Mai Rogoca na Domona e dua na Parofita

Mai vei Bisopi Dean M. Davies

iMatai ni Daunivakasala ena Matabisopi Veiliutaki

Kevaka eda vaqaqacotaka ki na noda bula na ivakarau ni rogoca ka muria na domo ni parofita bula, eda na tamusuka na veivakalougatataki tawamudu yalataki.

Ni vosa tiko baleta na Peresitedi ni Lotu i Jisu Karisito ni Yalododonu Edaidai, na Turaga e a kacivaka:

“Ka dua tale, na itavi ni Peresitedi ni itutu ni Matabete Levu sai koya me vakatulewa me baleta na lotu taucoko, ka me vakataki Mosese—

“… Io, me daurairai, dauvakatakila, dauvakavakadewa, ka parofita, ka tu vua na isolisoli kece ni Kalou ka solia vua na iliuliu ni lotu” (Vunau kei na Veiyalayalati 107:91–92; vakamatatataki).

Au sa vakalougatataki ni’u vakadinadinataka e so na isolisoli ni Kalou kivei ira Nona parofita. E rawa niu wasea mada edua na ka tabu au a sotava vaka oya kei kemuni? Ni bera ni’u kacivi ki na noqu itutu oqo, au a veivuke ena raici kei na tokoni ni vei vanua-digitaki ni vei valetabu mai muri. Sa qarauni matua sara na takosovi ni iyalavavanua kei Amerika ni oti na 11 ni Sepiteba, 2001. E vakavuna me, taura e rua ki na tolu na auwa vei ira e vuqa na lewenilotu me takoso mai Vancouver, Kenada, ena ilakolako ki na Valetabu e Seattle Washington. A vakatura o Peresitedi Gordon B. Hinckley, ka a Peresitedi ni Lotu ena gauna oya, ni dua na valetabu e Vancouver ena vakalougatataki ira na lewe ni Lotu. A vakadonui edua na vakasaqaqara vanua, ka oti na neitou vakadikeva eso na vanua taukena na Lotu, e a laurai talega eso tale na vanua-digitaki e Vancouver ka sega ni taukena na Lotu.

E laurai edua na vanua-digitaki totoka ka toka ena iwasewase-vakalotu veitikivi kei na Trans-Canadian Highway. E vanua maqosa na kena sala, ka teivaki ena vei vuni-paini totoka ni Kenada, ka toka vinaka sara ka rawa ni laurai votu ki na udolu na daukau motoka era veilakoyaki.

Keitou a kauta cake na vanua-digitaki kei na iyaloyalo kei na mape ki na bose vakavula ni Komiti ni Vanua-digitaki ni Valetabu. E a vakadonuya o Peresitedi Hinckley me keitou biuta vaka konitaraki ka vakacavara na vakadidike e ganita. Ena Tiseba ni yabaki oya, keitou ripotetaka lesu ki na komiti ni sa vakacavari na vakadidike, ka keitou a vakasaqara na veivakadonui me sa qaravi yani na kena voli. Ni rogoca oti na neitou ripote, e a kaya o Peresitedi Hinckley, “Au vakila ni dodonu me’u raica na vanua-digitaki oqo.”

Ena mua ni vula oya, rua na siga ni oti na Siganisucu, keitou gole ki Vancouver kei Peresitedi Hinckley; Peresitedi Thomas S. Monson; kei Bill Williams, edua na daudroini valetabu. E a sotavi keitou mai o Paul Christensen, na peresitedi ni iteki e kea, ka kauti keitou ki na vanua-digitaki. E a suasua vakalailai ka kabukabu ena siga oya, ia o Peresitedi Hinckley e a lade ga mai na motoka ka tekivu taubaletaka wavoki na vanua-digitaki.

Ni oti edua na gauna e kea, au tarogi Peresitedi Hinckley ke via raica okoya eso tale na vanua-digitaki ka a sa vakasamataki tu. E kaya okoya io, ena taleitaka oya. Mo ni kila, na raici ni vei vanua-digitaki tale eso, keitou a rawa kina ni veidutaitaka na nodra ivakarau talei.

Keitou a wavokiti Vancouver vakarivirivi ka vakaraica na vei vanua tale eso, ka yaco lesu tale yani ki na itekivu ni vanua-digitaki. A kaya o Peresitedi Hinckley, “Oqo edua na vanua-digitaki totoka.” E a qai taroga okoya, “E rawa ni tou lako ki na valenisoqoni ni Lotu rauta ni dua-na-ikava na maile (0.4 km) mai ke?”

“E rawa saraga, Peresitedi,” keitou a sauma yani.

Keitou vodo tale ena motoka ka draiva yani ki na valenilotu voleka. Ena neitou yaco yani ki na valenilotu, e a kaya o Peresitedi Hinckley, “Gole ena imawi eke.” Keitou a gole ka muria na gaunisala me vaka sa vakaroti. A sa tekivu cabe vakalailai na gaunisala.

