Raica na Tamata!
    Footnotes

    Raica na Tamata!

    O ira era kunea na sala me ra raica dina kina na Tamata era sa kunea na matanikatuba ki na reki cecere ni bula kei na iwali ni dredre levu duadua ena bula.

    Kemuni na taciqu kei na ganequ lomani, na itokani taleitaki, au vakavinavinaka niu tiko vata kei kemuni ena muanimacawa vakasakiti oqo ni koniferedi raraba. O Harriet kei au keirau reki vata kei kemuni ena noda tokoni Elder Gong kei Soares kei ira na lewe vuqa na tacida era sa ciqoma na veikacivi vou ena koniferedi raraba oqo.

    E dina niu nanuma noqu itokani lomani o Peresitedi Thomas S. Monson, au lomana, tutaka ka tokona na noda parofita ka Peresitedi, o Russell M. Nelson, kei rau nona daunivakasala vakaturaga.

    Au sa vakavinavinaka talega ka doka ni rawa meu mai cakacaka vata tale vakavoleka kei ira na noqu itokani lomani Veitacini ena Kuoramu ni Le Tinikarua.

    Na kena ilutua, au rokova vakalevu ka marautaka noqu lewena Na Lotu i Jisu Karisito ni Yalododonu E daidai, era tuvakarau kina e milioni na tagane, yalewa kei ira na gone me ra lave ena vanua era tu kina ena itutu se veikacivi cava ga—ka ra saga mai vuniyalodra me ra qarava na Kalou kei Ira na luvena, me tara cake na matanitu ni Kalou.

    Nikua e dua na siga bibi.Na Sigatabu ni Siganimate, na gauna eda vakananuma kina na mataka lagilagi oya ena nona tagutuva na iVakabula na ivau ni mate1 ka basika ena qaqa mai na ibulubulu.

    Na Siga Cecere Duadua ena iTukutuku ni Veigauna

    Ena dua na gauna walega qo au taroga na initaneti, “Na siga cava e veisautaka vakalevu duadua na itukutuku ni vei gauna?”

    Na kena isau, eso e veivakakidacalataki ka so e matalia so e titobu ka vakavure vakasama. Era oka kina, na siga a lutuka kina na Cevaicake kei Mexico e dua na vuravura vatu; se ena 1440, ni vakaotia o Johannes Gutenberg na nona kabani ni tabaivola; io kei na siga oya ena 1903 ena nodrau vakaraitaka na veitacini na Wright ni rawa dina ni vuka na tamata.

    Kevaka e tarogi vei iko na taro vata oya, na cava o na tukuna?

    E matata na kena isau ena noqu vakasama.

    Me da kila na siga bibi duadua ena itukutuku ni vei gauna, sa dodonu me da lesu tale ki na yakavibogi oya voleka ni 2,000 na yabaki sa oti ena Were mai Kecisemani ena nona tekiduru o Jisu Karisito ena vakamamasu ka cabori Koya me isau ni noda ivalavala ca.Sai koya ena gauna ni isoro cecere tawavakaiyalayala oya ni veivakararawataki sega ni vakatauvatani rawa ena yago kei na yalo ka bunotaka kina na dra mai na qara kece ga ni yagona o Jisu Karisito, sai koya na Kalou.Ena dela ni loloma uasivi, nona a solia taucoko me rawa kina ni da taukena taucoko. Na Nona isoro vakalou, dredre ni da kila, me na vakilai ga e vuniyaloda kei na noda vakasama, sa vakananuma vei keda na idinau raraba ni vakavinavinaka eda sa dinau tu kina vei Karisito me baleta Nona isolisoli vakalou.

    Ena lomaloma ni bogi oya, sa kau mai ko Jisu e matadra na iliuliu vakalotu kei ira na vakaitutu vakapolitiki me ra vakalialiai Koya, mokulaki Koya, ka lewa me vakamatei ena imatemate lolovira sara. A lili toka ena kauveilatai ena mosi kei na yaluma, me yacova, ni“sa oti.”2 A vakotori na yagona mate ena dua na ibulubulu qaravatu kerei. Ia, ena mataka ni ikatolu ni siga, o Jisu Karisito, na Luvena na Kalou Qaqa, e basika mai na ibulubulu qaravatu me vaka e dua na ka vakailagilagi, vakaturi cake mai na mate vakasakiti, rarama, ka vakaturaga.

    Io, e vuqa na ka e yaco ena itukutuku ni veigauna sa tatara vakalevu sara ki na bula ni veimatanitu kei ira na tamata. Ia ni o cokoti ira vata kece, ko na sega ni rawa ni o tekivu mo na vakatauvatana rawa ena na bibi ni ka e yaco ena imatai ni mataka ni Siganimate oya.

