Wasa Loal en Atail Mohngiong

Sang Douglas D. Holmes

Apwtehn Kommoldisang Sounsawas Keieu nan Presidensi Lap en Mwahnakapw kan

Kauno kin ketin sewese kitail—kitail koaros—pwe en ketkieng Sapwellime rongamwahuo nan atail mongiong kan.

Riei lih oh ohl akan, kitail wie momour nan ansou kaselel ehu. Ni atail kin pereperenki tepin kopwurpwurdoh e pil mwahu ong kitail en pil perenki kopwurpwurdoh me kitail kilkilang. I ianguhk perenki mour en rahn pwukat.¹ Kauno kin ketin kaunopda, sang rehn Sapwellime soukohp akan, soahng koaros me kitail anahne pwe kitail en kak alehda Ih. ²

Ehu mehkot me kitail anahne iei soahng kapw me seri oh me pwulopwul kin anahne pwe ren kak pein wia irailda. Me tohto kumwail ese prokram kesempwal duen koasoanehdi dahme ke mwahuki ehu rahn, kilel ni mwaramwar de rihng kapw ong irail, oh tiepene en kehlepen me pwulopwul kan. Apw kitail en dehr kasolongehla ire kesempwal kan en prokram wet oh arail pwukoa: pwe en sewese kieng rongamwahu en Sises Krais nan mongiong en neitail seri kan oh me pwulopwul kan.³

I kamehlele me ni atail pahn esehla wiepe pwukat, kitail pahn kasawih me met laudsang kisehn prokram ohng towehkan sang sounpar 8 lel 18. Kitail pahn kilang ia mwomwen Kauno kin ketin nantiong sewese kitail—kitail koaros—pwe en ketkieng rongamwahuo nan atail mongiong kan. I kapakapki pwe Ngehn Sarawi en ketin sewesei kitail en kak ehupene oh kaskuhlki.

Mwomwen ara de arail ehpene—“mih rehrail”⁴

Wiepe keieu iei ehupene. Pwehki irail iei kisehn Mwomwohdiso en Sises Krais, kitail kin ekei pahk manokehla kesempwal pen ehupene nan atail kin wie koskosipene. Kitail sohte pahn diar de alu nan inouo kelehpw. Kitail anahne limpoak oh utuht sang pahpa oh nohno, pil atail peneinei teikan, kompokepahtail kan, oh atail kaun kan me iang weweid nan ahl wet.

Soangen ehupene pwukat kin kak werei. Ansou en mihmi pene. Ansou en kouruhr, mwadong, esehla oh papah pene. Ansou en ehukipene en emen emen pwukoa kan oh kedirepw kan Ansou en ehupene oh mehlel pene ni atail pahn koadoahke pwe kitail en kak mwahula. Ehupene pwukat wia ehu kahrepen atail kin kohpene nan peneinei kan, pwihn kan, pwihn en kasukuhl akan, oh mwomwohdiso kan. Irail wia poahsoanpen pwukoah en papah.⁵

Elder Dale G. Renlund kieng kitail kihkan pwe en kairada ehupene pwukat ahnsou me e koasoaia: “Pwe kitail en kak sewese mehteikan kitail anahne kilang irail … ki lengleng en Samatail Nanleng. Ihte met me kitail pahn kak tepida oh esehla duen kesemwpwal en ehu mour. Ihte met me kitail pahn kak kehnda duwen limpoak en Sahm Nanleng ong Sapwelime serih kan koaros.”⁶

Kilang ekei duen Koht ah kin ketin kilang irail iei kisakis iou. I luke kitial koaros en rapahki kisakis wet. Ni mesetail kan ah kak kilang⁷kitail pahn pil kak sewese meteikan en kilang pein irail nin duwen Kauno ah masanih irail.⁸ President Henry B. Eyring kakehlailih uwen manaman en met ni ah koasoaia: “Dahme keieu kesempwal iei dahme [mehteikan] koledihsang [kowe] duwen ihs udahn irail oh dahme irail kak wiahla. I pepehm me irail sohte kak kolehdi sang ni koasoai kan. Irail pahn alehdi sangpepehm kanen ihs irail, ihs me kitail kin medewekin irail, oh dahme kitail kin medewe me irail pahn wiahla.⁹ Sewese mehteikan en wehwehkihla uhdahn ihs irail oh kahrepen arail mour wia ehu kisakis keieu laud me kitail kak kihda. ¹⁰ Wiahki mehteikan oh pein kitail nin duwen me Koht kin ketin wia kin kadokepene mohngiongitail kan en ”patpene ni minimin oh limpoak.”¹¹

