Kapwoaropworki Tenek wet iei me Pwung

Sang Elder James R. Rasband

En Isiakan

Pwehn koasoanehdihla kadeik pwung, Sapwellimen Sounkomour Tomwo pahn kamwakelehsang kahpwal en rotorot oh pil kamedek koaros me sang rehn mehteikan.

Pwuken Mormon kin Padahngki Rongamwahu en Krais

Oktohpe me nekiero, President Russell M. Nelson songkiong kitail en medewe ia mwomwen atail mour pahn wekila ma atail “marain sang Pwuhk en Mormon pahn audahte sohrasang kitail.”¹ I medmedewe sapwellime peidek wet, oh I kamehlele me kumwail pil. Ehu iren madmadau kin kalapw pwurpwurodo rehi—ma sohte Pwuhk en Mormon oh ah wehwe duwen mehlel en Krais oh Sapwellime tomwo, iawasa I pahn sohpeila ie pwe ien diar meleilei?

Padahk en Krais—me audaudki mehlel kan oh tiahk sarawi kan en pwoson Krais, koluhla, pepdais, de kisakis en Ngehn Sarawi, oh dadaurete lel ni imwi—kin kalahpw padpadahk pak tohto nan iren pwuhk sarawi kan me kapwurupwurdo ahpw sang ni manaman kaselel ieu en Pwuhk en Mormon.² Padahk o tepida sang ni pwoson Krais, oh soahng kan koaros kohsang ni koapworoapworki Sapwellime kamatalaho.

Ni President Nelson padahngki, “Pwuhk en Mormon kihda unsek oh keieu mweimwei ne wehwehkihla duwen Tomwpen Sises Krais en dierek wasa koaros.³ Ni atail pahn wewehkihla mwahu duwen Sapwellimen Sounkomouro kisakiso, ih atail pahn kehn oh esehla, nan atail madamadau oh nan mohngiongitail kan,⁴ kesempwalpen en Presiden Nelson padahk me “mehlel en Pwuhk en Mormon ahneki manaman en kamwahuiala, kansenamwahui, kapwurehdo, sewese, kakehlaka, oh kapereniada ngehn akan.”⁵

Sapwellimen Sounkomouro Tomw kin Kapwaiada Anahnepen Pwuhng Koaros

Me keieu kesempwal oh onepek mwahu en Pwuhk en Mormon ong atail wehwehki Tomwpen Sounkomouro iei padahk en Krais ni Eh matala oh tohnmeteikihla pein Ih pwe en wahdo onepek mwahu. Duwehte Alma ah kawehwehda, “Pein Koht kelehpw tohnmeteikihla pein Ih pwehki dipen sampah pwon, pwe en wahdo pilahn en mahk, en wahdo onepek mwahu, pwe kitail en ese me Koht me unsek, Koht kelehpw, oh pil Koht Mahk.”⁶ Sapwellimen Sahmo pilahn en mahk⁷—me nan pwuhk sarawi pil kin koasoia pilahn en peren⁸ de pilahn en komouro⁹—sohte pahn kak pweida lahu koasondi koaros pweida mwahu.

Apw iahkan udahn “ koasoandih kan en pwung”? Medewe mahs dahme Alma lelohng. Tamataman me, ahnsou me Alma pwulopwulo, Alma kin kohkohseli raparapahki en ”kauwehla mwomwohdiso.”¹⁰ Ni mehlel, Alma padahkiong nah pwutak Helaman me e “lokolongki medek en nan ehl“ pwehki sang ni ah “kemehla diren sapwellimen [Koht] seri kan“ sang ahi kahluwai irail ong mehla.”¹¹

Alma kawehwehieng Heleman me meleilei apw mihla reh ansou me “e alehda an ah pahpau padahng kan “duen ketdohn en … Sises Krais … pwe en pwoukihla dipen sampah.”¹² Alma me pahtoula peki mahk rehn Krais¹³ oh apw kehnda peren oh insenamwahu ni ansou me e esehda me Krais me ketin matkihla dipeh kan oh pwainla soang koaros me anahnepen mehlel. Pilehu, dahme pwung pahn anahne Alma en wia? Alma ahpw doula padahngki, ”Sohte mehkot samin kak sohsohki wehin Koht.”¹⁴ Eri, kisehn en Alma ah insenamwahuda udahn iei me ma mahk sohte patehng, pwuhng pahn keinapwihdi Ih en pwurala rehn Samatail Nanleng.¹⁵

