Kitail Sou Doulahte Mwowe nan Doadoahk Lap wet?
Kitail en tamataman ahnsou koaros uwen pweine me Joseph oh Hyrum pwaindahro, iangahki me tohto en irail ohl, lih, oh seri me lelepek pwehn katengtehdi Mwomwohdiso.
Kalahngan en komwi, Presiden, pwehki ritida mwahu. Maing souleng ohl oh lih akan, pahr 215 samwalahro, kisin pwutak kis ipwidiong Joseph oh Lucy Mack Smith nan Vermont nan wasa ieu me dehdehki New England nan palimesehn United States.
Joseph oh Lucy Mack kamehlele Sises Krais, onopki pwuhk sarawi kan, kapakap ni aktikitik, oh kin alu nan ara pwoson Koht.
Ira kahdaniki neira kisin pwutak Joseph Smith Jr.
Me pid peneinei en Smith, Brigham Young koasoaia: “Kauno mahsanih [Joseph Smith], pil iangahki ah pahpa, oh ahn ah pahpa pahpao, pil iangahki kadaudoke kan kohla lel Abraham, oh sang Abraham kohla lel ni nohliko, sang ni nohliko kohla lel Enoch oh sang Enoch kohla lel Adam. E kin mamahsanih peneinei wet oh intao ni ah kin piripiriseli sangete ni uhdakeho leledo ni ipwidi en ohl menet. [Joseph Smith] kasarawilahr kohkohlahte.”1
Kempoake en ah peneinei, Joseph Jr. inennen karanih rie pwutak laud Hyrum, me sounpar weneu ahnsou me Joseph ipwidi.
Oktohpe nekiehro, I mwohndi pohn takai me mih nan werengen imwen Smith nan Sharon, Vermont, wasa me Joseph ipwidi ie. I kehn ahn Hyrum limpoak ohng Joseph oh I pein medeweiong ih ah kolokol rie kisin serio nan peh ko oh padapadahkiong ia mwomwen ah pahn alu.
Pahpa oh Nohno Smith pil lelohng pein ara kahpwal, me elehiong irail en kemwekid ara kisin peneinei pahk tohto mwohn arail soandiong nan New England oh wiahda lamalam kehlail en kousoanla ni palieir en New York State.
Pwehki peneinei wet ah ehupene, irail dadaur kahpwal pwukat oh irail koaros pil ahneki kehlail en pwurehng tepda nan wasa ieu me acre-epwiki en sahpw tuhke ieu nan Manchester, karanih Palmyra, New York.
I sohte nohn wehwehki ma tohtohn kitail ese soangen kahpwal en paliwar oh palingehn me mour kapw wet kihong peneinei en Smith—kamwakelehda sahpw, padokehdi wahn tuhke oh wahnsahpw akan, kauwada kisin ihmw tuhke oh soangsoangen ihmw en nan sahpw akan, doadoahk ohng mehteikan ni rahn, oh wiahda dipwisou kaselel oh mwahu kan pwe en kak netikihla nan town.
Ni ahnsou me peneinei wet lel nan palieir en New York, wasao inennen pingipingkihda pelien lamalam akan—me kahdaneki Keriapak en mehn Pepehm Laud.
Erein ahnsou wet me akamai en nanpwungen mwomwohdiso kan wiewiawi, Joseph eri alehdi kaudiahl kaselel ehu, me kahdaneki rahnwet Kaudiahl Keieu. Kitail paieki me mie poadoapoad laud me pahieu me I pahn koasoaia.2
Joseph intingihdi: “Nan ahnsoun lapalahn mwekimwekid wet [ni pelien lamalam akan] ahi lamalam kin kalapw alehda madamadau laud oh pepehm en soansuwed kehlail; ahpw mehndahte ahi pepehm kan kin loal oh ekei pahk insensuwed, I kin song tohrohrsang pelien lamalam ako, itarete ahi patehng arail kapokon kan uwen me I kak. … [Ahpw] uwen laud en kapingiping oh akiakamai nanpwungarail, e inennen apwal ohng aramas me iang soangen ahi pwulopwul, oh me sohte kin wehwehki aramas oh dahme ahn aramas, I en esehda mehlel ihs me pwung oh ihs me sapwung.”3
Joseph sohpeiong Pwuhk Sarawi pwe en rapahki pasepengpen ah peidek kan oh wadek Seims 1:5: “Ma emen rehwail anahne eripit, a en kapakap oh peki rehn Koht, oh Koht ahpw pahn ketikihong, pwe Koht me kupwursapan oh kalahngan ong aramas koaruhsie.”4
Joseph eri intingihdi: “Saik pahk ehu me irehn pwuhk sarawi kasalehieng mohngiong en aramas manaman laud sang dahme met wiahiongehr mohngiongeiet ahnsou wet. E mwomwen kohdohngie ni kehlail ong ahi pepehm koaros en mohngiongeiet. Pahk tohtohie me I katamandohngie.”5
Joseph diarada me Pwuhk Sarawi sohte kolokol pasapengpen peidek en mour koaros; pwe e padahkiong ohl oh lih akan ia mwomwen arail pahn diar pasapengpen arail peidek kan sang ni arail pahn koasaoiong Koht sang ni kapakap.
