ຄວາມຈິງ ແລະ ແຜນ
ເມື່ອເຮົາສະແຫວງຫາຄວາມຈິງກ່ຽວກັບສາດສະໜາ, ເຮົາຄວນໃຊ້ວິທີທາງ ທາງວິນຍານທີ່ຖືກຕ້ອງສຳລັບການຄົ້ນຄວ້ານັ້ນ.
ການເປີດເຜີຍສະໄໝໃໝ່ແປຄວາມໝາຍຂອງ ຄວາມຈິງ ວ່າ ເປັນຄວາມຮູ້ເຖິງສິ່ງທີ່ເປັນຢູ່, ແລະ ດັ່ງທີ່ໄດ້ເປັນມາ, ແລະ ດັ່ງທີ່ຈະເປັນ (ເບິ່ງ Doctrine and Covenants 93:24). ມັນເປັນການແປຄວາມໝາຍທີ່ດີເລີດ ສຳລັບແຜນແຫ່ງຄວາມລອດ ແລະ ສຳລັບໃບ “ຄອບຄົວ: ການປະກາດຕໍ່ໂລກ.”
ເຮົາມີຊີວິດຢູ່ໃນວັນເວລາທີ່ຂໍ້ມູນຖືກຂະຫຍາຍ ແລະ ເຜີຍແຜ່ຢ່າງກວ້າງຂວາງ. ແຕ່ບໍ່ແມ່ນຂໍ້ມູນທັງໝົດທີ່ເປັນຄວາມຈິງ. ເຮົາຕ້ອງລະມັດລະວັງ ເມື່ອເຮົາສະແຫວງຫາຄວາມຈິງ ແລະ ເມື່ອເຮົາເລືອກແຫລ່ງທີ່ເຮົາຈະເພິ່ງອາໄສໃນການຄົ້ນຄວ້ານັ້ນ. ເຮົາບໍ່ຄວນຖືວ່າຄວາມໂດ່ງດັງທາງໂລກ ຫລື ສິດອຳນາດເປັນແຫລ່ງຂອງຄວາມຈິງທີ່ເໝາະສົມ. ເຮົາຄວນລະມັດລະວັງກ່ຽວກັບຂໍ້ມູນ ຫລື ຄຳປຶກສາທີ່ໄຮ້ສາລະ ທີ່ດາລາການບັນເທີງ, ນັກກິລາທີ່ໂດ່ງດັງ, ຫລື ແຫລ່ງທີ່ບໍ່ບອກຊື່ຈາກໃນອິນເຕີເນັດນຳສະເໜີ. ຄວາມຊ່ຽວຊານໃນອາຊີບໜຶ່ງ ບໍ່ຄວນຖືກຮັບຮູ້ວ່າເປັນຄວາມຊ່ຽວຊານ ເຖິງຄວາມຈິງໃນອີກຫົວຂໍ້ໜຶ່ງ.
ຄວາມລະມັດລະວັງອີກຢ່າງໜຶ່ງສຳລັບການໄຕ່ຕາມຫາຄວາມຈິງແມ່ນໃຫ້ພິຈາລະນາຄວາມຕັ້ງໃຈຂອງຜູ້ທີ່ໃຫ້ຂໍ້ມູນນັ້ນ. ເພາະເຫດນັ້ນ ພຣະຄຳພີຈຶ່ງເຕືອນເຮົາໃຫ້ຕ້ານທານກັບການຫລອກລວງຂອງປະໂລຫິດ (ເບິ່ງ 2 ນີໄຟ 26:29). ຖ້າຫາກແຫລ່ງໃດທີ່ບໍ່ບອກຊື່ ຫລື ເຮົາບໍ່ເຄີຍໄດ້ຍິນມາກ່ອນ, ຂໍ້ມູນອາດເປັນໜ້າສົງໄສ.
ການຕັດສິນໃຈສ່ວນຕົວຂອງເຮົາຄວນອີງຕາມຂໍ້ມູນຈາກແຫລ່ງທີ່ມີສິດເໝາະສົມກ່ຽວກັບຫົວຂໍ້ນັ້ນ ແລະ ປາດສະຈາກການບິດເບືອນ ທີ່ສາມາດເປັນຜົນທີ່ມາຈາກ ຄວາມຕັ້ງໃຈທີ່ເຫັນແກ່ຕົວ.
I.
