Raica! Na Mataivalu Vakatui
Sa na dua na reki levu vei ira na lewe taucoko ni Matabete i Melikiseteki me nodra na veivakalougatataki ni veivakavulici, vuli, ka veiqaravi ena duavata.
Kemuni na veitacini matabete lomani, au tu e matamuni ena yalomalumalumu levu ena soqoni vakairogorogo oqo, ena ilesilesi mai vua na noda parofita lomani o Peresitedi Russell M. Nelson.Sa dua na ka noqu lomana ka tokona na turaga cecere oqo ni Kalou kei na noda Mataveiliutaki Taumada vou. Au vakadinadinataka vata kei Elder D. Todd Christofferson, kei iratou na veitacini ena Kuoramu ni iApositolo Le Tinikarua ni veisau sa mai vakaraitaki ena yakavi nikua sa lewa ni Turaga.
Me vaka a kaya o Peresitedi Nelson, na ka oqo sa boseri mai ena masumasu ka sa vakasamataki tiko vakabalavu mai vei ira na Veitacini iliuliu ena Lotu.Na gagadre o ya me vakasaqarai na lewa ni Turaga ka vaqaqacotaka na kuoramu ni Matabete i Melikiseteki. A ciqomi na veivakauqeti, ka sa mai vakaraitaka ena yakavi nikua na noda parofita na lewa ni Turaga. “E dina ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nona italatala na parofita.”!1 Eda sa kalougata dina ni tiko e dua na noda parofita bula nikua!
Ena neirau bula taucoko, keirau sa lakova vata kei Sister Rasband na veiyasai vuravura ena ilesilesi vaka-Lotu ka vakakina vakacakacaka.Au sa raica na veimataqali tabana sa tuvai tu ena Lotu: e dua na tabana lailai mai Rusia na iwiliwili e kea ni Matabete i Melikiseteki e rawa ni wiliki ga ena dua na liga; e dua na tabanalevu vou ka tubu tiko mai Aferika era soqoni vata tiko ga na bete levu kei na italatala qase baleta ni ra lailai tiko na Matabete i Melikiseteki; kei ira na tabanalevu tu vinaka e sa gadrevi ki na nodra lewe ni italatala qase me wasei rua tale na nodra kuoramu!
Na veivanua keirau a gole kina, keirau sa vakadinadinataka ni liga ni Turaga sa liu e matadra na Nona italai, me vakarautaki na tamata kei na sala ki liu me ra vakalougatataki na Luvena taucoko ena nodra gagadre yadua.A sega beka ni yalataka me na “liu e [matada]” ka “tiko e [yasada] imatau ka tiko talega e [yasada] imawi” kei na “[Yalona] ena tiko e lomamudou, era na vakavolivoliti [keda] na [Nona] agilosi”?2
Niu vakasamataki kemuni kece, au nanuma kina na serenilotu “Raica! Na Mataivalu ni Tui.”
Raica! Na mataivalu,
Sa ukucavu tu,
Sa toso ga ki liu
Ena bula oqo.
Sotia ni Kalou,
Sa lomavata tu.
Era sa muri Jisu
Ka sere tiko ga.3
Sa mai sauma o Elder Christofferson na taro eso sa vakadeitaki ni ra na kacivaki mai o ya ni kuoramu ni bete levu kei na italatala qase, ena tabanalevu, era sa cokovata me ra mataivalu duabau, qaqa veitacini ni Matabete i Melikiseteki.
Na veisau oqo ena vukea na kuoramu ni italatala qase kei na iSoqosoqo ni Veivukei me ra cakacaka vata. Ena rawarawa talega na cokonaki ni kuoramu vata kei na matabisopi kei na matabose ni tabanalevu. Sa rawa kina vei bisopi me lesia e levu na itavi vei peresitedi ni kuoramu ni italatala qase kei na iSoqosoqo ni Veivukei me rawa vei bisopi kei rau na nona daunivakasala me ratou raica na nodratou itavi taumada—vakabibi na vakatulewa vei ira na goneyalewa, kei na cauravou era lewe tiko ni Matabete i Eroni.
