Weliakapw sang ni Manaman en Pwuhk en Mormon

Sang Elder Benjamin M. Z. Tai

En Isiakan

Pwuhk en Mormon kihong kitail kehlail en palingehn, kaweid kin kitail ia mwomwen atail pahn mwekid, oh koadokei kitailahng Ngehn Sarawi.

Mwurin petehkpen repwoht me sang dou pe pid palinwaro, I esehla me I anahne kaiahnehng en momourki. Pwehn seweseie, e kihengie winien kehlail oh ien koasoanehdi ansou en eksersais, mwo, ma i pahn idawehn, e pahn kak seweseie ien kak wiahla aramas kehlail men.

Ma emen emen kitail pahn kosou en palingehn, dahme kitail pahn kak koledihsang pein kitail? Songen wekidekla dah kan me atail toahktoahn palingehn o pahn kihong kitail? Ong kitail en wiahla dahme kitail anahne wiahla, e inenen kesempwal kitail en ese dahme kitail en wia de wia dahme kitail ese.

Sises Krais ie me Kaun en Toahkte.¹ Sang ni Sapwellime Tomwo, E kamwahuila atail ohla kan, wahda atail souitar de luwet akan, oh kamwahuila atail mongiong me ohla kan.² Sang Sapwellime kalahngan, atail luwet akan kehlail la.³ E luhkei kitail en indahwen Ih⁴sang ononopki Ih, rongorong Sapwelime mahsen akan, oh kekeidki karakarahk en Sapwellime Ngehn.⁵ E inoukiong kitail me e pahn sowese kitail⁶nan momour en weliakapwala wet, me pahn wekidala kitail oh wahdo peren soutuk.⁷

Sounkomouro ketkiong kitailehr Pwuhk en Mormon en wia dipwisou manaman ehu en sewesei kitail weliakapwala. Pwuhk en Mormon kihong kitail kehlail en palingehn, kaweid kin kitail ia mwomwen atail pahn mwekid, oh koadokei kitailahng Ngehn Sarawi. Intingdier ong kitail,⁸ e audaudki mahsen en Koht ni sansal⁹ oh padahkiong kitail ia mwomwetail, ia kahrepatail, oh ia wasa kitail pahn lel ie.¹⁰ Iangahki Pwuhk Sarawi, Pwuhk en Mormon kin kadehde duwen Sises Krais¹¹oh kin padahkiong kitail ia mwomwen atail pahn esehla mehlelo oh duwehla Ih.

Riei pwutak Saw Polo

Brother Saw Polo sounpar [limeisek waluh] 58 ni ansou me e kapehseiong rongamwahu kopwurupwurdohn Sises Krais. Ansou me ih tuhong ih, e wia pwukoah en branch presiden sounpar koai, ahpw ih pil diarada me e saikinte wadek Pwuhk en Mormon pwehki e saikinte kawewehdi ni ah lokaia iei Burmese. Ansou me ih idek ia mwomwen ah ese me pwuhko mehlel ni ah sohte wadek, e sapengki me e onopiki Soai kan en Pwuhk en Mormon sang ni ah kin kilekilang pwuhk kilel kan rahn koaros, doadoanghki diksenery pwe en kawehwe lokaiahn wai kan, oh kin intingihdi kosoi kan ni keneinei ong dahme e kin koledi. E kawehwe me, “Ansou koaros me ih kin onop, ih kin kapakapki dahme ih kin koledi kan, oh ih kin koahn moaloailoai oh peren, nan ai mwahlioal kin marainda, oh ai mongiong kin mwuterekla. Ih kin kehn me Ngehn Sarawi me kin kadehdeiong ioa me e mehlel. I udahn ese me Pwuhk en Mormon iei mahsen en Koht.”

Duwehte Brother Saw Polo, emen emen kitail kak onopiki Pwuhk en Mormon nin duwen pein atail irair kan. Ni atail kin inangih en kamehlele oh medewe duwen ah padahk kan nan mohngiongatail, kitail kak peki rehn Koht ni pwoson ma padahk ko mehlel.¹² Ma kitail peki ni ingeng mehlel oh pahn mwekidkihda, E pahn ketin sapeng kitail nan mohngiongatail sang ni Ngehn Sarawio. Sang ni manaman en Ngehn Sarawi kitail kin esehla duwen mehlel pen mehkoaros.¹³ Ni atail pahn alehda kadehdeh pen Pwuhk en Mormon, kitail pil pahn alehda kadehde sang ni manamanohte me Sises Krais iei Soundor en Sampah, me Jospeh Smith wia Sapwellime soukohp, oh me Mwomwohdiso en Sises Krais en Souleng en Imwin Rahn Akan iei Sapwellime mwomwohdiso kopwuropwurdo.¹⁴

Ni ai wia mwanakapw pwulopwul men kaukaunop en kohla nan ai misin, ih iangada soumpihr ehu kohla Australia. Ahniki pepehm en ei kelehpw, saloh, oh peikasal ahpw ni ai inou en papah, I inenen anahne kakehloapoan dahme ih kamelele me e pwung mehlel. I kapakap oh wadek nei pwuhk sarawi, ahpw ansou me sompihro pihrda, ai peikasalki peihn ngei laudla oh paliwereiet luwetala. Mwurin ai wie soasoansuedki awa koai, tohn doadoahk en sompihro men aluhdido nan ahil oh uhdi limwahn wasa ih mwomwohd ioa. E kihsang Pwuhk en Mormon me ih wie wadwadeko nan poahi kat. E kilang kilin pwuhko ih inda, “Pwuhk kaselel ehu met!” ih eri kapwurehdo pwuhko rehi oh alialuhla. Ih sohte pwurehng kilangada ih.

