2010–2019
Ko Koya sa Vosota me yacova na iVakataotioti, Ena Vakabulai.
Epereli 2018


Ko Koya sa Vosota me yacova na iVakataotioti, Ena Vakabulai.

Me da yalodina ki na ka eda sa vakabauta ka kila.

Kemuni na taciqu kei na ganequ lomani, au vakavinavinakataka vakalevu na madigi me’u cavuta vei kemuni eso na ka au vakila.

Ena vica na yabaki sa oti, keirau a tiko kei na watiqu ena soqo ni kena tekivutaki na vakaraitaki iyaya veicurumaki nodra na gone ena Valeniyayamakawa ni iTukutuku Makawa ni Lotu e Salt Lake City. Ni mai cava na soqoni, ea lako mai vei keirau o Peresitedi Thomas S. Monson, ka ni keitou lululu ga, a kaya o koya, “mo vosota tiko, ka o na qai qaqa”—edua na ivakavuvuli bibi ka dua na dina, eda rawa ni vakadonuya kece.

O Jisu Karisito ea yalataka vei keda ni “ko koya ena vosota me yacova na ivakataotioti, ena vakabulai ko koya.”1

Meda vosota e kena ibalebale “meda tudei tikoga ena veidinadinati meda dina ki na vei ivakaro ni Kalou veitalia na veitemaki, veisaqasaqa, se veivakacacani.”2

O ira sara mada ga era sa sotava oti na veivakaukauwataki vakayalo ka veiqaravi ena yalodina e rawa ni lako sese se lutu tani mai na lotu ena dua na siga kevaka era sega ni vosota me yacova na ivakataotioti. Meda dau maroroya ka cavuta vakabibi e veigauna ki lomada kei na yaloda na malanivosa “Na ka oqo ena sega ni yaco vei au.”

Ni a veivakatavulici o Jisu Karisito e Kapenaumi, “era sa suka tani kina e le vuqa vei ira na nona tisaipeli, a ra sa sega tale ni lako vata kaya.

“Sa qai kaya ko Jisu vei ira na lewe tinikarua, Dou sa via lako tani talega koi kemudou?”3

Au vakabauta edaidai, o Jisu Karisito e tarogi keda kece eda sa caka veiyalayalati tabu kei Koya, “Dou sa via lako tani talega koi kemudou?”

Sa noqu masu ni o keda kece, eda vakasama vakatitobu baleta na veika e vakarautaka vei keda na vuravura tawamudu, eda na rawa ni sauma me vakataki Saimoni Pita: “Kemuni na Turaga, keitou na lako vei cei? sa tu ga vei kemuni na vosa ni bula tawamudu.”4

Me da yalodina ki na ka eda sa vakabauta ka kila. Kevaka eda sega tiko ni bula me vaka na noda kila, ia meda veisau. O ira na daucakacala ka ra cakava tikoga na nodra ivalavala ca, ka sega ni veivutuni, era na dromu vakatitobu ka titobu cake e loma ni dukadukali, yacova ni tauri ira o Setani me nona, ka vakaleqa vakalevu sara nodra madigi me veivutuni, me ra vosoti, ka me ra vakalougatataki ena veivakalougatataki kece ni vuravura tawamudu.

Au sa rogoca e vuqa na nodra vakatautaukeni ira o ira era sa sega ni vakaitavi vagumatua ena Lotu ka ra sa lecava na raivotu dodonu ni inaki ni noda ilakolako ena vuravura oqo. Au vakamasuti ira mera digova tale ka lesu mai, baleta au vakabauta ni sega ni dua ena rawa ni vakaiulubale ena mata ni noda Turaga, o Jisu Karisito.

Ena noda a papitaiso, eda a veiyalayalati—sega kei na dua ga na tamata ia kei na iVakabula, ka da vakadonuya “me [da] taura na yacai Jisu Karisito, ka sa tiko na inaki dei ni ra na qaravi koya me yacova na ivakataotioti.”5

Na noda dau tiko ena veisoqoni ni sakaramede e dua na sala bibi eda rawa ni dikeva kina na noda inaki dei meda qaravi Koya, noda vaqaqacotaki vakayalo, kei na tubu cake ni noda vakabauti Jisu Karisito.

Sa usutu ni kena rokovi na Siga ni Vakacecegu oya na kena votai na sakaramede. Na Turaga ea vakamacalataka na cakacaka vakalotu oqo vei iratou Nona iApositolo ni se bera ni mateo Koya.Ea vakayacora talega oKoya vakakina ena vanua levu o Amerika. E tukuna o Koya vei keda ni kevaka eda vakaitavi ena cakacaka vakalotu oqo, e sa ivakadinadina ki vei Tamada ni da na dau nanumi Koya e veigauna, ka yalataka o Koya, vakakina, ni na tiko kei keda na Yalona.6

Ena ivakavuvuli i Alama Lailai vua na luvena o Sipiloni, eda kunea kina na vei ivakasala kei na ivakaro momona ka na vukei keda me yalodina tikoga ki na noda veiyalayalati:

“Mo qarauna mo kakua ni vakalevulevui iko mo viavialevu kina; io, mo raica mo kakua ni boletaka na nomu yalomatua se sakitaka na nomu igu.

