Na Cakacaka Vakalotu ni Veivakabulai ena Kauta mai Vei Keda na Rarama Vakasakiti
    Footnotes

    Na Cakacaka Vakalotu ni Veivakabulai ena Kauta mai Vei Keda na Rarama Vakasakiti

    Na vakaitavi ena cakacaka vakalotu kei na rokova na kena veiyalayalati ena kauta mai na rarama vakasakiti kei na veitaqomaki ena vuravura sa butobuto cake tikoga oqo.

    Kemuni na taciqu kei na ganequ, au reki vata kei kemuni ena kosipeli, se na ivunau i Karisito.

    A tarogi Elder Neil L. Andersen, lewe ni Vitusagavulu ena gauna oya, e dua na itokani se vakaivei na ivakarau ni yalona ni vosa e matadra na 21,000 na tamata ena Vale ni Koniferedi.A sauma o Elder Andersen, “E sega ni o ira na 21,000 na tamata e vakavuna na rere; o iratou ga na 15 na Turaga iLiuliu eratou dabe tiko e dakumu.” Au vakasukadredre ena gauna oya, ia au vakila nikua. Sa dua na ka noqu lomani iratou ka tokoni iratou na 15 na turaga oqo ni ratou parofita, daurairai, ka dauvakatakila.

    E tukuna na Turaga vei Eparaama, mai vei ira na nona kawa vakakina mai na matabete, ena vakalougatataki kina na veimatavuvale kece sara ni vuravura “ena veivakalougatataki ni Kosipeli, … io na bula tawamudu” (Eparaama 2:11; raica talega na tikina 2–10).

    Na veivakalougatataki yalataki oqo ni kosipeli kei na matabete sa vakalesuimai ki vuravura, ia ena, 1842, a qarava kina na Parofita o Josefa Simici na edaumeni vei ira e dua na iwiliwili yalani ni turaga kei na marama.E dua vei ira o Mercy Fielding Thompson.A kaya vua na Parofita, “Na [edaumeni] oqo ena kauti iko tani mai na butobuto ki na rarama vakasakiti.”1

    Nikua au na vakanamata ena cakacaka vakalotu ni veivakabulai, ka na kauta mai vei iko kei au na rarama vakasakiti.

    Cakacakatabu Vakalotu kei na Veiyalayalati

    Ena Tudei ena Vakabauta eda wilika kina: “Na cakacaka vakalotu e dua na cakacaka tabu vakatulewataki ka qaravi ena lewa ni matabete.[Na] cakacaka vakalotu [era] sa yaga bibi sara ki na noda bula vakacerecerei … ka ra vakatokai me ra cakacaka vakalotu ni veivakabulai. Era okati kina na papitaiso, veivakadeitaki, veitabaki ki na Matabete i Melikiseteki (vei ira na tagane), na edaumeni ni Valetabu, kei na vauci ni veiwatini.”2

    E vakavuvulitaka o Elder David{nb}A. Bednar, “Na cakacaka vakalotu ni veivakabulai kei na bula vakacerecerei ka qaravi ena nona Lotu vakalesui mai na Turaga … e oka kina na sala vakadonui ena drodro mai kina ena noda dui bula na veivakalougatataki kei na mana vakalomalagi.”3

    Me vaka na yasa ruarua ni ilavo kaukamea, na veicakacaka vakalotu kece ni veivakabulai era veitokani kei na veiyalayalati vata kei na Kalou. Sa yalataka vei keda na Kalou na veivakalougatataki kevaka eda rokova ena yalodina na veiyalayalati oqori.

    E tukuna na parofita o Amuleki “me vakarautaki koya na tamata ena bula oqo me na lesu tale vua na Kalou” (Alama 34:32 Eda na vakarautaki keda vakacava? Ena noda ciqoma ena bula kilikili na cakacaka vakalotu. Sa dodonu talega vei keda, me vaka na vosa nei Peresitedi Russell M. Nelson, “Me da tikoga ena salatu ni veiyalayalati.” E tomana o Peresitedi Nelson, “Na nomuni dinata mo ni muria na iVakabula ena nomuni cakava na veiyalayalati kei Koya ka qai maroroya tiko na veiyalayalati oqori ena tadolava na katuba ki na veivakalougatataki vakayalo yadua kei na madigi me nodra na tagane, yalewa, kei ira na gone ena veivanua kecega.”4.