Sounkomouro kin Kamwahuiahla Ohla kan me Kitail Sohte Kak Kamwahuiahla

Apw dah, en Alma ah peren kin ongete pein ih—ni ah kin nantieng kadohwanweisang kahpwal oh ni ah kak pwurala rehn Seme Nanleng? Kitail ese me Alma pil insensuedkihla irail kan me e karehieng arail dohlahsang mehlelo.¹⁶ Ahpw pein Alma sohte kak kamwahuiahla oh kapwurehdo irail koaros me e kahluwahsang nan mwomwohdiso. Pein ih sohte kak wehwehki ma re pahn iang ahniki ansou mwahu en alehda Sapwellimen Krais rongamwahuo oh kapai kan ni ahr pahn momourki duwen pwung mehlelo. E sohte kak kapwurehdo irailko me melahr oh sohte alehda mehlelo pwehki ah padahk sapwung kan.

Presiden Boyd K. Packer padahngki: “Madamadau me kapitala Alma … iei met: Kapwurehdo me ke sohte kak kapwurehdo, kamwau ihla ohla me ke sohte kak kamwau ihla, wiahda mehkan me ke kawehla oh ke sohte kak pileu wiahda iei me wia kahrepen kamatalahn Krais.”¹⁷ Pwung mehlel me Alma medewehda “tengedieng reh” me kaidehnte ih kelehpw kak mwakelekela apw pil irail kan me e kansensuedihala pil kak mwakelekelda oh unsekla.

Sapwellimen Sounkomouro Meirong Koasoanehdihla Kedeik Pwung

Pahrkei mwohn en Alma ah alehda rongamwahuo, Nanmwarki Bensamin padahngki duwen esingek en mour me sounkomwouro ketkiong kitail sang ni Sapwellime pwoulahu. Nanmwarki Pensamin padahnki me “rohngamwahu en peren laud” kohieng ih “sang tohnleng en Kauno.”¹⁸ Me patehng rongamwahu kapereno iei ni mehlelo me Krais pahn ketin lokolok oh matkihla dipatail kan oh atail suwed kan pwe en kak pweida “tenek pwungo en kak wiawieng tohn sampah.”¹⁹

Dahkan me “pwungpen tenek kan” anahne? Nan iren mwuhro, Nanmwarki Pensamin kawehwe me, pwe ken kak wia tenek pwung, intahn Sounkomouro kapwilpwildier “ong irailkan me wiahda dihp ni pwupwilahn Adamo” oh irail kan “me mehla sohte ese duwen Sapwellimen Koht koasoandi kan ong irail, de me wiahda dihp ni arail sohte wehwehki.”²⁰ Tenek pwung ehu kin anahne, e koasoaia, me “intahn Krais lapwahda” dipen kisin seri kan.²¹

Iren pwuhk sarawi pwukat padahngki duwen mehlelo: pwoulahn Sounkomouro kamwahuwiahla, ni kisakis soh pweipwei, irailkan me wiahda dihp ni arail sohte wehwehki— irailko me, nin duwen Seikop koasoaia, “sohte kosonned koieng irail.”²² Kalokepen dipatail kin kohsang ni marain me koieng kitail oh poasoankihda koaiek en doadoangki atail men pilipil.²³ Kitail ese duwen kamwahula wet oh kansenamwahula ni pwung pwehki sang Pwuhk en Mormon oh pil duwen rongamwahu en kapwurpwurdo teikan.²⁴

Ei, wasa me mie kosoned, ni atail sohte kasohwe Sapwellimen koht koasoandi kan, kitail me pahn pein pwukoaki. Duwen Nahnmwarki Pensamin kangoangoaki: “Mehd suediong ih me ese me e uhwong sapwellimen Koht koasoandih kan! Komourla sohte pahn kohieng ihte ma e pahn koluhla oh pwoson Kaun Sises Krais.”²⁵

Pil met wia rohng kaperen duwen rongamwahu en Krais. Kaidehnte Sounkomouro kin kamwahuwiahla oh kapwurehdo irail kan me kin wiahda dihp ni arail sohte wehwehki apw pil, ong irail kan me kin wiahda dihp ong maraino, Sounkomouro ki ketin kamwahuwiahla irail kan me kin koluhla oh pwoson Ih.²⁶

Alma mweinte “katengehdieng ih” duwen pwung en mepwukat. Mehlel Alma kehn duwen me e koasia “peren … laud”²⁷ ma e kamehlele me Krais me kamourla ih apw sohte sewese irailko me e kaluwahsang ni mehlelo? Mehlel soh. Pwe Alma en kak ahniki meleilei unsek, irailko me e sohte sewese pil anahne wiepe wet pwe ren unsekla.

