Ko Sa Via Bula se Segai?
Ena vuku ni Veisorovaki i Jisu Karisito, ke da digia meda veivutuni ka vagolea na yaloda taucoko vua na iVakabula, ena vakabulai keda vakayalo.
Ni oti toka e vica na vula nona kaulotu voli, a vakila na luvequ tagane gone duadua e dua na mosi ni ulu ni vuli lesoni tiko kei na nona itokani vakaulotu. Sa veilecayaki sara o koya; ka tekivu me malumu mai na ligana imawi, ka sa nunu mai na yamena. Ka sa veve sobu mai na yasana imawi ni matana. Ka sa dredre me vosa. Sa kila o koya ni dua na ka sa cala. E sega ni kila o koya ni sa yaco sara tu ga vua na mate ni uto ena tolu na tiki ni nona mona. Sa tekivu me basika na rere ni sa paralase e dua na yasana. Na totolo ni nodra qaravi na mate ni uto ena rawa ni mana veivakurabuitaki sara ki na itagede ni nona vakabulai. A totolo sara na vakasama nei nona itokani vakaulotu. Ni qirita oti na 911, a qai masulaki koya. E veivakurabuitaki, ni lima ga na miniti sa basika na lori ni valenibula.
Ni sa cicivaki ki valenibula o luvei keirau, era a vakadikeva na vuniwai na ka e yaco ka nanuma me sa soli e dua na wainimate vei luvei keirau me na rawa ni vakasuka na revurevu ni paralase ni mate ni uto ena kena gauna.1 Ia, ke a sega ni tauvi mate ni uto tu na luvei keirau, na wainimate o ya ena rawa ni vakavure ca sara, me vakataka na dra ni mona. Sa digidigi nei luvei keirau. A digitaka o koya me taura na wainimate. Ni sa gadreva na veivakabulai taucoko e vuqa na veisele kei na vula, a yaco me lesu tale na luvei keirau ka vakacavara nona kaulotu ni oti na kena vakasukai na revurevu ni nona mate ni uto.
Na Tamada Vakalomalagi e tiko vua na kaukauwa ka kila na ka kecega. E kila tu o Koya na noda sasaga bula vakayago. Sa kila tu o Koya na mosi ni yagoda ni da malumalumu, tauvimate, qase mai, vakacalaka, se dredre ni vakasucu. Sa kila tu o Koya na veigayaki ni yaloda e vuna noda lomaocaoca, galili, tubu ni dra, se mate ni vakasama. Sa kila o Koya na tamata yadua e sotava na veivakalolomataki se o ira sa vakacacani. E kila o Koya na noda malumalumu kei na dredre kei na veitemaki eda sotava tiko.
Eda sa vakatovolei ena bula oqo meda raica ke da na digitaka na vinaka mai na ca. Vei ira ka maroroya na Nona ivakaro, era na bula vata kei Koya “mera tiko marau kina me tawamudu.”2 Me vukei keda ni toso ki liu meda na vakataki Koya, sa solia na Tamada Vakalomalagi na kaukauwa kei na kilaka kece kivua na Luvena, o Jisu Karisito. E sega na malumalumu vakayago, ni vakasama, se vakayalo me sega ni vakabula rawa na Karisito.3
Ena cakacaka vakalotu e vuravura ni iVakabula, e tukuni ena ivolanikalou e vuqa na cakamana i Jisu Karisito ka a vakayagataka kina nona kaukauwa vakalou me vakabulai ira era rarawa vakayago.
Na Kosipeli i Joni e tukuna na italanoa ni tagane ka a tauvi koya dede tu na mate ni yago ena 38 na yabaki.
“Ni sa raici koya ko Jisu ni sa davo koto, ka kila sa dede, sa kaya vua, Ko sa via bula se segai?”
A kaya mai na tagane sa tauvimate ni sega e dua e vukei koya na gauna e gadreva kina vakalevu.
“Sa kaya vua ko Jisu, Tu cake, taura cake na nomui mocemoce, ka lako.
“A sa bula vinaka vakasauri na tamata, ka taura cake na nona imocemoce, ka lako.”4
Yalovinaka raica na veidutaitaki ni balavu ni nona rarawa tu mai na tagane oqo (38 na yabaki) kei na totolo ni veivakabulai a yaco ni sa mai vakaitavi na iVakabula. Na veivakabulai a “vakasauri.”
E dua tale, o ya e dua na yalewa ka turidrabalavu tu me 12 na yabaki, ka “sa vakayagataka taucoko nona iyau vei ira na vuniwai, … sa lako mai dakuna, ka tara na tutu ni nona isulu: ka [mudu] vakasauri na davedave ni nona dra. …
“A sa kaya ko Jisu, Sa dua sa tarai au: niu sa kila sa lako tani vei au na kaukauwa.
