Tuva Tiko na Yavu ni Dua na Cakacaka Cecere

Mai vei Elder Steven R. Bangerter

Ena Vitusagavulu

Na lesoni e vakavulici ena ivakarau eda yavutaka ena noda itikotiko, dina ni lailai ka rawarawa, era sa ka bibi cake tikoga ena vuravura nikua.

Ni da sa itubutubu e Saioni, sa vakalou na noda ilesilesi meda vakayadrati ira na luveda ena yalololoma kei na dina ki na reki, rarama, kei na dina ni kosipeli i Jisu Karisito. Ni da susugi ira na luveda, eda sa tauyavutaka na ivakarau ena noda itikotiko ka tara cake na iwalewale ni veitaratara kei na itovo ena noda veimaliwai vakavuvale. Ni da cakava, na ivakarau eda tauyavutaka e dodonu me vakatikora na itovo vinaka kaukauwa, tudei vei ira na luveda ka ra vakatawai ena kaukauwa mera vorata rawa na ibolebole ni bula oqo.

Ena vuqa na yabaki sa dau marautaka na noqu matavuvale na laki keba vakayabaki ena Ulunivanua cecere e Uintah ena tokalau vualiku kei Utah. Keitou lakova e 20 na maile (32 na km) ena gaunisala soso veivatu me yaco ki na buca drokadroka totoka, ena kena babavatu cecere, ka no e loma na kena uciwai batabata, ka makare. Ena veiyabaki, sa nuitaki me vakadeitaki na yaga ni vunau ni kosipeli ka vakayacori e lomadra na luvei keirau kei na makubui keirau, keirau dau kerea kei Susan na ono na luvei keirau kei na nodra vuvale mera vakarautaka vakalekaleka na ulutaga e bibi baleta na yavu ni vuvale e kena usutu na Karisito. Keimami kumuni vata ena dua na lotu vakavuvale ena vanua lokuci, ka cauraka na neimami dui itukutuku.

iVakatakilakila

Na itukutuku era volai tu ena vatu.

Ena yabaki oqo, e ratou vola na makubui keirau na nodra itukutuku ena vatu, ka vakayadudua, era a qai buluta veitikivi, me vakaraitaka tiko na yavu dei sa tauyavutaki kina e dua na bula marau. E solegi e loma ni ono ni nodra itukutuku na dina tawayavalati rawa, ka tawamudu ni o Jisu Karisito na vatu ni tutu ni yavu o ya.

Ena vosa nei Aisea, “O koya oqo sa kaya kina na Turaga ko Jiova, Raica, au sa viritaka mai Saioni na vatu ni yavu, na vatu sa vakatovolei, na vatu ni tutu ni vale sa talei, na yavu sa dei sara.”¹ O Jisu Karisito na vatu ni tutu sa talei ena yavu kei Saioni. Sai Koya a vakatakila oqo vei Parofita Josefa Simici: “O koya mo dou kakua kina ni oca ena cakacaka-vinaka, ni dou sa tuva tiko na yavu ni dua na cakacaka cecere. Ia ena tubu mai ena veika lalai na veika cecere.”²

Na lesoni e vakavulici ena ivakarau eda yavutaka ena noda itikotiko, dina ni lailai ka rawarawa, era sa ka bibi cake tikoga ena vuravura nikua. Na cava na ka lalai ka rawarawa, ni sa tauyavutaki, ena cakava e dua na cakacaka cecere ena nodra bula na luveda?