Ni qai yaco ga na motoka ena ulu ni delana, a kaya o Peresitedi Hinckley, “Kele na motoka, kele na motoka.” E a qai dusi yani okoya ki na imatau ki na dua na tiki ni qele ka kaya, “Vakacava na vanua oqo? Oqo na vanua me toka kina na valetabu. Oqo na vanua e vinakata na Turaga me toka kina na valetabu. Dou taura rawa li?” Dou taura rawa li?”

Keitou a se sega mada ni raica na vanua oqo. E a tiko sara e loma ka toka tani mai na gaunisala levu, ka sega ni volitaki tiko. Ena neitou sauma yani ni keitou sega ni kila, e a dusi o Peresitedi Hinckley ki na vanua oya ka kaya tale, “Oqo na vanua me toka kina na valetabu.” Keitou a tiko me vica na miniti ka qai gole ki na iroro-ni-waqavuka ena ilakolako lesu.

Na siga ka tarava, keirau a kacivi kei Brother Williams kina valenivolavola nei Peresitedi Hinckley. E a sa droinitaka tu okoya na ka kece ena dua na tiki ni pepa: na veigaunisala, na valenilotu, gole ena imawi eke,na xe toqa na vanua ni valetabu. E a taroga okoya na cava keirau sa kunea rawa. Keirau a tukuna vua ni a digitaka okoya edua na vanua dredre dina. Eratou taukena e lewe tolu na tamata: dua mai Kenada, dua mai Idia, ka dua mai Jaina! Ka sega ni tiko ena vanua iwasewase-vakalotu.

“Ia, cakava na nomu maqosa taucoko,” e a kaya okoya.

Sa qai yaco na caka mana. Ena loma ni vica na vula keitou sa taukena na vanua oya, ka emuri na siti o Langley, British Columbia, a solia na veivakadonui me tara na valetabu.

iVakatakilakila

Valetabu e Vancouver British Columbia

Ni vakasamataki na ka oqo, au yalomalua ni’u qai kila ni dina ga e tu vei Brother Williams kei au na kilaka vakavuli ka vakacakacaka ena veivoli qele kei na droinitaki valetabu, o Peresitedi Hinckley e a sega ni vulica oya; ia e tu vua edua na ka cecere cake sara: na isolisoli ni raivotu vakaparofita. E a raica rawa okoya na vanua me duri kina na valetabu ni Kalou.

Ni vakaroti ira na Yalododonu eliu ena itabagauna oqo na Turaga mera tara edua na valetabu, e a vakaraitaka oKoya:

“Ia me tara e dua na vale me noqu me vaka na kena ivakarau au na vakatakila vei iratou.

“Ia kevaka era na sega ni tara na noqu tamata me vaka na ivakarau ka’u na vakatakila … , au na sega ni ciqoma mai ligadra” (Vunau kei na Veiyalayalati 115:14–15).

Me vakai ira na Yalododonu eliu, sa vakataki keda edaidai: na Turaga e a sa vakatakila ka tomana tiko me vakatakila vua na Peresitedi ni Lotu na ivakarau me dusimaki kina na matanitu ni Kalou ena noda siga. Ka, vei keda yadua, e vakarautaka okoya na veidusimaki ki na ivakarau e dodonu meda dui bulataka, me rawa ni ciqoma talega na noda ivakarau na Turaga.

Ena Epereli 2013 au a vosa baleta na veisasaga ena kena vakarautaki na yavu ni vei valetabu me rawa ni vorata na vei cava kei na draki rerevaki ena sotavi. Ia na yavu esa itekitekivu walega. Edua na valetabu e tara mai na vuqa na buloko ni vale, ka cokoti vata me vaka na ivakarau ni kena droinitaki taumada. Me yaco na noda bula me vale ni Kalou ni da sa tara yadua tiko me vaka e a vakatavulica na Turaga (raica na 1 Korinica 3:16–17), eda na rawa ni tarogi keda, “Na buloko ni vale cava me da tuvana me rawa ni cakava na noda bula me totoka, vakaturaga, ka veivorati ki na vei cava ni vuravura?”

Eda rawa ni kunea na isau ni taro oqo ena iVola i Momani. Me baleta na iVola i Momani, e a kaya na parofita ko Josefa Simici: “Au a tukuna vei ira na veitacini ni iVola i Momani e ivola dodonu duadua e vuravura, ka vatu ivakadei ni noda lotu, ka na toro voleka cake vua na Kalou e dua na tamata ena nona muria na kena ivakavuvuli mai na dua tale na ivola.” (ai vakamacala taumada ni iVola i Momani). Ena ivakamacala taumada ni iVola i Momani, eda vulica ni “o ira era rawata na ivakadinadina vakalou mai vua na Yalo Tabu [ni iVola i Momani e vosa ni Kalou] era na kila talega ena kaukauwa vata oqori ni sa iVakabula kei vuravura ko Jisu Karisito, ni o Josefa Simici sa Nona dauvakatakila [ka parofita ni Vakalesuitale], kei na Lotu i Jisu Karisito Ni Yalododonu Edaidai, sai koya na nona matanitu na Turaga, ka sa tauyavutaki tale e vuravura.”

