Ohsahna oh Aleluia—Ieias en Sises Krais: Poahsoan en Kopwurupwurdohu oh Ihster
Nan ansouhn ohsahna oh aleluia wet, kitail en koulki aleluia—pwe Ih me pahn kaunda erein kohkohlahte!
Riei ohl akan oh lih akan koaros: ohsahna oh aleluia, kitail kaukauwahuwih ieias en Sises Krais ni ahnsou wet ong popouslahn Kopwurupwurdohu oh Ihster. Ni limpoak unsek, atail Sounkomour kin inoukihong kitail :“Kumwail kak ahneki meleilei rehi. Sampah pahn kalokei kumwail, ahpw kumwail koapworopwor, pwehki I kalowehdier sampah.”1
Pahr kei samwalahro, ngehi oh Sister Gong tuhwongdi peneinei limpoak ehu, neira kisin serepein, ede Ivy, ahpw wahdo doupen na mehn keseng paiolino. E usasang tuhke pwoat mehn kesengki paiolin, kadeng oh kihong rosin. Eh ahpw kapwurehdiong tuhkehu ni keneinei nan doupehu, keipwekidi, oh mwohndi. Pwehki e apwetehnte tep kaskuhlki, ih uwen me e ese ong paiolino me e ehukiheng kiht. Met, pahr kei mwuri, Ivy inenen maihengala kesingki paiolino.
Nan irair en mour wet, kitail koaros duwehte Ivy oh nah paiolino. Kitail kin tep ni tapio. Sang ni atail kin nantiheng esehla, kitail kin keirda oh koaiekala. Ni atail wia lalaudla, atail pilipil kan oh kasongosong kan me kitail lelehng kin sewese kitail en duwehla atail Sounkomour ni atail kin iang doahdoahk Reh ni Sapwellime mwetwel en tuhkehn olip2oh idawehn Sapwellime ahlen inouo.
Rahn en kataman kan, iangaki kataman pen sounpahr keriepwiki wet, kin kasalehda kasoandi en kopwurupwurdohu.3 Ni atail perepereniki Kopwurupwurdo en rongamwahu en Sises Krais, kitail pil wie kaukaunop ohng Ihster. Ni kemwekid riau pwukat koaros kitail kepkepinge ketdo sapahl en Sises Krais. E ketin ieias—kaidehn ahnsouwohte, ahpw rahnpwukat; kaidehn ongete ekei, ahpw ong koaruhsiehn. E ketdo pwehn kamwahuiala irail akan me weirek, kapitala me sensel kan, kamwahuiala me maskun akan en kak kilangada wasa, oh kasaledekala irail kan me ohlahr.4 Ih duwen emen emen kitail. Sapwellime inou en poadoandoar kan dokedoke kitail, sohte mehnda atail mour en mahs, met, de pwunod kan me mih mwohtail.
Lakapw iei Rahn Sarawi en Rahmwus. Ni tiahk, tehn dihpw wia kasalepen mehkot ieu ong preen en atail Kauno, me iei Krais ah ketlong en powehdi nan Serusalem, wasa “me diren aramas … ale rahn tuhke oh tehn tuhke, oh kohla pwe rehn iang tuhwong ih.”5 (Mwein komw men esehla ia udahn kilelel en Harry Anderson me in langalang nan an Presiden Russell M. Nelson ohpis, mwurinte ah tehpelo.) Nan pwuhk en Kaudiahl, irail akan me kapinga Koht oh Sihmpwulo “likawih likou pwup pwetepwet, oh wa tehn paini kan.”6 Me patehng “likou pwup en pwuhng” oh “mwaramwar en klohri” tehn paini pil iang mih nan kapakap en kasarawi en tehnpas sarawi en Kirtland.7
Mehlel, Rahn Sarawi en Rahmwus kesempwal sang pokon en aramas kei arail doahdoahngki tehn paini pwehn kasamwo Sises. Ni Rahn Sarawi en Rahmwus, Sises ketilong nan Serusalem ni mwohmw ehu pwe me lelepek akan en kak kasawih pweidahn kokohp. Duwehte Sekaraia8 oh kokohp akan me sansal nan pwuhk en Melkahka, atail Kauno ketin ketilong nan Serusalem pohn ohs pwul men oh pokon en aramas ngisingiski “Ohsahna ong wasa lapalahpie.”9 Ohsahna wewehki “kapitala met.”10 Ansouo, oh pil rahnwet kitail kepkepinga, “Koht en ketin kupwuramwahwih me kin patohdo ni mwaren Kauno.”11
