Kapakap en Pwoson
Ni atail kin kapakap ni pwoson, kitail pahn pil iang wia pwukoah nan doadoahk en Kauno ni ah pahn kaunopada sampah ong Sapwellime Ketido Keriau.
Ahn Elder Maynes kapakap ni tepin tiepene en kapokon lap pasapengehr. Pepehm kin kodohng kitail sang ni padahk kaselel oh koul kaselel kan. Inou en Presiden Russell M. Nelson me tiepene wet pahn inenen kaselel oh pahn dehde e tepier wiewiawi pwe en pweida.
Presiden Nelson koasoanehdi me pahr wet iei ”ahnsou en kawahuwih pahr 200 sang ni ahnsou me Koht Sahm oh Sapwellime Iehros Kempoake, Sises Krais, pwarehng Joseph Smith nan kaudiahl ehu.” Presiden Nelson luke kitail en wiahda pein atail koasoandi pwehn kaunopehng kapokon lap wet, me katamanpe e mahsanih pahn wia “ehu mwekid kesempwal nan poadoapoad en Mwomwohdiso, oh ahmw pwukoah pahn inenen kesempwal.”1
Duwehte ngehi, mwein ke rong sapwellime mahsen oh peidengki rehn pein kowe, koasoaia, ”Ia duwen ahi pwukoah ah kesempwal?” Mwein ke wadek oh kapakapki duwen wieiwia kan en Kopwurupwurdohu. Mwein, laud sang mahs, ke wadek poadepen ahnsou kan koaros me Koht Sahm kepehse Sapwellime Iehros Kesempwal. Mwein ke wadek nan ahnsou kan me Sounkomouro koasoaiong Sapwellimen Samatail Nanleng seri kan. I ese me I wia soahng pwukat koaros.
Ni ahi kin diarada ire kan nan ahi wadawad me pid prihsduhd en Koht oh ritidahn mwehi marain kan, I ahnekihla aktikitik. I tepiehr diarada me ahi kaunopehng tiepene wet wia mwekid kesempwal ohng pein ahi poadoapoad. I pehm wekila nan ahi mohngionget. I ahnekihla kalahngan kapw. I kehn me I audaudki popohl pwehki ahi luhkongehr en patehng katamanpen Kopwurupwurdohu wet.
I kin medewe me ekei ahneki pepehm, pwehki sang ni kaunop keneinei , popohl laud, ahneki koapwoaroapwoar laud, oh inengieng en papah ni wasa kan koaros me Kauno kupwurki.
Kemwekid lap akan me kitail kawahuwih iei tepdahn imwin rahn akan me kokohpehr, ahnsou me Kauno kaukaunopada Sapwellime Mwomwohdiso oh Sapwellime aramas, iei irail akan me kahdaneki ni Mware, pwehn alehda ih. Nin duwen eh wia kisehn atail kaukaunopehng Sapwellime ketido, E pahn pwekada emenemen kitail pwe kitail en kak powehdi kasongosong en ngehn kan oh isaniki ahnsou mwahu kan me weksang dahme sansalehr nan poadoapoad en sampwah wet.
Nan Septempe 1840, Soukohp Joseph Smith oh ah tungoal sounsawasko nan Presidensi Keieu kalohkihda mepwukat: “Doadoahk en Kauno ni imwin rahn pwukat me inenen kouwahlap oh aramas kak sohte wehwehki. Ah lingan sipellehla me kak sansal , oh ah wahu me pohnangin mehkoaros. Iei ih padahko me kainangih nan mohngiong en soukohp akan oh ohl pwung kan sangete ni kepikipikdahn sampah kohkohdo nan dih koaros lel met; oh iei ih mwehi en unseklahn mehkoaros, ni ahnsou me soahng koaros me mih rehn Krais Sises, mendahte ma nanleng de pohn sampah, pahn kohpene Reh, oh ni ahsnou me soahng koaros pahn kopwurupwurdohr, duwehte me kokohpehr sang rehn soukohp koaros sangete ni tepin sampah; pwe nan ahnsouwo inou kaselel koaros en Sahm ako pahn pweida, oh kasansalpen manaman en Me Lapalahpieo pahn inenen laud, lingan, oh marain.”
Irail doula oh nda: “Se ahneki pepehm en sokowei mwowe oh kihpene aht kehlail pwehn iang kawada Wehio, oh kauwada Prihsduhd nan arail unsek oh lingan. Doadoahk me anahne imwisekla ni imwin rahn akan wia ehu doadoahk laud oh kesempwal, oh pahn ekerpene kehlail, koahiek, kisakis, oh kak en Souleng kan, pwe en kak kohwei mwowe ni lingan oh manaman me kokohpda sang Soukohpo [Daniel] [kilang Daniel 2:34-35, 44-45]; oh pahn uhd anahne kapokonpenehn Souleng kan, pwe en kaimwisekla soangen doadoahk laud oh lingan ako.”2
Soahng tohto en pisetikpen dahkan me kitail pahn wia oh iahd me kitail pahn wia nan koasoandihkan en Kopwurupwurdohu saik kasansalda. Ahpw Presidensi Keieuo eseiehr nan rahn pwuko uwen tehlap en oh loal en doadoahk me Kauno kaunopadahr mwohtail. Iet ekei karasaras en dahkan me kitail ese pahn wiawi;
Sang rehn Sapwellime Souleng kan, Kauno pahn ketkihda kisakis en Sapwellime rongamwahuo “ohng koaros wehi, keinek, mahsen, oh aramas.”3 Kompiuter kan oh kasansal kan pahn doulahte wia arail pali—duwehte emenemen ”sounlaid en aramas” me pahn papah ni manaman oh pwoson kehkehlailla.