Apw ia mwomwen arail pahn—de irailko me kitail kin kawehla—kak unsekla? Mendahte ma kitail sohte wehwehki duwen wiepe sarawi sang duwen en Sounkomouro kamwatalahu me E kin ketin kamwahuwihala oh kopwurehdo, kitail ese me kitail en kak wiahda tenek pwung, sounkomouro pahn ketkihsang soukautih oh medek kan me meiteikan kin wiaieng komwi.²⁸ Sang met E padahkieng kitail me koaros Sapwellimen Koht seri kan pahn koieng irail ahnsou mwahu, oh kaudiahl sansal, pwe ren pilada ren idahwehn Ih oh alehda Sapwellime kosonned en mour soutik.²⁹

Sounkomouro Pahn Onehda Soahng Koaros Me Kitail Kauwehla

Iei mehlel pwukat me pahn kiheng Alma meleilei. Oh pil iei mehlel pwukat me pahn pil kieng kitail meleilei laud. Atail wia ohl oh lih, kitail koaros kin sapwung, de ekei pak loipene, loisang emen emen oh karehda ohla. Duwehte pahpa men oh nohno men kak pein koasoaia, me medek me kohsang ni atail sapwung kan kaidehn ihte masak pein atail kolokolok ahpw me kitail masak o, ma kitail pahn sohte mweidehng neitail seri kan peren de ni ehu wiepe kihsang arail kak kilang oh wehwehki. Linganpen Sapwellimen Sounkomouro inoupen tohnmeteio iei, uwen laudpen sapwung kan me kitail pahpa oh nohno kin kalapw insensuedki, E kin ketin mahkengehr neitail serikan oh inoukieng irail mahk.³⁰ Oh ma irail pil wiahda dihp ong maraino—me kitail koaros pil kin wia—E kin ketin ahnekihte kalahngan,³¹ oh E pahn ketin komour iraila ma re pahn alehda Ih oh mourla.³²

Mendahte Sounkomouro ah ahniki manaman en kamwahuwihla dahkan me kitail sohte kak kamwahuwihla, E ketin mahsonihong kitail en wia uwen atail kak en kamwahula pwe en wia iengen atail songsongen koluhlahu.³³ Dipatail oh atail sapwung kan kaidehnte e kin kihsang atail ehuong Koht apw pil kihsang atail kin ehuong mehteikan. Ekei pak soahng kan me kitail kin anahne kamwauwihla oh kapwurehdo e kin kak mengei duwete pekimahk, apw ekei pak kapwungpwungla kin kak sounpar kei pwe en kak aktikitikla.³⁴ Apw, sang dihp oh sapwung tohto me kitail wiahda, kitail saikinte kak kamwauihla irailko me kitail kansensuwedihla. Linganpen, meleilei oh inou en Pwuhk en Mormon oh kopwurpwurdohn rongamwahuo iei duwen me Sounkomouro pahn kamwauhwihala soahng koaros me kitail kawehla.³⁵ Oh E pil pahn ketin kamwahuwikitaila ma kitail pahn alehda Ih ni pwoson oh koluhkihla sapwung kan me kitail wiadahr.³⁶ E ketkieng kitail kisakis pwukat koaros pwe E ketin poakoahng kitail ni limpoak unsek³⁷oh e pahn ketin ketkieng kitail tenek me pwung oh mehlel me pahn pil wahuneki mehlel duwen kopwungpe oh mahk. I kadehdehki me mepwukat mehlel ni mwaren Sises Krais, ahmen.

Ire kan

1. Russell M. Nelson, “Closing Remarks,” Liahona, Nov. 2019, 122.

2. Tehk 2 Nihpai 31; 3 Nihpai 11:28, 32, 35, 39–40; Doctrine and Covenants 10:62–63, 67–70; 68:25; Moses 6:52–54; 8:24; Articles of Faith 1:4.