Sang ni lalaudlahn ahng suwed kan me kin wawaik kitail, kitail anahne kehlail me kohdo sang ehupene kan me audaudki limpoak. Eri ni atail kin pilanehda kemwekid kan, tuhpene kan oh soangen tuhpene teikan, kitail en taman me kahrepen tuhpene pwukat iei en kauwada peneinei en kakehlaka, ehupene, oh en sewese ale rongamwahu en Sises Krais wasa loal en atail mongiong kan.¹²

Kaudiahl, Mehn Pilipil, oh Koluhla—”Koaros wia kisehn Nanleng”¹³

Me pwung, e sohte itar kitail en pirapirpenehte. Mie diren pwihn oh pali kan me ehukipene ni songesongen wiepe tohto. Eri, ehupene me kitail raparapahki iei en wiahla ehu rehn Krais, en ehukiong paliwaratail kan ong Ih.¹⁴ Pwehn kadokepene mohngiongitail kan ong nanleng, kitail anahne pein atail irair kesempwal kan en palingehn me Elder Andersen apwtehn kawehwehiong kitail.¹⁵ Iren atail doadoahk kan kin kohdo ni ahnsou me Ngehn Sarawi kin wahdo mahsen oh limpoak sang rehn Koht ong nan atail madamadau oh mongiong kan.¹⁶

Kaudiahl wet kin kohdo sang nan iren pwuhk sarawi kan, ahpw mehlel Pwuken Mormon, sang ni mahsen kaselel en soukohp akan oh ekei sounpadahk pwoson akan, oh sang ni ngihl tikitiko.¹⁷ Mahsen pwukat inenen laudsang mesen inting ehu nan doaropwe ieu. ngilen ilok nan salengetail kan, de madmadau kan nan atail mwahliel kan de pepehm en nan mohngiong kan. Mahsen en Koht me audaudki manaman en ngehn. ¹⁸ Ih met me mehlel oh marain.¹⁹ Ih mwomwen atail kin rong Ih! E kin tapiada oh kalaudehla atail pwoson Krais oh kanampileh kin kitail ineng en wiahla de duwehla atail Soundoaro—wehwehki, koluhla oh alu nan ahl en inouwo. ²⁰

Nan Epreil nekiehro, Presiden Russell M. Nelson sewesekin kitail en wehwehki ia kesempwal pen koluhla nan atail seiloak en kaudiahl wet.²¹ E masanih: “Ni atail kin pilada en koluhla, kitail pilada en wekla! Kitail kin mweidehng Sounkomouro en wekid kitailla ong atail mour me keieu mwahu. Kitail kin pilada en duwehla Sises Krais!”²² Wiepen wekidekla wet, kin audehkin kitail mahsen en Koht, iei ih mwomwen atail pahn ehu ong nanleng.

En Presiden Nelson luhk ong kitail en koluhla kin patepatehng padahk en mehn pilipil. Kitail en pein pilada ong pein kitail. Rongamwahuo sohte kak idihdieng nan atail mohngiong kan. Elder Renlund koasoaia, “Dahme Samatail Nanleng kupwurki kaidehn te Sapwellime seri kan en wia dahme pwung; pwe Sapwellime seri kan en pilada en wia dahme pwung.”²³

Nan prokrahm me wilialihkida Seri oh me Pwulopwul arail prokrahm, mie soahng 500 me anahne kaneknekla pwe en alehdi soangesoangen kaping kan.²⁴ Rahn wet, mie ehu me inenen kesempwal. E wia luhk en pilada en ekisekis duwehla Sounkomouro. Kitail wia met ni atail ale mahsen en Koht pwehki Ngehn Sarawi eh kin kaweid kitail oh mweidohng Krais en wikidkitailla ong mwomwen kitail me keieu mwahu.

Met e laudsang mehkot me kitail kin nannationg en alehdi de pein atail kekeirda. Met e wia ahnsou en kitail en ehu ong nanleng sang ni kaudiahl, mehn pilipil, oh koluhla—en kohdo rehn Krais oh alehdi Sapwellime rongamwahu nan wasa loal en atail mongiong kan.

Katengehdi oh Tohnmeteikihla—“Mweidohng Ira en Kaweid”²⁵

Eri, pwe en alehdi rongamwahu en Sises Krais nan wasa loal en atail mongiong kan kitail anahne katengteng ong loale—kihong atail ahnsou oh koahiek loale, oh tohnmetei ong.²⁶ Kitail koaros mwahuki atail mour en mie katepe, oh met e inenen mehlel ohng dih en mwuhr akan. Irail anahne kahrepe ehu.