Kitail pahn ehupene ni minimin laud nan ahnsou me saminimin lalaudla. Kitail pahn ehupene ni ngehn kehlail en aramas tohto oh peneinei kan me audaudkihda marain en rongamwahuo.
Pil lel sampah me salamalam pahn kasawih Mwomwohdiso en Sises Krais en Souleng en Imwin-rahn akan oh esehda manaman en Koht me ket powe. Tohnpadahk kan me diren pwoson oh kommwad pahn alehdi Mwaren Krais nan arail mour en rahn koaros ni sohte masepwehk, ni karakarahk, oh ni mwohmw sansal.
Eri, ia mwomwen atail kak iang patehng soangen doadoahk laud oh lingan wet? Presiden Nelson padahkihonger kitail mwomwen kakairada manaman en pali ngehn. Ni ahnsou me kitail kin wiahki koluhla mehkot kaperen ehu pwehki keirdahn pwoson me Sises iei ih me Krais, ni ahnsou me kitail kin wewehki oh kamehlele me Samatail Nanleng karonge atail kapakap, ni ahnsou me kitail nantiong oh peikiong oh momourki kosonned akan, kitail kin keirda nan atail manaman en alehdi kaudiahl, Ngehn Sarawi kak wiahla kempoakepatail. Pepehm en marain kin kousoan rehtail mendahte ma sampah kapilkinkitailpene rotorot.
Joseph Smith wia karasaras en ia mwomwen atail pahn keirda ni manaman en pali ngehn. E kasalehiong kitail me kapakap ni pwoson wia ehu key en alehdi kaudiahl sang rehn Koht. E kapakap ni pwoson, kamehlele me Koht Sahm kin sapeng kapakap kan. E kapakap ni pwoson, kamehlele me sangete rehn Sises Krais me e kak pitikihsang katoutou kan me e kin pehm ong ni dipeh kan. Oh e kapakap ni pwoson, kamehlele me e anahne diarada Mwomwohdiso en Sises Krais pwung pwe en kak alehdi mahk.
Erein ah doadoahk en soukohp, Joseph Smith kin doadoahngki kapakap ni pwoson pwe en kak alehdi kaudiahl akan. Ni atail kin sohpeiohng kahpwal akan en met oh me pahn kohdo kan, kitail pil anahne doadoahngki soahngen mwohmwohte. Presiden Brigham Young koasoaia, ”I sohte ese ehu soangen ahl tohrohr ong Souleng en Imwin-rahn akan sang me esingek koaros en wia kapakap ni ngidingid ong Koht pwe en kaweid oh kahluwa sapwellime aramas kan.”
Lepin lokaia pwukat sang nan kapakap en kamadipw sarawi en wia kaweidpen atail mour nan ehuehu rahn: ”Tamataman ih ahnsou koaros.” “Ih“ iei Sises Krais. Lepin lokaia me mwuriho, ”oh kolokol Sapwellime kosonned akan,” kasalehda ia wehwehn atail pahn tamataman ih.6 Ni atail kin tamataman Sises Krais, mwein kitail en peidengki rehtail nan atail kapakap, ”Dahme E kupwurki ien wia?”
Soangen kapakap wet, me kin wiawi sang ni pwoson Sises Krais, iei me kahrehdo oh tapiada mwehi wet. Oh e pahn mih nan mohngiong en atail pwukoah ni atail kin doulahte oh kadkadaurete. I diaradahr, pil duwehte kowe, karasaras kaselel kei en soangen kapakapo.
Keieu iei Joseph Smith. E peki ni pwoson me mwomwen seri dahme Kauno kupwurki en wia. Ah pasapengo wekidala poadoapoad en sampah.
Ong ie, ire me keieu kesempwal kohsang an Joseph mwekid ong Sehdan ni ahnsou me e song en kauhdi ih ni Joseph eh kelepwidi pwe en kapakap.
I ese sang ni ahi wehwehki me Sehdan oh nah ladu kan pahn song kihong kitail pepehm me kitail en dehr kapakap. Ahnsou me Joseph Smith wia uwen ah kak koaros en likweriong Koht pwe en kapitsang manaman me song en salihdi ih, ah kapakap en saledekla pasapeng pweida oh Samatail Nanleng oh Sises Krais pwarehng.
