Na Dina kei na iTuvatuva
Ni da vakasaqara na dina baleta na lotu, e dodonu meda taurivaka na ivakarau vakayalo e ganita na vakadidike o ya.
Na ivakatakila nikua e tukuna ni ibalebale ni dina o ya na “kena kilai na veika ena kedra ituvaki ena gauna oqo, kei na kedra ituvaki ena veigauna sa oti, kei na kedra ituvaki ena veigauna e se bera mai” (Vunau kei na Veiyalayalati 93:24). Oqori e dua na ibalebale uasivi ni ituvatuva ni veivakabulai kei “Na Matavuvale: Ai Vakaro ki Vuravura Raraba.”
Eda bula donuya tiko na gauna sa vakarabailevutaki sara ka vakatetei yani na itukutuku. Ia e sega ni itukutuku taucoko oqo e ka dina. E gadrevi meda qaqarauni ni da vakasaqara na dina ka digitaka na ivurevure ni vakadidike o ya. Meda kakua ni veilecayaki ena irogorogo vakavuravura se lewa me ivurevure donu ni dina. Meda qarauna noda vakararavi tiko ki na itukutuku se ivakasala mai vei ira na dauveivakamarautaki rogo, dauqito kilai levu, se ivurevure tawakilai ena initaneti. Na kila-ka ni dua na cakacaka me kakua ni tauri me kila-ka ni dina ena ulutaga tale eso.
Meda qarauna talega na inaki ni ile nei koya e solia na itukutuku. Oqo na vuna sa vakarota kina na ivolanikalou meda qarauni ira na betevakailasu (raica na 2 Nifai 26:29). Ke sega ni tukuni se kilai na ivurevure, meda sa qarauni talega na itukutuku oqori.
Na noda lewa me na yavutaki ena itukutuku ni ivurevure era dodonu ena kena iulutaga ka galala mai na veika ca e rawa ni yaco mai ena yalo ni kocokoco.
I.
Ni da vakasaqara na dina baleta na lotu, meda sa taurivaka na iwalewale vakayalo dodonu ni vakadidike: o ya na masu, ivakadinadina ni Yalo Tabu, ka vulica na ivolanikalou kei na nodra vosa na parofita nikua. Au dau rarawa niu rogoca na itukutuku ni dua sa yali nona vakabauta na lotu ena vuku ni ivakavuvuli vakavuravura. Vei ira era dau rai vakayalo tu e liu sa rawa mera vakaleqai ena veika ga era vakavuna mera mataboko kina vakayalo. Me vaka e kaya o Peresitedi Henry B. Eyring, “Nodra leqa oqo e sega ni vakavuna na ka era nanuma ni ra raica; ia ena ka era sega ni raica rawa.”1
Na iwalewale ni vakadidike vuku e muataki keda ki na ka eda vakatoka me dina ni vakadidike. Ia na “dina ni vakadidike vuku” oqo e sega ni ka ni bula taucoko. Vei ira era sega ni kila “ena vuli kei na vakabauta” (Vunau kei na Veiyalayalati 88:118) sa yalani na nodra kila na veika dina ka rawa mera vakadeitaka vakaibalebale ena vakadidike vuku. Sa yaco kina na yalani ni ka wale mera saga na dina.
A kaya o Peresitedi James E. Faust: “Vei ira sa [papitaiso] era sa solia na yalodra tawamudu me lewai ena sasaga walega ena ivurevure vakavuravura ni vuli. Eda vakadinata ni Lotu i Jisu Karisito ni Yalododonu Edaidai sa tiko kina na taucoko ni kosipeli i Karisito, na kosipeli sai usutu ni ka dina kei na veivakararamataki tawamudu.”2
Eda kunea na dina kei na reki gugumatua ni da sa kila ka cakacaka ena dina me baleti keda, na ibalebale ni bula oqo, kei na vanua eda lako kina ni da sa mate. Na dina oqo e sega ni vulici rawa ena sala vakavuravura se nodra ivakadidike vuku.
II.