E kapatahiong: “Eri, pwehn pahrekiong met, iei ahi ineng laud en peki rehn Koht, ngehi eri kohla nanwelo pwe I en song wia. E wiawi ni menseng kaselel, ni rahn sansal ehu, ni tepin spring en pahr kid walepwiki rieisek.”6
Ekiste mwurih, Joseph koasoaia me “[ehu uhr en] marain uh pohi [oh] I kilangada Kahlap riemen, me lingara oh ara kilohri siksang me kak kawehweh, kisikisihnen pohnangi nan wehwe. Emen ira mahsendo, malepeie ni edei oh mahsanih, ni ah ididihlahng mehteio —[Joseph,] Iet Nei Pwutak Kempoake. Rong Ih!”7
Sounkomouro eri mahsani, “Joseph, nei pwutak, dipomw kan lapwadahr. Kohwei, alu nin duwen ahi koasoandi kan, oh kolokol ahi kosonned akan. Eri kilang, ngehi me Kaun en kilohri. Ih kalohpwulahr pwehki sampah, pwe koaros me pahn kamehlele mwarei en kak ahneki mour soutuk.”8
Joseph kapatahiong me “Sohte pwahnd, ahnsouwo, me I ahnekihda kehlail en paliwareiet, pwe I en kak koasoai, oh idek rehn Kahlapo me kisikisihnen nan maraino pohnangi, mehnia nan pelien lamalam kat me pwung.”9
E kapwurehiong, “Ira mahsaniongie me pelien lamalam koaros kin kamehlele padahk sapwung kan, oh me sohte ehu rehrail me Koht kin ketin ekerki Sapwellime mwomwohdiso oh wehi. Oh … ahnsouwohte [I] alehdi inou ieu me unseklahn rongamwahu pahn sansalohngie ehu rahn.”10
Joseph pil intingihdi, “I pil kilangada tohnleng tohto nan kaudiahl wet.”11
Mwurinte kaudiahl kaselelo, Joseph intingihdi: “Palingeniet audaudkihda limpoak, oh erein rahn tohto I kin wie kapikapingahki ahi peren laud. … Kauno ketin ieiang ie.”12
E pwurasang wasa sarawio nan tuhke ko oh tepda kaunopada en wiahla soukohp en Koht.
Joseph tepda pil esehla dahme soukohp en mahs ako kin lelohng—kapwurupwurla, uhwong, oh lokolok. Joseph katamando ah ehukiong kaudiahl me e kilangehro ong emen sounpadahk me pil kin inennen kehlail nan ah akamaiki pwungen ah mwomwohdiso.
“I inennen pwuriamweikihla ah mwekido; e sohte wiahki mehkot tikitik, pwe mehkot me e waski, ininda me doadoahk en tepil mwo, oh sohte kaudiahl kin wiawi nan rahn pwuko; pwe soahng ko koaros me kin iang wahnpoaron ko sohrala, oh sohte pahn pil ehu pwarada.
“Mwuhr, I ahpw diarada me koasoaio kahrehda sounpadahk en mwomwohdiso tohto en uhwongie, oh elehda lapalahn kaolokolok, me doudoulahte oh lalaudla; … oh wiawier nanpwungarail koaros—elehiong koaros arail ehupene oh uhwongie.”13
Sounpar siluh mwuri, nan pahr 1823, nanleng pwurehng ritida ni eh wia kisehn Kapwurupwurdohn rongamwahu en Sises Krais ni imwin rahn akan. Joseph intingihdi me tohnleng men, adaneki Moroni, pwarehng oh koasoaia “me Koht kolokol doadoahk ehu I en wia … [oh me] mie pwuhk ieu wie nekinek, inting pohn pleit kohl kei” me audaudki “unseklahn rongamwahu soutuko … me kohsang rehn atail Sounkomouro ong irail akan mehn kawahko [en America].”14
Mwurin ahnsou kis, Joseph alehdi, kawehwehdi, oh kadarpeseng poadoapoad en mehn kawahko, me adaneki Pwuhk en Mormon nan rahnpwukat.