ເມື່ອເຮົາສະແຫວງຫາຄວາມຈິງກ່ຽວກັບສາດສະໜາ, ເຮົາຄວນໃຊ້ວິທີທາງ ທາງວິນຍານທີ່ຖືກຕ້ອງສຳລັບການຄົ້ນຄວ້ານັ້ນ ດັ່ງເຊັ່ນ: ການອະທິຖານ, ພະຍານຈາກພຣະວິນຍານບໍລິສຸດ, ແລະ ການສຶກສາພຣະຄຳພີ ແລະ ຖ້ອຍຄຳຂອງສາດສະດາໃນຍຸກສະໄໝໄໝ່. ຂ້າພະເຈົ້າເສົ້າໃຈຕະຫລອດເມື່ອຂ້າພະເຈົ້າໄດ້ຍິນຄົນໃດຄົນໜຶ່ງລາຍງານ ການສູນເສຍສັດທາໃນສາດສະໜາ ເພາະຍ້ອນຄຳສອນທາງໂລກ. ອາການຕາບອດທາງວິນຍານອາດກໍ່ໃຫ້ເກີດຂຶ້ນດ້ວຍຕົວເອງ ໂດຍຜູ້ທີ່ຄັ້ງໜຶ່ງເຄີຍໄດ້ມີພາບທີ່ມາໃຫ້ເຫັນທາງວິນຍານ. ປະທານເຮັນຣີ ບີ ໄອຣິງ ໄດ້ກ່າວວ່າ, “ບັນຫາຂອງເຂົາເຈົ້າບໍ່ໄດ້ຢູ່ໃນ ສິ່ງທີ່ເຂົາເຈົ້າຄິດວ່າເຂົາເຈົ້າເຫັນ; ມັນຢູ່ໃນສິ່ງທີ່ເຂົາເຈົ້າ ບໍ່ສາມາດເຫັນໄດ້ເທື່ອ.”1
ວິທີທາງຂອງວິທະຍາສາດຈະນຳເຮົາໄປສູ່ສິ່ງທີ່ເຮົາເອີ້ນວ່າ ຄວາມຈິງທາງວິທະຍາສາດ. ແຕ່ “ຄວາມຈິງທາງວິທະຍາສາດ” ບໍ່ໄດ້ເປັນທັງໝົດຂອງຊີວິດ. ຜູ້ທີ່ບໍ່ຮຽນຮູ້ ໂດຍການສຶກສາ ແລະ ໂດຍສັດທານຳອີກ (ເບິ່ງ Doctrine and Covenants 88:118) ຈະຈຳກັດຄວາມເຂົ້າໃຈຂອງເຂົາເຈົ້າເຖິງຄວາມຈິງ ທີ່ເຂົາເຈົ້າສາມາດພິສູດໄດ້ໂດຍວິທີທາງວິທະຍາສາດ. ສິ່ງນີ້ໃຫ້ຄວາມຈຳກັດໃນການໄຕ່ຕາມຫາຄວາມຈິງ.
ປະທານເຈມສ໌ ອີ ຟາວ ໄດ້ກ່າວວ່າ: “ຜູ້ທີ່ໄດ້ [ຮັບບັບຕິສະມາ] ໄດ້ວາງຈິດວິນຍານນິລັນດອນຂອງເຂົາເຈົ້າໄວ້ໃນຈຸດທີ່ສ່ຽງ ໂດຍການໄຕ່ຕາມຫາພຽງແຕ່ແຫລ່ງແຫ່ງການຮຽນຮູ້ຂອງໂລກຢ່າງບໍ່ລະມັດລະວັງ. ເຮົາເຊື່ອວ່າ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ມີຄວາມສົມບູນຂອງພຣະກິດຕິຄຸນຂອງພຣະຄຣິດ, ຊຶ່ງພຣະກິດຕິຄຸນນັ້ນເປັນແກ່ນສານ ຂອງຄວາມຈິງ ແລະ ຄວາມຮູ້ແຈ້ງນິລັນດອນ.”2
ເຮົາພົບເຫັນຄວາມຈິງ ແລະ ຄວາມສຸກທີ່ແທ້ຈິງ ໂດຍການມາຮູ້ຈັກ ແລະ ກະທຳຕາມຄວາມຈິງກ່ຽວກັບວ່າ ເຮົາເປັນໃຜ, ຄວາມໝາຍຂອງຊີວິດມະຕະ, ແລະ ວ່າເຮົາຈະໄປໃສເມື່ອເຮົາຕາຍໄປ. ຄວາມຈິງເຫລົ່ານັ້ນບໍ່ສາມາດຮຽນໄດ້ໂດຍວິທີທາງຂອງວິທະຍາສາດ ຫລື ທາງໂລກ.
II.
ບັດນີ້ຂ້າພະເຈົ້າຈະກ່າວເຖິງຄວາມຈິງຂອງພຣະກິດຕິຄຸນທີ່ຖືກຟື້ນຟູ ທີ່ເປັນພື້ນຖານຂອງຄຳສອນຂອງສາດສະໜາຈັກ ຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ກະລຸນາພິຈາລະນາຄວາມຈິງເຫລົ່ານີ້ຢ່າງລະມັດລະວັງ. ມັນຈະອະທິບາຍກ່ຽວກັບຄຳສອນ ແລະ ພາກປະຕິບັດຂອງເຮົາ, ບາງທີຈະຮ່ວມດ້ວຍບາງສິ່ງທີ່ຍັງບໍ່ທັນເຂົ້າໃຈເທື່ອ.