“Ia ni sa kila na yalewa ni sa sega ni vuni, ka … tukuna e matadra kecega na lewe vuqa … na nona sa bula vakasauri.”5
Ena Nona cakacaka vakalotu, a vakavulica na Karisito ni sa tu Vua na kaukauwa e uabaleta na ituvaki vakayago. Eda sega ni lewa rawa na gauna ena yaco kina na veivakabulai i Karisito ki na noda malumalumu vakayago eso. E yaco na veivakabulai me vaka na Lomana kei na vuku. Ena ivolanikalou, eso a rarawa tu vakabalavu; eso tale, ena nodra bula taucoko. Na malumalumu vakayago e rawa ni vakatudonutaki keda ka vakatitobutaka noda vakararavi vua na Kalou. Ia ni da vakadonui Karisito me oka kina, ena dau qaqacotaki keda vakayalo o Koya meda rawa ni gumatua sara ni vosota na noda icolacola.
Ena yaco, meda kila ni veidredre yadua vakayago, tauvimate, se ituvaki tani ena vakabulai ena Tucaketale. Oqo e dua na isolisoli ki na kawatamata ena Veisorovaki i Jisu Karisito.6
Sa rawa ni veivakabulai cake o Jisu Karisito sega walega ena noda bula vakayago. Sa rawa me vakabula vakakina na yaloda. Ena ivolanikalou eda vulica na iwalewale ni veivuke i Karisito kivei ira na malumalumu vakayalo ka vakabulai ira.7 Ni da tugana na veika e yaco oqo, sa vakalevutaki na noda nuitaka ka vakabauta na kaukauwa ni iVakabula me vakalougatataki keda. Sa rawa vei Jisu Karisito me veisautaka na yaloda, vakabulai keda mai na revurevu ni lewa vakatani se veivakacacani, ka vaqaqacotaka noda igu meda taura na druka kei na mosi, ka vakacegui keda me vukea noda vosota na vakatovolei ni noda bula, ka vakabula na lomada.
Sa rawa vei Karisito me vakabulai keda ni da cakacala. Eda cakacala ni da kila eda sa voroka e dua na lawa ni Kalou.8 Ni da cakacala, sa yaco me dukadukali na yaloda. Sa sega na ka tawasavasava me tiko ena iserau ni Kalou.9 “Na savasava mai na cakacala sai koya [meda] na vakabulai vakayalo.”10
Na Kalou na Tamada sa kila ni da na cakacala, ia sa vakarautaka o Koya na sala meda na vueti kina. E vakavulica o Elder Lynn G. Robbins: “Na veivutuni e sega ni ikarua ni ituvatuva ni [Kalou] ke yaco meda druka. Na veivutuni sa Nona ituvatuva, ni kila ni da na vakakina.”11 Ni da cakacala, sa noda na madigi meda digitaka na vinaka mai na ca. Eda digitaka na vinaka ni da sa veivutuni ni oti noda cakacala. Mai vei Jisu Karisito kei na Nona solibula veisorovaki, sa rawa ni da vueti mai na noda cakacala ka vakau lesu ki na iserau ni Kalou na Tamada kevaka eda veivutuni. Na veivakabulai vakayalo e sega ni vakatabakidua—sa gadrevi kina na kaukauwa veivueti ni iVakabula kei na veivutuni dina nei koya a cala. Vei ira era digitaka mera kua ni veivutuni, era sa besetaka na veivakabulai nei Karisito. Vei ira oqo e vaka ni a sega ni yaco na veivueti.12
Niu a vakasalataka oti eso era saga tu mera veivutuni, au kurabuitaka ni o ira ka se cakacala voli ga a dredre mera vakatulewa dodonu. E rawa me biuti ira na Yalo Tabu, ka ra dau saga dredre mera digitaka na veika mera voleka cake kina vua na Kalou. Era dau sasaga dredre vakavula se vakayabaki sara, ka madua se rere voli ena vuku ni revurevu ni nodra cakacala. Era dau nanuma ni sega ni rawa mera veisau se vosoti. Au dau rogoci ira ni wasea nodra rere ni ke ra kila nodra daulomani na veika era sa cakava, era na sega tale ni lomani ira se biuti ira. Ni ra murialako na vakanananu vakaoqo, era sa vakasamataka mera galuvaka ga ka lokuyarataka nodra veivutuni. Era nanuma cala kina ni vinaka ga mera sa kua ni veivutuni oqo ka ra na sega tale ni vakararawataki ira era lomana. Era sa nanuma ni sa vinaka cake mera rarawa voli ni oti na bula oqo mai na lakocuruma na ivalavala ni veivutuni. Taciqu kei na ganequ, e sa sega ni vakasama vinaka mo lokuyarataka na nomu veivutuni. Sa dau vakayagataka o vu-ni-meca na rere me tarova na tutaki vakatotolo ni noda vakabauti Jisu Karisito.