Rie pwutak Hyrum, me kin utung ih ahnsou koaros, ahpw mehlel mwurin pwahl en neho me udahn kamedek oh kereniong kemehla ni pahr 1813, wia emen sounkadehdehpen pileit kohl ko. E pil wia emen towe en meh wenemen ko en Mwomwohdiso en Sises Krais ahnsou me e koasoandihla nan pahr 1830.
Nan ara momourpene, Joseph oh Hyrum ehupene nan ara sohpai pwihn en sounpei oh lokolok koaros. Ni karasepe, ira koaros lelohng lapalahn luwet oh kahpwal laud ni ara mih nan Kalapwuhs en Liberty nan Missouri erein sounpwung limau nan ahnsoun kopou en pahr 1838-39.
Nan Epreil en pahr 1839, Joseph intingiong ah pwoud Emma pwehn kawehwehdi mwomwen Kalapwuhs en Liberty: “I leme me met kereniong sounpwung limau oh rahn weneu me I mihmiki pahn mahs sakanakan, en soun silasil kat pwohng oh rahn, oh ni dihd kat, meteh kateng kan, oh ngilen wenihmw meteh kan, en kalapwuhs ieu me inennen samin oh kaloalloid. … Se pahn anahne mwekid sang [wasaht] oh se kapingki. Se kasamwoh dahme pahn lelohng kiht, se sohte kak mihmi wasa ieu me sakanakan sang met. … Se pahn solahr inangih Liberty nan Clay County, Missouri. Se itarkiehr wasao kohkohlahte.”15
Nan ahnsoun lokolok ah wiewiawi, Hyrum kasalehda ah pwoson sapwellimen Kauno inou kan, patehng inou en pitisang ah imwintihti kan ma ih me e pilada. Nan kapai ieu me Hyrum alehdi nan pahr 1835 sang rehn Joseph Smith, Kauno inoukiong ih: “Ke pahn ahneki manaman en pitisang ahmw imwintihti kan. Aramas pahn rapahki ahmw mour ni ineng kehlail pwehn kihsang, ahpw ke pahn pitisang.. ma e kapereniuhkada, oh ke inangih, ke pahn ahneki manaman en pein kihdi ahmw mour pwe en kalinganahla Koht.”16
Nan June 1844, Hyrum ahneki pilipil en kihdi ah mour pwe en kalinganahla Koht oh en “katengehkihdi ah kadehde pein intah”—peipeian rie pwutak kempoake Joseph.17
Wihk ehu mwohn arail pahn wia arail seiloak ong Carthage, wasa irail kamakamala ie sang rehn irail pwihn en sounpei kan me kalitopwiahla meserail kan pwe aramas en sohte diarada ihs irail, Joseph intingiehdi me “I panawih riei pwutak Hyrum en wahda ah peneinei oh iangada pwoht oh kohkohla Cincinnati.”
I kin men sengisengkihla ahnsou me I kin tamanda pasapeng en Hyrum: “Joseph, I sohte kak kokohlasang uhk.”18
Joseph ih Hyrum eri kohla nan Carthage, wasa ira mehkila mwaren Krais oh sapwellime doadoahk.
Pakair en kamakamalao me keieu manaman oh dehde iei met: “Joseph Smith, Soukohp oh Ohl Sarawi en Kauno, … kapwurehdo Pwuhk en Mormon, me e kawehwehdiehr sang ni kisakis oh manaman en Koht, oh kadarpeseng pohn sahpw laud riau; ih me wahdo rongamwahu unseko, me e audaudki, ong keimw pahieu en sampah; e pil wahdo kaudiahl kan oh kosonned akan me wiawihkihda pwuhk en Doctrine and Covenants, oh soangsoangen ire kesempwal tohto oh kaweid mwahu kan pwe en wia kamwahupen nein aramas akan koaros; kapokonepene souleng en Imwin-rahn akan meh kid kei, diarada kahnimw kaselel ehu, oh kihdiong indand oh ahd ehu me sohte kak sohrala. … Oh pil duwehte tohto en sapwellimen Kauno me keikeidi kan en mwehin kawahko, [Joseph] katengehkidiehr ah pwukoah oh ah doadoahk pein intah; pil duwehte rie pwutak Hyrum. Nan mour ira sohte kin tohrohrpeseng, oh ni mehla ira sohte tohrohrpeseng!”19
