ສະຕີ ແລະ ການຮຽນຮູ້ພຣະກິດຕິຄຸນຢູ່ໃນບ້ານເຮືອນ
ພຣະຜູ້ຊ່ວຍໃຫ້ລອດເປັນຕົວຢ່າງທີ່ສົມບູນແບບຂອງທ່ານວ່າ ທ່ານຈະມີບົດບາດທີ່ສຳຄັນອັນໃດ ໃນການກ້າວໄປໃຫ້ຄວາມເອົາໃຈໃສ່ຫລາຍຂຶ້ນ ເລື່ອງການຮຽນຮູ້ພຣະກິດຕິຄຸນຢູ່ໃນບ້ານເຮືອນ.
ເອື້ອຍນ້ອງທີ່ຮັກແພງຂອງຂ້າພະເຈົ້າ, ນີ້ຊ່າງເປັນໂອກາດທີ່ປະເສີດທີ່ໄດ້ມາຊຸມນຸມກັບທ່ານ. ນີ້ກໍເປັນວັນເວລາທີ່ຕື່ນເຕັ້ນໃນສາດສະໜາຈັກຂອງພະເຢຊູຄິດແຫ່ງໄພ່ພົນຍຸກສຸດທ້າຍ. ພຣະຜູ້ເປັນເຈົ້າກຳລັງຖອກເທຄວາມຮູ້ລົງມາເທິງສາດສະໜາຈັກຂອງພຣະອົງ ດັ່ງທີ່ພຣະອົງໄດ້ສັນຍາ.
ທ່ານກໍຈຳສິ່ງທີ່ພຣະອົງໄດ້ກ່າວ ວ່າ ອີກດົນນານປານໃດທີ່ຜືນນ້ຳທີ່ໄຫລລ່ອງຈະຍັງບໍ່ບໍລິສຸດ? ອຳນາດໃດທີ່ຈະຢັບຢັ້ງສະຫວັນ? ດັ່ງມະນຸດຈະເດ່ແຂນອັນບອບບາງຂອງເຂົາ ອອກໄປຢຸດແມ່ນ້ຳມີເຊີຣີ ບໍ່ໃຫ້ໄຫລໄປຕາມທິດທາງຂອງມັນ, ຫລື ເຮັດໃຫ້ມັນໄຫລຢ້ອນກັບໄປບໍ່ໄດ້ສັນໃດ, ກໍຈະບໍ່ສາມາດຂັດຂວາງພຣະຜູ້ຊົງລິດອຳນາດຍິ່ງໃຫຍ່ ໃຫ້ຖອກເທຄວາມຮູ້ຈາກສະຫວັນລົງມາເທິງຫົວ ຂອງໄພ່ພົນຍຸກສຸດທ້າຍບໍ່ໄດ້ສັນນັ້ນ.1
ພາກສ່ວນຂອງການແບ່ງປັນຄວາມຮູ້ຂອງພຣະຜູ້ເປັນເຈົ້າໃນເວລານີ້ ກ່ຽວຂ້ອງກັບການເລັ່ງການຖອກເທຄວາມຈິງນິລັນດອນ ຂອງພຣະອົງນັ້ນລົງມາເທິງຫົວ ແລະ ເຂົ້າໄປໃນຫົວໃຈຂອງຜູ້ຄົນຂອງພຣະອົງ. ພຣະອົງໄດ້ເຮັດໃຫ້ແຈ່ມແຈ້ງວ່າ ທິດາຂອງພຣະບິດາເທິງສະຫວັນ ຈະມີບົດບາດຕົ້ນຕໍໃນການເລັ່ງທີ່ອັດສະຈັນນັ້ນ. ຫລັກຖານໜຶ່ງເຖິງສິ່ງມະຫັດສະຈັນນັ້ນ ຄືການນຳພາສາດສະດາທີ່ມີຊີວິດຢູ່ຂອງພຣະອົງ ໃຫ້ເນັ້ນໜັກຫລາຍຂຶ້ນ ເຖິງການສິດສອນພຣະກິດຕິຄຸນຢູ່ໃນບ້ານເຮືອນ ແລະ ພາຍໃນຄອບຄົວ.