Ansou me ah koasoai ko kin pwurpwurehdo rehi, I udahn rong oh koahn nan ai mongiong, “Ih mih met, oh I ese iawasa ke mih ioa. Ihte wia wen ahmw kak, pwe ih pahn apwalihala luhwehkau koaros. Nan sompihro pohnangin Lepin Sehd en Pacific, I alehdi pein ai kadehde sang ai onopiki Pwuhk en Mormon oh pepehm en Ngehn Sarawi me ai Soundor ese his ngehi oh me rongamwahuo mehlel.

Elder David A. Bednar padahngki: “Ese me rongamwahuo mehlel iei kalingan poan kadehde ehu. Wiewia loaloapwoat ong rongamwahuo iei me keieu kesemwpal ong weliakapwalahu.”¹⁵ Weliakapwala anahne kitail en wia “tohn doadoahk en mahseno, ah kaidehn soun rongorongete.”¹⁶ Sapwellimen Kauno koasondi en doadoahk ong kitail—padahk en Krais—iei me keieun sansal mwahu nan Pwuhk en Mormon.¹⁷ Iei me patehng:

• Keieu, kaiahn en ahniki pwoson Sises Krais sang ni kamehlele Ih, kolokol Sapwellime kosonned akan, oh ese me E pahn ketin sewese kitail.¹⁸

• Keriau, koluhkila rahn koaros atail souitar akan oh alehdi oh pil ahniki popohl oh meleilei ni ansou me E kin makohng kitail.¹⁹ Koluhla anahne kitail en mahkong meteikan²⁰oh sewese kitail en wenla mwowe. Sounkomouro ketin inoukiong kitail me E pahn kin ketin mahkohng kitail ansou koaros me kitail koluhla.²¹

• Kesiluhl,wiewia oh kolokol inou kan ong Koht sang ni tiahk sarawi kan me duwehte pepdais. Met pahn kolokol kitail pohn ahl en inouo me kolahng Reh.²²

• Kapahiou, alehdi kisakis en Ngehn Sarawi. Kisakis wet mweidohng kitail iengetail men me kin kasarawih, koaloalamwahuih, oh kahluwai kitail.²³

• Kelimau, dadaurete lel ni imwi sang amw pahn nantiong dadaurete oh katengetengedi ansou meni omw pahn audaudki rahn koaros mahsen en Krais.²⁴ Sang ni wadwadek Pwuhk en Mormon oh kolokol teng padahk kan me mih loale, kitail kak powehdi kahpwal kan oh alehdi kaweid oh perepen atail mour kan.²⁵

Sang ni doadoahngki mahsen en Krais ansou koaros nan atail mour, kitail pahn kak powehdi dahme kin kolokol kitail sang men weliakapwala oh masepwehk me kin kol kitaidihsang atail wiewia. Kitail pahn alehdi pein atail kaudiahl, pwe Ngehn Sarawi “pahn kasalehiongkumwail soahng koaros me kumwail anahne wia, ”²⁶ oh “mahsen en Krais pahn padahkiongkumwail soahng koaros me kumwail pahn anahne wia.”²⁷

Ereihn pahr [riesek] 20, Brother Juncong ahneki kahpwal en mehn koalitopw, sika, oh mwadong en mwohni. Ansou me e kapehsehiong Sises Krais oh Sapwelime rongamwahu kapwurupwurdohu, Brother Huang ahneki inoang en weliakapwala pwehki ah kisin peneinei tikitik. Me e keieu apwal ki iei simwok. Pwehki ih soun simwok emen, eh kin song en kesehla pak tohto ahpw sohte kin pweida. Ehu rahno, mahsen pwukat en nan Pwuhk en Mormon pa kohda nan ah madamadau: “sang ni mongiong karakarahk, ni inoang mehlel.”²⁸ Mendahte ah sohte kin pweida, e pehmada me mwein e anahne sawas sang Samatail Nanleng oh Sises Krais pwe en kak wekila.

Misineri kan ahpw ehukieng ih arail pwoson oh wiahda kamwomwada ehu pwe irail en patoang, iangahki kapakap oh kin onopiki mahsen en Koht. Sang ni aktikitik oh inoang mehlel, Brother Huang mwekid ni pwoson oh diarada me ni ah medewehte ong ni mwekid me e anahne wekidala, me duwehte ononopki Pwuhk en Mormon, e solah nohn medewe wiewiah kan me e men kesehla.