3. Russell M. Nelson, “Pwuhk en Mormon: E pahn ia mwomwen ahmw mour ma sohte pwuhk wet,” Liahona, Nohpempe 2017, 62.

4. Tehk Doctrine and Covenants 8:2–3.

5. Russell M. Nelson, “The Book of Mormon: What Would Your Life Be Like without It?” 62.

6. Alma 42:15.

7. Tehk Alma 42:15.

8. Tehk Alma 42:8.

9. Tehk Alma 24:14; Moses 6:62.

10. Tehk Mosaia 27:8–10.

11. Alma 36:13, 14.

12. Alma 36:17, 18.

13. Tehk Alma 36:18.

14. Alma 40:26; pil kilang 1 Nephi 15:34; Alma 7:21; 11:37; Helaman 8:25.

15. Tehk 3 Nephi 27:19; pil tehk Moses 6:57.

16. Tehk Alma 36:14–17.

17. Boyd K. Packer, “The Brilliant Morning of Forgiveness,” Ensign, Nov. 1995, 19–20.

18. Mosiah 3:2, 3.

19. Mosiah 3:10; miehte me pahn kapatpat ieng.

20. Mosaia 3:11; pil tehk 2 Nihpai 9:26.

21. Mosaia 3:16; see also Mosaia 15:25; Moronai 8:11–12, 22.

22. 2 Nihpai 9:25.

23. Tehk 2 Nihpai 2:26–27; Ihlimen 14:29–30.

24. Tehk Articles of Faith 1:2; pil kilang Doctrine and Covenants 45:54. Ni eh kaloallehla padahk en pepdais en me mehlahr akan, Soukohp Joseph koasoaia: “Duwehte, ehu soahng me mour en aramas kin mwahuki wia iei tenekih oh uhwong mehteikan ni sohte mahk, Samatail Nanleng kin kilang kitail aramas ni eh kin ketin wiahkin kitail Sapwellime oh kesemwpwal kin kitail; E kin kilang kitail duwehte Sapwellime seri. … Ih soun tenek loaloakong, oh pahn tenekih aramas koaros, kaidehn pahn sang mehkot tikitik, kosoned akan me emen emen kamehlele. … E Pahn kapwung irail, ‘kaidehn sang dahkan me re sohte wia, apw e pahn sang dahkan me re wia’; irailko me sohte momouriki kosonedo, pahn tenek ni sohte kosoned, oh irail kan me kin idawehn kosoned, pahn tenengki kosonedo. Kitail sohte anahne kosohwe loaloakong oh koaioak en wasa lapalap Siohwa; E pahn kieng tenek oh mahk ong wasa koaros nin duwen arail wiewia, duwen arail kin kak alehda koaioak, kosoned akan me re kin idawehn, wasahkan me kin kieng irail duwen dah me pwung, oh … kitail koaros pahn anahne kadehde ieng atail soun tenek me tenek koaros pohn sampah me pwung oh mehlel” (Teachings of Presidents of the Church: Joseph Smith [2007], 404).

25. Mosaia 3:12; pil tehk 2 Nihpai 9:27.

26. Tehk Mosiah 3:12; Helaman 14:30; Moroni 8:10; Doctrine and Covenants 101:78. Ekei pahn sohte men alehda ekei kosoned akan oh inoukan de sohte kak doadoangki arail pwung en pilipil ong soahng teikan apw pahn kak pweida nan soahng teikan pwehki marain en Krais me mih loalerail (Tehk 2 Nihpai 9:25; Moronai 7:16–19). Sounkomouro, Iei atail soun tenek oh e pahn kieng kitail tenek me pwung oh mehlel, me pahn kieng kitail tenek pwung en atail wiewia (Tehk Mormon 3:20; Moses 6:53–57). Oh eh pwainla pweinen koros—the former unconditionally and the latter upon the condition of repentance.

