Vakarau mo Sotava na Kalou
Ni da sasagataka na noda ilesilesi vakalou ni ivalavala savasava, lomavata, kei na duavata ena vakarautaki keda meda sotava na Kalou.
Ena nona a vosa o Eliza R. Snow ena vakatabui ni Valetabu e Kirtland (ka a tiko kina), a kaya: “Na soqo ni veivakatabui o ya a rairai vakatovotovotaki beka, ia e sega na vosa me vakamacalataka rawa na ivakaraitaki vakalomalagi a yaco ena siga ni vakananumi o ya. Era a rairai na agilosi vei ira eso, ka a vakilai na iserau vakalou vei ira kece a tiko kina, ka vakasinaiti na yalo yadua ena reki tawa vakamacalataki rawa ka ra sinai ena lagilagi.”1
Na ivakaraitaki vakalou a yaco ena Valetabu e Kirtland ka yavutaki kina na inaki ni Lotu i Jisu Karisito sa vakalesuimai me ra vakabulai ka bula vakacerecerei kina na luvena na Tamada Vakalomalagi.2 Ni da vakavakarau meda sotava na Kalou, eda rawa ni kila ni noda ilesilesi vakalou o ya meda taleva lesu na idola tabu a vakalesuimai ena Valetabu e Kirtland.
Ena masu ni veivakatabui, a vakamamasu kina na Parofita o Josefa Simici vua na Turaga “mo ni ciqoma na vale oqo … ia na vale keimami a tara me vaka na nomuni ivakaro.”3
Ni oti e dua na macawa, ni Siga ni Mate, a rairai mai na Turaga ena lagilagi ka vakadonuya na Nona valetabu. A yaco oqo ena ika 3 ni Epereli, 1836, voleka ni 182 na yabaki sa oti mai na Siga ni Mate oqo. A gauna talega ni Lako Sivia—dua na gauna duidui asoqoni vata kina na Siga ni Mate kei na Lako Sivia. Ni sa oti na raivotu, a rairai mai e tolu na parofita, o Mosese, Ilaisa, kei Ilaija, me ratou solia na idola e bibi ki na kena vakavotukanataki na inaki ni Turaga ki na Nona Lotu vakalesui mai ena iotioti ni itabagauna oqo. Na inaki oya e rawarawa, ka matata sara, me ra vakasokumuni na Isireli, me ra vauci vakamatavuvale, ka vakarautaki o vuravura ki na iKarua ni Lako Mai na Turaga.4
Ni rau rairai ruarua mai o Ilaija kei Mosese sa dua na “‘cecere cokovata’ ki na ‘itovo vaka-Jiu, o ya me rau lako vata mai o Mosese kei Ilaija ena ‘iotioti ni gauna.’”5 Ena noda ivakavuvuli, na rairai mai oqo sa mai yaco kina na vakayavutaki ni vakalesuimai ni idola eso “sa soli vei kemudou … ena veisiga mai muri kei na iotioti ni gauna, sai koya na itabagauna ni taucoko ni gauna.”6
Na Valetabu e Kirtland, na vanua e tiko kina kei na kena levu, e sega soti ni kilai. Ia me baleta na veika cecere ki na kawatamata, sa veivakarautaki tawamudu. Era sa vakalesuya na parofita ni gauna makawa na idola ni matabete me baleta na cakacaka vakalotu tawamudu ni veivakabulai ni kosipeli i Jisu Karisito.Sa yaco kina me ra uabaleti ena reki na lewenilotu yalodina.
Era sa vakarautaka na idola oqo “ena kaukauwa mai lomalagi”7 na ilesilesi vakalou me yavutaki ena gauna oya kei na gauna oqo na inaki taumada ni Lotu.8 Ena Siga ni Mate totoka o ya ena Valetabu e Kirtland, a vakalesui mai kina e tolu na idola.