    Na cava e vakavuna me ka bibi duadua kina e yaco ena itukutuku ni veigauna na isoro tawavakaiyalayala kei na Tucaketale nei Jisu Karisito—ka levu cake na kena revurevu mai na ivalu ni vuravura, na leqa veivakarusai, kei na vua ni vakadidike e veisautaka na bula?

    Ena vukui Jisu Karisito, Eda na Rawa ni Bula Tale

    Na kena isau e koto ena rua na bolebole lelevu dredre, ka da dau sotava kece.

    Taumada, eda na mate kece. Se vakacava na lailai ni nomu yabakinibula, na kemu totoka, bulabula, se nomu qaqarauni, ena dua na siga sa na sega na bula ena yagomu. Era na tagicaki iko na nomu itokani kei na matavuvale. Ia era na sega ni rawa ni vakalesui iko mai.

    Ia, ena vukui Jisu Karisito, ena tu vakawawa nomu mate. Ena dua na siga erau na duavata tale na yalomu kei na yagomu. Sa na sega tale ni mate rawa na yago sa tucaketale mai na mate oqo,3 sa na laki bula ena tawamudu, galala mai na mosi kei na rarawa vakayago.4

    Ena yaco oqo baleti Jisu na Karisito, o koya sa vakadavora Nona bula ka taura cake tale.

    Sa vakayacora o Koya ena vukudra era vakabauti Koya.

    Sa vakayacora o Koya ena vukudra era sega ni vakabauti Koya.

    E vakayacora o Koya vei ira sara mada ga era vakalialiai, ka rulaka, ka vosa vakacacataka na Yacana.5

    Ena vukui Jisu Karisito, Eda na Rawa ni Bula vata kei na Kalou

    iKarua, eda sa ivalavala ca kecega. Ena tarova noda bula vata kei na Kalou na noda ivalavala ca, baleta “ni sega ni rawa ni curu ki na nona matanitu e dua na ka dukadukali.”6

    A yaco kina, ni ra sa sogolati na tagane, yalewa, kei na gone kecega mai na Nona iserau—oya, me yacova na gauna sa solia kina o Jisu Karisito, na Lami sa sega ni duka, na nona bula me isau ni noda ivalavala ca. Baleta ni sega nona idinau ki na lewadodonu o Jisu, sa rawa vua me sauma na noda idinau ka sotava na gagadre ni lewadodonu ni tamata yadua. Oqori e daru okati kina o iko kei au.

    Sa sauma o Jisu Karisito na isau ni noda ivalavala ca.

    O ira Taucoko.

    Ena siga bibi duadua oya ena itukutuku ni veigauna, a dolava kina o Jisu Karisito na matamata ni mate ka biuta vakatikitiki na ilati e tarova tiko noda curuma yani na salatu tabu ka savasava ni bula tawamudu.Ena vukuna na noda Turaga na iVakabula, sa soli kina vei iko kei au e dua na isolisoli talei ka sega ni voli rawa—se cava ga na itukutuku ni noda bula, e rawa ni da veivutuni ka muria na salatu ka na kauti keda ki na rarama vakasilesitieli kei na lagilagi, era sinai kina na luvena yalodina na Tamada Vakalomalagi.

    E Cava Eda Reki Kina

    Oqo na ka eda marautaka ena Sigatabu ni Siganimate—eda marautaka na bula!

    Ena vukui Jisu Karisito, eda na tucake mai na veivakarusai nei mate ka mokoti ira eda dau lomana e ligada, ena drodro na wainimata ni reki kei na vakavinavinaka vuabale. Ena vukui Jisu Karisito, eda na tu me tamata tawamudu, ena vuravura sega ni vakaiyalayala.

    Ena vukui Jisu Karisito, ena sega walega ni bokoci noda ivalavala ca; e rawa ni guilecavi.

    E da na rawa ni savasava ka vakacerecerei.

    Vakalou.

    Ena vukuna noda iVakabula Daulomani, sa rawa ni da gunu tiko ga mai na mataniwai tovure tu ki na bula tawamudu.7 Eda na rawa ni tiko ga ena nona itikotiko vakatui na noda Tui tawamudu, ena lagilagi sega ni vakasamataki rawa kei na marau e taucoko.

    Eda sa “Raica Beka na Tamata”?

    E dina ni tu na veika kece oqo, e vuqa ena vuravura nikua era sega tu beka ni kila se sega ni vakabauta na isolisoli talei sa solia vei keda o Jisu Karisito.Era sa rogoca beka na veika baleti Jisu Karisto ka kila ni dua o Koya e kilai levu ena veigauna, ia era sega ni raici Koya me vaka na Kena irairai dina.

    Niu vakasamataka na veika oqo, au nanuma lesu na iVakabula ni tu e matana na kovana ni Roma, o Ponitio Pailato, ni vo ga e vica na auwa me mate kina na iVakabula.