Wihk ehu mwurin Rahn Sarawi en Rahmwus iei Rahn Sarawi en Ihster. Presiden Russell M. Nelson padahngki me Sises Krais “ketdo pwehn pwainla pwei pwand ehu me kaidehn Sapwellime pwehki kitail me wiahda pwei pwand ehu me kitail sohte kak pwainla.”12 Mehlel, sang ni Tomw me Krais ketin wia, sapwellimen Koht seri kan koaros “pahn kak komourala, sang ni ahr pahn peikiehng kosonned oh tiahk sarawi kan en Rongamwahuo.”13 Ansou en Ihster, kitail kin koulki Aleluia. Aleluia wehwehki “kepinga ih iei Kaun Sihowa.”14 Oh “Hallelujah Chorus” in Handel’s Messiah wia kalohk en limpok ehu nan Ihster me Ih me “nanmwariki en nanmwariki kan, oh Kaun en Kaun akan.”15
Kemwekid sarawi en Rahn Sarawi en Rahmwus oh Ihster wia soaipen Ohsahna oh Aleluia. Ohsahna iei atail pekipek ong Koht en kapkitaila. Aleluia kasalehda atail kaping kalahngan ong Kauno pwehki koapwoaroapwoar en komourla oh lapalapala. Nan ohsahna oh aleluia kitail kin pohnese ieias en Sises Krais nin duwen E ketin wia poahson en Ihster oh kopwurupwurdohu ni imwen rahn akan.
Kopwurupwurdo en ni imwen- rahn akan tepkihda kasansal ehu—iei ketdo en Koht Sahm oh Sapwellime Iehros, Sises Krais, rehn soukohp pwulopwul Sosep Smid. Soukohp Sosep mahsanih, “Ma Kauno mweidehng kumwail en kilang nanleng erein minit limau, kumwail pahn wehwehki laud sang ma kumwail pehien wadek pwuhk koaros me intingidiher pid nanleng.”16 Pwehki nanleng ah pil ehu ritada, kitail ese oh “kamehlele Koht, Sahm Soutuk, oh Sapwellime Iehros, Sises Krais, iangaki Ngehn Sarawi”17—iei Koht Sahm, Koht Nah oh Ngehn Sarawi.
Ni Rahn Sarawi en Ihster, Epreil silu, nan ansoun kapwurupwurdohu, Sises Krais ahpw ketin pwarada ni kasarawi en Tehnpas Sarawi en Kirtland. Irail akan me kilang Ih wasahu ahpw kadehdeki Ih rasohng kisiniei oh pihl: “Sapwellime silhang duwehte lulul en kisiniei; sapwellime piten moange me pwetepwet duwehte sinou mwekelekel;Sapwellime kahlap me lingaling sang lingan en ketipin; oh kapitiehu me duwehte ngilen lapakehn pihl lap akan, iei kapitiehn en Sihowa.”18
Ni ansouo atail Sounkomour ketin mahsanih, “Ngehi me tapio oh imwio; iei ih ngehi me moumour, ngei me kamakamala; Ngehi me wia wiliepomwail rehn Sahmo.”19 Pil ni soangen kawewehute—ni tepi oh imwi, ieias oh kamakamala. Ihme Alpa oh Omeika, tapio oh ihmwio,20 me wiahda oh me ka unsekala atail pwoson.21
Me kohdo mwurin ketdo en Sises Krais iei Moses, Elaias oh Elaisa. Sang ni kaweid sarawi, soukohp wadawad en mahs pwukat kupwurehdo kih kan en prihsduhd oh mweimwei. Eri, “kih kan en mwehi wet kohiengehr”22 sapwellime Mwomwohdiso pwehn kapaiada sapwellimen Koht seri kan koaros.
Ketdo en Elaisa nan Tehnpas Sarawi en Kirtland pil kapwaiadahr kokohp en Malaka me sansal nan Kadehde Meringi me “mwohn sapwellimen Kauno rahn lapalap oh kamasepwehko eh pahn leledo.”23 Ni eh wiawi, Elaisa pil kasaingdi, ahpw kaidehn depweila ehu, ahnsou en Pahsohpa en mehn Suhs ako me katamanpe kin kasikasik ni wahu ketdo sapahl en Elaisa.