Ni ah katamanda ah mwekid en sounpar 15 samwalahro, e ahpw koasoia, “I sohte taman ansou da me ih sohla simwok, ahpw ansou me ih song en wia soahng kan koaros me ih anahne wia pwe en luhkedo Ngehn en Kauno rehi nan ai mour et oh wenwenlahte mwowe ih sola medewe sika leledo rahn wet.” Sang ni ah doadoahngki Pwuhk en Mormon, ahn Brother Huang mour wekidekla, oh e wiahla ohl pwopwoud oh pahpa mwahu men.

Huang Juncong oh peneinei

President Russel M. Nelson inoukihda me: “Ni amwail pahn kapakap oh onopiki Pwuhk en Mormon rahn koaros, kumwail pahn kak wiahda pilipil mwahu kan—rahn koaros. Ih inoukihwei me ni amwail pahn kin medewe dahme kumwail kin onopiki, wenihmw tok en nanleng pahn ritida, oh kumwail pahn alehdi pasapeng kan en amwail kalelapak kan oh wasa me kumwail pahn kak keidla ie. I inoukihong kumwail me ni amwail pahn wadek Pwuhk en Mormon rahn koaros, kumwail pahn kak kehlail ong doadoahk en tepil kan nan rahn akan pil iangahki kilel suwed kan me kin kol kitaildi oh soahngen suwed kan koaros me kitail kin sohte kakoahng.”²⁹

Kempoakepahi ko, Pwuhk en Mormon iei mahsen en Koht, oh kitail pahn karanihala Ih ma kitail pahn onopiki.³⁰ Ni ansou me kitail pahn kin kaskasawih sapwelime mahsen akan, kitail pahn alehdi kadehdepen me mehlelo.³¹ Ni atail pahn nantihong oh momourki sapwelime padahk kan, kitail pahn sohte inangiada en wia “mehkot me sohte mwahu.”³² Atail mongiong, mesetail, oh paliweretail pahn wekidekla³³ pwe en duwehla Sounkomouro. I ehukiheng kumwail ai kadehde ni mehlel me Sises iei Ih me Krais, atail Soundor, Sounkomour, oh Kempoakepatail. Ni mwaren Sises Krais, ahmen.

Ireh kan

1. Kilang Mark 2:17.

2. Kilang Melkahka kan 147:3; Aiseia 53:4; Madiu 8:17.

3. Kilang 2 Nihpai 25:23; Jacob 4:7; Ether 12:27.

4. Kilang Madiu 19:21; Mark 10:21; Luhk 18:22; 2 Nihpai 31:10.

5. Kilang Doctrine and Covenants 19:23.

6. Kilang Aiseia 41:10.

7. Kilang Mosiah 2:41; 3:19; 5:2.

8. Kilang 2 Nephi 25:8, 21–22; Mormon 7:1; 8:35.

9. Kilang 2 Nihpai 25:7; 31:2–3

10. Kilang 2 Nihpai 2:25; Alma 40

11. Kilang Aiseia 29:4, 11–18; Esekiel 37:16–21; 2 Korint 13:1; 1 Nihpai 13:38–42; 2 Nihpai3:12; 25:26.

12. Tehk Alma 32:26–43.

13. Tehk Moronai 10:4–5.

14. Tehk Mehn Kapehse en Pwuhk en Mormon.

15. David A. Bednar, “Converted unto the Lord,” Liahona, Nov. 2012, 109.

16. Seims 1:22.

17. Kilang 2 Nihpai 31; 3 Nihpai 11:31–40; 27:13–22.

18. Kilang 1 Nihpai 3:7; Moroni 7:33.

19. Kilang Mosiah 4:3.

20. Tehk Matthew 18:21–35; Mark 11:25–26; Luke 6:37; 3 Nephi 13:14–15; Doctrine and Covenants 64:10; 82:1.

21. Kilang Mosiah 26:30; Moroni 6:8.

22. Kilang 2 Nihpai 31:17–18.

23. Kilang 1 Nihpai 10:19; 2 Nihpai 33:1; 3 Nihpai 11:32; 28:11; Moroni 6:4.

24. Tehk 2 Nephi 31:20.

25. Tehk 1 Nephi 15:24.

26. 2 Nihpai 32:5; iren kapatapat.

27. 2 Nihpai 32:3; iren kapatapat.

28. Moroni 10:5.

29. Russell M. Nelson, “Pwuhk en Mormon: E pahn ia mwomwen ahmw mour ma sohte pwuhk wet?” Liahona, Nohpempe 2017, 62–63.

30. Soukohp Joseph Smith koasoia duwen Pwuhk en Mormon, “Aramas pahn karaniala Koht sang ni kolokol oh kapwaiada audepeh kan, sang pwuhk teikan” (ni tepin Pwuhk en Mormon

31. Kilang Jacob 6:7; Alma 32:26–43.

32. Alma 19:33.

33. Kilang 2 Korint 5:17; Mosiah 3:19; 5:2; Alma 5:14, 19.