    E raici Jisu o Pailato ena dua na rai ni lewa vakavuravura. E dua na cakacaka me cakava o Pailato, e oka kina e rua na kena itavi levu: kumuni vakacavacava ni matanitu o Roma ka taqomaka na tiko sautu. Ia era sa kauta mai vua ko ira na matabose ni Jiu e dua na tamata era tukuna ni vakaitatao tiko vei rau ruarua.8

    Ni oti nona vakataroga nona kaivesu, sa kacivaka o Pailato, “Au sega ni raica e dua nona cala na tamata.”9 Ia e nanuma me vakalomavinakataki ira era beitaki Jisu tiko, a qai vakayagataka o Pailato e dua na ivalavala ni vanua ka vakatarai kina me sereki e dua na kaivesu ena gauna ni lakosivia. Era na sega beka ni sereki Jisu mai vua na daubutako ka daulaba o Parapa?10

    Ia era kailavaka na ilala kosakosa vei Pailato me sereki Parapa ka vakamatei Jisu ena kauveilatai.

    “A cava na vuna?” E taroga o Pailato: “A cava na ka ca sa cakava ko koya?”

    Ia era sa qai qoqolou vakalevu cake. “Vakota ki na kauveilatai!”11

    Ena dua na iotioti ni sasaga me ra lomavinaka na ilawalawa ca, a vakaroti ira nona tamata o Pailato me ra vakanakuitataki Jisu.12 Era vakayacora oqori, ka laivi koya ni sa dra ka drakusi tu. Era vakalialiai Koya, vakadarama e uluna na isala wa vakavotona, ka vakasulumi Koya ena kote lokaloka.13

    Rairai e nanuma beka o Pailato ni oqori ena vakamamautaka nodra vinakata me dave na dra.De rawa ni ra lomana kina na tamata oya. “Raica au sa kauti koya mai vei kemudou, mo dou kila niu sa sega ni kunea e dua na ivalavala ca vei koya. … Raica na tamata!”14

    A tu sara ga vakatamata na Luve ni Kalou e matadra na tamata e Jerusalemi.

    E rawa ni ra raici Jisu, ia era a sega ga ni raici Koya dina sara.

    E sega vei ira na mata me ra raica.15

    Ena vakasama ni vosa vakaibalebale, o keda talega eda sa sureti me da “raica na tamata.” Na vakasama eso baleti Koya e duidui e vuravura. Era vakadinadinataka na parofita ni gauna oqo ni o Koya na Luve ni Kalou. Au vakayacora talega oqo. Sa dodonu ka bibi sara me da dui kila vakataki keda. Ni da vakananuma vakatitobu na bula kei na veiqaravi nei Jisu Karisito, na cava o raica?

    O ira era kunea na sala me ra raica dina kina na Tamata era sa kunea na matanikatuba ki na reki cecere ni bula kei na iwali ni dredre levu duadua ena bula.

    O koya, ni ko sa virikovuti tu ena rarawa kei na yaluma, raica na Tamata.

    Ni o vakila ni ko sa lakosese se guilecavi, raica na Tamata.

    Ni o rarawa voli, tu duadua, vakatitiqa, vakacacani, se vakadrukai, raica na Tamata.

    Ena vukei iko o Koya.

    Ena vakabulai iko o koya ka vakaibalebale na nomu ilakolako. Ena sovaraka mai na Yalona ka vakasinaita na yalomu ena reki cecekia.16

    “Sa dau solia na kaukauwa vei ira era sa malumalumu; ia ena vakalevutaka na kaukauwa vei ira era sa sega ni gumatua rawa.”17

    Ni da sa raica dina na Tamata, eda na vuli mai Vua ka segata me da vakataudonutaka noda bula Vua.Me da veivutuni ka saga me da vakasavasavataka noda veitiki ni bula ka tubu cake vakalailai Vua e veisiga. Eda nuitaki Koya. Eda vakaraitaka noda lomani Koya ena noda muria Nona ivunau ka bula taka noda veiyalayalati bibi.

    Ena dua tale na kena itukutukuni, eda yaco me nona tisaipeli.

    Na nona rarama veivakasavasavataki e vakamalumalumutaka na yaloda. Nona loloma soliwale e laveti keda cake. Sa vakamamadataki noda icolacola, ka vakatitobutaki noda vakacegu. Ni da sa raica dina na Tamata, sa noda na yalayala ni na vakalougatataki noda veisiga ni mataka ka na vakauqeti ka tokoni keda ena iwavoki kei na sukusukura ni sala ena ilakolako ni bula. Ni da railesu, eda na vakadinadinataka ni tiko e dua na ivakarau vakalou, ni ra na sota vinaka na digo kece sara.18

    Ni o sa ciqoma na Nona isoro, yaco mo Nona tisaipeli, ka qai yacova yani na icavacava ni nomu ilakolako e vuravura, na cava sa na yaco ena veika rarawa o sa sotava ena bula oqo.