Au na vosa oqo ena dina ni kosipeli vakalesui mai sa ka bibi sara ki na vunau ni Lotu i Jisu Karisito ni Yalododonu Edaidai. Yalovinaka vakasamataka vakavinaka na dina oqo. Era vakamacalataka vakalevu na noda vunau kei na kena cakacaka, oka kina na kena mera kilai vinaka.
E tiko e dua na Kalou, sa Tama dauloloma ni yaloda kece era sa bula se o ira ena mai bula.
Na tagane se yalewa e tawamudu. Ni bera ni da mai sucu e vuravura, eda a bula taumada vakayalo vaka tagane kei na yalewa ena iserau ni Kalou.
Eda se qai rogoca oti ni ra lagata na Matasere ni Tabernacle ena Rara ni Valetabu “I Will Follow God’s Plan.”3 Oqo na ituvatuva sa tauyavutaka na Kalou me rawa vei ira kece na Luvena vakayalo mera tubu tawamudu. Na ituvatuva o ya sa ka bibi vei keda yadua.
Ena ituvatuva o ya, a bulia na Kalou na vuravura oqo me vanua vei ira na Luvena lomani vakayalo mera mai sucu eke ka vakayago ena veimadigi mera tubu tawamudu ni ra digidigi dodonu.
Me vakaibalebale cake, na digidigi vakayago mena caka ena tadrua ni veika e vinaka kei na butobuto. Ena tiko na veisaqasaqa, ia ena tiko kina o vu-ni-meca, ka cemuri tani mai ni a veisaqasaqa, me rawa ni temaki ira na luve ni Kalou mera saqata na ituvatuva ni Kalou.
Na inaki ni ituvatuva ni Kalou o ya me solia vei ira na Luvena na madigi mera digitaka na bula tawamudu. Ena rawati ga oqo ena sotavi ni bula vakayago eke, ia ni oti na mate, ka tubu ena bula tarava ena vuravura ni yalo.
Ena ilakolako ni bula oqo, eda na vakadukai mai na ivalavala ca ena noda muria na veitemaki ni vu-ni ca, ka na yaco meda mate. Eda a ciqoma na ibolebole oqo ni da vakararavi ki na ivakadei ni ituvatuva ni Kalou na Tamada ni na vakarautaka e dua na iVakabula, na Luvena Duabau, ena vakabulai keda ena tucaketale vakalomalagi ena bula vakaituvaki ni oti na mate. Na iVakabula sa vakarautaka talega e dua na veisorovaki me sau ni nodra vakasavasavataki na tamata mai na ca ena ilavaki ena nona vosa. Na ilavaki oqori e oka kina na vakabauta na Karisito, veivutuni, papitaiso, na isolisoli ni Yalo Tabu, kei na cakacaka vakalotu e vakayacora na matabete.
Na ituvatuva cecere ni bula marau ni Kalou sa vakatautauvatataka na lewa tawamudu kei na loloma veivueti eda na rawata mai na Veisorovaki i Jisu Karisito. Sa rawa talega kina meda vakavoui ka tamata vou vei Karisito.
Na Kalou dauloloma sa dodoliga mai vei keda yadua. Eda kila ni Nona loloma ga kei na Veisorovaki ni Luvena Duabau Ga, ena “vakabulai na tamata kecega kevaka eda sa talairawarawa ki na lawa kei na cakacaka vakalotu ni [Nona] Kosipeli” (Yavu ni Vakabauta 1:3; vakamatatataki).