Ahn Sehdan songosong en kauhdi tepin Kopwurupwurdohu inenen laud mehlel pwehki ahn Joseph ah kapakap inenen kesempwal. Kowe oh ngehi pahn iang ahneki pwukoah tikitik ong ni doadoahk en Kopwurupwurdohu. Ahpw imwintitihn Kopwurupwurdohu pahn song en kauhdi kitail sang kapakap. Ahn Joseph karasaras en pwoson oh ah ineng kak kakehlaka kitail nan atail nannanti. Met iei ehu sang kahrepe kan me I kin kapakapki oh kapatahieng ahi kaping ong Samatail Nanleng pwehki Soukohp Joseph.
Enos nan Pwuhk en Mormon pil wia mehn kahlmeng ong ahi kapakap en pwoson ni ahnsou kan me I kin song wia ahi pali nan Kopwurupwur wet. Sohte lipilipil dahme ahmw pwukoah, ke kak ale ih en wia pein ahmw mehn kahlmeng.
Duwehte Sohsep, Enos kapakap ni pwoson. E kawehwehda ah kemwekid nin duwen met:
”Oh ngeniet duhpekla; oh I kelepwidi mwohn ahi Sounkepikepik, oh I likwerih ni kapakap laud oh pekimahngki pein ngeniet; oh rahno pwon I wie liklikwer ong Ih; ei, oh pwohng ahpw leledo I kalakalaudehlahte ngileiet pwe an kak lel nanleng.
”Oh ngihl ehu ahpw peido ongie, mahsanih: Enos, mahkpen dipomw kan kohwong komwiehr, oh komw pahn kapaida.
”Oh Ngehi, Enos, wehwehki me Koht sohte kak likamw; kahrehda, dipei kan mwakelekeladahr.
”Oh Ngehi eri nda: Kaun, ia mwomwen met ah wiawihier?
”Oh e mahsanihongie: Pwehki ahmw pwoson Krais, me ke sohte kin rong mwowe de kilang. Oh pahr tohto nekier mwohn ah pahn kasalehieng kitail ih ni paliwar; Eri, kohwei, ahmw pwoson kahreiehng ahmw unsekla.”
Ire me kapaiehda mih nan lepin lokaiahkat: ”Pwehki ahmw pwoson Krais, me ke sohte kin rong mwowe de kilang.”
Joseph pwoson Krais pwe en kohla nanwehlo oh pil kapakap pwe en kak mweisang manaman en Sehdan. E saikinte kilang Sahmo de Iehroso oh, ahpw e kapakap ni pwoson oh ni kehlail en ah mohngiong unsek.
Ahn Enos ah kemwekid pil padahkiongie soangen irair kesempwalohte. Ahnsou me I kin kapakap ni pwoson, Sounkomouro kin kaminiminihpene ngehi oh Sahmo oh I kin kak kehn me ahi kapakap kin lel nanleng. Pasepeng kan kin kohdo. Kapai kan kin alahldi. Mie meleilei oh peren mendahte ma ahnsou en kahpwal.
I taman ahnsou me, ni ah wia towe kapw nan Pwihn en Wahnpoaron Ehk-riemen, I kelepwidi nan kapakap rehn Elder David B. Haight. Ah sounpar ahnsouwo duwehte ahi sounpar en ahnsouwet, oh ah kahpwal kan duwehte ahikat. I taman ngile ahnsou me e kapakapo. I sohte duwarpeseng ien kilang, ahpw e ngilen wie sinsirei. E koasoaieng Samatail Nanleng ni ngihl peren.
I kak rong nan ahi madmadau ah peren ni ahnsou me e inda, ”Ni mwaren Sises Krais.” Ngilehu duwehte mwomwen Elder Height ah kehn me Sounkomouro kupwuriki ah kapakap nan ahnsouwohte. Oh I ese me e pahn alahldi ni peren.
Atail koahiek en wia atail pwukoah ong lingan en Kopwurupwurdohu pahn lalaudla ni atail kekeirda ni pwoson me Sises Krais me atail Sounkomour oh Samatail Nanleng me wia Samatail limpoako. Ni atail kin kapakap ni pwoson, kitail pahn pil iang wia pwukoah nan doadoahk en Kauno ni ah pahn kaunopada sampah ong Sapwellime Ketido Keriau. I kapakapki me kitail koaros pahn diar peren ni atail pahn wia doadoak me e lukeieng emenemen kitail en wia.
I kadehdehki me Sises Krais ketin ieias. Met iei Sapwellime Mwomwohdiso oh Sapwellime wehi pohn sampah. Joseph Smith me wia Soukohp en Kopwurupwurdohu. Presiden Russell M. Nelson me wia sapwellimen Kauno soukohp pohn sampah rahn wet. E kolokol key en prihstud koaros nan Mwomwohdiso en Sises Krais en Souleng en Imwin-rahn akan. Ni mwaren Sises Krais, ahmen.