Na Loma ni Dua na Parofita
Ena rawa ni da reki ni toka donu na parofita ni Turaga ka sa caka tiko na cakacaka ni Turaga me vaka sa lesia vakalou O Koya.
Au sa masu vagumatua me na tiko kei keda yadua nikua na Yalo Tabu, ena soqoni cecere oqo. Na ka eda sa mai vakadinadinataka vata e ka matalia dina ni sa mai tokoni ena soqoni bibi na i ka 17 ni parofita ni itabagauna oqo.
Niu vaqara na veidusimaki meu kila kina na ulutaga e vinakata na Turaga meu vosa kina nikua, e a kau na noqu vakasama ki na dua na veitalanoa kei na Mataveiliutaki Taumada kacivi vou. Ena veitalanoa oqo, e a wasea kina e dua na daunivakasala na veivosaki oqo: “Au vakanuinui titobu ni ra na kila deivaki na lewe ni Lotu na bibi ni ka e yaco ena nona kacivi na parofita vou, o Peresitedi Russell M. Nelson, kei na kena ibalebale ka vakalou ni soqoni bibi ka na vakayacori ena koniferedi raraba.” E tukuna talega, “Sa oti e 10 na yabaki, ka vuqa, vakabibi o ira na itabagone ena Lotu, era sega ni nanuma se sotava na ka oqo e liu.”
Na ka oqo e vakavuna na noqu vakananuma lesu kina na veika au sa sotava oti. Nai matai ni parofita au nanuma o Peresitedi David O. McKay. Au a yabaki 14 ena gauna e a takali kina. Au vakananuma ni a dua na yalo ni yali e sala vata kei na nona takali kei na wai ni mata e mata itinaqu, kei na rarawa e vakila kece tu na matavuvale. Au vakananuma ni lutu rawarawa ena masu mai na tebenigusuqu na veivosa oqo “Ni yalovinaka ka vakalougatataki Peresitedi David O. McKay,” ena gauna mada ga sa yali kina, au dau lutu ki na veivosa oya. Au a veinanuyaka se na rawa ni ciqoma na yaloqu kei na noqu vakasama na veisau, meu vakila na veivakauqeti vata ga eliu vei ira na parofita e tarava mai.Ia me voleka ni vakataki ira na itubutubu ka lomani ira yadua na luvedra, au kunea e dua na loloma kei na isema kei na ivakadinadina baleti Peresitedi Joseph Fielding Smith, ka taravi Peresitedi McKay, kei ira yadudua na parofita era veimuri: o Harold B. Lee, Spencer W. Kimball, Ezra Taft Benson, Howard W. Hunter, Gordon B. Hinckley, Thomas S. Monson, kei na siga oqo o Peresitedi Russell M. Nelson. Ena yaloqu taucoko au tokoni ira yadudua ena lave liga—kei na laveti cake ni yalo.
Ni oti na nodra takali yadudua na noda parofita lomani, ena yaco ga mai na vakilai na rarawa kei na lolosi. Ia na noda rarawa ena seavu totolo ka lako mai na reki kei na inuinui ni dua na veivakalougatataki cecere ena Veivakalesui mai: na nona kacivi ka tokoni e dua na parofita bula ena vuravura.
Ena ka oya, au na vosa kina ena dua nai tuvatuva vakalou ka a vakamuri ena 90 na siga sa sivi. Au na vakamacalataka ena va na iwasewase: imatai, na takali ni noda parofita lomani kei na vagalalataki ni Mataveiliutaki Taumada; ikarua, na gauna ka waraki kina na tuvai tale ni Mataveiliutaki Taumada vou; ikatolu, na kacivi ni parofita vou; kei na ikava, na veitokoni vua na parofita vou kei na Mataveiliutaki Taumada ena soqoni tabu.
Na Nona Takali E Dua na Parofita
Ena i ka 2 ni Janueri, 2018,sa toki kina na noda parofita lomani ko Thomas S. Monson ki na tai kadua ni ilati. Ena tiko ga na nona tikina ena lomada. Na vakacacavu nei Peresitedi Henry B. Eyring ena takali nei Peresitedi Monson e vakamacalataka vinaka na lomada: “Na ivakatakilakila ni nona bula, me vaka na iVakabula, sa ikoya nona kauwai vakaikoya me dolele ki vua na dravudravua, na tauvimate—io ki na tamata yadua—e vuravura raraba.”1
A vakamacalataka o Peresitedi Spencer W. Kimball:
“Ni sa dromu e dua na kalokalo ki na ra, e dua tale e na tubu ena iyaloyalo, na mate e vakatubura na bula.