27. Alma 36:21.

28. Tehk Mosiah 3:11; pil tehk D. Todd Christofferson, “Redemption,” Liahona, May 2013, 110; Alma 7:11–12 (“E pahn alehdi powe medek kan oh soumwahu kan en Sapwellime aramas akan. … Oh E pahn alehdi arail luwet akan”); Isaiah 53:3–5 (“Mehlelte me E kehn atail kahpwal akan, oh toutouki atail kansensuwed akan”); 61:1–3 (“Kauno ketin keieiedier pwe I en … kansenamwahwihala me nan kapehd toutoulahr akan, … en kihong irail kan me kin nsensuwed nan Saion kaselel a kaidehk pesepes, oh lehn popohl ong mwahiei”). E kamarain me Sounkomouro kawehwehsang iren Aiseia pwukat ni Eh ketin mahsanihada duwen Sapwellime Mesaia: “Rahnwet mahsen en iretikitikwet pweidahr rehtail” (tehk Luke 4:16–21).

29. In the spirit world, “the gospel is preached to the ignorant, the unrepentant, and the rebellious so they can be freed from their bondage and go forward to the blessings a loving Heavenly Father has in store for them” (Dallin H. Oaks, “Trust in the Lord,” Liahona, Nov. 2019, 27). See 1 Peter 4:6; 2 Nephi 2:11–16; Doctrine and Covenants 128:19; 137:7–9; 138:31–35.

30. Tehk Moses 6:54. President M. Russell Ballard padahngki padahk pwukat ni ah sair duen kemehla pein kowe: “Kaunote me mwahngih meh koros, oh ih iei pein ih me pahn tenekih atail wiewia kan pohn sampah wet. Ni ansou me e pahn kapwung kitail, I kamehlele me e pahn ese mehkoros: kadaudakitail kan oh irekdihn atail peneinei, atail iren madamadau, atail men pepehm, padahngkan me kitail alehier, atail tiahk kan, atail rosonpen paliwar oh pil songteikan. Kitail esehla nan pwuhk sarawi kan me intahn Krais lapwahda dipen irail kan ‘me mehla a saik ese kupwuren Koht ong irail, de me dipada ni arail sohte wehwehki’ (Mosiah 3:11)” (“Suicide: Some Things We Know, and Some We Do Not,” Ensign, Oct. 1987, 8; Tambuli, Mar. 1988, 18).

31. Tehk Seikop 6:5; Mosaia 29:20; 3 Nihpai 9:14; Doctrine and Covenants 29:1.

32. Tehk Ilimen 8:15.

33. Tehk Lipai 6:4–5; Isihkiel 33:15–16; Ilimen 5:17; Doctrine and Covenants 58:42–43.

34. Iei ih soangen wiepehu me Alma pein iangada (tehk Alma 36:24).

35. President Boyd K. Packer padahngki ire wet ni ngong:

    “Miehte ekei ansou me ke sohte kak kamwahuihla dahkan me ke kawehla. Mweinte mwekid wet wereilahr, de me ohlau sohte alehda am pekmwahk. Mwein ele ohlau inenen laud me ke sohte kak kamwauwihala mendahte ia uwen ahmw mehntehnoh kamwahuwiala.

    “Ahmw koluhla sohte pahn alahlda ihte ma ke weliakapwala. Ma ke sohte kak kapwungala dahme ke wia, eri ke tengalahr. E mengei ken kak wehwehkihda ia uwen ahmw kak kehnda me sohla sawaspem oh sohla am koapwoaroapwoar oh ke men tehnoh pwang, duehte dahme Alma wiau. …

    “Ia mwomwen koaros ah pahn kak pwurong wiawihda, kitail sohte ese. Mwein e sohte pahn kak en koaros en nekila nan mwour wet. Kitail ese sang kaudiahl kan oh pwarodohn ngehnakan me sapwelimen Kauno ladu kan pahn dolahte oh wiewia sapwelime doadoakpen soundoro lela palio.

    “Marain wet pahn mwau ong me pwung kan oh pil iangahki me dipadahr kan. I medemedewe pahpa oh nohno me insensued kihlahr sapwungkan me neirail seri ketihwo kan wiahda oh pil solahr ahniki koapwoaroapwoar” (“The Brilliant Morning of Forgiveness,” 19–20).

36. Tehk 3 Nephi 12:19; pil tehk Matthew 6:12; 3 Nephi 13:11.

37. Tehk John 15:12–13; 1 John 4:18; Dieter F. Uchtdorf, “Perfect Love Casteth Out Fear,” Liahona, May 2017, 107.