ມີພຣະເຈົ້າ, ອົງທີ່ເປັນພຣະບິດາທີ່ຮັກຂອງວິນຍານຂອງທຸກໆຄົນທີ່ເຄີຍມີຊີວິດ ຫລື ຈະມີຊີວິດ.
ເພດເປັນເລື່ອງນິລັນດອນ. ກ່ອນເຮົາລົງມາເກີດຢູ່ເທິງໂລກນີ້, ເຮົາໄດ້ມີຊີວິດຢູ່ເປັນວິນຍານຊາຍ ຫລື ຍິງ ຢູ່ໃນທີ່ປະທັບຂອງພຣະເຈົ້າ.
ເຮົາຫາກໍໄດ້ຍິນກຸ່ມນັກຮ້ອງ ແທໂບແນໂກ ຮ້ອງເພງ “I Will Follow God’s Plan” ແປວ່າ ເຮົາຈະຕິດຕາມແຜນຂອງພຣະເຈົ້າ.”3 ນັ້ນແມ່ນແຜນທີ່ພຣະເຈົ້າໄດ້ສະຖາປະນາຂຶ້ນ ເພື່ອວ່າລູກໆທາງວິນຍານຂອງພຣະອົງທຸກຄົນ ຈະກ້າວໜ້າໄປສູ່ນິລັນດອນ. ແຜນນັ້ນແມ່ນຈຳເປັນຕໍ່ເຮົາແຕ່ລະຄົນ.
ພາຍໃຕ້ແຜນນັ້ນ, ພຣະເຈົ້າໄດ້ສ້າງແຜ່ນດິນໂລກນີ້ ໃຫ້ເປັນບ່ອນທີ່ລູກໆທີ່ຮັກທາງວິນຍານຂອງພຣະອົງ ຈະສາມາດລົງມາເກີດໃນຄວາມເປັນມະຕະ ແລະ ຮັບເອົາຮ່າງກາຍ ແລະ ມີໂອກາດສຳລັບຄວາມກ້າວໜ້ານິລັນດອນ ໂດຍການເລືອກເຮັດສິ່ງທີ່ຖືກຕ້ອງ.
ເພື່ອໃຫ້ມີຄວາມໝາຍ, ການເລືອກມະຕະນີ້ຕ້ອງຖືກເຮັດລະຫວ່າງພະລັງ ທີ່ຕ້ານທານກັນຂອງຄວາມດີ ແລະ ຄວາມຊົ່ວ. ຕ້ອງມີການກົງກັນຂ້າມ ແລະ, ສະນັ້ນ, ຜູ້ປໍລະປັກ, ຜູ້ທີ່ຖືກຂັບໄລ່ອອກໄປ ເພາະການກະບົດ, ຈຶ່ງໄດ້ຮັບອະນຸຍາດໃຫ້ລໍ້ລວງ, ແລະ ທົດລອງຜູ້ຄົນ ໂດຍການຊັກນຳເຂົາເຈົ້າໃຫ້ກະທຳກົງກັນຂ້າມກັບແຜນຂອງພຣະເຈົ້າ.
ຈຸດປະສົງຂອງແຜນຂອງພຣະເຈົ້າແມ່ນໃຫ້ໂອກາດແກ່ລູກໆຂອງພຣະອົງ ເພື່ອເລືອກຊີວິດນິລັນດອນ. ຈະສາມາດບັນລຸສິ່ງນີ້ໄດ້ ພຽງແຕ່ໂດຍປະສົບການມະຕະ ແລະ, ຫລັງຈາກຄວາມຕາຍ, ໂດຍຄວາມກ້າວໜ້າຫລັງຊີວິດມະຕະ ທີ່ບັນລຸຜົນສຳເລັດໃນໂລກວິນຍານເທົ່ານັ້ນ.