Sa tawayalani na cakacaka ni Turaga; “Ni sa mate mada ga e dua na iliuliu qaqa, e sega vakadua ni dua na gauna me sega kina na veiliutaki ena Lotu, e vakavinavinakataki na Veivakarautaki loloma ko koya ka solia ki na nona matanitu me toso tiko ka vakaikuritaki. Me vaka sa yaco oti … e liu ena itabagauna oqo, e dua na kawatamata era sogota ena vakarokoroko e dua na ibulubulu, qusia na wainimata, ka vukica na matadra ki na sigavou.”2
Veiliutaki Tu–wawa Vakaiapositolo
Na iwase ni gauna ena maliwa ni nona mate e dua na parofita kei na tuvai vou ni Mataveiliutaki Taumada e vakatokai na “veiliutaki tu–wawa vakaiapositolo.” Ena loma ni gauna oqo, na Kuoramu ni Le Tinikarua, ena ruku ni veiliutaki nei peresitedi ni kuoramu, eratou na taura cokovata tu na idola ni kena qaravi na veiliutaki ena Lotu. Ena nona vosa ena ka oqo, e a kaya kina o Peresitedi Joseph F. Smith, “Ena dau duadua tikoga na iliuliu e loma ni Lotu, ka kevaka sa yali na Mataveiliutaki ni Lotu ena vuku ni mate se dua tale na ka, e sa na veiliutaki tarava ena Lotu na iApositolo Le Tinikarua, me yacova ni sa tuvai tale na mataveiliutaki.”3
Na veiliutaki tu–wawa ka qai mai cava e tekivu mai na takali nei Peresitedi Monson ena ika 2 ni Janueri, ka mai cava ena 12 na siga e muri ena Sigatabu, 14 ni Janueri. Ena mataka ni Siganivakacecegu oya, eratou a sota kina ena rumu ecake ni Valetabu e Salt Lake na Kuoramu ni Le Tinikarua ena yalo ni lolo kei na masu, ena ruku ni veituberi nei Peresitedi Russell M. Nelson, na iApositolo liu ka Peresitedi ni Kuoramu ni Le Tinikarua.
Kacivi E Dua na Parofita Vou
Na soqoni tabu ka daunanumi oqo, ni ra dabedabe vakaitutu ena veimama na iwirini e 13 na idabedabe, ni ra vakamuria na ivalavala vakadeitaki ni dua kei na lomavata, era lave liga kina na Veitacini taumada me tokona e dua na Mataveiliutaki Taumada ka qai tokoni Peresitedi Russell Marion Nelson me Peresitedi ni Lotu i Jisu Karisito ni Yalododonu Edaidai. E muria na veitokoni oqo na nodratou duri wavoki na Kuoramu ni Le Tinikarua ka tavara na ligadratou ena ului Peresitedi Nelson me ratou tabakaka vakatikora, ka gusu ni vosa na iApositolo qase duadua ka taravi koya.
Sa qai cavuta o Peresitedi Nelson o irau na nona daunivakasala, o Peresitedi Dallin Harris Oaks, kei Peresitedi Henry Bennion Eyring, ka me Peresitedi ni Kuoramu ni iApositolo Le Tinikarua o Peresitedi Oaks ka Peresitedi Vakatawa ni Kuoramu ni iApositolo Le Tinikarua ko Peresitedi Melvin Russell Ballard.E tarava na veitokoni vata ga, e ratou a vakatikori, na Veitacini oqo ki na nodratou dui ilesilesi mai vei Peresitedi Nelson. Oqo e dua na gauna titobu na kena tabu, ka sovaraki kina na Yalotabu. Au solia noqu ivakadinadina dei ni na lewa ni Turaga, ka keimami a masulaka vagumatua, e a basika vakaukauwa ena itavi kei na cakacaka ena siga oya.
Ena nona tabaki o Peresitedi Nelson kei na tuvai tale ni Mataveiliutaki Taumada, sa mai cava kina na veiliutaki tu–wawa vakaiapositolo, e matalia, ni Mataveiliutaki Taumada buli vou eratou tekivu cakacaka ka sega ni tao me dua mada ga na sekodi ena liutaki ni matanitu ni Turaga e vuravura.
