Na Tawamamau Vakalou
Na tawamamau vakalou e rawa ni tosoi keda meda cakacaka ena vakabauta, muria na veisureti ni iVakabula meda caka vinaka, ka solia ena yalomalumalu na noda bula vei Koya.
Niu a se qai tekivu vuli , keimami dau taubale ki vale ena dua na sala buluti ka veigoleyaki e yasa ni dua na delana. E dua tale na sala, sega ni bulu, e vakatokai na “sala ni gonetagane.” Na sala ni gonetagane e salatu ena qele ka cabeta vakadodonu na delana. E lekaleka ia e icabecabe levu sara. Niu se goneyalewa lailai, au kila niu lakova rawa na sala cava ga era rawata na gonetagane. E bibi cake, au kila niu sa bula tiko ena veisiga e muri kau na gadrevi meu cakava na veika dredre, vakai ira na painia—kau vinakata meu tu vakarau. Koya gona ena veigauna eso, au dau vakalutulutu e dakudra noqu ilala mai na sala buluti, luvata noqu ivava, ka cabeta e yavaqu na sala ni gonetagane. Au via vakaukauwataka tiko na qeteqete ni yavaqu.
Niu a se goneyalewa ni Lalai, oya na ka au nanuma meu cakava meu vakarau kina. Nikua sa duatani na noqu kila! Me duatani mai na cabe salatu e delana ena yavaqu, au sa kila niu rawa ni vakarautaka na yavaqu me lako ena salatu ena yavalati mai na veisureti ni Yalo Tabu. Ni na Turaga, mai vua Nona parofita, esa kacivi keda yadua meda bula ka kauwai ena “sala cere ka tabu cake” ka me “kalawa cere cake.”1
Na kaci eso vakaparofita oqo meda yavala, ka sema vata kei na kila e yaloda ni da rawa ni cakava ka levu cake, e dau bulia vagauna e lomada na ka a vakatoka o Elder Neal A. Maxwell na “tawamamau vakalou.”2 Na tawamamau vakalou e yaco ni da vakatautauvatataka “na ka sa ikeda ki na ka sa tu vei keda na kaukauwa me da yacova.”3 Oi keda yadua, kevaka eda dina, ena tawani na maliwa o tu kina ka da kila o cei o ikeda, evei kei na ka eda vinakata me da yacova. Eda tagica na rawaka yadua e uasivi cake. Eda na vakila tiko na ka oqo baleta ni da luvena yalewa kei na tagane ni Kalou, sucu ena Rarama i Karisito ia ka bula tiko ena dua na vuravura tawasavasava. Eda na vakila ni oqo nai isolisoli va-Kalou ka solia na gu ni yalo ni vakaitavi.
E dodonu meda ciqoma ka vakila na tawamamau vakalou ka uqeti keda ki na sala cecere, ia meda raica ka levea na ivadi i Setani—koya dau veivakayalolailaitaki. Sa ikoya oqo na vanua talei ka na marautaka ko Setani me lade yani kina. E rawa meda digia ka lako ena sala cecere cake ka muataki keda meda vakasaqara na Kalou kei na Nona vakacegu kei na loloma soliwale, se meda vakarorogo vei Setani, ka bololaki keda ena vei itukutuku ka sega ni taucoko: rawa ka vakarauta, maqosa vakarauta, lagilagi vakarauta, dua ga na ka sa rauta. Na noda tawamamau e rawa ni yaco me vakalou—se veivakarusai.
Cakacaka ena Vakabauta
E dua na sala eda rawa ni kila kina na tawamamau vakalou mai na ivadi i Setani ni tawamamau vakalou e muataki keda ki na cakacaka yalodina. Na tawamamau vakalou e sega ni veisureti me tiko ga ena noda toba maravu, ka sega talega ni muataki keda ki na taqaya. Au sa vulica na gauna au vakaciriciri voli kina ena vakanananu ni veika kece ga e sega ni koi au, au sega ni dau toso ki liu, kau dau kunea ni dredre cake meu vakila ka muria na Yalo.4
Ni se cauravou, a vakila vakalevu o Josefa Simici na nona malumalumu eso ka leqataka na “veika bibi me baleta na [nona] bula vakayalo.” Ena nona vosa, “au sa lomaleqa sara vakalevu, baleta niu sa kila na noqu cala, ka …ka luvuci au na rarawa ena vuku ni noqu ivalavala ca ka vakakina ena ivalavalaca ni vuravura.”5 Oqo e muataki koya me “vakasama sara vakatitobu ka veilecayaki vakalevu.”6 E rogo matau beka na ka oqo? O dau sega ni logaloga vinaka se rarawataka beka nomu malumalumu?
Io, ko Josefa e cakava e dua na ka. E wasea, “au sa dau kaya vakavuqa e lomaqu: A cava beka me caka?”7 E yavala ena vakabauta o Josefa. E vuki ki na ivolanikalou, wilika na veisureti ena Jemesa 1:5, ka vuki vua na Kalou me vukei. Na raivotu ka qai yaco e udu mai kina na Vakalesuitale. A ka levu na noqu vakavinavinaka ena nona tawamamau vakalou o Josefa, na nona gauna ni kida kei na veilecayaki e biligi koya ki na cakacaka yalodina.
Muria na Veivakayarayarataki mo Caka Vinaka
E dau vakayagataka wasoma ko vuravura na tawamamau me iulubale ni nanumi-koya ga, na vuki ki loma ni vakanananu ka ki muri ka duri duadua ena ko cei koi Au, ko cei ka sega ni koi Au, kei na ka Au vinakata. Na tawamamau vakalou e yavalati keda meda muria na ivakaraitaki ni iVakabula, “ka a lako voli ka dau caka vinaka.”8 Ni da lako tu ena salatu ni tisaipeli, eda ciqoma na veibiligi vakayalo me tarai ira yani na tani.
E dua na italanoa kau rogoca ena vica na yabaki sa oti a vukei au meu kila ka yavala ena veivakayarayarataki ni Yalo Tabu. E wasea o Sister Bonnie Parkin, na Peresitedi Raraba ni iSoqosoqo ni Veivukei vakacegu na ka oqo:
“O Susan … e dua na dauculacula totoka. O Peresitedi [Spencer W.] Kimball e tiko ena [nona] tabanalevu. Ena dua na Sigatabu, a raica o Susan ni dua nona sutu vou. Ko tamana e qai kauta ga mai …eso na isulu silika vakasakiti. E nanuma ko Susan ni rawa ni caka mai na isulu oya e dua na neke tai totoka me lako vata nona sutu vou o Peresitedi Kimball. Ena Moniti a cakava sara okoya na neke tai. E ologa ena pepa malumu ka taubale cake ki na vale nei Peresitedi Kimball.
“Nona gole voleka yani ki matanikatuba, e vakasauri nona tuvakadua ka vakanananu, ‘Ko cei mada koi au meu mai cakava e dua nona neke tai na parofita? Ena rairai levu tu beka na nona.’ Sa nanuma ni a cala na ka e a cakava, ea tu vuki me lesu.
“E na gauna vata oya a dolava na katuba o Sister Kimball ka kaya mai, ‘Oe, Susan!’
“Ni veirikayaki ena veilecayaki, e kaya yani o Susan, ‘Au a raici Peresitedi Kimball ena nona sutu vou ena Sigatabu. E se qai kauta ga mai ko tamaqu eso na sulu silika mai Niu Yoka … kau mani cakava mai e dua nona neke tai.’
“Ni se bera ni vakuria o Susan, a tarovi koya o Sister Kimball, taura na tabana ruarua, ka kaya: ‘Susan, kua ni dau tarova na vakanananu lomasoli.’”9
Au taleitaka o ya! “Kua ni dau tarova na vakanananu lomasoli.” So na gauna ni dau yaco mai na vakanananu meu cakava e dua na ka vua e dua, au dau veinanuyaka ni veivakayarayarataki se noqu nanuma ga. Ia kau vakananumi, “Ia raica, sa veisureti ka veivakayarayarataki tikoga ki na vinaka na veika sa mai vua na Kalou; a sa uqeti mai vua na Kalou na veika kecega sa sureta ka vakayayarataka na tamata me ra caka vinaka ka lomana na Kalou ka qaravi koya.”10
Ke ra veivakayarayarataki vakadodonu se vakila ga me veivuke, na cakacaka vinaka e sega ni lutucala; ni “sa sega ni mudu na loloma”11—ka sega ni vakatulewa cala.
E vakawasoma ni dau gauna cala, ka vakavudua meda kila na revurevu ni noda cakacaka lailai ni veiqaravi. Ia ena gauna lalai eso, eda na kila ni da sa iyaragi ena liga ni Turaga ka da na vakavinavinaka ni kila ni na Yalo Tabu ka cakacaka tiko vei keda e ivakatakilakila ni veivakadonui ni Kalou.
Kemuni na taciqu, koi kemuni kei au e rawa ni da kerea na Yalo Tabu me vakaraitaka vei keda “na veika kece me da kitaka,”12 dina mada ni kena irairai ni sa sinai tu na ka meda cakava. Ni da vakayarayarataki, e rawa ni da biuta tu na veleti ena siqi se initaneti sinai ena bolebole ka tagica noda vakanamata me rawa ni da wiliwili vua e dua na gone, siko itokani, mei gone vei wekamu, se veiqaravi e valetabu. Kua ni tauri au cala—au dau tuva matautaka na ka, au taleitaka niu toqa laivi na ka eso. Ia e dau yaco mai na vakacegu ena kila ni kemu levu e sega sara ni tautauvata kei na cakacaka vaka levu. Niu yavalati ki na tawamamau ka lewa meu muria na veivakayarayarataki e veisautaka na ivalavala ni noqu vakanananu baleta “noqu gauna,” kei na noqu raici ira na tamata, sega ni ra vakaosooso, ia era inaki ni noqu bula.
