Vosa ni Vakamacala Taumada
Sa kacivaki yani e dua na veisau bibi ki na ituvatuva ni veikuoramu ni Matabete i Melikiseteki me qaravi kina vakavinaka cake na cakacaka ni Turaga.
Vinaka vakalevu, na nomuni itukutuku bibi, Baraca Holmes.
Kemuni na veitacini, eda sa nanumi rau vakalevu o Peresitedi Thomas S. Monson kei Elder Robert D. Hales.Ia “meda sa gu tikoga ena cakacaka” ni Turaga.1
Au vakavinavinaka vakalevu ki na tagane yadua e taura tu na matabete tabu. Sai kemuni na inuinui ni noda Dauveivueti ka gadreva “me ra vunau ko ira ena yaca ni Turaga na Kalou, na nodra iVakabula na kai vuravura.”2 E vinakati kemuni kece na Luvena tagane sa tabaki mo ni matataki Koya, mo ni vosa ena Vukuna, mo ni cakacaka ena Vukuna, ka vakalougatataka nodra bula na luvena na Kalou e vuravura taucoko “na vakabauta talega me na vakalevutaki e vuravura [taucoko].”3
Eso vei kemuni e veiqaravi ena vanua sa tauyavu tu kina na Lotu ena vica vata na tabatamata sa oti. Eso tale vei kemuni o ni veiqaravi ena vanua se vou kina na Lotu. Eso, era ka lelevu nomuni tabanalevu. Eso tale vei kemuni, era ka lalai nomuni tabana ka tu vakayawa sara. Se cava ga na kemuni ituvaki, o kemuni yadua o ni lewe ni dua na kuoramu ni matabete ka kena ilesilesi vakalou mo ni vuli ka veivakavulici; mo ni loloma ka qaravi ira na tani.
Ena bogi nikua, sa kacivaki yani e dua na veisau bibi ki na ituvatuva ni veikuoramu ni Matabete i Melikiseteki me qaravi kina vakavinaka na cakacaka ni Turaga. Ena veitabanalevu yadua, era sa na cokoti vata na bete levu kei na italatala qase ki na dua na kuoramu ni talatala qase. Na veisau oqo ena vukea vakalevu na nodra rawata na tagane ena matabete era taura tu na matabete me ra qaravi ira na tani. Era na ciqomi kina na vakavakarau ki na italatala qase ka tuberi ena veitokani ena kuoramu oya. Ena veiiteki yadua, eratou na vakatulewa tikoga na mataveiliutaki ni iteki ena kuoramu ni bete levu ni iteki. Ia o ira na lewe ni kuoramu oya ena yavutaki ena veikacivi ni matabete era tu kina o qo me vaka sa vakarau vakamacalataki yani.
Erau vakarau vakavulica vei keda o Elder D. Todd Christofferson kei Elder Ronald A. Rasband ena Kuoramu ni iApositolo Le Tinikarua eso tale na ka baleta na veisau bibi oqo.
Na veisau vou oqo sa vakadikevi tiko mai ena vica vata na vula. Keitou sa vakila na gagadre levu me vakavinakataki na ivakarau eda kauwaitaki ira kina noda lewenilotu kei na kena ripotetaki na noda veitaratara tiko vata kei ira. Me vinaka cake noda qarava oqori, sa gadrevi me vaqaqacotaki noda veikuoramu ni matabete me vakainaki vakalevu kina na veiqaravi ni loloma kei na veitokoni e nakita na Turaga e vukudra Nona Yalododonu.
Na veisau oqo e vakauqeta na Turaga. Ni da sa vakayacora oqo, esa na vinaka cake sara mai na veigauna sa oti.
Eda sa vakaitavi tiko ena cakacaka ni Kalou Qaqa. Sai Jisu na Karisito! Eda sa Nona italai yalomalumalumu. Me vakalougatataki kemuni na Kalou, kemuni na taciqu, ni da vulica ka qarava noda itavi, oqo na noqu masu ena yaca i Jisu Karisito, emeni.