ທ່ານອາດຖາມວ່າ, “ພຣະອົງຈະເຮັດໃຫ້ເອື້ອຍນ້ອງຜູ້ຊື່ສັດເປັນພະລັງຕົ້ນຕໍ ເພື່ອຊ່ວຍພຣະຜູ້ເປັນເຈົ້າຖອກເທຄວາມຮູ້ນັ້ນລົງມາ ເທິງໄພ່ພົນຂອງພຣະອົງແນວໃດ?” ພຣະຜູ້ເປັນເຈົ້າໄດ້ໃຫ້ຄຳຕອບຢູ່ໃນໜັງສື “ຄອບຄົວ: ການປະກາດຕໍ່ໂລກ.” ທ່ານຈຳພຣະຄຳເຫລົ່ານັ້ນ, ແຕ່ທ່ານອາດຈະເຫັນຄວາມໝາຍໃໝ່ ແລະ ຮັບຮູ້ວ່າພຣະຜູ້ເປັນເຈົ້າໄດ້ເຫັນການປ່ຽນແປງທີ່ຕື່ນເຕັ້ນນີ້ລ່ວງໜ້າແລ້ວ, ຊຶ່ງຕອນນີ້ກຳລັງເກີດຂຶ້ນຢູ່. ຢູ່ໃນການປະກາດນັ້ນ, ພຣະອົງໄດ້ມອບໝາຍໃຫ້ບັນດາເອື້ອຍນ້ອງ ເປັນຄູສອນຫລັກທຳພຣະກິດຕິຄຸນຢູ່ໃນຄອບຄົວ ດ້ວຍພຣະຄຳເຫລົ່ານີ້ ວ່າ: “ແມ່ມີໜ້າທີ່ຮັບຜິດຊອບຕົ້ນຕໍທີ່ຈະລ້ຽງດູ ລູກເຕົ້າຂອງຕົນ.”2 ນີ້ກໍຮ່ວມດ້ວຍການບຳລຸງລ້ຽງຄວາມຈິງ ແລະ ຄວາມຮູ້ຂອງພຣະກິດຕິຄຸນ.
ການປະກາດກ່າວຕໍ່ໄປ ວ່າ: “ພໍ່ແມ່ຕ້ອງໄດ້ຊ່ວຍກັນແລະກັນ ແລະ ເປັນຫຸ້ນສ່ວນທີ່ເທົ່າທຽມກັນ.”3 ເຂົາເຈົ້າເປັນຫຸ້ນສ່ວນທີ່ເທົ່າທຽມກັນ, ເທົ່າທຽມກັນໃນສັກກະຍະພາບຂອງເຂົາເຈົ້າ ສຳລັບການເຕີບໂຕທາງວິນຍານ ແລະ ສຳລັບການສະແຫວງຫາຄວາມຮູ້, ແລະ ເຂົາເຈົ້າກໍປຸ້ມລຸມກັນໂດຍການຊ່ວຍເຫລືອກັນແລະກັນ. ເຂົາເຈົ້າເປັນຫຸ້ນສ່ວນທີ່ເທົ່າທຽມກັນ ໃນຈຸດໝາຍປາຍທາງແຫ່ງສະຫວັນຂອງເຂົາເຈົ້າ ທີ່ຈະຖືກເຮັດໃຫ້ສູງສົ່ງນຳກັນ. ຕາມຈິງແລ້ວ, ຊາຍ ແລະ ຍິງຈະຖືກເຮັດໃຫ້ສູງສົ່ງບໍ່ໄດ້ຕາມລຳພັງ.
ແລ້ວ, ເປັນຫຍັງ, ທິດາຂອງພຣະເຈົ້າ ທີ່ຢູ່ໃນຄວາມສຳພັນ ທີ່ເປັນໜຶ່ງດຽວ ແລະ ເທົ່າທຽມກັນ ຈຶ່ງໄດ້ຮັບໜ້າທີ່ຮັບຜິດຊອບຕົ້ນຕໍ ໃຫ້ບຳລຸງລ້ຽງດ້ວຍໂພສະນາການທີ່ສຳຄັນທີ່ສຸດ ທີ່ທຸກຄົນຕ້ອງໄດ້ຮັບ, ເຊັ່ນ ຄວາມຮູ້ແຫ່ງຄວາມຈິງທີ່ມາຈາກສະຫວັນ? ຕາມທີ່ຂ້າພະເຈົ້າເຂົ້າໃຈໄດ້, ນັ້ນເປັນວິທີທາງຂອງພຣະຜູ້ເປັນເຈົ້າ ນັບຕັ້ງແຕ່ຄອບຄົວໄດ້ຖືກສ້າງຂຶ້ນຢູ່ເທິງໂລກນີ້.