Na Tawamamau Vakalou e Tuberi Keda vei Karisito
Na tawamamau vakalou e tuberi keda ki na yalomalua, ka sega kina na lomalomani koya se na yalolailai ka lako mai na veivakatautauvatataki ka da dau lailai sobu ga kina. Na marama maroroi-veiyalayalati e tu ena duidui lelevu kei na ibulibuli; nodra matavuvale, nodra ka sotavi ni bula, kei na duidui ituvaki.
E dina, eda na lutu koso kece mai na noda iyacoyaco vakalou, ka tu eso na dina ena kilaka ni da tuduadua eda sega ni yaga. Ia na itukutuku vinaka ni kosipeli ni ena loloma soliwale ni Kalou, eda qai yaga. Ena kaukauwa i Karisito, eda na rawata na ka kecega.13 Sa yalataka na ivolanikalou ni da na “lomani talega ka vukei ena gauna e yaga kina.”14
Na dina veivakurabuitaki oya ni noda malumalumu eso e rawa ni veivakalougatataki ni lokumi keda ka vukici keda vei Karisito.15 Na tawamamau e yaco me vakalou ni da toro ena yalomalua vei Jisu Karisito kei na noda gagadre, ka sega ni tu suka ni lomalomani keda.
E dina, ni cakacakamana i Jisu e tekivu vakalevu ena kena kilai na lailai, gagadre, guce, se tawayaga. Nanuma na ibulimadrai kei na ika? O ira yadua na dauvola Kosipeli era tukuna ni a veivakani mana o Jisu vei ira na udolu ka ra muri Koya.16 Ia na italanoa e tekivu mai na nodra kila na tisaipeli na nodra takiveiyaga; ni ra kidava ni tu ga vei ira e “lima na ibuli madrai parile, ka rua na ika: ia ka yaga vakacava oqo vei ira na lewe vuqa vakaoqo?”17 Eratou donu na tisaipeli: e sega ni tu vei iratou na kakana veirauti, ia eratou solia na ka e tu vei iratou vei Jisu ka vakarautaka na cakamana O Koya.
O sa bau vakila ni nomu taledi kei na isolisoli e rui lailai ki na itavi e matamu? Au vakakina. Ia ko iko kei au e rawa ni daru solia na ka e tu vei kedaru vei Karisito, ia Ko Koya ena vakalevutaka na nodaru igu. Na ka o rawa ni solia e levu cake mai na ka e veirauti—ke tu mada ga na malai vakayago kei na malumalumu—ke o vakararavi ki na loloma soliwale ni Kalou.
Na dina ni koi keda yadua eda yawa me dua na itabatamata mai na iTutuvakalou—eda luvena yadua na Kalou.18 Ni sa cakava oti O Koya vei ira na parofita kei na tamata wale kei na marama ena veiyabaki sa sivi, e nakita vakakina na Tamada Vakalomalagi me veisautaki keda.
E vakamacalataka o C. S. Lewis na kaukauwa me veisautaka ena sala oqo: “Mo vakananumataka ni o iko me dua na vale e bula tiko. Sa qai lako mai na Kalou me taravou tale na vale. Ni se qai tekivu, ko na rawa beka ni kila na ka e via cakava O Koya. Sa vakavinakataka mai na sala ni wai, ka tarova na turu ni wai mai na delavuvu ni vale, kei na so tale na ka, ka o kila vinaka tu o iko ni cakacaka oqo a dodonu ga me caka ka sega ni o kurabui kina. Ia, oqo sa tekivu me tukituki mai na veiyasana kece ni vale ka sa vaka e momosi sara vei iko. … [Mo raica,] E sa tara tiko o Koya e dua tani sara na vale mai na ka o nanuma tiko. … Ko a nanuma ni ko na tara [tiko] me dua na vale lailai toka ga ka rairai vinaka, ia o Koya e vinakata me tara e dua na valenitui. E nakita me lako mai ka mai bula tiko kina o Koya.”19
Me baleta na isoro veivakaduavatataki ni noda iVakabula, eda sa rawa ni buli me veiraurau kei na cakacaka ka tu e matada. Era sa vakatavulica na parofita, ni da cabeta na salatu vakatisaipeli, e rawa ni da vakasavasavataki mai na loloma soliwale nei Karisito. Na tawamamau vakalou e rawa ni tosoi keda meda cakacaka ena vakabauta, muria na veisureti ni iVakabula meda caka vinaka, ka solia ena yalomalumalu na noda bula vei Koya. Ena yaca i Jisu Karisito, emeni.