Nai Matai, a rairai mai o Mosese ka mai solia na idola ni nodra vakasokumuni na Isireli mai na yasai vuravura e va, o ya na cakacaka ni kaulotu.9
Nai Karua, a rairai mai o Ilaisa ka mai solia na idola ni itabagauna ni kosipeli i Eparama, sa oka kina na vakalesui mai ni veiyalayalati vaka-Eparama.10 A vakavulica o Peresitedi Russell M. Nelson na inaki ni idola ni veiyalayalati sai koya me ra vakarautaki na lewenilotu ki na matanitu ni Kalou.A kaya, “Eda sa kilai keda vakataki keda ka kila na veika e namaka vei keda na Kalou.”11
Nai Katolu, a rairai mai o Ilaija ka mai solia na idola ni kaukauwa ni veivauci ni itabagauna oqo, o ya na cakacaka ni tuva kawa kei na cakacaka vakalotu veisosomitaki ni valetabu ni nodra vakabulai na bula kei ira na mate.12
E tiko ena veidusimaki ni Mataveiliutaki Taumada kei na Kuoramu ni Le Tinikarua, e tolu na matabose cecere ena itikotiko liu ni Lotu e ratou raica raraba na veilesilesi vakalou yavutaki tiko ena idola a vakalesuimai ena Valetabu e Kirtland.Sai iratou na Matabose Cecere ni Kaulotu, na Matabose Cecere ni Matabete kei na Matavuvale, kei na Matabose Cecere ni Valetabu kei na Tuva Kawa.
Eda Tucake tu Evei Nikua Me Vakayacori Kina na Ilesilesi Vakalou Oqo?
iMatai, me baleta nona vakalesuya mai o Mosese na idola ni vakasokumuni o Isireli, sa yacova na 70, 000 na levu ni daukaulotu e vuravura raraba era sa vunautaka tiko na Nona kosipeli me ra sokumuni na Nona digitaki. Oqo na kena tekivu taki na vakayacori ni cakacaka cecere totoka a raica o Nifai vei ira na kai Matanitu Tani kei na mataqali o Isireli. A raica o Nifai na noda gauna na Yalododonu ni Kalou ni da na roboti vuravura taucoko, ia era na lewe lailai ga ena vuku ni ivalavala ca.Ia, a raica o koya ni ra “sa vakaiyaragi tu ena ivalavala dodonu kei na kaukauwa ni Kalou ena lagilagi cecere.”13 Ni raici yani vakalekaleka na itukutuku makawa ni Lotu vakalesuimai, sa totoka sara na sasagataki ni kaulotu. Sa laurai tiko kina na kena sa yaco na raivotu nei Nifai. Dina ga ni da se lewe lailai toka, eda na tomana na noda sasaga ka gole yani vei ira era na rogoca na itukutuku ni iVakabula.
iKarua, a rairai mai ko Ilaisa ka mai vakatikora na itabagauna ni kosipeli i Eparaama, ka tukuni kina ni oi keda kei ira na noda kawa era na vakalougatataki na itabatamata kecega. Ena koniferedi oqo, sa soli mai na veidusimaki bibi me vukei na nodra vakavinakataki na Yalododonu ka vakarautaki ira ki na matanitu ni Kalou.14 Na veika e kacivaki ena soqoni ni matabete me baleta na kuoramu ni talatala qase kei na bete levu ena sorova mai na kaukauwa kei nai lesilesi. Na veituberi kei na siko vuvale, ena “veiqaravi,” me vaka e vakatavulici sara vakamatata ena soqoni oqo, ena vakarautaka na Yalododonu Edaidai me sotava na Kalou.
iKatolu, sa mai solia o Ilaija na idola ni veivauci ni itabagauna oqo. Vei keda eda bula tiko ena gauna oqo, na vakalevutaki ni valetabu kei na cakacaka ni tuva kawa sa vakaitamera sara.Ena tomani tiko na igu oqo ka totolo sara me yacova na iKarua ni Lako mai na iVakabula, ke sega ena “vakarusai sara na vuravura taucoko ni sa lako mai ko koya.”15
Na cakacaka ni tuva kawa, sa mai vakalougatataki vakalomalagi ena tekinolaji, sa tubu cake vakalevu ena vica na yabaki sa oti. Eda na rawa ni lecaika ni da taura vakamamada na ilesilesi vakalou oqo ka qai namaki Nei Jane se so tale na wekada yalodina mera na mai vakayacora na ka oqo.Meu wasea mada na vosa doudou nei Peresitedi Joseph Fielding Smith: “E sega ni dua e na vakuwai mai na ilesilesi cecere oqo. Sa gadrevi me cakava o apositolo vakakina o cauravou se goneyalewa daukaulotu yalomalua.Na vanua, se itutu, se veiqaravi dede ena Lotu … ena sega ni vakadonua e dua me beca na nona vakabulai na wekana e dua sa mate.”16
Sa tu vei keda na valetabu e vuravura taucoko vakakina na ivurevure ni ilavo veivuke vei lewe ni valetabu e tu vakayawa mai na valetabu.