ຍົກຕົວຢ່າງ, ເອວາໄດ້ເປັນຜູ້ທີ່ໄດ້ຮັບຄວາມຮູ້ວ່າ ອາດາມຕ້ອງກິນໝາກໄມ້ ຈາກຕົ້ນໄມ້ແຫ່ງຄວາມຮູ້ ເພື່ອວ່າເຂົາເຈົ້າຈະໄດ້ຮັກສາພຣະບັນຍັດທຸກຂໍ້ ຂອງພຣະເຈົ້າ ແລະ ຈັດຕັ້ງຄອບຄົວ. ຂ້າພະເຈົ້າບໍ່ຮູ້ວ່າເປັນຫຍັງ ເອວາຈຶ່ງຮູ້ກ່ອນ, ແຕ່ອາດາມ ແລະ ເອວາ ໄດ້ເປັນນ້ຳໜຶ່ງໃຈດຽວກັນ ເມື່ອຄວາມຮູ້ນັ້ນຖືກຖອກເທລົງມາເທິງອາດາມ.
ອີກຕົວຢ່າງໜຶ່ງເຖິງການໃຊ້ຂອງປະທານແຫ່ງການບຳລຸງລ້ຽງຂອງສະຕີ ຄືວິທີທີ່ພຣະອົງເສີມຄວາມເຂັ້ມແຂງໃຫ້ແກ່ພວກລູກຊາຍຂອງຮີລາມັນ. ຂ້າພະເຈົ້າຕື້ນຕັນໃຈເມື່ອຂ້າພະເຈົ້າໄດ້ອ່ານເລື່ອງລາວນີ້ ແລະ ກໍຈື່ຈຳຖ້ອຍຄຳທີ່ໃຫ້ຄວາມໝັ້ນໃຈງຽບໆຂອງແມ່ຂອງຂ້າພະເຈົ້າເອງ ຕອນຂ້າພະເຈົ້າໄດ້ອອກຈາກບ້ານໄປຮັບໃຊ້ເປັນທະຫານ.
ຮີລາມັນໄດ້ບັນທຶກໄວ້ວ່າ:
“ພວກເຂົາໄດ້ຮັບການສິດສອນຈາກແມ່ຂອງພວກເຂົາ, ວ່າຖ້າຫາກພວກເຂົາບໍ່ສົງໃສ, ແລ້ວພຣະເຈົ້າຈະປົດປ່ອຍພວກເຂົາ.
“ແລະ ພວກເຂົາໄດ້ທົບທວນຄຳເວົ້າຂອງແມ່ຂອງພວກເຂົາກັບຂ້າພະເຈົ້າ, ໂດຍກ່າວວ່າ: ພວກເຮົາບໍ່ສົງໃສເລີຍວ່າ ແມ່ຂອງພວກເຮົາຮູ້ຈັກເລື່ອງນີ້.”4
ເຖິງແມ່ນວ່າຂ້າພະເຈົ້າຈະບໍ່ຮູ້ເຫດຜົນທັງໝົດຂອງພຣະຜູ້ເປັນເຈົ້າ ທີ່ໄດ້ມອບໜ້າທີ່ຮັບຜິດຊອບຕົ້ນຕໍ ສຳລັບການບຳລຸງລ້ຽງໃນຄອບຄົວ ໃຫ້ແກ່ບັນດາເອື້ອຍນ້ອງຜູ້ຊື່ສັດ, ແຕ່ຂ້າພະເຈົ້າເຊື່ອວ່າມັນຕ້ອງກ່ຽວຂ້ອງກັບ ຄວາມສາມາດຂອງທ່ານທີ່ຈະຮັກ. ມັນຕ້ອງໃຊ້ຄວາມຮັກທີ່ຍິ່ງໃຫຍ່ ທີ່ຈະຮູ້ສຶກເຖິງຄວາມຕ້ອງການຂອງຄົນອື່ນ ຫລາຍໄປກວ່າຄວາມຕ້ອງການຂອງຕົນເອງ. ນັ້ນຄືຄວາມຮັກອັນບໍລິສຸດຂອງພຣະຄຣິດ ທີ່ມີໃຫ້ແກ່ຜູ້ທີ່ທ່ານບຳລຸງລ້ຽງ. ຄວາມຮູ້ສຶກຂອງຄວາມໃຈບຸນນັ້ນມາຈາກຜູ້ຄົນທີ່ຖືກເລືອກໃຫ້ເປັນຜູ້ບຳລຸງລ້ຽງ ທີ່ເໝາະສົມສຳລັບຜົນສະທ້ອນຂອງການຊົດໃຊ້ຂອງພຣະເຢຊູຄຣິດ. ຄຳຂວັນຂອງສະມາຄົມສະຕິສົງເຄາະ, ຊຶ່ງແມ່ຂອງຂ້າພະເຈົ້າເອງໄດ້ເປັນຕົວຢ່າງທີ່ດີ, ສຳລັບຂ້າພະເຈົ້າແລ້ວແມ່ນຖືກດົນໃຈແນ່ວ່າ: “ຄວາມໃຈບຸນດຳລົງຢູ່ຕະຫລອດ.”