    O John kei Bonnie Newman, me vaka e vuqa vei kemuni, erau sa rawata na veivakalougatataki vakayalo e yalataka o Peresitedi Nelson. Ena dua na Sigatabu, ni suka mai na lotu kei iratou na luvena lalai e lewe tolu, a tukuna o Bonnie vei John, ka sega tiko ni se lewena na Lotu “Au sega ni rawa ni cakava duadua oqo. Mo na lewa mo lako mai ki na noqu lotu vata kei keitou se digitaka e dua na lotu e rawa ni datou lako vata kina, ia eratou gadreva na gone me ratou kila ni lomana talega na Kalou o tamadratou.” Ena Sigatabu ka tarava kei na Veisigatabu kece tale ni oti oya, a sega walega ni lako i lotu o John; a veiqaravi talega, tabapiano ena vuqa na tabanalevu, tabana, kei na Lalai ena veiyabaki. A ka dokai vei au meu sotavi John ena Epereli 2015, ena sota oqori, keirau veitalanoataka kina ni sala vinaka duadua me vakavotukanataka kina nona lomani Bonnie me kauti koya ki na valetabu, ia ena sega ni rawa oqori vakavo ni sa papitaiso.

    Ni oti nona dau lakova na Lotu i Jisu Karisito ni Yalododonu Edaidai ena loma ni 39 na yabaki, a papitaiso o John ena 2015. Ni oti e dua na yabaki, rau a vauci o John kei Bonnie ena Valetabu mai Memphis Tennessee, ni oti e 20 na yabaki nona ciqoma o Bonnie nona edaumeni.A kaya kina na luvedrau tagane yabaki 47, o Robert, me baleti tamana, “Sa qai seraka vakavinaka mai o Ta, mai na gauna e ciqoma kina na matabete.” E vakuria o Bonnie, “E dau tamata mamarau ka yalovinaka tu ga o John, ia ni sa ciqoma na cakacaka vakalotu ka rokova nona veiyalayalati sa vakavinakataka cake nona yalomalua.”

    Veisorovaki i Karisito kei na Nona iVakaraitaki

    Ena vuqa na yabaki sa oti, a vakasalataka kina o Peresitedi Boyd K. Packer, “Na itovo vinaka ka sega kina na cakacaka vakalotu ni kosipeli ena sega ni vueta se vakacerecerea na kawatamata.”5 Ia na ka dina, eda sega ni gadreva walega na cakacaka vakalotu kei na veiyalayalati me da lesu kina vei Tamada, ia eda gadreva talega na Luvena, o Jisu Karisito, kei na Nona Veisorovaki.

    E vakavulica na Tui o Penijamini ena vuku duadua ga ni yaca i Karisito ena rawa kina na veivakabulai vei ira na luve ni tamata (raica na Mosaia 3:17; raica talega Yavu ni Vakabauta 1:3

    Ena Nona Veisorovaki, sa vueti keda kina o Jisu Karisito mai na revurevu ni Lutu i Atama ka rawa kina vei keda na veivutuni kei na bula vakacerecerei. Ena Nona bula, sa virikotora ko Koya na ivakaraitaki vei keda me da ciqoma na cakacaka vakalotu ni veivakabulai, sa “vakatakilai kina na kaukauwa ni bula vakalou” (V&V 84:20

    Ni ciqoma oti na iVakabula na cakacaka vakalotu ni papitaiso me “vakayacori kina na ivalavala dodonu kecega” (raica na 2 Nifai 31:5–6), a temaki Koya o Setani.E vakakina, noda temaki e sega ni oti ni da sa papitaiso se vauci, ia noda ciqoma na cakacaka vakalotu tabu ka rokova na veiyalayalati e salavata kaya ena vakasinaiti keda ena rarama vakasakiti ka solia vei keda na kaukauwame da vorata ka vakamalumalumutaka na veitemaki.

    iVakasala

    E parofisaitaka o Aisea ni ena veisiga e muri, “sa vakadukadukalitaki talega ko vuravura … baleta ni ra sa … lako tani mai na cakacaka vakalotu” (Aisea 24:5; raica talega na V&V 1:15).

    E dua na ivakasala veiwekani, a vakatakilai vua na Parofita o Josefa Simici, oya ni so era sa “toro voleka ga vua [na Turaga] ena tebenigusudra, … era vakatavulica me ivunau na ivakavuvuli ni tamata, era sa viavia vakalou ena nodra ivalavala, ia era sa cakitaka ga na nona kaukauwa” (Josefa Simici—Ai Tukutuku 1:19).

    A vakasalataka talega o Paula ni so era na viavia vakalou ena nodra ivalavala, ia era na [cakitaka] ga na nona kaukauwa: mo lako tani mai vei ira era sa vakaoqo” (2 Timoci 3:5 Au kaya tale, lako tani mai vei ira era sa vakaoqo.