Me tohto peneinei en mehn Suhs akan me kaunopada dewen Elaisa ni tepel en kamadipw en Pahsohpa. Me tohto me audehda kep pwehn luke oh kasamwo ih. Oh ekei, ni kamadipw en Pahsohpa, kin kadarala emen seri ni wenihmwo, ekei pak e kin ritada ekis, pwehn kilang ma Elaisa sou mihmi likio awiawi irail en luke en pidelong.24
Ni kokohp eh pweidahr oh pil kisehn inou pen kopwurupwurdohn mehkoaros,25 Elaisa ketdo duwen me inoupe wiawiehr, ni ahnsou en Ihster oh ni tepin Pahsohpa. E wahdo mweimwei en ketengepene peneinei kan pohn sampah oh pil nanleng. Duwen me Moroni padahkiheng Soukohp Sosep, Elaisa “pahn poadokedi nan mongiong en seri kan inou kan me wiawihengehr arail pahpa kau, oh mongiong en seri kan pahn sohpeilahng arail pahpa kau. Ma soh,” Moroni pousehla, “sampah pwon pahn wiahki mehkot mwahl [en Kauno] ketdo.”26 Ngehn en Elaisa, me wia ehu kasalepen Ngehn Sarawi, kin kaluwakitaillahng atail peneinei en mahs, met, oh pil men mwuhr akan—ni atail kihpene poadopoad akan oh pil nan atail doahdoahk en nan tehpas sarawi.
Kitail pil tehkada mahs ia wehwehn Pahsohpa. Pahsohpa wia kataman pen kapitilahn seri en Israel sang ni arail wia lidu kei erein sounpahr [pahpwiki] 400. Pwuhk en Eksodus kawehwe duwen kapitala wet duwen ah wiawi mwurin kalokolok suwed kei me rasohng kairu, lingkarak, loahng, mehlahn mahn akan, umpwos, kotou en aihs takai oh kisiniei, loukost kan oh rotorot en lahng. Lahs en kalokolok iei mehlahn mesenih koaros en sahpwo ahpw e sohte pahn lel nihmwen mehn Israel kan ma—ma irail pahn iriski intahn sihmpwul mesenih ni uhr en wenihmw en imwarail kan.27
Meninkauwo pahn daulih ihmw kan me iriski kilel pen ntahn sihmpwulo.28 Douluhlo, de pahsohpao, wia kilel pen Sises Krais ah pahn ketin powehdi mehla. Mehlel, ntahn tohmw en Sihmpwul en Koht ketkiheng atail Soun Silipen Sihpw Mwahuo manaman en kapokonepen Sapwellime aramas ni wasa koaros oh irair akan en mih ni epwel mwahu ong Sapwellime aramas ni pali koaros en kehlo.
Me kesempwal, Pwuhk en Mormon kin kawehwe duwen “manaman oh iasadahn Krais”29—pwohn ihster—nin duwen e wia kupwurupwurdo riau.
Keieuo, iasada wehwehki kopwurupwurdohn “paliwaratail ni mwohmw unsek,“koaros kakon en neh oh peh,“ “pil lel ehu piten moang sohte pahn salongala.“30 Inou wet kin kahrehda koapwoaroapwoar rehn irail kan me pehpali de nehpali, me solahr kak kilang wasa, rong, de alu; de irail kan me mwomwen salongala pwehki soumwahu doar, soumwahu en mwahliel, de ehu soangen kaluwet. E pahn diar kitail. E pahn kamwahuihkitailla.