ໃນຖານະທິດາຂອງພຣະເຈົ້າ, ທ່ານມີຄວາມສາມາດຕາມທຳມະຊາດ ແລະ ຍິ່ງໃຫຍ່ ທີ່ຈະຮູ້ສຶກເຖິງຄວາມຕ້ອງການຂອງຄົນອື່ນ ແລະ ທີ່ຈະຮັກ. ສິ່ງນັ້ນແຫລະ, ທີ່ເຮັດໃຫ້ທ່ານສາມາດໄດ້ຮັບຮູ້ສຽງກະຊິບຈາກພຣະວິນຍານ. ແລ້ວພຣະວິນຍານນັ້ນກໍສາມາດນຳພາສິ່ງທີ່ທ່ານຄິດ, ສິ່ງທີ່ທ່ານກ່າວອອກ, ແລະ ສິ່ງທີ່ທ່ານເຮັດ ເພື່ອບຳລຸງລ້ຽງຜູ້ຄົນ ເພື່ອວ່າພຣະຜູ້ເປັນເຈົ້າອາດຈະຖອກເທຄວາມຮູ້, ຄວາມຈິງ, ແລະ ຄວາມກ້າຫານລົງມາເທິງເຂົາເຈົ້າ.
ເອື້ອຍນ້ອງທັງຫລາຍທີ່ກຳລັງໄດ້ຍິນສຽງຂອງຂ້າພະເຈົ້າຢູ່ດຽວນີ້ ກໍຢູ່ໃນຈຸດພິເສດຂອງການເດີນທາງຂອງທ່ານຜ່ານຊີວິດນີ້. ບາງຄົນກໍເປັນເດັກຍິງນ້ອຍໃນພາກປະຊຸມສະຕີສາມັນເປັນເທື່ອທຳອິດ. ບາງຄົນກໍເປັນຍິງໜຸ່ມທີ່ກຳລັງຕຽມທີ່ຈະເປັນຜູ້ບຳລຸງລ້ຽງ ທີ່ພຣະເຈົ້າປະສົງໃຫ້ພວກເຈົ້າເປັນ. ບາງຄົນກໍຫາກໍແຕ່ງງານທີ່ຍັງບໍ່ທັນມີລູກ; ແລະ ບາງຄົນກໍເປັນແມ່ໜຸ່ມສາວທີ່ມີລູກໜຶ່ງ ຫລື ສອງຄົນ. ບາງຄົນກໍເປັນແມ່ຂອງໄວລຸ້ນ ແລະ ບາງຄົນກໍມີລູກທີ່ຢູ່ໃນສະໜາມເຜີຍແຜ່. ບາງຄົນກໍມີລູກທີ່ອ່ອນແອໃນສັດທາ ແລະ ຢູ່ໄກຈາກບ້ານ. ບາງຄົນກໍອາໄສຢູ່ຄົນດຽວໂດຍບໍ່ມີຄູ່ຄອງທີ່ຊື່ສັດ. ບາງຄົນກໍເປັນແມ່ຕູ້.
ແຕ່, ບໍ່ວ່າສະຖານະການສ່ວນຕົວຂອງທ່ານຈະເປັນແບບໃດກໍຕາມ, ທ່ານເປັນພາກສ່ວນ—ພາກສ່ວນທີ່ສຳຄັນ—ຂອງຄອບຄົວຂອງພຣະເຈົ້າ ແລະ ຄອບຄົວຂອງທ່ານເອງ, ບໍ່ວ່າຈະເປັນໃນອະນາຄົດ, ໃນໂລກນີ້, ຫລື ໃນໂລກວິນຍານ. ຄວາມໄວ້ວາງໃຈຂອງທ່ານຈາກພຣະເຈົ້າ ແມ່ນໃຫ້ບຳລຸງລ້ຽງສະມາຊິກ ໃນຄອບຄົວຂອງພຣະເຈົ້າ ແລະ ຂອງທ່ານ ຫລາຍເທົ່າທີ່ທ່ານສາມາດເຮັດໄດ້ ດ້ວຍຄວາມຮັກ ແລະ ສັດທາຂອງທ່ານ ທີ່ມີໃນອົງພຣະເຢຊູຄຣິດເຈົ້າ.