Mwurinte ara mehlao, paliweren Joseph oh Hyrum kapwurupwurla Nauvoo, kamwakelda, oh kalikouda pwe peneinei en Smith en kak kilang arail me kempoake kan. Are nohno kempoake kapwurehiong: “Ahnsou reirei I kin nantiong kakehlaka ie, kakehlaka palingeniet, oh kin likweriong Koht en kakehlaka ie; ahpw ahnsou me I pidelong nan pehreo, oh kilang paliweren nei pwutak ko mwohn meseie, oh rong ngilen sengiseng kan oh weriwer kan en ahi peneinei oh sengiseng kan sang ni kilin ewen ara pwoud ko, neira serihko, riara pwutak ko, oh riara serepein ko, e nohn laud ong ie. I idengekidi oh likiwerkiong Kauno ni palingeniet diren weirek, ‘Maing ahi Koht! Maing ahi Koht! Dahme komw ketin likidmeliekihla peneineiwet?’”20
Nan ahnsou en insensued oh pwunodo, e tamanda ara koasoakoasoaia, “Nohno, ke dehier sengisengkinkiht, pwe se powehdiehr sampah ni limpoak.”21
Mehlel re udahn powehdi sampah. Joseph oh Hyrum Smith, duwehte souleng pwoson ko me koasoaiepe mih nan pwuhk en Kaudiahl, “keidier nan kamakam laudo; re kamwakeledahr ar likou kan, oh ntahn Sihmpwulo me re mwakelekelkilahr [oh] … re mihmi mwohn mwoalen Koht oh kin papah ni rahn nipwong nan tehnpese. Me ketiket nan mwoahlo, ih me pahn kin ketin apwalih irail.
“Re solahr pahn kin men mwengehda de men nimpilda; ketipin de pil ehu soangen karakar solahr pahn kamwasikei irail;
“Pwe Sihmpwulo, me mi nanwerengen mwoahlo, pahn wialahr sileparail, oh ih me pahn kin kahluwairaillahng ni pilen komour; oh Koht pahn ketin limwihasang pilen masarail kan.”22
Ni atail kamkamadipwki ahnsou kaperen wet, iei pahr kataman 200 sang ni Kaudiahl Keieuo, kitail en ahnsou koaros tamataman uwen pweine me Joseph oh Hyrum Smith pwaindahro, iangahki irail ohl akan, lih akan, oh seri akan me inennen poadidi, pwe rehn kauwada Mwomwohdiso wet pwe komwi oh ngehi en kak iang pereniki kapai kan koaros oh kapwurupwurdohn pwungo me kitail ahneki rahnwet. Ara doadoahk en pwoson en dehr manokonokla!
Ekei pahk I kin medewe dahme kahrehda Joseph oh Hyrum iangahki ara peneinei anahne lokolok laud ki. Mwein ih wasa me re esehla Koht sang ni arail lokolok laud ni soangen mwohmw tohto me kak sohte wiawi ma e sohte wiawiong irail. Sang ni met, re kin tamanda nan Kedsemeni oh lohpwu en Sounkomouro. Ni Paul ah koasoaia “Pwe Koht ketikihongkumwailehr kalahngan ehu—iei en papah Krais, kaidehn sangete ni amwail pwoson ih, ahpw pil sang ni amwail lokolongki ih.”23
Mwohn ah mehla nan 1844, Joseph intingiada kisin likou inennen kapehm ehu ong Souleng kan. E wia likwer ong doadoahk, me doudoulahte nan Mwomwohdiso rahnet.
“Riei ohl akan [oh lih akan], kitail sou wenla mwowe nan doadoahk laud wet? Wenla mwowe a kaidehk mwuri.” Kumwail kommwad, riei ohl akan [oh lih akan]; oh wonoweite, wonowei pwe en powehdi! …
“… Eri, kitail, nin duwen atail wia mwomwohdiso tehieu oh soangen aramas tehieu, oh Souleng en Imwin-rahn akan, kihong Kauno meirong me pwung.”24
Ni atail pahn rong Ngehno nan pahr 200 en kapokon lap wet ni kaimwseklahn wihk wet, medewe dahme ke pahn kihong Kauno ni pwung erein rahn akan me pahn kohdo. Kumwail kommwad—ehukiong emen me ke kin koapwoaroapwoarki, oh me keieu kesempwal, menlau ahneki ahnsou mwahu en kapwaiada!
I ese me Sounkomouro inennen kupwurperen ni ahnsou me kitail kin kihong Ih mehkot me pwung sang nan mongiongatail, duwehte ah kin kupwurperenki meirong pwoson en pirien mwahuko, Joseph oh Hyrum Smith, oh irail Souleng lelepek teikan. Mepwukat me I kadehdehki ni wahu oh ni mwahr sarawi en atail Kaun Sises Krais, ahmen.