Pil ehu inoupen Ihster oh Sapwellimen Kauno Tohmw me iei, ni pali ngehn, “soahng koaros pahn kopwurupwurlahng ni udahn mwomwe.”31 Kopwurupwurdohn ngehn wet kin kasalehda atail ineng oh wiewia kan. Duwehte pilawa en pohn pihl,32 e kapwurehdo “dahme mwahu,“ “lelepek,“ “pwung,“ oh “diren kalahngan.“33 Ihme kahrehda Alma ah kin doadoahngki lepin lokaia kapwurehdo pak [riesek riau] 2234 ni e kangoangehkin kitail en “kin ahniki lamalam mwahu, kadeik ni pwung, oh kin wiewia mwahu.”35
Pwehki “Pein Koht ketin tomwkihla dihp en sampah,”36 Sapwellimen Kauno Tohmw kak kapwurehdo dahme wiawiehr ahpw pil dahme saikinte wiawi. Pwehki E ketin mwahngih atail medek kan, kahpwal akan, soumwahu kan, atail “ kasongosong kan koaros,”37 E kak, ni kupwurkalahngan, sewese kitail nin duwen dahme atail kaluwet akan.38 Pwehki Koht wia “Koht unsek oh pwung men, oh pil Koht emen me kin dihrekihla mahk,” pilahn en mahk kakehte “pwungala sang ni wiepen kopwung kan.”39 Kitail koluhla oh wia uwen atail kak. E kin ketin kapilkinkitailpene “nin limen sapwellime limpoak.”40
Rahn wet kitail kawahui kopwurupwurdohu oh iasadahu. I iang kumwail, I kapingki oh pil kadehdehki duwen Kopwurupwurdo pen rongamwahu unsek en Sises Krais me wihwiawi. Duwehte ni tapio sounpahr riepwiki samwalahro, marain oh kaudiahl wie pepeuslahte sang rehn Sapwellimen Kauno soukohp oh Sapwellime mwomwohdiso me kahdaniki ni mware—Mwomwohdiso en Sises Krais en Souleng en Imwin Rahn akan—oh sang ni pein atail kaudiahl oh marain sang ni kisakis lap en Ngehn Sarawi.
I iang kumwail, nan ahnsou en Ihster wet, I kadehdehki Koht, Samatail Soutuk, oh Sapwellime Iehros, Sises Krais me ketin ieias. Ohl akan kalohpwuwalahr oh iasadahr. Ahpw ihte Sapwellime kahlap iasadahr ni unsek en Sises Krais ieias me kolokolte lipwen mete nin lime, pengepenge oh aluweluweh kan. Ihte Ih me kak mahsanih, “I ntingihdier mwaromw nan pehi kat.”41 Ihte Ih me kak mahsanih: “Iei ngehi me kesepwildahro. Ngehi Sises me kalopwuhlahro. Ngehi sapwellimen Koht Iehros.”42
Duwehte Ivy oh nah paiolin o, kitail pil mihmi wasa ieu me atail ahl ahpwten tepida. Ni mehlel e mahsanih, “soahng kan me aramas saikinte kilang, de rong, de pidelong nan mongiong en aramas akan, ong sohng kan koaros me Koht kounopoahng irail me limpok ong ih.”43 Rahn pwukat, soahng tohto me kitail kak esehla duwen me mwahu en Koht oh uwen atail kak alehdi limpoak en Koht en lalaudla rehtail ni atail rapahki Ih oh miniminpene nanpwungatail. Ni wiepe kapw kan oh nan wasa kapw kan, kitail kak wiahda oh wiahla, ekis ekis, sang ni ehu ehu wiewia mwahu, kelehpw oh pil nan pokon.
Riei kesempwal kan me mih wasa koaros, ni atail kin tuhpene oh kasukuhlpene, amwail pwoson oh loalamwahu kin kahrehda I en kehn kaping oh kaperen pen rongamwahu wet. Amwail kadehde oh seiloak en rongamwahu kin kakehlailih ahi kadehde oh pein ahi seiloak en rongamwahu. Amwail iren kapwunod oh amwail popohl, amwail kin poakoahng neitail Souleng kan, oh amwail momourki oh wehweki kapwurupwrudohn mehlel oh marain me kalaudehla ai wehwekila kapwurupwurdohn rongamwahu unseko, me iangahki Sises Krais nan atail mongiong. Kitail kin kilihpene, “mehndahte depwek de ketipin, Maing Kaun, komwi en ketiket rehi.”44 Ehukipene atail wehwe kan, pwilikihdi katoutoukan oh ineng kan, kitail kak wadek uwen tohto en atail kapaikan.45 Ni oaritik en rahn koaros oh sang ni dahme tikitik oh me mengei, kitail kak kilang soahng tohto me laud pweida nan atail mour.46
“Oh e pahn lel ansou me irail kan me pwung pahn kohpene sang nan ehu ehu wehi kan, oh pahn kohdo Saion, kokoulki koul en peren soutik.”47 Nan ansouhn ohsahna oh aleluia wet, kitail en koulki aleluia—pwe Ih me pahn kaunda erein kohkohlahte! Koulki ohsahna ong Koht oh Sihmpwulo! Ni lengileng en kapai oh sarawi en Sises Krais, ahmen.