ການທ້າທາຍທົ່ວໄປຂອງທ່ານກໍຄື ທີ່ຈະຮູ້ວ່າຈະບຳລຸງລ້ຽງໃຜ, ໂດຍວິທີໃດ, ແລະ ເມື່ອໃດ. ທ່ານຕ້ອງການຄວາມຊ່ວຍເຫລືອຈາກພຣະຜູ້ເປັນເຈົ້າ. ພຣະອົງຮູ້ຫົວໃຈຂອງຄົນອື່ນ, ແລະ ພຣະອົງຮູ້ເມື່ອໃດເຂົາເຈົ້າພ້ອມທີ່ຈະຮັບເອົາການບຳລຸງລ້ຽງຈາກທ່ານ. ການອະທິຖານດ້ວຍສັດທາຂອງທ່ານຈະເປັນສິ່ງຈຳເປັນຕໍ່ຄວາມສຳເລັດຜົນ. ທ່ານສາມາດເພິ່ງອາໄສ ທີ່ຈະໄດ້ຮັບການຊີ້ນຳຈາກພຣະອົງ.
ພຣະອົງໄດ້ໃຫ້ກຳລັງໃຈນີ້ວ່າ ໃຫ້ເຮົາທູນຂໍພຣະບິດາໃນພຣະນາມຂອງພຣະອົງ, ໃນສັດທາໂດຍເຊື່ອວ່າເຮົາຈະໄດ້ຮັບ, ແລະ ເຮົາຈະມີພຣະວິນຍານບໍລິສຸດສະຖິດຢູ່ນຳ, ຊຶ່ງສະແດງທຸກສິ່ງທີ່ສົມຄວນໃຫ້ປະຈັກ.5
ນອກເໜືອໄປຈາກການອະທິຖານ, ການສຶກສາພຣະຄຳພີທີ່ຈິງຈັງ ກໍຈະເປັນພາກສ່ວນຂອງພະລັງທີ່ເຕີບໂຕຂອງທ່ານ ທີ່ຈະບຳລຸງລ້ຽງ. ນີ້ຄືຄຳສັນຍາວ່າ ທັງບໍ່ໃຫ້ເຮົາຄິດລ່ວງໜ້າວ່າເຮົາຈະກ່າວຫຍັງ; ແຕ່ໃຫ້ສະສົມຖ້ອຍຄຳແຫ່ງຊີວິດໄວ້ໃນຈິດໃຈຂອງເຮົາເລື້ອຍໄປ, ແລະ ມັນຈະຖືກມອບໃຫ້ແກ່ເຮົາໃນຊົ່ວໂມງນັ້ນເອງ ສ່ວນທີ່ຈະຜອງໃຫ້ແກ່ມະນຸດທຸກຄົນ.6
ສະນັ້ນທ່ານຈະໃຊ້ເວລາອະທິຖານ, ໄຕ່ຕອງ, ແລະ ພິຈາລະນາຫລາຍຂຶ້ນ ເຖິງເລື່ອງທີ່ເປັນທາງຝ່າຍວິນຍານ. ທ່ານຈະໄດ້ຮັບຄວາມຮູ້ຂອງຄວາມຈິງ ທີ່ຖືກຖອກເທລົງມາເທິງທ່ານ ແລະ ເຕີບໂຕໃນພະລັງຂອງທ່ານ ທີ່ຈະບຳລຸງລ້ຽງຄົນອື່ນໆຢູ່ໃນຄອບຄົວຂອງທ່ານ.
ຈະມີຊ່ວງເວລາເມື່ອທ່ານຈະຮູ້ສຶກວ່າ ຄວາມກ້າວໜ້າຂອງທ່ານ ໃນການຮຽນຮູ້ວິທີທີ່ຈະບຳລຸງລ້ຽງນັ້ນຊ້າແດ່. ມັນຈະຕ້ອງໃຊ້ສັດທາເພື່ອຈະອົດທົນ. ພຣະຜູ້ຊ່ວຍໃຫ້ລອດໄດ້ສົ່ງພຣະຄຳທີ່ໃຫ້ກຳລັງໃຈນີ້ມາໃຫ້ທ່ານວ່າ:
ບໍ່ໃຫ້ທ່ານເມື່ອຍລ້າໃນການເຮັດວຽກງານດີ, ເພາະທ່ານພວມວາງຮາກຖານຂອງວຽກງານອັນຍິ່ງໃຫຍ່. ແລະ ຈາກສິ່ງເລັກນ້ອຍ ສິ່ງຍິ່ງໃຫຍ່ຈະເກີດຂຶ້ນ.
