“ esehla meh tohto, “pwilikihdi mehkan en sampah wet, … rapahkihda mehkan en wasa me mwahusang,“ oh “kolokolte ah inou sarawi kan“ rehn Koht. ⁸ Kaskuhl wia kisehn atail keirida soutuk me inenen kesempwal, uhdahn kesempwal ansou me Ngehn Sarawi kin padahkiong kitail en pwilikihdi mehkot—wehwehki mehkot me kin koaroapwa kitail de kapwandehla atail keirida.

Presiden Nelson mahsanih, “I koangoangehkin kumwail en kalaudehla amwail kak alehda pein amwail kaudiahl.” ⁹ Mahsen akan en sapwellimatail soukohp kin wie mihmi rehi ni ai kin medemedewe duwen en lih akan arail pwukoah en wenla mwowe oh wia. E ketin peki rehtail, me en wia pwukoah keieu laud. E padpadahkiong kitail mwomwen atail kak powehdi sampah wet me audaudiki dihp ni atail kin alehda oh mwekidkihda kaudiahl. ¹⁰ Ni atail pahn kin kapwaiada, momouriki kosonned akan en Kauno, e ketin inoukihong kitail, duwehte Emma Smith, “en ahniki wairenleng en pwuhng.“ ¹¹ Soukohp Joseph Smith padahngki duwen kesempwal pen wewehkihla ahl me kitail nanantihla loale nan mour wet iei koasondihsang Koht. Ma sohte wehweh wet, kitail “ pahn ahniki pwang en madamadau oh sawehwe.” ¹²

Nan kapokon lap wet, kitail pahn rong mehlel kan me kaweidkin kitail en wekidala, kawahuwihala, oh kamwakelehda atail mour. Sang pein atail kaudiahl, kitail sohte pahn toutouki dahme ekei kin kahdahniki “katoutou en kapokon lap”—ansou me kapokon lap nekehr a kitail tihwohkilahr kapwaida soahng koaros ansoukiset. Lih akan kin pukoahki soahng pwukoah tohto, ahpw e sohte kak wiawi, oh pil sohte anahnepe, kitail sohte kak wia mehkoaros nan ahnsoutehkis. Ngehno sewesei kitail en ese mehnia pwukoah me konehng kitail en kapwaiada rahn wet. ¹³

Sang ni limpoak en Kauno me Ngehn Sarawi kin sewese kitail en ese Sapwellime kupwur me pid atail keirida. Kin nantiheng tetehk peihn en emen emen kaudiahl pahn kasalehiong ih ong pein ah keirida. ¹⁴ Kitail kin rong oh wia. ¹⁵ Kauno mahsanih, “Peki rehn Sahmo ni mwarei, ni pwoson kamehlele me kumwail pahn alehdi, oh kumwail pahn ahneki Ngehn Sarawi, me kin kasalehda soahng koaros me kak wiawi.” ¹⁶ Atail pwukoah doadoahk iei kitail en ale kaudiahl ansou koaros.

Ni atail kin koahiekla en kapwaiada mepwukat, kitail kin alehda dirlahn manaman nan pein atail pwukoa en papah oh kapwaiada doadoahk en komour oh mour soutuk—pwehn “pwilikihdi [ni mehlel] mehkan en sampah wet, oh rapahkihda mehkan en wasa me mwahusang.” ¹⁷ Kitail ahpw pahn kak kasalehieng irail me pahn kohdo mwuhr kan ngoang en wia soahngohte.

Riei ohl oh lih akan, kitail koaros kin rapahki manaman en Koht nan atail mour. ¹⁸ Mie minimin kaselel nan pwungen lih oh ohl akan ong ni pweidahn Sapwellimen Koht doadoahk rahnwet. Kitail kin doadoangki manaman en Prihsduhd sang ni atail kin wiahda inou sarawi kan, tepkihda nan pilen pepdais oh ahpw lelongalahng ni dihd en tehnpas sarawi kan. ¹⁹ Presiden Nelson padahkieng kitail, “Lih koaros oh ohl koaros me wiahda arail inou sarawi kan rehn Koht oh kolokol inou sarawi pwukat, oh me kin iang warohng patehng tiahk sarawi kan en prihsduhd, ahneki ahl ong ni manaman en Koht.” ²⁰

Peihn ahi me I men kasalehda rahwet iei me ni ai wia lih emen I sohte kalapw medewe nan ai mour me I ahnikihier sang ni ahi inou sarawi kan, ong ni manaman en Prihsduhd. ²¹ Riei lih oko, I kapakapki me kitail en pohnese oh wauniki manaman en prihsduhd ni atail pahn “kolokol teng [atail] inou sarawi kan,” ²² roapwoahnge mehlel akan en pwuhk sarawi kan, oh ahne mahsen akan en atail soukohp ieias rahnwet.

Kitail ahniki karakarahk oh kaselehda atail loaloapwoat ohng Samatail Nanleng oh atail Sounkomour, “ni atail pwoson ih ni mehlel, mweidohng ih mehkoaros me ahniki manaman unsek en kamaurala.” ²³ Kitail nantihla mwowe oh perepereniki seilok wet lel ni wen we ehu me palingenetail kak wia oh sewewse irail kan me mih limwahtail en wia soangen mwekidohte sang ni kasalehda kaun mwahu, limpoak, papah, oh mahk.

Elder James E. Talmage katamankin kitail, “Me kin keieun utung lih oh mour en lih iei Sises Krais.” ²⁴ Ni kaimwseklahn padahk wet, me pid lih akan oh arail pwukoa kan nan Kopwuropwurdohu, ahi kalelepak: mehnia pwukoa me keieun anahn? I kadehdehki me iei en rong Ih, ²⁵ idawehn Ih, ²⁶ likih Ih, ²⁷ oh wiahla kisehn Sapwellime limpoak. ²⁸ I ese me Eh ketin ieias. ²⁹ Ni lengileng sarawi en Sises Krais, ahmen.