A vosa o Peresitedi Russell M. Nelson ki na dua na ivavakoso levu mai Toronto, Kenada, ka veivakananumi bibi kina vei ira na itubutubu baleta na ilesilesi tabu meda vakavulici ira na luveda. Ena vica na ilesilesi bibi a tukuni, a vakamatatataka o Peresitedi Nelson na noda itavi na itubutubu meda vakavulici ira na luveda mera kila na vuna eda kania kina na sakaramede, na inaki levu ni noda sucu ena veiyalayalati, na bibi ni vakavakarau ka ciqoma na veivakalougatataki vakapeteriaki, ka uqeti ira na itubutubu mera liutaka na nodra wilika vata vakavuvale na ivolanikalou.³ Ena sasaga oqo, sa kerei keda na noda parofita lomani meda cakava noda itikotiko me “vanua tabu ni vakabauta.”⁴

Ena iVola i Momani, a vola o Inosi na nona vakavinavinaka cecere baleta na ivakaraitaki nei tamana, a “vakavulici [koya] ena nona vosa, kei na veisusugi kei na veivunauci ni Turaga.” Ena yaloluluvu levu a kaya o Inosi, “Me vakalougatataki ga na yaca ni noqu Kalou ena ka oqo.”⁵

Au vakamareqeta na ivakarau lalai ka rawarawa keirau sa mai cakava tiko ena neirau itikotiko ena 35 na yabaki ni neirau vakamau. E vuqa na neitou ivakarau sa matata sara ia e vakaibalebale. Me ivakaraitaki:

Ena veiyakavi niu yali mai vale, au dau kila ena veidusimaki nei Susan, ena taura o luvequ tagane ulumatua na ilesilesi, ka sega tale ni dau kerei, me na liutaka na matavuvale ena vulici ni ivolanikalou kei na masu vakamatavuvale.⁶
Dua tale na ivakarau––keitou na sega ni biuta neitou itikotiko se vosa oti ena talevoni ke sega ni keitou kaya, “Au lomani iko.”
Sa kalougata na neitou bula ena kena vakatikitikitaki e dua na gauna tudei me marautaki na veivakatarogi vei ira yadua neirau cauravou. Ena dua na veivakatarogi au a tarogi noqu cauravou baleta nona gagadre me laki kaulotu. Ni toso na veivosaki, keirau a veigaluvi vakalailai, a qai kala mai liu ka kaya mai vakamalua, “Ta, o nanuma tiko niu a se lailai ka sa tekivu kina na veivakatarogi ni tama?” Au a kaya, “Io.” “Ia,” a kaya, “Au a yalataka kina vei iko niu na kaulotu, o a qai yalataka ni o iko kei Na drau na laki kaulotu gauna drau sa qase kina.” Oti o ya a mai dua tale na tu na veigaluvi. “E dredre tiko beka vei kemudrau e dua na ka ena tarova nomudrau laki kaulotu—baleta meu rawa ni veivuke kina?”

Na ivakarau savasava vakamatavuvale e oka kina na masu, wili ivolanikalou, lotu vakamatavuvale, kei na tiko ena soqoni ni Lotu, dina ga ni ra ka lalai ka rawarawa, e bulia na itovo ni loloma, veidokai, duavata, kei na veitaqomaki. Ena yalo e lako vata kei na sasaga oqo, era sa taqomaki na luveda mai na gasau vidi ni tevoro sa umanaki tu vakalevu ena ivakarau ni vuravura nikua.

Eda veivakananumi ena ivakasala matua nei Ilamani vei rau na luvena: “Mo drau nanuma mo drau tara na nomudrau yavu ena uluvatu ni noda Dauveivueti, o koya na Karisito na Luve ni Kalou; ia ni sa vakaliwava mai na tevoro na nona cagi kaukauwa, io, kei na nona moto ena covulaca, io, ni sa liwavi kemudrau na nona uca cevata kecega kei na nona cava kaukauwa, ena sega ni rawai kemudrau me dreti kemudrau sobu ki na ikeli ni rarawa kei na yaluma tawacava rawa, ni sa dei sara na uluvatu drau sa tara kina, ka sai koya na yavudei ia kevaka sa tara cake na tamata ena yavu oqo, ena sega sara ni bale rawa.”⁷