Oi keda yadua, ena totoka sara na noda taleva tiko na noda sasaga ni cakacaka ni kaulotu, valetabu kei na tuva kawa, ka vakavakarau meda sotava na Kalou.
Na Valavala Dodonu, Duavata, kei na Duabau ena mata ni Turaga sa Yavutaki kina na iLesilesi Tabu Oqo
Me baleta na valavala dodonu, na bula oqo sa gauna meda vakavakarautaki keda kina meda na sotava na Kalou.17 Na iVola i Momani sa tukuna tu na ivakaraitaki eso ni veika ca a yaco ni tamata yadua se na ilawalawa ni ra sega ni maroroya na ivakaro ni Kalou.18
Ena noqu bula, na ivakarau kei na valavala kei vuravura e mua mai na kena kaukauwa ki na dua tale—mai na sasaga tawayaga ka veilecayaki ki na valavala butobuto bibi. E ka marautaki ni so na valavala ca ka butobutoera sa vakadodonutaki ka sega ni tokoni.19 Na valavala butobuto vakayadudua oqo sa saqata tiko na lawa ni tamata. Ia, kivei ira era kila tu na ituvatuva ni Kalou me ra saqata talega na valavala butobuto ka tokona ni sa ivalavala ca. Na noda ivakaro raraba ki vuravura o ya“ni o ira na dau beca na ivakarau ni tiko savasava, vakatotogani watidra se luvedra … ni ra na saumi taro kina vua na Kalou ena dua na siga.”20
Ni da veiraiyaki yani, eda raica na veivakarusai tiko ni valavala ca kei na veivakatotogani ena yasana kecega.Kevaka, meda sa kauwai dina o keda yadua, ki na siga ni lewa ni noda iVakabula, eda na saga medaveivutuni.Au lomaleqataka ni vuqa era na sega ni kauwai tiko vua na Kalou ka sega ni gole ki na ivolanikalou se nodra vosa na parofita mera na dusimaki kina.Kevaka meda na vakasamataka na lewenivanua na revurevu ni ivalavala ca, ena levu na kena saqati na iyaloyalo vakasisila kei na nodra volitaki na marama.21 Me vaka a kaya o Alama vei luvena o Korianitoni ena iVola i Momani, “E sega vakadua ni vu ni marau na caka ca.”22
Me baleta na duavata, a kaya kina na iVakabula, “Ia kevaka dou sa sega ni duavata dou sa sega ni noqu.”23 Eda sa kila tu ni yalo ni veileti sa mai vua na tevoro.24
Ena gauna oqo, na ivakaraitaki vakaivolanikalou ni duavata sa sega tu ni kauwaitaki, ka vuqa era sa vakanaulu tiko ki na mataqali vata,25 yavutaki tiko ena itutu, tagane yalewa, matatamata cava, kei na iyau. Ena vuqa na matanitu, se so vei ira, era sa tawase tu vakalevu ena sala mera bula kina. Ena Lotu ni Turaga, na itovo ga eda na muria ka vakavulica sai koya na itovo ni kosipeli i Jisu Karisito. Na duavata eda vakasaqara tiko o ya meda duavata kei na iVakabula kei na Nona ivakavuvuli.26
Ni da raica na inaki taumada ni Lotu, era sa yavutaki taucoko medatautauvata ena mata ni Turaga 27 ka muria na itovo ni kosipeli i Jisu Karisito. Me baleta na cakacaka ni kaulotu, na ilavaki taumada ni papitaiso o ya na yalomalumalumu ena mata ni Kalou ka lako mai ena yaloraramusumusu kei na yalo bibivoro.28 Na vuli, iyau, matatamata cava, se kai matanitu cava e sega mada ga ni wili.
Me ikuri, era sa yalomalua na daukaulotu ena vanua era kacivi kina. Era sega ni saga mera veiqaravi ena itagede ni vuravura se vakarau ki na cakacaka saumi. Era veiqaravi e yalodra kece, igu, vakasama, kei na kaukauwa taucoko ena vanua cava ga era lesi kina.Era sega ni digitaka na nodra itokani, ka ra saga vagumatua me ra tara cake na ivakarau sa Vakarisito,29 sai koya na usutu ni itovo i Jisu Karisito.
Na ivolanikalou e dusimaka na noda veimaliwai bibi duadua.E vakavulica na iVakabula ni imatai ni ivakaro sai koya mo “lomani Jiova na nomu Kalou.”Kei na kena ikarua o ya “mo lomana na kai nomu me vaka ko lomani iko.”30
Sa qai tomana na iVakabula ni tamata kecega era sa kai noda.31 E vakamatatataka na iVola i Momani ni sega ni dodonu me tiko na yaca, se mataqali, se kalasi.32 E dodonu meda duavata ka tautauvata.