Na Lotu i Jisu Karisito ni Yalododonu Edaidai e kilai vakavinaka ni Lotu e kena iusutu na matavuvale. Ia na ka e sega tiko ni kilai vinaka ni iusutu ni noda matavuvale e raici matua kina na ka e uasivia cake mai na veiwekani vakayago. Na bula ni veiwekani Tawamudu sa ka bibi talega kina noda vulica na veika va Kalou. “Na matavuvale e sa lesi mai vua na Kalou.”4 Ena ruku ni ituvatuva cecere ni noda Dauniveibuli dauloloma, na ilesilesi ni Nona Lotu vakalesui mai o ya mera vukei na Luve ni Kalou mera rawata na kalougata cecere vakalou ni bula vakacerecerei ena matanitu vakasilesitieli, e rawati duadua ga ena nodrau vakamau tawamudu e dua na tagane kei na dua na yalewa (raica na Vunau kei na Veiyalayalati 131:1–3 Keitou vakadeitaka na ivakavuvuli ni Turaga ni “e tiki bibi na noda ituvaki vaka yalewa se tagane kei na keda inaki ena bula taumada, bula oqo kei na tawamudu” kei na “nodrau vakawati na tagane kei na yalewa sa yaga ki na Nona ituvatuva tawamudu.”5
Kena itinitini, na loloma ni Kalou sa cecere ni, vakavo ga e vica sa lomadra dina mera luve ni veivakarusai, sa vakarautaka na icavacava lagilagi ki na Luvena kecega. “O ira kece na Luvena” era oka kina o ira sa mate. Eda cakava na cakacaka baleti ira ena cakacaka ni veisosomitaki ena valetabu. Na inaki ni Lotu i Jisu Karisito ni Yalododonu Edaidai o ya me ra rawata na Luvena na itagede cecere ni lagilagi, o ya na vakacerecerei se bula tawamudu. Vei ira era sega ni gadreva se via rawata o ya, sa vakarautaka na Kalou na bula lagilagi ena kena matanitu lailai sobu.
Vei koya sa kila vinaka na dina tawamudu oqo ena kila vinaka na vuna era vakasama kina vaka oya ka da cakava na veika eda cakava na lewe ni Lotu i Jisu Karisito ni Yalododonu Edaidai.
III
Au na tukuna mada eso na ivakarau ni dina tawamudu oqo, ena kilai vinaka ga ena rarama ni ituvatuva ni Kalou.
iMatai, eda doka na galala ni tamata yadua. E vuqa sa kila tiko na sasaga cecere ni Lotu vakalesui mai me tutaki na bula galala vakalotu e Amerika kei vuravura taucoko. Na sasaga oqo e sega ni vunautaka na noda ile, ia me vaka na Nona ituvatuva, e sagai mera vukei na luvena taucoko na Kalou mera rekitaka na galala ni digidigi.
iKarua, eda sa tamata daukaulotu. Eda dau tarogi ena so na gauna na vuna eda talai ira kina na daukaulotu ki na veimatanitu, vakakina vei ira na lewevuqa era lotu Vakarisito. E dau tarogi vei keda na vuna e solia kina e milioni vakamilioni na dola ena veivuke ni matatamata raraba era sega ni lewe ni noda Lotu kei na vuna eda sega ni semata oqo ki na noda cakacaka ni kaulotu. Eda cakava oqo baleta eda sa kila ni tamata kece sa luvena na Kalou—era sa tacida kei na ganeda—ka da gadreva meda wasea na noda iyau vakayalo, vakayago vei ira yadua.
iKatolu, na bula sa ka tabu vei keda. Na noda yalayala ki na ituvatuva ni Kalou eda sa saqata kina na vakalutu gone kei na laba ena loloma.
iKava, eso era lomaleqataka na veika e tutaka tiko na noda Lotu me baleta na vakamau kei ira na gone. Noda kila baleta na ituvatuva ni veivakabulai sa vakatakila mai na Kalou ena gadrevi kina meda saqata na ile kei na lawa ni gauna oqo me vakasuka se veisautaki na vakamau dodonu ka me veisautaki ka vakatanitaka se vukica na ituvaki vaka tagane se yalewa se tavulona na kedrau duidui na tagane kei na yalewa. Na noda kila me baleta na veiwekani vakayago, ituvaki, kei na cakacaka ni tagane kei na yalewa sa ka bibi ki na kena qaravi na ituvatuva cecere ni Kalou.
iKalima, sa tiko talega na noda vakasama matata baleti ira na gone. Eda raica na nodra sucu ka susugi cake na gone sa tiki ni ituvatuva ni Kalou ni sa itavi tabu rekitaki vei ira e soli vei ira na kaukauwa me ra vakaitavi kina. E noda rai, ni ulu ni noda iyau e vuravura ka vakakina mai lomalagi sai ira na luveda kei na noda kawa. Koya gona, eda sa vakavulica ka gumatuataka na ivakavuvuli kei na ivakarau e vuavuai vinaka sara mera vakatorocaketaki ka marau na gone—o ira kece.