ໃນຊ່ວງຊີວິດມະຕະ, ເຮົາຈະເປິເປື້ອນໂດຍບາບ ເມື່ອເຮົາຍອມຕໍ່ການລໍ້ລວງ ທີ່ຊົ່ວຮ້າຍຂອງຜູ້ປໍລະປັກ, ແລະ ໃນທີ່ສຸດ ເຮົາຈະຕາຍ. ເຮົາໄດ້ຮັບວ່າການທ້າທາຍເຫລົ່ານັ້ນຈະເປັນພາກສ່ວນຂອງແຜນນັ້ນ, ໂດຍເພິ່ງອາໄສຄວາມແນ່ໃຈວ່າ ພຣະເຈົ້າອົງເປັນພຣະບິດາຂອງເຮົາ ຈະຈັດໃຫ້ມີພຣະຜູ້ຊ່ວຍໃຫ້ລອດ. ພຣະຜູ້ຊ່ວຍໃຫ້ລອດອົງນັ້ນ, ພຣະບຸດອົງດຽວທີ່ຖືກຳເນີດຂອງພຣະອົງ, ຈະກູ້ຊີວິດເຮົາ ໂດຍການຟື້ນຄືນຊີວິດ ໃຫ້ທຸກຄົນມີຊີວິດຫລັງຈາກຄວາມຕາຍ. ພຣະຜູ້ຊ່ວຍໃຫ້ລອດຈະຈັດໃຫ້ມີການຊົດໃຊ້ນຳອີກ ເພື່ອຈ່າຍຄ່າ ເພື່ອທຸກຄົນຈະສະອາດຈາກບາບ ອີງຕາມເງື່ອນໄຂທີ່ພຣະອົງໄດ້ຈັດໄວ້. ເງື່ອນໄຂເຫລົ່ານັ້ນແມ່ນຮ່ວມດ້ວຍສັດທາໃນພຣະຄຣິດ, ການກັບໃຈ, ການບັບຕິສະມາ, ຂອງປະທານແຫ່ງພຣະວິນຍານບໍລິສຸດ, ແລະ ພິທີການອື່ນໆ ທີ່ດຳເນີນການໂດຍສິດອຳນາດຂອງຖານະປະໂລຫິດ.
ແຜນແຫ່ງຄວາມສຸກທີ່ຍິ່ງໃຫຍ່ຂອງພຣະເຈົ້າຈັດໃຫ້ມີຄວາມດຸນດ່ຽງ ທີ່ສົມບູນແບບລະຫວ່າງຄວາມຍຸດຕິທຳ ແລະ ຄວາມເມດຕານິລັນດອນ ທີ່ເຮົາສາມາດໄດ້ຮັບຜ່ານທາງການຊົດໃຊ້ຂອງພຣະເຢຊູຄຣິດ. ມັນຍັງເຮັດໃຫ້ເຮົາສາມາດປ່ຽນແປງເປັນຄົນໃໝ່ໃນພຣະຄຣິດ.
ພຣະເຈົ້າທີ່ຊົງຮັກເອື້ອມອອກມາຫາເຮົາແຕ່ລະຄົນ. ເຮົາຮູ້ວ່າ ຜ່ານທາງຄວາມຮັກຂອງພຣະອົງ ແລະ ເພາະການຊົດໃຊ້ຂອງພຣະບຸດອົງດຽວທີ່ຖືກຳເນີດຂອງພຣະອົງ, “ທຸກຄົນຈະລອດໄດ້ໂດຍການເຊື່ອຟັງກົດ ແລະ ພິທີການຂອງພຣະກິດຕິຄຸນ [ຂອງພຣະອົງ]” (ຫລັກແຫ່ງຄວາມເຊື່ອ 1:3; ເນັ້ນຄຳເນີ້ງ).
ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ກໍເປັນທີ່ຮູ້ຈັກຢ່າງຖືກຕ້ອງວ່າ ເປັນສາດສະໜາຈັກທີ່ມີຄອບຄົວເປັນສູນກາງ. ແຕ່ສິ່ງທີ່ບໍ່ເຂົ້າໃຈກັນດີກໍຄືວ່າ ການມີຄອບຄົວເປັນສູນກາງຂອງເຮົານັ້ນ ບໍ່ໄດ້ເຈາະຈົງໃສ່ແຕ່ຄວາມສຳພັນໃນຊ່ວງມະຕະເທົ່ານັ້ນ. ຄວາມສຳພັນນິລັນດອນກໍສຳຄັນຕໍ່ຄວາມເຊື່ອທາງສາດສະໜາສາດຂອງເຮົາ. “ຄອບຄົວແມ່ນຖືກແຕ່ງຕັ້ງຂຶ້ນໂດຍພຣະເຈົ້າ.”4 ພາຍໃຕ້ແຜນອັນຍິ່ງໃຫຍ່ຂອງພຣະຜູ້ສ້າງທີ່ຊົງຮັກ, ພາລະກິດຂອງສາດສະໜາຈັກທີ່ຖືກຟື້ນຟູຂອງພຣະອົງ ແມ່ນທີ່ຈະຊ່ວຍລູກໆຂອງພຣະເຈົ້າ ໃຫ້ບັນລຸຄວາມສູງສົ່ງໃນອານາຈັກຊັ້ນສູງ ຈະສາມາດບັນລຸເຖິງພອນທີ່ສູງສົ່ງນີ້ໄດ້ ພຽງແຕ່ຜ່ານທາງການແຕ່ງງານນິລັນດອນ ລະຫວ່າງຊາຍ ແລະ ຍິງເທົ່ານັ້ນ (ເບິ່ງ Doctrine and Covenants 131:1–3). ພຣະຜູ້ເປັນເຈົ້າໄດ້ສອນເຮົາວ່າ “ເພດເປັນສິ່ງສຳຄັນຫລາຍ ຕໍ່ການຈຳແນກບອກໃຫ້ຮູ້ເຖິງບຸກຄະລິກລັກສະນະຂອງແຕ່ລະຄົນ ໃນໂລກກ່ອນເກີດ, ໃນໂລກນີ້, ແລະ ໃນນິລັນດອນ ແລະ ເຖິງຈຸດມຸ້ງໝາຍ” ແລະ ວ່າ “ການແຕ່ງງານລະຫວ່າງຊາຍ ແລະ ຍິງ ເປັນສິ່ງສຳຄັນຫລາຍຕໍ່ແຜນນິລັນດອນຂອງພຣະອົງ.”5
ໃນທີ່ສຸດ, ຄວາມຮັກຂອງພຣະເຈົ້າແມ່ນຍິ່ງໃຫຍ່ຫລາຍ, ຍົກເວັ້ນເສຍແຕ່ສຳລັບສ່ວນໜ້ອຍ ທີ່ຕັ້ງໃຈຈະກາຍເປັນບຸດແຫ່ງຄວາມຈິບຫາຍ, ພຣະອົງໄດ້ຈັດໃຫ້ມີຈຸດໝາຍປາຍທາງທີ່ຮຸ່ງໂລດສຳລັບລູກໆຂອງພຣະອົງທຸກຄົນ. “ລູກໆທຸກຄົນຂອງພຣະອົງ” ຮ່ວມທັງຜູ້ທີ່ໄດ້ເສຍຊີວິດແລ້ວ. ເຮົາເຮັດພິທີການເພື່ອເຂົາເຈົ້າ ໂດຍຜູ້ກະທຳແທນ ຢູ່ໃນພຣະວິຫານຂອງເຮົາ. ຈຸດປະສົງຂອງສາດສະໜາຈັກຂອງພຣະເຢຊູຄຣິດ ແມ່ນເຮັດໃຫ້ລູກໆຂອງພຣະອົງເໝາະສົມ ສຳລັບລັດສະໝີພາບລະດັບສູງສຸດ, ຊຶ່ງເປັນຄວາມສູງສົ່ງ ຫລື ຊີວິດນິລັນດອນ. ສຳລັບຜູ້ທີ່ບໍ່ປາດຖະໜາ ຫລື ບໍ່ເໝາະສົມ, ພຣະອົງກໍໄດ້ຈັດໃຫ້ມີລັດສະໝີພາບໃນອານາຈັກທີ່ຕ່ຳກວ່າ.
ຜູ້ໃດທີ່ເຂົ້າໃຈຄວາມຈິງນິລັນດອນເຫລົ່ານີ້ ກໍສາມາດເຂົ້າໃຈວ່າເປັນຫຍັງສະມາຊິກ ຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍຄິດດັ່ງທີ່ເຮົາຄິດ ແລະ ເຮັດດັ່ງທີ່ເຮົາເຮັດ.
III.
ບັດນີ້ຂ້າພະເຈົ້າຈະກ່າວເຖິງການນຳໃຊ້ຄວາມຈິງນິລັນດອນບາງຢ່າງເຫລົ່ານີ້, ທີ່ສາມາດເຂົ້າໃຈໄດ້ ພຽງແຕ່ໃນມຸມມອງຂອງແຜນຂອງພຣະເຈົ້າເທົ່ານັ້ນ.
ທຳອິດ, ເຮົາໃຫ້ກຽດອຳເພີໃຈສ່ວນຕົວ. ຫລາຍຄົນກໍຮັບຮູ້ຄວາມພະຍາຍາມອັນກວ້າງໄກຂອງສາດສະໜາຈັກ ທີ່ຈະສົ່ງເສີມອິດສະລະພາບທາງສາດສະໜາ ໃນສະຫະລັດ ແລະ ຕະຫລອດທົ່ວໂລກ. ຄວາມພະຍາຍາມເຫລົ່ານີ້ບໍ່ພຽງແຕ່ສົ່ງເສີມຜົນປະໂຫຍດຂອງເຮົາເທົ່ານັ້ນ, ແຕ່ອີງຕາມແຜນຂອງພຣະອົງ, ຍັງສະແແຫວງຫາທີ່ຈະຊ່ວຍເຫລືອໃຫ້ລູກໆ ຂອງພຣະອົງທຸກຄົນມີອິດສະລະພາບທີ່ຈະເລືອກ.