Ena vica na yabaki sa oti, niu a se bisopi cauravou kina, a kerea e dua na qase me keirau veivosaki. A vakamacalataka na nona a biuta na Lotu kei na ivakarau dodonu ni nona itubutubu ni a se cauravou kina. A vakamacalataka vakamatata nona sotava na rarawa ni nona bula ni vakasaqara matewale na reki tawamudu, ena loma ni marau lekaleka e solia o vuravura. Ia oqo, ni sa yacova mai na yabaki ni qase, sa sotava na vinaka, ka vakawasoma na vosa malua ni Yalo ni Turaga e dusimaki koya lesu tiko ki na lesoni, itovo, vakanananu, kei na veitaqomaki vakayalo ni se gone kina. A vakaraitaka nona vakavinavinaka ki na nodrau ivakarau na nona itubutubu, ka kaya ena vosa vou, na ka a kaya o Inosi: “Me vakalougatataki ga na yaca ni noqu Kalou ena ka oqo.”

Na ka au raica, ni nona lesu mai na turaga oqo ki na kosipeli sa nodra ivakarau e vuqa ka ra cakava tiko na luve ni Kalou era biubiu mada vakalailai, ka ra lesu tale mai ki na ivakavuvuli kei na nodra itovo ni itabagone. Ena gauna vakaoqori, eda vakadinata na vuku nei koya a vola na vakaibalebale, a kerei ira na itubutubu, “Vakatavulica na gone ena sala e dodonu me lako kina, ia ni sa qase mai, ena sega ni lako tani mai kina.”⁸

Na itubutubu yadua era na sotava na veilecayaki kei na veituyaki ni itagede ni gugumatua kei na qaqaco ni ra susu gone. Ia, ni ra vakabauta na itubutubu ka vakavulici ira na gone e veigauna, vakadodonu, ena loloma ka cakava nodra igu mera vukei ira ena ilakolako oqo, era na ciqoma na inuinui cecere ni sorenikau a teivaki ka na kadre e yalodra kei na nodra vakasama na luvedra.

E kila vinaka o Mosese na bibi ni kena gadrevi na veivakavulici wasoma. A vakasalataka “Mo ni gumatua ni vakavulica vei ira na luvemuni na [vosa oqo], ka dau vosataka ni kemuni sa tiko ena nomuni vale, ni kemuni sa lako voli talega ena sala, ka ni kemuni sa koto sobu, ni kemuni sa duri cake.”⁹

Eda sa tekiduru vata kei ira na luveda ena masu vakamatavuvale, eda karoni ira ena noda sasaga me vakaibalebale noda wili ivolanikalou, ka vosota, ni da da qaravi ira ni da vakaitavi vata ena lotu vakamatavuvale, ka tagicaki ira ena masu eda cakava vakai keda yadua ki lomalagi. Isa, na noda gadreva na sorenikau eda teivaka tiko me ti na wakana e yalodra kei na nodra vakasama na luveda.

Au vakabauta ni sega soti me tarogi era sa “ciqoma tiko” beka na gone ni da veivakavulici, me vaka na sasaga ni vulici na ivolanikalou se me caka na lotu vakamatavuvale se tiko ena Muavata kei na soqoni tale eso ni Lotu. E sega ni lomataro taki ni gauna vakaoqori era sa kila na bibi ni itaviqaravi oqori ia meda tarogi na itubutubu eda sa vakabauta vakavinaka tiko beka meda muria na ivakasala ni Turaga meda gu ka bulataka, vakavulica, ka veivakauqeti, ka namaka na inaki e veivakauqeti kina na kosipeli i Jisu Karisito. Na sasaga e muataki ni da vakabauta––noda vakadinata ni yaco na siga na sorenikau a teivaki ni ra se gone ena tete na wakana ka buroro ka tubu.

Na veika eda veivosakitaka, na ka eda vunautaka ka vakavulica ena vakadeitaka na veika ena yaco vei keda. Ni da tauyavutaka na ivakarau savasava e vakavulica na vunau i Karisito, ena vakadinadinataka na Yalo Tabu ni sa dina na noda itukutuku ka vakabulabulataka na sorenikau ni kosipeli sa teivaki titobu e yalodra na luveda ni da sasagataka tiko yani. Au sa vakadinadinataka oqo ena yaca i Jisu Karisito, emeni.