Oqo gona eso na buloko ni vale yaga ni noda vakabauta kei na ivakadinadina yadua:

O Jisu Karisito e iVakabula kei vuravura.
Na iVola i Momani e vosa ni Kalou.
Na Lotu i Jisu Karisito ni Yalododonu Edaidai e matanitu ni Kalou e vuravura.
O Josefa Simici edua na parofita, ka ra tu na noda parofita bula e vuravura edaidai.

Ena veivula sa qai oti ga, au a vakarorogo ki na ivunau ni koniferedi raraba kece nei Peresitedi Nelson tekivu mai na gauna e a kacivi taumada kina okoya me dua na iApositolo. Na itavi oqori e sa veisautaka noqu bula. Ni’u vulica ka vakasamataka na 34 na yabaki ni isoqoni ni vuku i Peresitedi Nelson, e a basika mai na nona ivakavuvuli na vei ulutaga matata ka tudei. Na ulutaga yadua oqo e semati ki na vei buloko ni vale ka a tukuni oti se edua tale na buloko ni vale bibi ni noda valetabu yadua. Era oka kina na vakabauta na Turaga o Jisu Karisito; veivutuni; papitaiso me bokoci na ivalavala ca; na isolisoli ni Yalo Tabu; veivueti vei ira na mate kei na cakacaka ni valetabu; rokova na Siga ni Vakacecegu; tekivu ena vakanananutaki ni itinitini; tikoga ena sala ni veiyalayalati. O Peresitedi Nelson e sa vunautaka kece oqori ena loloma kei na yalodina.

Esa vatuivakadei ka buloko ni vale ni Lotu kei na noda bula o Jisu Karisito. Oqo na Nona Lotu. O Peresitedi Nelson e Nona parofita. Na ivakavuvuli i Peresitedi Nelson e vakadinadinataka ka vakatakila ki na noda tikovinaka na bula kei na itovodei i Jisu Karisito. E tukunikataka okoya ena loloma kei na kila vinaka na itovo matau ni iVakabula kei na Nona ilesilesi. E wasea wasoma ka vagumatua nona ivakadinadina ni ra sa kacivi vakalou o ira na parofita bula—na Peresitedi ni Lotu—ka a veiqaravi e rukudra okoya.

Ia oqo, nikua, e sa noda na dodonu me tokoni koya me parofita bula ni Turaga e vuravura. Eda sa matau ki na nodra tokoni na iliuliu ni Lotu ena ivakarau vakalou ni da laveta na ligada ki na sikoya me vakaraitaka noda veiciqomi kei na veitokoni. Eda qai cakava ga oqo ena vica na miniti sa oti. Ia na veitokoni dina e lako sivita sara na ivakatakilakila vakayago oqo. Me vaka e volai ena Vunau kei na Veiyalayalati 107:22na Mataveiliutaki Taumada me na “tokoni ena nodra veivakabauti, nodra yalodina, kei na nodra masumasu na lewenilotu.” Eda yaco me tokona vakataucoko ka vakaidina na parofita bula ni da taracake na ivakarau ni veivakabauti ena nona vosa, ena vakabauta me cakacakataka, ka qai masulaka tiko na veivakalougatataki ni Turaga ki vua.

Ni’u vakananumi Peresitedi Russell M. Nelson, au yalovakacegu ena vosa ni iVakabula ena Nona a kaya, “Ia kevaka era na muria na domoqu ko ira na tamata, kei na domodra na noqu italai ka’u sa digitaka me ra liutaki ira na noqu tamata, raica, au sa kaya vakaidina vei kemudou, era na sega sara ni vakayavalati rawa mai na nodra tikina” ((Vunau kei ma Veiyalayalati 124:45).

Ni ra vakarogoci ka vakamuri na parofita bula ena kauta mai kivei keda na veisautaki-bula uasivi. Eda sa vakaukauwataki. Eda sa vakadeitaki cake ka yalodei. Eda rogoca na vosa ni Turaga. Eda vakila na loloma ni Kalou. Eda na kila na bulataki ni noda bula me vakainaki.

Au lomani kau tokoni Peresitedi Russell M. Nelson kei ira kece era sa kacivi me parofita, daurairai, ka daunivakatakila. Au vakadinadina ni tu vua na isolisoli ka a vakatikora na Turaga e buradelana, ka’u vakadinadinataka ni kevaka eda vakaqaqacotaka ki na noda bula na ivakarau ni rogoca ka muria na domo ni parofita bula, ena taraicake noda bula me vaka na iwalewale vakalou ni Turaga vei keda, ka da na tamusuka na veivakalougatataki tawamudu. Na veisureti sa soli tu vei keda kece. Mai rogoca na domona e dua na parofita; io, lako mai vei Karisito mo bula kina. Ena yacai Jisu Karisito, emeni.