Soqoni Tabu
Ena mataka nikua, na ikalawa vakalou e mai vakacavari me vaka e vakaroti vakaivolanikalou ka tuvai ena Vunau kei na Veiyalayalati: “Ia ena vakayacori na veika kecega me vaka na kena ivakarau, ia me ra vakadonuya kece na lewe ni lotu, ena masu ni vakabauta,”4 ia e tolu na Bete Levu Vakatulewa,…eratou na qai tokoni ena nodra veivakabauti, nodra yalodina, kei na nodra masumasu na lewenilotu; eratou na lewe ni kuoramu ni Mataveiliutaki ni Lotu.”5
E a vakamacalataka vakakoqo o Elder David B. Haight na kena yaco ena dua na gauna e liu na ka eda vakaitavi kina nikua:
“Eda sa ivakadinadina ka vakaitavi ki na dua na gauna tabu dina—na soqoni tabu me vakayacori kina na cakacaka vakalomalagi.Me vaka ena gauna makawa, e sa levu na lolo kei na masu mai vei ira na Yalododonu e vuravura taucoko mera ciqoma na sovaraki ni Yalo ni Turaga, ka a vakadinadinataki ena mataka nikua.
“A soqoni tabu, me vaka sa tukuna tiko na yacana, e vakaraitaka na vakatatabu, vakanomodi kei na vakarokoroko ni gauna era soqoni kina na Yalododonu ena veituberi ni Mataveiliutaki Taumada.”6
Kemuni na taciqu kei na ganequ, e rawa ni da reki—ka kaila ga “Osana!”—ni sa dabe tiko na gusunivosa ni Turaga, na parofita ni Kalou, ka sa lomavinaka na Turaga ni sa vakayacori na Nona cakacaka me vaka na ilesilesi vakalou.
Peresitedi Russell M. Nelson
Na ituvatuva vakalou oqo e vakanaulu ki na dua tale na parofita kacivi vakalou. Me vaka ga ni o Peresitedi Monson e a dua na lewei vuravura cecere duadua, e vaka talega kina o Peresitedi Nelson. E a sa vakarautaki vakamatau ka vakatavulici vakatabakidua mai vua na Turaga me liutaki keda ena gauna oqo. Sa noda na veivakalougatataki levu me mai noda edaidai o Peresitedi Russell M. Nelson na noda parofita lomanika dina—na i ka 17 ni Peresitedi ni Lotu ena iotioti ni veitabagauna oqo.
E turaga duatani dina o Peresitedi Nelson. Sa ka dokai vei au na veiqaravi ena Kuoramu ni Le Tinikarua ka noqu peresitedi kina o koya me oti vakalailai e rua na yabaki. Au sa dau veilakoyaki vata kaya kau dau qoroya nona icegubula, ka ni dau kusa edua me toboki koya. Sa sikova oti e 133 na matanitu ena gauna ni nona bula taucoko.
E dolele yani ki na tamata kece, na gone kei na qase. E vaka ni kilai ira kece na tamata ka nona isolisoli vakatabakidua na nanuma na yaca. Vei ira kece era kilai koya era vakila ni ra nona ka talei. Ia sa yaco vei keimami yadudua—baleta nona loloma dina kei na kauwai me baleta na tamata yadua.
Na noqu veimaliwai taumada kei Peresitedi Nelson e ka ni vakailesilesi ni lotu, ia au sa laki kila talega na bula vakacakacaka ka taura tu o Peresitedi Nelson ni bera ni kacivi ki na Veiliutaki Raraba. Me vaka e levu vei kemuni e kila, o Peresitedi Nelson e a dauveisele uto kilai e vuravura ka, ena itekivu ni nona cakacaka vakavuniwai, e a dua ka liu ni buli ni misini ni uto–atevuso.E a cakacaka talega o koya kei na ilawalawa dauvakadidike ka tokona na imatai ni veisele dola–uto ki na tamata ka vakayagataka na takosovi ni uto–atevuso ena 1951. O Peresitedi Nelson ea vakayacora na veisele uto vei Peresitedi Spencer W. Kimball ni se bera vakalailai ni laki parofita o Peresitedi Kimball.
Ia, e ka talei, ni nona kacivi o Peresitedi Nelson ki na Le Tinikarua ena 34 na yabaki sa oti sa mai cava kina na cakacaka vakavuniwai ni vakaukauwataka ka sema na uto, ka sa mai tekivu na veiqaravi vaka iApositolo kaqarava na vakaukauwataki kei na semati ni nodra uto na udolu vaka tini ka ra laveti ka vakabulai mai na nona vosa kei na cakacaka vuku, veiqaravi, kei na loloma.
Na Loma Vakarisito
Niu raitayaloyalotaka na loma Vakarisito ni vakayacori e veisiga, au raici Peresitedi Nelson. Au se sega ni sotava e dua me vakaraitaka na itovo oya ena kena ivakatagedegede sara e cake me vakataki koya.E ivakavuvuli dua tani sara vei au na tu meu sarava matanavotu na ivakaraitaki ni loma Vakarisito nei Peresitedi Nelson.