iOtioti, eda sa luvena lomani na Tamada Vakalomalagi, sa vakavulici keda ni yago ni tagane kei na yalewa, na vakamau ni dua na tagane kei na yalewa, kei na nodra sucu ka susugi na gone era sa ka bibi ki na Nona ituvatuva cecere ni bula marau. Na noda tutaka na veika bibi oqo sa vakavuqa me vakavurea na kena saqati na Lotu. Eda sa sega ni tarova rawa. Na veisaqasaqa sa tiki ni ituvatuva, kei na veisaqasaqa kaukauwa nei Setani sa ravuta na veika sa bibi sara ena ituvatuva ni Kalou. Sa saga o koya me vakarusa na cakacaka ni Kalou. E vakayagataka o koya na iwalewale me vakarogocataka na iVakabula kei na Nona lewa vakalou, me bokoca na mana ni Veisorovaki i Jisu Karisito, ka vakadaroya na veivutuni, me vakalasuya na ivakatakila, ka saqata na dina ni tamata yadua. Sa saga talega me veilecayaki na tagane kei na yalewa, vakacacana na vakamau, vakadaroya na vakaluveni—vakabibi na itubutubu era susuga na luvedra ena dina.
IV.
Na cakacaka ni Turaga sa toso ga ki liu se cava ga na tuvai vakavuqa ni veisaqasaqa sa vorati keda ni da saga tiko meda bulataka na ivakavuvuli ni Lotu i Jisu Karisito ni Yalododonui Edaidai. Vei ira era rawai ena veisaqasaqa o ya, au vakatura kina oqo.
Nanuma na ivakavuvuli ni veivutuni sa rawati ena kaukauwa ni Veisorovaki i Jisu Karisito. Me vaka a kaya o Elder Neal A. Maxwell, mo kakua ni maliwai ira “era sa saga ga mera veisautaka na Lotu ka sega ni veisautaki ira.”6
Me vaka e veivakauqeti kina o Elder Jeffrey R. Holland:
“Taura matua na veika o sa kila rawa tu ka va kaukauwa tiko me yacova ni ra yaco mai na ikuri ni kila-ka. …
“… Ena Lotu oqo, na veika eda kila sa ka bibi cake tikoga mai na kena eda sega tu ni kila.” 7
Vakabauta na Turaga o Jisu Karisito sa ikoya na imatai ni ivakavuvuli ni kosipeli.
iOtioti, vakasaqara mo vukei. O ira na noda iliuliu ni Lotu era lomani kemuni ka saga mera veidusimaki vakayalo ka vukei iko. Esa vakarautaki tu e vuqa na ivurevure me vaka na kena e kune ena LDS.org, kei na iyaragi veitokoni tale eso ni vulici ni kosipeli ena itikotiko. Ka ra sa kacivi talega na turaga kei na marama dauveiqaravi mera veivuke ena loloma.
Na Tamada Vakalomalagi dauloloma, e gadreva vei keda na Luvena me noda na reki ni sa inaki ni noda buli. Na icavacava rekitaki o ya sai koya na bula tawamudu, sa rawati ena noda gu ki liu ena ka e vakatoka noda parofita, o Peresitedi Russell M. Nelson, me “salatu ni veiyalayalati.” A kaya oqo ena imatai ni nona vosa ni sa Peresitedi ni Lotu: “Mo tiko ga ena sala ni veiyalayalati. Ni ko dinata mo muria na iVakabula ena nomuni veiyalayalati kei Koya ka maroroya na veiyalayalati oqori ena dolava na katuba ki na kalougata vakayalo yadua kei na madigi me nodra na tagane, yalewa, kei ira na gone ena veivanua kecega.”8
Sa noqu ivakadinadina vakalou ni veika au sa cavuta sa ka dina, ka sa rawati ga ena ivakavuvuli kei na Veisorovaki i Jisu Karisito, sa cakava rawa o Koya ena ituvatuva cecere ni Kalou, na Tamada Tawamudu. Ena yaca i Jisu Karisito, emeni.