ພຣະຜູ້ເປັນເຈົ້າຮຽກຮ້ອງຫົວໃຈ ແລະ ຈິດໃຈທີ່ເຕັມໃຈ; ແລະ ຄົນທີ່ເຕັມໃຈ ແລະ ເຊື່ອຟັງ ຈະໄດ້ຢູ່ດີກິນດີຢູ່ໃນແຜ່ນດິນຊີໂອນ ໃນວັນເວລາສຸດທ້າຍນີ້.7
ການທີ່ທ່ານມາຮ່ວມກອງປະຊຸມໃນຄ່ຳຄືນນີ້ ກໍເປັນຫລັກຖານວ່າ ທ່ານເຕັມໃຈທີ່ຈະຍອມຮັບເອົາຄຳເຊື້ອເຊີນ ຂອງພຣະຜູ້ເປັນເຈົ້າທີ່ຈະບຳລຸງລ້ຽງຄົນອື່ນ. ນັ້ນເປັນຄວາມຈິງແມ່ນແຕ່ສຳລັບຄົນທີ່ມີອາຍຸນ້ອຍທີ່ສຸດ ຢູ່ທີ່ກອງປະຊຸມໃນຄ່ຳຄືນນີ້. ທ່ານສາມາດຮູ້ໄດ້ວ່າຈະບຳລຸງລ້ຽງໃຜແດ່ໃນຄອບຄົວຂອງທ່ານ. ຖ້າຫາກທ່ານອະທິຖານດ້ວຍເຈດຕະນາອັນແທ້ຈິງ, ຊື່ ຫລື ໃບໜ້າ ຂອງບາງຄົນຈະເຂົ້າມາໃນຈິດໃຈຂອງທ່ານ. ຖ້າຫາກທ່ານອະທິຖານເພື່ອຈະຮູ້ວ່າຈະເຮັດຫຍັງ ຫລື ຈະເວົ້າຫຍັງ, ທ່ານຈະຮູ້ສຶກເຖິງຄຳຕອບ. ແຕ່ລະເທື່ອທີ່ທ່ານເຊື່ອຟັງ, ພະລັງຂອງທ່ານທີ່ຈະບຳລຸງລ້ຽງຈະເຕີບໂຕຂຶ້ນ. ທ່ານຈະຖືກຕຽມພ້ອມສຳລັບວັນເວລາ ທີ່ທ່ານຈະບຳລຸງລ້ຽງລູກໆຂອງທ່ານເອງ.
ແມ່ທີ່ມີລູກເປັນໄວລຸ້ນ ສາມາດອະທິຖານເພື່ອຈະຮູ້ວ່າ ຈະບຳລຸງລ້ຽງລູກຊາຍ ຫລື ລູກສາວ ຜູ້ທີ່ເບິ່ງຄືວ່າບໍ່ມີການຕອບຮັບຕໍ່ການບຳລຸງລ້ຽງເລີຍ. ທ່ານອາດອະທິຖານເພື່ອຈະຮູ້ວ່າ ໃຜຈະມີອິດທິພົນທາງວິນຍານ ຕໍ່ຄວາມຕ້ອງການຂອງລູກຂອງທ່ານ ແລະ ຜູ້ໃດທີ່ລູກຈະຍອມຮັບ. ພຣະເຈົ້າໄດ້ຍິນ ແລະ ຕອບຄຳອະທິຖານທີ່ຈິງໃຈຂອງແມ່ຜູ້ທີ່ເປັນຫ່ວງ, ແລະ ພຣະອົງຈະສົ່ງຄວາມຊ່ວຍເຫລືອມາໃຫ້.
ພ້ອມນີ້, ຜູ້ເປັນແມ່ຕູ້ທີ່ມາຮ່ວມໃນຄ່ຳຄືນນີ້ ອາດຮູ້ສຶກເຈັບປວດໃຈ ທີ່ເກີດຈາກຄວາມຍາກລຳບາກຂອງລູກໆ ແລະ ຫລານໆຂອງນາງ. ທ່ານອາດຈະຮັບເອົາຄວາມກ້າຫານ ແລະ ການຊີ້ນຳຈາກປະສົບການຂອງຄອບຄົວ ທີ່ຢູ່ໃນພຣະຄຳພີ.
ນັບຕັ້ງແຕ່ວັນເວລາຂອງເອວາ ແລະ ອາດາມ, ຜ່ານບິດາຂອງເຊື້ອສາຍອິດສະຣາເອນ, ແລະ ຈົນເຖິງທຸກໆຄອບຄົວໃນພຣະຄຳພີມໍມອນ, ກໍມີບົດຮຽນບົດໜຶ່ງທີ່ແນ່ນອນ ກ່ຽວກັບວິທີທີ່ຈະເຮັດກັບລູກຜູ້ທີ່ບໍ່ຕອບຮັບ ຄື: ຢ່າເຊົາຮັກ.