ທີສອງ, ເຮົາເປັນຜູ້ຄົນທີ່ເຜີຍແຜ່. ບາງເທື່ອເຮົາກໍຖືກຖາມວ່າ ເປັນຫຍັງເຮົາຈຶ່ງສົ່ງຜູ້ສອນສາດສະໜາອອກໄປຫາ ຫລາຍໆປະເທດ, ແມ່ນແຕ່ໃນທ່າມກາງປະຊາຊົນທີ່ເປັນຊາວຄຣິດ. ເຮົາໄດ້ຮັບຄຳຖາມອັນດຽວກັນນີ້ ວ່າເປັນຫຍັງເຮົາຈຶ່ງບໍລິຈາກຈຳນວນເງິນ ເປັນຫລາຍໆລ້ານໂດລາ ໃນໂຄງການມະນຸດສະທຳໃຫ້ຜູ້ຄົນທີ່ບໍ່ໄດ້ເປັນສະມາຊິກ ຂອງສາດສະໜາຈັກຂອງເຮົາ ແລະ ວ່າເປັນຫຍັງເຮົາຈຶ່ງບໍ່ເຊື່ອມໂຍງການຊ່ວຍເຫລືອນີ້ ເຂົ້າກັບວຽກງານການເຜີຍແຜ່ຂອງເຮົາ. ເຮົາເຮັດສິ່ງນີ້ ເພາະເຮົາຮັບຮູ້ວ່າມະນຸດທຸກຄົນເປັນລູກໆຂອງພຣະເຈົ້າ—ເປັນອ້າຍເອື້ອຍນ້ອງຂອງເຮົາ—ແລະ ເຮົາຢາກແບ່ງປັນຄວາມອຸດົມສົມບູນທາງວິນຍານ ແລະ ທາງໂລກຂອງເຮົາກັບທຸກໆຄົນ.
ທີສາມ, ຊີວິດມະຕະເປັນເລື່ອງສັກສິດຕໍ່ເຮົາ. ຄຳໝັ້ນສັນຍາຂອງເຮົາຕໍ່ແຜນຂອງພຣະເຈົ້າ ຮຽກຮ້ອງໃຫ້ເຮົາຕໍ່ຕ້ານການແທ້ງລູກ ແລະ ການຕັດຊີວິດຄົນ.
ທີສີ່, ບາງຄົນກໍມີບັນຫານຳພາກປະຕິບັດຂອງສາດສະໜາຈັກ ກ່ຽວກັບການແຕ່ງງານ ແລະ ເດັກນ້ອຍ. ຄວາມຮູ້ຂອງເຮົາເຖິງແຜນ ທີ່ຖືກເປີດເຜີຍຂອງພຣະເຈົ້າເຖິງຄວາມລອດ ເຮັດໃຫ້ເຮົາຕໍ່ຕ້ານແນວໂນ້ມໃນປະຈຸບັນຂອງການເມືອງ, ກົດໝາຍ, ແລະ ຄວາມກົດດັນຂອງສັງຄົມ ເພື່ອການປ່ຽນແປງຕໍ່ການແຕ່ງງານຕາມປະເພນີ ແລະ ການປ່ຽນແປງທີ່ເຮັດໃຫ້ສັບສົນ ຫລື ປ່ຽນແປງເພດ ເຮັດໃຫ້ຄວາມແຕກຕ່າງລະຫວ່າງຊາຍ ແລະ ຍິງເປັນແບບດຽວກັນ. ເຮົາຮູ້ວ່າຄວາມສຳພັນ, ເອກະລັກ, ແລະ ໜ້າທີ່ຂອງຊາຍ ແລະ ຍິງແມ່ນຈຳເປັນ ເພື່ອຈະສຳເລັດແຜນອັນຍິ່ງໃຫຍ່ຂອງພຣະເຈົ້າ.
ທີຫ້າ, ເຮົາຍັງມີທັດສະນະທີ່ແຕກຕ່າງກ່ຽວກັບເດັກນ້ອຍນຳອີກ. ເຮົາຖືວ່າການມີ ແລະ ການລ້ຽງດູລູກໆເປັນພາກສ່ວນຂອງແຜນຂອງພຣະເຈົ້າ, ເປັນໜ້າທີ່ ທີ່ໜ້າຊື່ນຊົມ ແລະ ສັກສິດ ສຳລັບຜູ້ທີ່ໄດ້ຮັບອຳນາດທີ່ຈະມີ ສ່ວນຮ່ວມໃນວຽກງານນັ້ນ. ໃນມຸມມອງຂອງເຮົາ, ຊັບສົມບັດທີ່ມີຄ່າທີ່ສຸດຢູ່ເທິງໂລກ ແລະ ໃນສະຫວັນແມ່ນລູກໆ ແລະ ລູກຫລານຂອງເຮົາ. ສະນັ້ນ, ເຮົາຕ້ອງສິດສອນ ແລະ ຕໍ່ສູ້ເພື່ອຫລັກທຳ ແລະ ພາກປະຕິບັດທີ່ໃຫ້ມີບັນຍາກາດທີ່ດີທີ່ສຸດສຳລັບການພັດທະນາ ແລະ ຄວາມສຸກຂອງເດັກນ້ອຍ—ເດັກນ້ອຍທຸກໆຄົນ.
