Veiqaravi ena Kaukauwa kei na Lewa ni Kalou
Eda na veiqaravi ena Yacana, ena Nona kaukauwa kei na lewa, kei na Nona loloma yalovinaka.
Kemuni na taciqu, vinaka vakalevu na nomuni yalodina vua na Turaga kei na Nona cakacaka tabu oqo. E marautaki dina na tiko kei kemuni. Me vaka ni keitou dua na Mataveiliutaki Taumada vou, keitou sa vakavinavinakataki kemuni ena nomuni veitokoni kei na masu. Keitou vakavinavinakataka na nomuni bula kei na nomuni veiqaravi vua na Turaga. Na nomuni yalodina ki nai tavi kei na veiqaravi sega ni nanumi koya, e tiki bibi ni nomuni veikacivi me vaka na kena bibi ki na neitou veikacivi. Mai na bula ni veiqaravi ena Lotu oqo, au sa vulica ni sega saraga ni bibi na vanua eda veiqaravi kina. E kauwaitaka na Turaga nai vakarau ni veiqaravi eda solia.
Au vakavinavinakataki Peresitedi Thomas S. Monson, kei na nona ivakaraitaki vei au ni sivia e 50 na yabaki. Keirau na nona daunivakasala, o Peresitedi Henry B Eyring kei Peresitedi Dieter F. Uchtdorf, sa dua na ka na noqu dokai rau. Au vakacaucautaki iratou na nodratou veiqaravi vua na Turaga kei na Nona parofita. Erau sa ciqoma ruarua na italai yalodina oqo na ilesilesi vou. Erau tomana tiko ena bula vinaka kei na yalodina na nodrau veiqaravi. Au dokai rau ka lomani rau sara.
Esa veivakalougatataki vakasakiti dina na veiqaravi ena Lotu bula ka dina ni Turaga kei na Nona lewa kei na kaukauwa. Na vakalesuimai ni kaukauwa ni Kalou, oka kina na idola vakamatabete, e dolava kina Yalododonu Edaidai na bula kilikili ni veivakalougatatakivakayalo uasivi duadua. Eda raica na veivakalougataki ni drodrovi ira tiko mai na marama, turaga, kei na gone e vuravura taucoko.
Eda raici ira na marama era kila vinaka tu na kaukauwa mana e yaco mai ena nodra veikacivi vakakina ena edaumeni kei na cakacaka vakalotu ni valetabu.Era kila na marama oqo me ra kaciva na kaukauwa vakalomalagi me maroroya ka vakaukauwataki ira na watidra, luvedra, kei ira era lomana. Era sa marama kaukauwa vakayalo dina ena veiliutaki, veivakavulici, ka veiqaravi ena veikacivi ena doudou kei na qaqa ena kaukauwa kei na dodonu ni lewa ni Kalou!1 Sa ka levu na noqu vakavinavinaka me baleti ira!
Sa vakakina, o ira na turaga yalodina eda raica ni ra bula donuya na madigi kei na ilesilesi ni matabete e tiko vei ira. Era veiliutaki ka veiqaravi ena solibula ena sala ni Turaga ena loloma, yalovinaka, kei na vosota vakadede. Era vakalougatataki, dusimaki, taqomaki, ka vaqaqacotaki ira na tani ena kaukauwa mana ni matabete e tiko vei ira. Era kauta mai na cakamana kivei ira era qarava ka vaqaqacotaka ka taqomaka tale tikoga na nodra vakamau kei matavuvale ena gauna vata oqori. Era vakanadakuya na vunica kara italatala qase qaqa ni Isireli.2 Sa ka levu na noqu vakavinavinaka me baleti ira!
E rawa beka ni’u tukuna mada e dua na ka e leqataki tiko? Sai koya oqo: E vuqa vei ira na tacida kei na ganeda era sega ni kila vakavinaka nai naki ni kaukauwa ni matabete kei na kena lewa. Na nodra ivukivuki e vakaga era via vakaceguya na gagadre kocokoco ni lomadra kei na yagodra ka sega ni via vakayagataka na kaukauwa ni Kalou me vakalougatataki ira na Luvena.
Au leqataka ni vuqa vei ira na tacida kei na ganeda era sega ni taura vinaka tiko na veimadigi e nodra.3 Eso vei ira na tacida, me kena ivakaraitaki, na nodra ivakarau e vakaraitaka ni ra sega ni kila vinaka tu se cava na matabete kei na veika e rawa ni vakayacora me baleti ira. Me’u solia mada vei kemuni e vica na ivakaraitaki matata.
Ena dua na gauna lekaleka sa oti, au tiko ena dua na soqoni ni sakaramede ka me vakatoka yacataki e dua na gone vou ka soli vua e dua na veivakalougataki ni tama. E roqota tu e ligana o tama ni gone na luvena vakamareqeti, solia vua e dua na yaca, ka qai cavuta e dua na masu totoka. Ia, a sega ni solia o koya e dua na veivakalougatataki vei luvena. E ciqoma na gone yalewa lailai totoka oya e dua na yaca ka sega ni dua na veivakalougatataki! Na talatala qase lomani oya e sega ni kila na duidui ni masu kei na veivakalougatataki ni matabete. Ena nona lewa kei na kaukauwa vakamatabete, e rawa ni vakalougatataka kina na luvena lailai, ia a sega ni vakakina. Au vakasamataka “Sa calata sara o koya na madigi oya!”