ເຮົາມີຕົວຢ່າງທີ່ໃຫ້ກຳລັງໃຈຈາກພຣະຜູ້ຊ່ວຍໃຫ້ລອດ ຂະນະທີ່ພຣະອົງໄດ້ບຳລຸງລ້ຽງລູກໆທາງວິນຍານ ທີ່ກະບົດຂອງພຣະບິດາເທິງສະຫວັນຂອງພຣະອົງ. ແມ່ນແຕ່ເມື່ອພວກເຂົາ ແລະ ເຮົາກໍ່ໃຫ້ເກີດຄວາມເຈັບປວດ, ແຕ່ພຣະຫັດຂອງພຣະຜູ້ຊ່ວຍໃຫ້ລອດກໍຍັງຍື່ນອອກມາຢູ່.8 ພຣະອົງໄດ້ກ່າວຢູ່ໃນ 3 ນີໄຟ ເຖິງບັນດານ້ອງສາວ ແລະ ນ້ອງຊາຍທາງວິນຍານຂອງພຣະອົງ, ຜູ້ທີ່ພຣະອົງໄດ້ພະຍາຍາມທີ່ຈະບຳລຸງລ້ຽງ ແຕ່ບໍ່ສຳເລັດຜົນ ວ່າ: “ໂອ້ ເຈົ້າ … ຜູ້ເປັນເຊື້ອສາຍອິດສະຣາເອນ, ຈັກເທື່ອແລ້ວທີ່ເຮົາໄດ້ເຕົ້າໂຮມເຈົ້າ ຄືກັນກັບແມ່ໄກ່ເຕົ້າໂຮມລູກຂອງມັນ ໄວ້ໃຕ້ປີກຂອງມັນ, ແລະ ບຳລຸງລ້ຽງເຈົ້າ.”9
ສຳລັບເອື້ອຍນ້ອງທີ່ຢູ່ໃນທຸກໆຂັ້ນຕອນໃນການເດີນທາງແຫ່ງຊີວິດນີ້, ໃນສະພາບການທຸກໆຢ່າງຂອງຄອບຄົວ, ແລະ ຕະຫລອດທົ່ວທຸກໆວັດທະນະທຳ, ພຣະຜູ້ຊ່ວຍໃຫ້ລອດເປັນຕົວຢ່າງທີ່ສົມບູນແບບຂອງທ່ານວ່າ ທ່ານຈະມີບົດບາດທີ່ສຳຄັນອັນໃດ ໃນການກ້າວໄປໃຫ້ຄວາມເອົາໃຈໃສ່ຫລາຍຂຶ້ນ ເລື່ອງການຮຽນຮູ້ພຣະກິດຕິຄຸນຢູ່ໃນບ້ານເຮືອນ ແລະ ຄອບຄົວ.
ທ່ານຈະນຳເອົາຄວາມຮູ້ສຶກຂອງການມີຄວາມໃຈບຸນເຂົ້າສູ່ການປ່ຽນແປງໃນກິດຈະກຳ ແລະ ການປະຕິບັດຕ່າງໆໃນຄອບຄົວຂອງທ່ານ. ສິ່ງນັ້ນຈະນຳຄວາມເຕີບໂຕທີ່ຍິ່ງໃຫຍ່ທາງວິນຍານມາໃຫ້. ເມື່ອທ່ານອະທິຖານນຳຄອບຄົວ ແລະ ເພື່ອສະມາຊິກໃນຄອບຄົວ, ທ່ານຈະຮູ້ສຶກເຖິງຄວາມຮັກຂອງທ່ານ ແລະ ຂອງພຣະຜູ້ຊ່ວຍໃຫ້ລອດທີ່ມີໃຫ້ເຂົາເຈົ້າ. ສິ່ງນັ້ນຈະກາຍເປັນຂອງປະທານທາງວິນຍານຂອງທ່ານ ນັບມື້ນັບຫລາຍຂຶ້ນ ຂະນະທີ່ທ່ານສະແຫວງຫາມັນ. ສະມາຊິກໃນຄອບຄົວຂອງທ່ານຈະຮູ້ສຶກເຖິງມັນ ຂະນະທີ່ທ່ານອະທິຖານດ້ວຍສັດທາຫລາຍຂຶ້ນ.