    Era sa na yali.

    Na veivakacudrui, vakawaleni taki, veivakacacani o sa sotava?

    Sa na yali.

    Na vakararawataki, mosiniyalo, kilaiyalona, madua, kei na yaluma o sa lakocuruma?

    Sa na yali.

    Guilecavi

    Oya beka na vuna “eda sa tukuni Karisito ka rekitaki Karisito, ka vunautaki Karisito ka parofisaitaki Karisito, …me ra kila kina na noda kawa na sala me bokoci kina na nodra ivalavala ca”?19

    Oya beka na vuna eda sa saga e vuniyaloda me da raica dina na Tamata?

    Kemuni na taciqu kei na ganequ, au vakadinadinataka ni siga bibi duadua ena itukutuku makawa ni kawatamata na siga a vakadruka kina o Jisu Karisito, na Luve ni Kalou na mate kei na ivalavala ca ena vukudra na luve ni Kalou kece sara. Kei na siga bibi duadua ena nomu bula kei na noqu sai koya na siga eda vulica kina me da “raica na tamata”; ni da raici Koya baleta o cei dina o Koya; ni da vakaivotavota mai vuniyaloda ena mana ni Nona isoro; ena gauna eda yalataka kina ena igu kei na kaukauwa vakavoui me da muri Koya. Me na dau nanumi tu ena veisiga ni noda bula taucoko na siga oqori.

    Au laiva vei kemuni na noqu ivakadinadina kei na veivakalougatataki ni gauna eda “raica kina na tamata,” eda na kunea na ibalebale, na reki, kei na vakacegu ena bula vakavuravura oqo kei na bula tawamudu ena vuravura sa bera mai. Ena yaca tabu i Jisu Karisito, emeni.

    iDusidusi

    1. Raica Mosaia 15:23

    2. Joni 19:30

    3. Raica Alama 11:45

    4. Raica Ai Vakatakila 21:4.

    5. Raica 1 Koronica 15:21–23.

    6. 3 Nifai 27:19.

    7. Raica Joni 4:14

    8. Raica Luke 23:2.

    9. Joni 18:38 Me levea na veilewaitaki Jisu, a tovolea o Pailato me biliga yani na kisi vei Eroti Anitipasi. Kevaka e rawa vei Eroti, o koya ka vakarota na mate nei Joni na Dauveipapitaiso (raica na Maciu 14:6–11), me beitaki Jisu, me na qai sitabataka ga o Pailato na lewa oqori ka kaya ni oya e dua na ka ni nodra itikotiko e vakadonuya me rawa ni maroroi kina na tiko sautu Ia a sega ni cavuta o Jisu e dua na vosa vei Eroti (raica na Luke 23:6–12),ka mani vakasukai Koya lesu o Eroti vei Pailato.

    10. Raica na Marika 15:6–7; Joni 18:39–40. E vola e dua na vuku ni Veiyalayalati Vou, “E vaka tu me dua na itovoudei, ena gauna ni Lakosivia ena sereka na Kovana ni Roma vei ira na lewenivanua vaka-Jiu e dua na kaivesu e totogi mate tu” (Alfred Edersheim,The Life and Times of Jesus the Messiah [1899], 2:576). Na yaca Parapa e kena ibalebale “na luvei tamana.” Na vakasama me soli vei ira na kai Jerusalemi me ra digitaka e dua vei rau na turaga oqo e taleitaki toka.

    11. Raica 15:11–14

    12. A rerevaki sara na veivakanakuitataki ka vakatokai kina na “the intermediate death” (Edersheim, Jesus the Messiah, 2:577).

    13. Raica na Joni 19:1–3

    14. Joni 19:4–5

    15. E liu, a dikeva ko Jisu ni “sa uro mai na lomadra na tamata oqo, a sa didivara na daligadra, a sa bobo na matadra; de dua na siga ena rai na matadra, ka rogo na daligadra, ka kila na lomadra, A ra saumaki mai, ia kau na vakabulai ira.” Ia ena loloma a kaya kina o Koya vei ira Nona tisaipeli, “A sa kalougata na matamudou, ni dou sa raica, kei na daligamudou ni dou sa rogoca” (Maciu 13:15–16). Eda na laiva beka me kaukauwa na yaloda, se eda na dolava na matada kei na lomada me da raica vakaidina na Tamata?

    16. Raica Mosaia 4:20

    17. Aisea 40:29

    18. Raica na Dieter F. Uchtdorf, “The Adventure of Mortality” (lotu ni itabagone qase cake ni vuravura raraba, 14 ni Janu. 2018), broadcasts.lds.org.

    19. 2 Nifai 25:26.