Me’u tukuna mada eso tale na ivakaraitaki. Keimami kila eso na veitacini turaga era tabaki ira na marama me ra iliuliu se qasenivuli ena Soqosoqo ni Lalai, Goneyalewa, se Soqosoqo ni Veivukei ia era sega ni vakalougatataki ira ena kaukauwa me ra vakayacora na nodra veikacivi. Era solia ga na veivakaroti kei na veidusimaki. Keimami raica talega na tama e kilikili kaya tu ka sega ni solia vei watina kei ira na luvena na veivakalougatataki ni matabete ni sai koya oqori na veika era gadreva. Na kaukauwa vakamatabete esa vakalesui mai ki vuravura, ka sa vuqa tikoga na tacida kei na ganeda era lako curuma eso na veivakatovolei dredre sara ena nodra bula ka sega sara tu ga ni ra ciqoma vakadua e dua na veivakalougatataki vakamatabete dina. Sa dua na ka vakaloloma sara oqori! Oqori e dua na vakaloloma ena rawa ni da kauta laivi vakadua.
Kemuni na taciqu, eda taura tiko na matabete tabu ni Kalou! E tiko vei keda na Nona lewa meda vakalougatataki ira na Nona tamata. Vakasamataka mada na veivakadeitaki vakasakiti a solia vei keda na Turaga ena Nona kaya, “Ko koya yadua ko sa vakalougatataka, au na vakalougatataka.”4 Esa noda itavi meda cakacaka ena yaca i Jisu Karisito me vakalougatataki ira na luvena na Kalou me vaka na Nona lewa baleti ira. Kivei kemuni na peresitedi ni iteki kei na bisopi, yalovinaka mo ni raica me ra kila vakavinaka na lewe ni kuoramu kece era tiko ena nomuni veiliutaki na ivakarau ni soli e dua na veivakalougatataki—oka kina na bula kilikili yadua kei na vakavakarau vakayalo e gadrevi me kaciva vakataucoko mai na kaukauwa ni Kalou.5
Kivei kemuni kece na taciqu o ni taura tiko na matabete, au sureti kemuni mo ni vakauqeti ira na lewenilotu me ra maroroya na nodra veiyalayalati, masumasu ka lolo, vulica nai volanikalou, sokalou e valetabu, ka veiqaravi ena vakabauta vakatamata ni Kalou. Ena rawa ni vukei ira kece me ra raica ena mata ni vakabauta ni talairawarawa kei na yalododonu ena vakavolekati keda vei Jisu Karisito, vakatara me ra marautaka na veitokani ni Yalo Tabu, ka sotava na reki ena bula!
Duana ivakaraitaki niNona lotu dina na Turaga sa okoya na kena tuvalaki vakamatau na nodra qaraviyadudua na luvena na Kalou kei ira nodra matavuvale.6 Me vaka ni nona na Nona Lotu, o keda na Nona italai eda na veiqaravi veiira yadua, me vaka ga e vakayacora o Koya.7 Eda na veiqaravi ena Yacana, ena Nona kaukauwa kei na lewa, kei na Nona loloma yalovinaka.
E dua na ka au sotava ni rauta e 60 na yabaki mai Boston, e vakavulici au me baleta na kaukauwa e tiko ena veiqaravi ki vua na dua. Au a dauniveisele mai na Valenibula na Massachusett General—ena cakacaka tiko ena veisiga, kei na veibogi tale eso, kei na veimuanimacawa kece tale eso. E vakaiyalayala gauna au tiko kina kei na watiqu, kei iratou na va na luvequ, vakakina ena itaviqaravi ni Lotu. Ia, a lesi au na neitou peresitedi ni tabana me’u dauniveisiko vei Wilbur kei Leonora Cox kei na vakanuinui ni na lesu tale mai me vakaitavi ena Lotu o Brother Cox. A qai vauci kei Leonora ena valetabu.8 Ia, a sega tu ni vakaitavi o Wilbur ena vuqa na yabaki.
Keirau mani lako kei noqu itokani ki na nodratou vale. Ni keitou curu yani, e kidavaki keitou o Sister Cox,9 ia a curu yani ki na dua tale na rumu o Brother Cox ka sogota mai na katuba.
Au a gole ki katuba ka soga mai oya ka’u tukituki. Oti vakalailai e dua na gauna au rogoca, ena domo lailai sega ni matata “Curu mai.” Au dolava yani na katuba ka raici Brother Cox ni dabe volekata toka eso na yaya vakalivaliva ni ratio. Ena loma ni rumu lailai oya, e waqaca o koya na sika. E matata sara vei au ni sega ni ciqomi na noqu veisiko yani oya.