ເມື່ອຄອບຄົວເຕົ້າໂຮມກັນເພື່ອອ່ານພຣະຄຳພີອອກສຽງ, ທ່ານຈະໄດ້ອ່ານ ແລະ ອະທິຖານເຖິງຂໍ້ພຣະຄຳພີເຫລົ່ານັ້ນແລ້ວ ເພື່ອຕຽມຕົວທ່ານເອງ. ທ່ານຈະພົບເຫັນເວລາທີ່ຈະອະທິຖານ ເພື່ອທູນຂໍໃຫ້ພຣະວິນຍານ ເຮັດໃຫ້ຈິດໃຈຂອງທ່ານຮູ້ແຈ້ງຂຶ້ນ. ແລ້ວ, ເມື່ອເຖິງຜຽນຂອງທ່ານທີ່ຈະອ່ານ, ສະມາຊິກໃນຄອບຄົວກໍຈະຮູ້ສຶກເຖິງຄວາມຮັກ ທີ່ທ່ານມີໃຫ້ແດ່ພຣະເຈົ້າ ແລະ ພຣະຄຳຂອງພຣະອົງ. ເຂົາເຈົ້າຈະໄດ້ຮັບການບຳລຸງລ້ຽງໂດຍພຣະອົງ ແລະ ໂດຍພຣະວິນຍານຂອງພຣະອົງ.
ການຖອກເທລົງມາອັນດຽວກັນນັ້ນກໍສາມາດເຂົ້າມາໃນການເຕົ້າໂຮມຂອງຄອບຄົວໄດ້ ຖ້າຫາກທ່ານອະທິຖານ ແລະ ວາງແຜນສຳລັບສິ່ງນັ້ນ. ອາດຕ້ອງໃຊ້ຄວາມພະຍາຍາມ ແລະ ເວລາ, ແຕ່ມັນຈະນຳສິ່ງມະຫັດສະຈັນມາໃຫ້. ຂ້າພະເຈົ້າຈຳບົດຮຽນບົດໜຶ່ງທີ່ແມ່ຂອງຂ້າພະເຈົ້າໄດ້ສອນຕອນຂ້າພະເຈົ້າຍັງນ້ອຍ. ຂ້າພະເຈົ້າຍັງສາມາດເຫັນໃນຄວາມນຶກຄິດໄດ້ ເຖິງແຜນທີ່ ທີ່ເປັນສີ ທີ່ແມ່ໄດ້ເຮັດ ເຖິງການເດີນທາງຂອງອັກຄະສາວົກໂປໂລ. ຂ້າພະເຈົ້າບໍ່ຮູ້ວ່າ ເພິ່ນເອົາເວລາ ແລະ ເຫື່ອແຮງມາແຕ່ໃສ່ ມາເຮັດສິ່ງນັ້ນ. ແລະ ຈົນເຖິງມື້ນີ້ ຂ້າພະເຈົ້າໄດ້ຮັບພອນໂດຍຄວາມຮັກ ທີ່ເພິ່ນມີຕໍ່ອັກຄະສາວົກທີ່ຊື່ສັດຄົນນັ້ນ.
ທ່ານແຕ່ລະຄົນຈະພົບເຫັນວິທີທາງ ທີ່ຈະມີພາກສ່ວນຕໍ່ການຖອກເທ ຄວາມຈິງ ລົງມາເທິງຄອບຄົວຂອງທ່ານ ຢູ່ໃນສາດສະໜາຈັກທີ່ຖືກຟື້ນຟູ ຂອງພຣະຜູ້ເປັນເຈົ້າ. ທ່ານແຕ່ລະຄົນຈະອະທິຖານ, ສຶກສາ, ແລະ ໄຕ່ຕອງ ເພື່ອຈະຮູ້ວ່າສ່ວນບໍລິຈາກພິເສດຂອງທ່ານຈະເປັນອັນໃດ. ແຕ່ຂ້າພະເຈົ້າຮູ້ວ່າ: ທ່ານແຕ່ລະຄົນ, ເທົ່າທຽມກັນກັບບຸດທັງຫລາຍຂອງພຣະເຈົ້າ, ຈະເປັນພາກສ່ວນທີ່ສຳຄັນຂອງສິ່ງມະຫັດສະຈັນຂອງການຮຽນຮູ້ ແລະ ການດຳລົງຊີວິດຕາມພຣະກິດຕິຄຸນ ທີ່ຈະເລັ່ງການເຕົ້າໂຮມອິດສະຣາເອນ ແລະ ຈະຕຽມຄອບຄົວຂອງພຣະເຈົ້າສຳລັບການສະເດັດມາ ອັນຮຸ່ງໂລດຂອງອົງພຣະເຢຊູຄຣິດເຈົ້າ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.