Na veisau ena ituvatuva kei na cicivaki ni Lotu e sega ni ka vou. Ena 1883, a kaya na Turaga vei Peresitedi John Taylor: “[Me baleta] na lewai kei na tuvai ni noqu Lotu kei na Matabete … au na vakaraitaka vei iko, ena veigauna eso, ena ituvatuva au sa lesia, na veika kece sa dodonu me tarai cake kina ni mataka kei na vinaka cake ni noqu Lotu, me baleta na veisau kei na muataki ki liu na noqu matanitu.”4
Ena gauna oqo, au via vosa vei kemuni na veitacini ko ni bete levu—mo ni kila tiko ni keimami lomani kemuni! E lomani kemuni tiko na Tamada Vakalomalagi! Ko ni sa tiki cecere ni mataivalu ni tui ni matabete, ka da sega ni tosoya rawa na cakacaka oqo ke sega na nomuni vinaka, veiqaravi, kila, kei na valavala dodonu.A vakavulica o Alama ni ra sa kacivi na tagane mera bete levu ni sa cecere nodra vakabauta kei na caka vinaka mera veivakavulici ka qaravi ira na tamata.5 Na kila o ya sa gadrevi vakalevu cake duadua ena gauna oqo.
Ena vuqa na tabanalevu, era tiko beka na bete levu sa na nodra na madigi me na vakatulewa vei ira e dua na italatala qase me nodra peresitedi ni kuoramu.Eso na noda italatala qase vou era sa vakatulewa tiko vei ira na bete levu: na italatala qase era sa veiqaravi tiko vaka-peresitedi ni tabana ena so na vanua e vuravura era sa bete levu ena tabana o ya, ka sa tiko na tabana eso sa tauyavu ga kina na kuoramu ni italatala qase kei na bete levu.
Era na marau vakalevu na lewe taucoko ni Matabete i Melikiseteki ni ra sa vakalougatataki mera veivakavulici, vuli, ka veiqaravi ena duavata kei ira na lewe taucoko ni tabanalevu. Se evei ga o tu kina se kemu ituvaki cava ni bula, ko ni sa sureti ena masumasu, yalodina, kei na reki mo ni ciqoma na veimadigi vou ni veiliutaki se mo ni liutaki ka veiqaravi duavata ni isoqosoqo veitacini matabete.
Meu na vosa mada ena ikuri ni ulutaga, ka na gadrevi me vakadeitaki ni da toso yani me vakayacori na lewa ni Turaga me baleta na tuvai ni Nona kuoramu ni matabete tabu.
Na cava me veisautaki ena dua na kuoramu ni bete levu ena iteki? Na kuoramu ni bete levu ena iteki ena cakacaka tikoga vaka e liu. Na mataveiliutaki ni iteki ena veiqaravi tikoga vaka-mataveiliutaki ni kuoramu ni bete levu ena iteki. Ia, e kaya o Elder Christofferson, na lewe ni kuoramu ni bete levu ena iteki era sa na lewena mai na bete levu era veiqaravi tiko ena mataveiliutaki ni iteki ena gauna oqo, mera lewe ni matabisopi ni tabanalevu, lewe ni matabose e cake ni iteki, kei peteriaki sa lesi tiko. O ira na vunivola ni tabanalevu kei na iteki kei ira na sekeriteri liu era sega ni lewe ni kuoramu ni bete levu ni iteki. Ni dua e veiqaravi tiko vaka-bete levu, peteriaki, Vitusagavulu, se iApositolo e gole ki na dua na tabanalevu ka gadreva me tiko ena soqoni ni matabete, ena soqoni kei na kuoramu ni italatala qase.
Ni ra sa vagalalataki na veitacini sa kacivi oqo ena kena gauna, era na lesu i nodra tabanilotu mera lewe ni kuoramu ni italatala qase.
Na cava na itavi ni kuoramu ni bete levu ni iteki? Ena bose na mataveiliutaki ni iteki kei na kuoramu ni bete levu mera veivakasalataki, soli ivakadinadina, ka veituberi vakavuli. Na soqoni ni iteki sa tuvai tu ena ivoladusidusi ena tomani tiko ka sa rua na veisau:
Dua, na tabanalevu kei na iteki sa na sega tale ni vakayacora na soqoni ni komiti e cake ni matabete. Ni sa tiko e dua na kauwai bibi ni tabanalevu, me vakataka na leqa bibi ni vuvale se bolebole ni veika raraba duatani, sa rawa me wali ena bose ni matabisopi.Na kauwai lalai tale eso me na veivosakitaki ga ena matabose ni tabanalevu.Na ka a vakatokai tu mai me soqoni ni komiti e cake ni matabete ni iteki sa na vakatokai ena gauna oqo me “soqoni ni matabose e cake.”
Rua, na nodra soqoni vakayabaki na bete levu kece sa tabaki ena iteki sa na sega tale ni caka. Ia, na mataveiliutaki ni iteki ena tomana tikoga na nona soqoni vakayabaki ni kuoramu ni bete levu ena iteki me vaka sa kacivaki nikua.