ສຸດທ້າຍ, ເຮົາເປັນລູກໆທີ່ຮັກຂອງພຣະບິດາເທິງສະຫວັນ, ອົງທີ່ໄດ້ສິດສອນເຮົາວ່າ ຄວາມເປັນຊາຍ ແລະ ຍິງ, ການແຕ່ງງານລະຫວ່າງຊາຍ ແລະ ຍິງ, ແລະ ການມີ ແລະ ການລ້ຽງດູລູກໆ ແມ່ນຈຳເປັນຕໍ່ແຜນແຫ່ງຄວາມສຸກ ອັນຍິ່ງໃຫຍ່ຂອງພຣະອົງ. ສະຖານະຂອງເຮົາກ່ຽວກັບຫລັກທຳເຫລົ່ານີ້ ກໍມັກຈະກໍ່ໃຫ້ເກີດການກົງກັນຂ້າມ ໃຫ້ແກ່ສາດສະໜາຈັກເລື້ອຍໆ. ເຮົາຖືວ່ານີ້ເປັນສິ່ງທີ່ຫລີກລ້ຽງບໍ່ໄດ້. ການກົງກັນຂ້າມເປັນພາກສ່ວນຂອງແຜນນັ້ນ, ແລະ ເປັນການກົງກັນຂ້າມທີ່ແຮງກ້າຂອງຊາຕານ ທີ່ເຈາະຈົງໃສ່ສິ່ງໃດກໍຕາມ ທີ່ສຳຄັນທີ່ສຸດຕໍ່ແຜນຂອງພຣະເຈົ້າ. ມານສະແຫວງຫາທີ່ຈະທຳລາຍວຽກງານຂອງພຣະເຈົ້າ. ວິທີທີ່ສຳຄັນທີ່ສຸດຂອງມັນ ແມ່ນທີ່ຈະເຮັດໃຫ້ເສຍຄວາມເຊື່ອຖືພຣະຜູ້ຊ່ວຍໃຫ້ລອດ ແລະ ສິດອຳນາດແຫ່ງສະຫວັນຂອງພຣະອົງ, ທີ່ຈະລຶບລ້າງຜົນສະທ້ອນຂອງການຊົດໃຊ້ ຂອງພຣະເຢຊູຄຣິດ, ບໍ່ສົ່ງເສີມການກັບໃຈ, ປອມແປງການເປີດເຜີຍ, ແລະ ຂັດແຍ້ງຄວາມຮັບຜິດຊອບຂອງສ່ວນບຸກຄົນ. ມັນຍັງສະແຫວງຫາທີ່ຈະເຮັດໃຫ້ເພດສັບສົນ, ບິດເບືອນການແຕ່ງງານ, ແລະ ຂັດຂວາງການມີລູກ—ໂດຍສະເພາະ ໂດຍພໍ່ແມ່ທີ່ຈະລ້ຽງດູລູກໆຢູ່ໃນຄວາມຈິງ.
IV.
ວຽກງານຂອງພຣະຜູ້ເປັນເຈົ້າຈະກ້າວໄປໜ້າ ເຖິງແມ່ນວ່າຈະມີການກົງກັນຂ້າມທີ່ຈັດຂຶ້ນ ແລະ ບໍ່ລົດລະ ທີ່ຕໍ່ຕ້ານເຮົາ ຂະນະທີ່ເຮົາພະຍາຍາມຈະດຳລົງຊີວິດ ຕາມຄຳສອນຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍກໍຕາມ. ສຳລັບຜູ້ທີ່ຕົກຢູ່ພາຍໃຕ້ການກົງກັນຂ້າມນັ້ນ, ຂ້າພະເຈົ້າຂໍສະເໜີຄຳແນະນຳສາມຂໍ້.
ຂໍໃຫ້ຈື່ຈຳຫລັກທຳແຫ່ງການກັບໃຈ ທີ່ເຮັດໃຫ້ເປັນໄປໄດ້ ໂດຍອຳນາດທີ່ບໍ່ມີຫຍັງເທົ່າທຽມຂອງການຊົດໃຊ້ຂອງພຣະເຢຊູຄຣິດ. ດັ່ງທີ່ ແອວເດີ ນຽວ ເອ ແມ໊ກສະແວວ ໄດ້ກ່າວຊຸກຍູ້ວ່າ, ຢ່າຢູ່ໃນບັນດາ “ຜູ້ຄົນທີ່ພະຍາຍາມຈະປ່ຽນແປງສາດສະໜາຈັກ ແທນທີ່ຈະປ່ຽນແປງຕົນເອງ.6
ດັ່ງທີ່ ແອວເດີ ແຈັບຟະຣີ ອາ ຮໍແລນ ໄດ້ກ່າວຊຸກຍູ້ວ່າ:
“ໃຫ້ຢຶດໝັ້ນຢູ່ກັບສິ່ງທີ່ທ່ານຮູ້ຢູ່ແລ້ວ ແລະ ຢືນຢູ່ຢ່າງໝັ້ນຄົງຈົນກວ່າຄວາມຮູ້ເພີ່ມເຕີມຈະມາເຖິງ. …
“… ໃນສາດສະໜາຈັກນີ້, ສິ່ງທີ່ເຮົາຮູ້ຈະເອົາຊະນະສິ່ງທີ່ເຮົາບໍ່ຮູ້ສະເໝີ.” 7
ໃຫ້ໃຊ້ສັດທາໃນອົງພຣະເຢຊູຄຣິດເຈົ້າ, ຊຶ່ງເປັນຫລັກທຳຢ່າງທຳອິດ ຂອງພຣະກິດຕິຄຸນ.