Au veiraiyaki ena loma ni rumu ena qoroqoro ka’u qai kaya yani, “I Bro Cox, au dau vinakata tu me’u vulica na veika me baleta na cakacaka vakalivaliva ni retio. E rawa beka ni o vakavulica vei au? Vosoti au, au na sega ni tiko rawa na bogi oqo, ia ena rawa beka ni’u lesu tale mai ena dua na gauna?”
E galu tu ena dua na gauna, ka qai vakaio mai. Sa itekitekivu ni dua na veitokani totoka. Au lesu tale yani ka qai vakavulici au o koya. Sa tekivu me’u lomani koya ka rokovi koya talega. Ena veisiko veitaravi, sa tekivu basika mai na cecere ni tamata oqo. Sa yaco me keirau veitau vinaka sara, ka vakakina na dui wati keirau. Ka qai yaco mai na gauna, ni sa toki yani na noqu matavuvale. Era tomana tiko na veiliutaki ena vanua oya na veituberi kina matavuvale na Cox.10
Ni oti e walu na yabaki mai nai matai ni veisiko oya, e tauyavutaki na iTeki mai Boston.11 E rawa beka ni o vakilakila mai ocei a kena imatai ni peresitedi ni iteki? Io! O Brother Cox! Ena veiyabaki ka qai sivi a veiqaravi vakaperesitedi ni kaulotu kei na valetabu talega.
Ni sivi tale e vica na yabaki, ni’u sa lewe ni Kuoramu ni iApositolo Le Tinikarua, au a lesi meu tauyavutaka e dua na iteki vou e Sanpete County, Utah. Ni vakayacori tiko na veivakatarogi, au kidacala tale ena marau me’u sotava na noqu itokani lomani o Brother Cox! Au a vakauqeti meu kacivi koya me peteriaki vou ni iteki. Ni’u sa tabaki koya oti, keirau sa veimoko ka tagi. Era vakilakila o ira na tu ena loma ni rumu oya na cava keirau sa tagica tu e rua na turaga lelevu. Ia keirau sa kila. Ka sa kila talega o Sister Cox. Na wainimatai keirau e wainimata ni reki! Keirau mai vakananuma tu nai lakolako ni loloma kei na veivutuni e tekivutaki ena nodratou vale ena dua na bogi, ni rauta e 30 vakacaca na yabaki sa oti.
E sega ni cava e keri na itukutuku oqori. E tubu na vuvale nei Brother kei Sister Cox ena 3 na luvedrau, 20 na makubudrau, kei na 54 na makubudrau vakarua. Qai kuria oqori na nodra veivakayarayarataki kina drau vakadrau na daukaulotu, e udolu vakaudolu ena valetabu, kei na drau vakadrau tale era na ciqoma na veivakalougatataki vakapeteriaki e soli mai ena ligai Wilbur Cox. Na nodrau veivakayarayarataki o koya kei Leonora ena dewa tiko ga ena vuqa na veitabatamata e veiyasai vuravura.
Na veika oqo erau sotava o Wilbur kei Leonora Cox e yaco tiko, au nuitaka—ena veimacawa, veisiga—ena loma ni Lotu oqo. Na italai yalodina ni Turaga o Jisu Karisito era vakayacora tiko na Nona cakacaka, ena Nona kaukauwa kei na lewa.
Kemuni na taciqu, era tu na katuba eda rawa ni dolava, na veivakalougataki vakamatabete eda rawa ni solia, na yalo eda rawa ni vakabula, nai colacola eda rawa ni laveta, ivakadinadina eda rawa ni vakaukauwataka, na bula eda rawa ni vakabula, kei na reki eda rawa ni kauta mai ki na nodra vale na Yalododonu Edaidai—e rawa kece oqori baleta ni da taura tiko na matabete ni Kalou. Sai keda oqo na turaga “era sa kacivi ka vakarautaki mai na tauyavutaki ni vuravura me vaka na nona kilaka taumada na Kalou, ena vuku ni nod[a] vakabauta,” meda cakava na cakacaka.12
Na bogi nikua au sa kerei kemuni mo ni tucake sara mada vata kei au ena mataveitacini cecere tawamudu oqo. Ena gauna au cavuta kina na nomu ilesilesi vakamatabete, yalovinaka mo ni tucake ka tucake tikoga. Dikoni, yalovinaka tucake mai! Vakavuvuli, tucake mai! Bete! Bisopi! iTalatala qase! Bete levu! Peteriaki! Vitusagavulu! iApositolo!
Ena gauna oqo, kemuni na taciqu yalovinaka, mo ni tucake tiko ka lagata vata na tolu na qaqani sere na “Rise Up, O Men of God”?13 Ena gauna o lagasere tiko kina, vakasamataka na nomu itavi ena mataivalu ni Kalou me vakarautaki na vuravura me baleta na iKarua ni Lako Mai ni iVakabula. Sa ikoya oqo na noda itavi. Sa ikoya oqo na noda dodonu. Au sa vakadinadinataka oqo ena yaca i Jisu Karisito, emeni.