E rawa ni sivia na dua na kuoramu ni italatala qase ena tabanalevu? Na kena isau na io. Ena yalo ni Vunau kei na Veiyalayalati wase 107, tikina e 89, ni dua na tabanalevu sa levu na iwiliwili ni Matabete i Melikiseteki e tiko kina, mera na tauyavutaka na iliuliu e dua tale na kuoramu ni italatala qase. Ena kena vakaoqo, na kuoramu yadua me veiraurau ki na nodra yabaki ni bula, kila vakacakacaka, kei na ilesilesi kei na qaqaco ni matabete.
Au vakadinadinataka ni da toso yani ki liu vata kei naveisau kina ituvatuva ni kuoramu oqo ena noda tabanalevu kei na iteki eda na raica na levu ni veivakalougatataki.Meu tukuna mada e vica na ivakaraitaki.
Ena veiliutaki nei bisopi, e vuqa na ivurevure ni matabete ena rawa me vukea na cakacaka ni veivakabulai.Ena oka kina nodra vakasokumuni na Isireli ena cakacaka ni valetabu kei na tuva kawa, qaravi ira na vuvale kei na tamata yadua era tiko leqa, ka vukei ira na daukaulotu mera kauta mai na tamata vei Jisu Karisito.
Ni ra sa lesu na iliuliu vakatulewa taumada mera laki wasea na nodra kila ki na kuoramu ni italatala qase, ena yaco me qaqaco na lewena na kuoramu.
Ena levu cake na veimataqali isolisoli kei na gugumatua ena loma ni kuoramu.
Ena levu na vakasama raraba kei na galala me sotava na gagadre nikua ka vakatotolotaki ena tabanalevu kei na kuoramu me vakayacori na noda ilesilesi ni veiqaravi.
Ena tubu na veituberi kei na lomavata ni rau veiwasei vata e dua na italatala qase vou kei dua na bete levu kila ka ena soqoni ni kuoramu kei na cakacaka.
Sa nuitaki tiko vei bisopi kei peresitedi ni tabana me rau galala mai me rau mai laveta cake na nodrau veikacivi me rau vakatawani ira nodra sipi ka qaravi ira sa tiko leqa.
Eda sa kila tu ni tabanalevu kei na iteki yadua era duidui. Ni da sa kila tiko na duidui oqo, eda na nuitaka ko ni na vakamuria vakatotolo na veisau oqo ni oti ga na koniferedi raraba.Eda sa dusimaki tiko mai vua e dua na parofita ni Kalou? Sa qai dua dina na veivakalougatataki ka ilesilesi cecere.Meda sa vakayacora ena valavala dodonu kei na gugumatua taucoko!
Meu tukuna tale ni lewa ni matabete ena yaco ena veivakatikori kei na veitabaki, ia na kaukauwa dina ni matabete, na kaukauwa mo cakacaka ena yaca ni Turaga o Jisu Karisito, e yaco duadua ga ena bula dodonu.
A vakaraitaka na Turaga vua na Parofita o Josefa Simici, na parofita ni Veivakalesuimai:
“Raica ka rogoca, au na taqomaka na nomudou qele ni sipi, ia au na kacivi ira na italatala qase ka tala yani vei ira.
“Raica, au na kitaka kusarawa na noqu cakacaka ena kena gauna.”6
E dina, oqo na gauna sa kusata tiko kina na Turaga na Nona cakacaka!
Meda sa qai taurivaka na madigi oqo me ivakaraitaki ka tarai cake noda bula me sala vata cake kei na Nona lewa me noda e vuqa na kalougata sa yalataka o Koya vei ira na dina kei na yalodina.
Kemuni na taciqu, vinaka vakalevu na nomuni sa cakava tiko mo ni tiki ni cakacaka totoka oqo. Meda sa qai toso ki liu ena sasaga dokai cecere oqo.
Ni oti tu nai valu,
Ka oti tu na ca,
Ni da sa soqo vata
Ena vakacegu,
Ena nona iserau,
Eda lewe vuqa
Qai lave noda sere
Ka vakatu oqo:
Na qaqa, na qaqa,
Dauveivakabulai!
Na qaqa, na qaqa,
Jisu noda Tui Sau!
Na qaqa, na qaqa, na qaqa
Jisu noda Tui Sau!7
Nikua eda sa ivakadinadina ni Turaga sa vakaraitaka mai na lomana vua na Nona parofita, o Peresitedi Russell M. Nelson. Au vakadinadinataka ni sai koya na parofita ni Kalou e vuravura nikua. Au sa vakadinadinataka na Turaga o Jisu Karisito, na noda Dauveivueti cecere ka iVakabula. Oqo na Nona cakacaka, oqo na Nona lewa, ka sa noqu ivakadinadina dokai ena yaca i Jisu Karisito, emeni.