ສຸດທ້າຍ, ໃຫ້ສະແຫວງຫາຄວາມຊ່ວຍເຫລືອ. ເຮົາມີຜູ້ນຳທີ່ຮັກທ່ານ ແລະ ສະແຫວງຫາການຊີ້ນຳທາງວິນຍານ ເພື່ອຊ່ວຍເຫລືອທ່ານ. ເຮົາມີແຫລ່ງຊ່ວຍເຫລືອຫລາຍຢ່າງ ດັ່ງທີ່ທ່ານຈະພົບເຫັນຜ່ານທາງ LDS.org ແລະ ແຫລ່ງສະໜັບສະໜູນອື່ນໆ ສຳລັບການສຶກສາພຣະກິດຕິຄຸນ ຢູ່ທີ່ບ້ານ. ເຮົາກໍມີອ້າຍເອື້ອຍນ້ອງຜູ້ປະຕິບັດສາດສະໜາກິດ ທີ່ຖືກເອີ້ນໃຫ້ມາໃຫ້ຄວາມຊ່ວຍເຫລືອດ້ວຍຄວາມຮັກນຳອີກ.
ພຣະບິດາເທິງສະຫວັນທີ່ຊົງຮັກຂອງເຮົາ ປະສົງໃຫ້ລູກໆຂອງພຣະອົງມີຄວາມສຸກ ຊຶ່ງເປັນຈຸດປະສົງຂອງການສ້າງເຮົາຂຶ້ນມາ. ຈຸດໝາຍປາຍທາງແຫ່ງຄວາມສຸກຂອງລູກໆຂອງພຣະເຈົ້າຄືຊີວິດນິລັນດອນ, ຊຶ່ງເຮົາສາມາດບັນລຸໄດ້ ໂດຍການກ້າວໄປໜ້າຢ່າງໝັ້ນຄົງ ຕາມເສັ້ນທາງທີ່ສາດສະດາຂອງເຮົາ, ປະທານຣະໂຊ ເອັມ ແນວສັນ, ມັກຈະເອີ້ນວ່າ “ເສັ້ນທາງແຫ່ງພັນທະສັນຍາ.” ນີ້ຄືສິ່ງທີ່ເພິ່ນໄດ້ກ່າວໃນຂ່າວສານຄັ້ງທຳອິດໃນຖານະປະທານຂອງສາດສະໜາຈັກວ່າ: ຈົ່ງຢູ່ໃນເສັ້ນທາງແຫ່ງພັນທະສັນຍາ. ຄວາມຕັ້ງໃຈຂອງທ່ານ ທີ່ຈະເຮັດຕາມພຣະຜູ້ຊ່ວຍໃຫ້ລອດ ໂດຍການເຮັດພັນທະສັນຍານຳພຣະອົງ ແລະ ແລ້ວຮັກສາພັນທະສັນຍາເຫລົ່ານັ້ນ ຈະເປີດປະຕູຮັບເອົາພອນທຸກປະການທາງວິນຍານ ແລະ ຮັບເອົາສິດທິພິເສດ ທີ່ມີໃຫ້ຊາຍ, ຍິງ, ແລະ ເດັກນ້ອຍ ໃນທຸກແຫ່ງຫົນ.”8
ຂ້າພະເຈົ້າເປັນພະຍານຢ່າງໜັກແໜ້ນວ່າ ສິ່ງທີ່ຂ້າພະເຈົ້າກ່າວໄປນັ້ນ ເປັນຄວາມຈິງ, ແລະ ມັນຖືກເຮັດໃຫ້ເປັນໄປໄດ້ ໂດຍຄຳສອນ ແລະ ການຊົດໃຊ້ຂອງພຣະເຢຊູຄຣິດ, ຜູ້ໄດ້ເຮັດໃຫ້ທັງໝົດເປັນໄປໄດ້ ພາຍໃຕ້ແຜນອັນຍິ່ງໃຫຍ່ຂອງພຣະເຈົ້າ, ພຣະບິດານິລັນດອນຂອງເຮົາ. ໃນພຣະນາມຂອງພຣະເຢຊູຄຣິດ, ອາແມນ.