Rongamwahu en Sises Krais wia ehu kahrepe laud nan sampah. Presidet Ezra Taft Benson koasoia:“Kitail alehdi pakair ehu sang rehn Koht en kalohngki wei rongamwahu o wasa koaros nan sampah. Oh iei kahrepe wet me pahn kihpene kitail nan rahn pwukat. Rongamwahu o kelehpw me pahn kak kapitala sampah sang sued oh sakanakan en kawehla. Rongamwahuo kelehpw me pahn kak kihpene ohl [oh lih] en mwohmw koaros oh wasa kan koaros ni meleilei. Rongamwahuo kelehpw me pahn wahdo popohl, peren, oh komour rehn peneinei en aramas kan koaros.”²⁷

Elder David A. Bednar koasoaia, “Ni atail pahn kakehlaka me pwulopwul kan sang ni atail kin luke irail oh mweidohng irail en mwekid, Mwomwohdiso pahn mwekid wei mwowe ni doadoahk kapwuriamwei ehu.”²⁸ Pak tohto kitail kin sohte mweidohng me pwulepwul kan en kin tohnmeteiki doadoahk lap duen Krais. Elder Neal A. Maxwell kasawih, “Ma [neitail] me pwulopwul kan sohte pahn perenkihda [ahn Koht Doadoak] peren en sampah pahn poweiraildi.”²⁹

Prokrahm kapw wet dokodoke me pwulopwul kan pwe re en kak kamanamanala. Re kin pein pilada dahme re pahn koadoake pwe ren kak alehdi ehu rahn. Kuorem oh presedensi en klass kan e kairoakdi nan arail pwukoa kan. Pwihn en ward pwulopwul kan, duwehte pwihn en ward kan, kin katengtengdiengete doadoak en komour oh lapalapala.³⁰ Pwihn en prihsduhd oh kasukuhl kin tepkihda arail tuhpene sang ni arail kin ehukipene ia mwomwen arail pahn kak wia Sapwellimen Koht doadoahk me E ketikiheng irailehr.³¹

Presiden Nelson masanih ong me pwulopwul kan nan Mwomwodiso: “Ma kumwail pilada , ma kumwail mwahuki … kumwail kak wia kisehn mehkot laud, mehkot kesempwal, mehkot kopwuriamwei! … Kumwail iang wia me keioun mwahu me Kauno ketin kadaredo sampah wet. Kumwail ahneki marain laud oh pil katep laud pohn sampah sang dih teikan!”³¹ Oh pileu koamwoakid, Presiden Nelson padahkiong me pwulopwul kan: “I inenen koapwoaroapwoar kin kumwial. I poakoang kumwail, oh pil duehte Kauno. Kitail me Sapwellime aramas akan, mihpene wasahkis nan Sapwellime doadoak.”³³ Aramas pwulopwul kan, kumwail kak kehn koapwoaroapwoar me Presiden Nelson ahniki ong kumwail oh ia woahn kesempwal kumwail nan doadoak wet?

Pahpa, Nohno oh kaun mah kan, I luke kumwail en kilang me pwulopwul kan duehte Presiden Nelson ah kilang irail. Ni me pwulopwul kan ahr pahn kehn amwail limpoak oh koapwoaroapoar, ni am pahn koangenge oh padahkiong irail duen kahlua—oh keisang mwohrail—re pahn kopwuriamweikin uhk arail kak, koaioak, oh tengeteng nan rongamwahu.³⁴ Re pahn kehn peren en pilada pwe re en pateng oh tohnmeteiki doadoahk en Krais doadoahk. Sapwellime rongamwahuo pahn sair nan loalerail, oh doadoako pahn mwekidwei ni mwohm kapwuriamwei.

Inou oh Kadehde kan

I inouki, ma kitail pahn poadidiong wiepe pwukat—ehupene kan, kaudiahl, men pilipil, koluhla, oh tohnmetei pwehki doadoak wet—rongamwahu en Sises Krais pahn lel nan wasa loal en atail mongiong kan. Kitail pahn udiahl Kopwurupwurdohu en alehdi kahrepe unseko, poadondoaralahn Israel oh kokoudahn Saion³⁵wasa Krais pahn kaunda wiahla Nanmwarki en nanmwarki kan.

I kadehde me Koht ketin wiewiahte song kan koros me anahnepe pwe en kounopada Sapwelime serikan nan rahn wet. Kitail kak kilang limehkan nan doadoahk wet ni atail nantiong pwe “kohdo rehn Krais, oh unsekla reh.”³⁵ Ni mwaren Sises Krais, ahmen.