Ni qai vica na macawa na noqu kacivi ki na Tinikarua ena Okotova ni 2015, e a noqu na madigi meu digova vakavoleka na bula vakacakacaka e liu nei Peresitedi Nelson. Au a sureti meu tiko ena dua na soqoni me na dokai kina o koya vakaisevu ni dauveisele uto. Niu curuma yani na olo, au kurabui niu raica e dua na ilawalawa levu ni tamata rogo ka ra mai doka ka qoroya na cakacaka ka a vakayacora o Peresitedi Nelson ena vuqa na yabaki sivi yani ni a se vuniwai ka dauveisele kina.
Ena yakavi oya, e levu na tamata rogo era tucake ka tukuna nodra vakarokoroko kei na qoroqoro ena isolisoli cecere ka cakava o Peresitedi Nelson ena nona kila vakavuniwai. Sa matalia dina na veivakamacala yadudua me baleta na veika e vuqa e rawata o Peresitedi Nelson, ia au qai gabalavu ena dua na veitalanoa kei koya ka dabe tiko e yasaqu. E sega ni kila se ko cei koi au, ia e kilai Peresitedi Nelson me ko Dr. Nelson, ka dairekita ni parokaramu ni veisele saresare ena koronivuli ni vuli vuniwai ena 1955.
Na turaga oqo e a gonevuli e liu nei Peresitedi Nelson. E wasea e levu nona vakanananu. E matalia duadua na nona vakamacalataka na nona ivalavala ni veivakavulici o Peresitedi Nelson, ka, e tukuna, ni rogovaki vakalevu.E vakamacalataka ni levu ga na veivakavulici vei ira na vuli dauveisele ni uto e vakayacori e loma ni rumu ni veisele. E kea, o ira na vuli era dau sarava ka veisele ena ruku ni nodra veiliutaki na qasenivuli, me vaka na rumunivuli vakadidike. E wasea ni ituvaki ni rumu ni veisele e ruku ni so na dauveisele e kabuwacara, veisisivi, lomaocaoca, ka rawa ni yalovakatani. E vakamacalataka ni buturara dredre, ka so na gauna e rawa ni beci. E yaco, ni ko ira na vuli dauveisele era dau vakila ni na vakaleqai nodra cakacaka.
Ka qai vakamacalataka na ituvaki duatani e kunei ena nona rumu ni veisele o Peresitedi Nelson. E vakacegu, malumu ka vakarokoroko. O ira na vuli era dau qaravi ena vakarokoroko titobu. Ia, me muria na vakaraitaki ni dua na veisele, e dau kaciva o Dr. Nelson na ivakatagedegede ni cakacaka duadua e cake mai vei ira yadua na vuli. E kuria na turaga oqo ni bulavinaka duadua kei na dauveisele vinaka duadua era lako mai na rumu ni veisele nei Dr. Nelson.
Oqo e sega ni kurabuitaki vakalailai vei au. Sa ikoya oqo na ka au sarava matanavotu, kau vakalougatataki mai kina ena Kuoramu ni Le Tinikarua. Au vakila niu sa vaka, ena dua na kena ibalebale, niu sa dua nona “gonevuli vuli tiko.”
E tu vei Peresitedi Nelson e dua na ivalavala uasivi ni vakavulici ira na tani kei na veivakadodonutaki ena ivakarau donu, veilaveti, kei na vakarokoroko. O koya sa vatuka ni loma Vakarisito ka ivakaraitaki vei keda kece. Eda vulica mai vua ni draki ni bula cava eda sotava, na noda ivakarau kei na lomada e rawa ga ni muria na ivakavuvuli ni kosipeli i Jisu Karisito.
E tu vei keda oqo na veivakalougatataki levu meda tokona na noda parofita, o Peresitedi Russell M. Nelson. Ena nona bula taucoko, e sa vakalevutaka na nona itavi duidui ni a gonevuli, tama, parofesa, tagane vakawati, vuniwai, iliuliu vakabete, tukanigone, kei na iApositolo. E a vakayacora ena gauna koya—ka vakayacora tiko oqo—enayalo ni dua na parofita.
Kemuni na taciqu kei na ganequ, na ka eda vakadinadinataka ka vakaitavi kina nikua, e dua na soqoni tabu, e Liu kina noqu ivakadinadina ni ko Peresitedi Russell M. Nelson e nona gusunovosa bula na Turaga vei ira na kawatamata kece. Au vakuria noqu ivakadinadina baleta na Kalou na Tamada, baleti Jisu Karisito, kei na Nona itavi me noda iVakabula ka Dauveivueti. Ena yaca i Jisu Karisito, emeni.