    Na veivagolei tani kei na veitemaki ni bula sa vaka na “wolifa daukata” (Maciu 7:15). Na ivakatawa dina sai koya ena vakarautaka, taqomaka, ka vakasalataka na sipi kei na qelenisipi ni ra basika mai na wolifa oqo (raica na Joni 10:12). Me vaka ni da ivakatawa veivuke ka segata me da vakatotomuria na bula uasivi sara ni iVakatawa Vinaka, eda sega beka ni ivakatawa ni dui yaloda vakakina o ira na tani? Ena nodra ivakasala na parofita, daurairai, ka dauvakatakila eda se qai tokoni ira walega, kei na mana kei na isolisoli ni Yalo Tabu, eda na raica na wolifa ni ra sa lako mai kevaka eda yadra ka vakarau tu. Kena veibasai, ni da ivakatawa wele ni yaloda kei na yalodra na tani, ena rawa ni yaco na leqa. Na wele ena vakavuna na leqa. Au sureti keda yadua meda ivakatawa yalodina.

    Veika Sotavi kei na iVakadinadina

    Na sakaramede e dua na cakacaka vakalotu e na vukei keda me da tiko ga ena sala, kei na noda vakayagataka ena bula kilikili sa ivakadinadina ni da sa rokova tiko na veiyalayalati ni veicakacaka vakalotu kece tale. Ena vica na yabaki sa oti, ni keirau veiqaravi tiko kei na watiqu o Anita ena Tabana ni Kaulotu na Arkansas Little Rock, au a lako kei na rua na daukaulotu itabagone me keitou veivakavulici. Ena lesoni, a kaya mai na turaga vinaka keitou vakavulica, “au sa lesu mai ena nomudou lotu; na cava dou dau kana madrai ka gunu wai kina ena vei-Sigatabu? Ena neitou lotu, keitou cakava vakarua e veiyabaki, na Siganimate kei na Siganisucu, ka vakaibalebale sara vakalevu.”

    Keitou wasea vua ni da sa vakaroti me da dau “soqoni vata wasoma me da kana madrai ka gunu waini” (Moronai 6:6; raica talega na V&V 20:75). Keitou wilika vakadomoilevu na Maciu 26 kei na 3 Nifai 18. A sauma ni se bera ga ni raica rawa na kena yaga.

    Keitou qai wasea na ivakatautauvata oqo: “Vakatayaloyalotaka mada ni o okati ena dua na vakacalaka bibi ena motoka. O mavoa ka sega saraga ni vakilai iko.A lako mai e dua, ni raica ni o sega ni vakilai iko tu, a qirita na naba ni leqa tubukoso, 911. O qaravi ka vakilai yalomu tale mai.”

    Keitou taroga na turaga oqo, “Ni sa rawa ni o vakila mai na vanua o tu kina, na taro cava ena votu mai vei iko?

    E kaya o koya, “Au na vinakata meu kila seu yaco mai vakacava ki kea kei cei a kunei au. Au na vinakata meu vakavinavinakataki koya e veisiga baleta ni vakabulai au.”

    Keitou qai wasea vua na turaga vinaka oqo na sala e vakabulai keda kina na iVakabula kei na vuna me da vakavinavinakataki Koya kina e veisiga, veisiga, veisiga!

    Oti keitou taroga, “Ni o sa kila ni a solia o Koya Nona bula me baleti iko kei keitou, o na vinakata beka me vakavica nomu kania na madrai ka gunuva na wai na ivakatakarakara ni Yagona kei na Nona dra?”

    Qai kaya o koya, “au sa taura rawa, au sa taura rawa. Ia edua tale na ka. Nomudou lotu e sega ni bulabula vaka na neimami.”

    E keri keitou sauma yani, “Na cava o na cakava kevaka e curu mai katuba oya na iVakabula o Jisu Karisito?”

    E kaya o koya, “Ena gauna vata ga au na tekiduru sobu e duruqu.”

    Keitou taroga, “E sega beka ni o koya oqori na ka o vakila ni o curuma yani na valenilotu ni Yalododonu Edaidai—vakarokoroko vua na iVakabula?”

    Qai kaya o koya, “au sa taura rawa, au sa taura rawa, au sa taura rawa!”

    A basika yani i valenilotu ena Sigatabu ni Siganimate oya ka qai lesu tikoga yani.

    Au sureti keda yadua me da tarogi keda, “Na cakacaka vakalotu cava,oka kina na sakaramede, au gadreva meu ciqoma, kei na veiyalayalati cava au gadreva meu cakava, maroroya ka rokova?” Au yalataka ni vakaitavi ena cakacaka vakalotu kei na rokova na kena veiyalayalati ena kauta mai na rarama vakasakiti kei na veitaqomaki ena vuravura sa butobuto cake tikoga oqo. Ena yaca i Jisu Karisito, emeni.