Ni ra sa sotava tu na dina na daulomani baleta na itovo cakacala, ni ra rairai nanuma era mavoa bibi voli, era dau vinakata ni vukei koya ka sa veivutuni dina sara me veisau ka veivinakataki tale kei na Kalou. E dina, ena totolo na veivakabulai vakayalo ni ra vakatusa na tamata cakacala ka sa wavoliti mai vei ira sa lomani ira ka vukei ira mera vakanadakuya nodra ivalavala ca. Yalovinaka nanuma tiko o Jisu Karisito sa qaqa ena Nona vakabulai ira talega a ravuti ena ca ka gole Vua.13
E kaya o Peresitedi Boyd K. Packer: “Ena vakacacani na yaloda ni da cakacala ka ivalavala ca. Ia e sega ni tautauvata ki na yagoda, ni sa cava na ivakarau ni veivutuni, sa sega na mawe e koto ena vuku ni Veisorovaki i Jisu Karisito. Oqo na yalayala: ‘Raica ko koya sa veivutunitaka na nona ivalavala ca, ena vosoti, ia koi au na Turaga au na sega ni nanuma tale na nona ivalavala ca’ [Vunau kei na Veiyalayalati 58:42].”14
Ni da sa veivutuni “ena lomada taucoko,”15 “ena kau yani vakasauri vei kemuni na ituvatuva cecere ni veisereki”.16 Ena vakabulai keda na iVakabula.
Era a cakacaka kusarawa na itokani vakaulotu kei na kenadau ni tabana ni bula ni vukea na luvei keirau ka mate ni uto ena buturara ni kaulotu. A digitaka o luvei keirau me taura na wainimate e vakasuka na mate ni uto. Na revurevu ni paralase ni mate ni uto a rawa me tu ga vua ena vo ni nona bula vakayago sa mai vakasukai. Vakakina, na totolo ga ni noda veivutuni ka taura na Veisorovaki i Jisu Karisito ki na noda bula, na totolo cake ni noda vakabulai mai na revurevu ni valavala ca.
E veisureti kina o Peresitedi Russell M. Nelson: “Ke o sa butu tani mai na sala, … au sureti iko … yalovinaka lesu mai. Se cava ga nomu kauwai, se bolebole, sa tiko na vanua me baleti iko, ena nona Lotu na Turaga. O iko, kei na tabatamata se bera ni sucu, era na kalougata ni ko ni cakacakataka nikua mo ni lesu ki na sala ni veiyalayalati.”17
Na noda vakabulai vakayalo sa gadrevi kina meda soli keda ki na veika sa lavaka na noda iVakabula. Me da kakua ni lokuyara! Meda cakava ga nikua! Cakava nikua baleta me kua ni tarova na paralase vakayalo nomu toro cake tawamudu. Niu sa mai vosa tiko oqo, ke o vakila ni sa gadrevi mo kere veivosoti kivua e dua o a caka cala vua, au sureti iko mo cakava. Tukuna vei ira na ka o sa cakava. Kerea na nodra veivosoti. Kevaka o sa cakava e dua na cala e vakaseva na nomu bula kilikili ni valetabu, au sureti iko mo veivosaki kei nomu bisopi—nikua. Kua ni lokuyara.
Taciqu kei na ganequ, na Kalou sa Tamada dauloloma Vakalomalagi. Sa solia o Koya na kaukauwa kei na kilaka taucoko kivua na Luvena Daulomani, o Jisu Karisito. Ena Vukuna ga, era na vakabulai ena dua na siga na kawatamata kece mai na malumalumu vakayago kecega me tawacava. Ena vuku ni Veisorovaki i Jisu Karisito, ke da digia meda veivutuni ka vagolea na yaloda taucoko vua na iVakabula, ena vakabulai keda vakayalo o Koya. Na veivakabulai o ya sa rawa ni tekivu ga oqo. Sa noda na digidigi.. Eda sa via bula se segai?
Au vakadinadinataka ni sa tauca na isau o Jisu Karisito me rawa ni da vakataucokotaki. Ia meda sa digitaka ni taura na wainimate ni veivakabulai e solia o Koya. Taura nikua. Kua ni o vakabera. Ena yaca i Jisu Karisito, emeni.