Na cakacaka tabu vakalotu kei na ilesilesi vakalou era sa tara cake ena vakasama oqo.Au nuitaka ni tautauvata na veika o sotava ena valetabu kei na veika au sotava ena valetabu.Niu biuta yani na noqu cakacaka vakavuravura mai San Francisco ka curu ena Valetabu e Oakland, au dau sotava na yalo veisobuti ni loloma kei na vakacegu. Dua na tikina bibi o ya niu vakila niu sa voleka vua na Kalou kei na Nona inaki. Na cakacaka vakalotu veivakabulai a noqu usutu taumada, ia e dua na tiki bibi ni yalo totoka o ya na yalo e veivakatautauvataki kei na duavata e tiko e valetabu.Era vakaisulu vulavula kece e kea.E sega ni laurai e kea na iyau, itutu, se rawaka vakavuli; eda sa veitacini ka veiganeni ka da sa vakayalomalumalumutaki keda ena mata ni Kalou.
Ena loqi tabu ni veivauci, na cakacaka vakalotu ni vakamau tawamudu e tautauvata kece tamata taucoko.Au taleitaka vakalevu ni rawa ni tautauvata na veika erau sotava e dua na veiwatini erau sega ni rawaka sara vakavinaka kei na dua na veiwatini vutuniyau. E ratou suluma na mataqali kote balavu vata ga kei na veiyalayalati vata ga ena icabocabo ni soro vata ga. E ratou na ciqoma na veivakalougatataki vata ga ni matabete tawamudu.E yaco ga oqo ena kena valetabu totoka e tara ena nodra ikatini na Yalododonu me vale vakatabui ni Turaga.
Ni vakayacori na ilesilesi vakalou, yavutaki ena ivalavala dodonu, duavata, kei na tautauvata ena mata ni Turaga, ena kauta mai na marau ni tamata yadua kei na vakacegu e vuravura ka vakarautaki keda ki na bula tawamudu ki na vuravura sa roro tiko mai.33 Sa vakarautaki keda meda veisotari kei na Kalou.34
Sa neimami masu, se ituvaki cava ga o ni sotava tu vakayadua, mo ni veivosaki kei nomuni bisopi ka kilikili me dua na nomu ivolatara ni valetabu.35
Eda sa vakavinavinaka ni vuqa na lewenilotu era sa vakavakarau tiko me ra gole ki na valetabu. E laurai ni sa tubu sara na iwiliwili ni qase kilikili vakaivolatara ni valetabu ena vuqa na yabaki.Na ivolatara vakaiyalayala ni itabagone kilikili sa tubu talega ena rua na yabaki sa oti.Sa matata sara ni lewe ni Lotu yalodina qaqa sa kaukauwa cake sara.
Kena itinitini, mo ni kila deivaki tiko ni o ira na iliuliu ni Lotu era dabe vakatulewa tiko ki na ilesilesi ni inaki vakalou ni Lotu era sa vukei tiko vakalou.Na veidusimaki oqo sa mai vua na Yalo ka so na gauna sa mai vua na iVakabula.Sa soli ruarua mai na veidusimaki vakayalo. Au vakavinavinaka niu mai ciqoma na veivuke oqo.Ia na veidusimaki e soli ena nona gauna ga na Turaga, na vosa ena vosa kei na vunau ena vunau,36 mai vua na “Turaga sa cecere sara sa lewa ga me vakavulici keda.”37 Na veidusimaki ni Lotu raraba e tadu ga mai vua na Nona parofita.
A soli vei keda kece na madigi meda tokoni Peresitedi Russell M. Nelson me noda parofita ka Peresitedi ni Lotu i Jisu Karisito ni Yalododonu Edaidai ena koniferedi oqo.A ka vakayalo vei keitou na Le Tinikarua, vakailawalawa se keitou yadua, na tabaka na buradelai Peresitedi Nelson kei Peresitedi Dallin H. Oaks, me keitou domo, vakatikora ka tabaki koya me Peresitedi ni Lotu.Au vakadinadinataka ni a tabaki oti mai lomalagi ka a vakarautaki tu ena nona bula taucoko me mai parofita ni Turaga ni noda gauna oqo. Ena yaca i Jisu Karisito, emeni.