“Mo yalodoudou; ia mo kakua ni veivakararawataki; mo tarova tale ga na nomu gagano kecega, ia mo sinai sara ena loloma; ia mo qarauna mo kakua ni dau vakawelewele.”7

Ena vica na yabaki sa oti, ni’u a gade voli, au a via vakatasosoko ena bavelo me qai imatai ni gauna. Au redetaka edua na bavelo, ka ena levu ni mamakutu, au tavoca yani ki waitui.

Ni oti e vica na miniti, ea vakatobuicutaka na bavelo edua na ua.Ena dua na tamani sasaga levu, ni’u taura tiko na ivoce ena dua na ligaqu kei na bavelo ena dua tale, sa qai rawa ni’u tu vinaka tale.

Au tovolea tale me vocetaka na noqu bavelo, ia ni oti ga e vica na miniti, ea tavuki tale na bavelo. Au a tovolea tikoga ia, sa tawayaga ga, yacova ni qai tukuna vei au edua na kenadau ena vocetaki bavelo ni rairai cicila tiko beka na dagona ka sa sinai kina na bavelo ena wai, ka vakavuna me veisuayaki ka dredre na vakatulewataka Au a yarataka na bavelo ki na matasawa ka luvata na kena isogo, ka mani dina sara, e levu sara na wai ea lako mai tuba.

Au nanuma ni so na gauna eda lako curuma na bula kei na ivalavala ca ka, vaka na cicila ena noqu bavelo, e vakataotaka na noda toso ki liu vakayalo.

Kevaka eda ivalavala ca tikoga, eda guilecava na veiyalayalati eda a vakayacora kei na Turaga, dina ga ni da tatavukivuki tikoga baleta na suaigelegele e vakavuna na ivalavala ca oqori ena noda bula.

Me vaka na cicila ena noqu bavelo, na cicila eso ena noda bula e gadrevi me vakavinakataki. Eso na ivalavala ca ena vinakati vakalevu cake kina na sasaga mai na so tale me veivutunitaki.

Okoya gona e dodonu meda tarogi keda vakatakikeda: Eda sa tu evei enanoda ivakarau ni bulani da rai tiko Vua na iVakabula kei na Nona cakacaka? Eda tu beka ena ituvaki i Pita ena nona a cakitaki Jisu Karisito?Se da sa toso yani ki na vanua ka sa lai tu kina vei keda na itovo ni rai kei na inaki dei ka a tu vua ni oti na “ilesilesi cecere” ka a ciqoma okoya mai Vua na iVakabula?8

Meda sasaga ka vakamuria na ivakaro kece ka malele vakavoleka ki na kena e dredre duadua vei keda meda maroroya. Na Turaga ena tu e yasada, ka vukei keda ena veigauna ni gagadre kei na malumalumu, ka kevaka eda vakaraitaka na gagadre vakaidina ka cakacakataka, ena cakava o Koya “me vu ni nodra kaukauwa na veika malumalumu.”9

Na talairawarawa ena solia vei keda na kaukauwa meda vorata na ivalavala ca. E dodonu meda kila talega ni vakatovolei ni noda vakabauta e vinakati kina meda talairawarawa, ka vakavuqa ena noda lecava na kena icavacava.

Au vakatura edua na iwalewale ka na vukei keda me da vosota ki na ivakataotioti:

  1. E veisiga, masu ka wilika na ivolanikalou.

  2. E veimacawa, vakayagataka na sakaramede ena yalo sa raramusumsu kei na yalobibivoro.

  3. Sauma na noda ikatini kei na noda isolisoli ni lolo ni veivula.

  4. Ena vei yarua na yabaki—e veiyabaki vei ira na itabagone—vakavouiya noda ivolatara ni valetabu.

  5. Ena noda bula taucoko, veiqaravi ena cakacaka ni Turaga.

Me vakadeitaka na lomada na vei dina cecere ni kosipeli, ka meda maroroya noda bula me galala mai na veicicila ka rawa ni itatao ni noda ilakolako taqomaki ena loma ni waitui ni bula oqo.

Na rawaka ena sala ni Turaga edua na kena isau, ka sala duadua ga e rawati kina oya me saumi na isau oya.

Au vakavinavinaka ni noda iVakabula ea vosota ki na ivakataotioti, ka vakacavara Nona veisorovaki cecere.

Ea vakararawataki o Koya ena vuku ni noda ivalavala ca, mosi, yalorarawa, yaluma, malumalumu, kei na rere, ka sa kila kina o Koya me vukei keda vakacava, me uqeti keda vakacava, me vakacegui keda vakacava, ka me vakaukauwataki keda vakacava me rawa ni da vosota ka rawata na isala ka sa vakarautaki vei ira era sega ni vakadrukai.

Na bula e duidui vei keda yadudua. E tu kece na noda gauna ni vakatovolei, na gauna ni mamarau, na gauna ni vakatulewa, na gauna ni lako curumi na vei itatao, kei na gauna ni vakayagataki vinaka ni vei madigi.

Se vakacava na noda ituvaki yadua, au vakadinata ni Tamada Vakalomalagi e kaya tikoga, “Au lomani iko. Au tokoni iko. Au sa tiko vaka kei iko. Kakua ni guce. Veivutuni ka vosota ena sala ka’u sa vakaraitaka vei iko. Ka’u yalataka vei iko ni da na veiraici tale ena noda vale vakasilesitieli.” Ena yaca i Jisu Karisito, emeni.