2010–2019
Sa Tucake ko Jisu
Epereli 2018


Sa Tucake ko Jisu

Nikua na Sigatabu ni Siga ni Mate Au vakadinata ena vakarokoroko ka vakadinadinataka na Karisito bula—ni a mate o Koya, “a bulu, ka tucake tale ena ikatolu ni siga.”

Kemuni na taciqu kei na ganequ lomani, ni rau a se gone sara na luvei keirau tagane, au dau talanoa‑itukuni ni moce veirau baleta na koli yava leka lalai ka vagugu sere ni moce, oka kina na “Jisu sa Tucake Mai.”1 Eso na gauna au veisautaka na qaqana: “Oqo sa gauna ni moce—aleluia. Dau vakawasoma rau dau moce totolo na luvei keirau tagane; erau kila ni kevaka au nanuma erau moce, au na cegu ena lagasere.

Na vosa—na noqu vosa sara madaga—e sega ni tukuna rawa na veika vakilai vuabale mai na gauna e taura kina ena loloma o Peresitedi Russell M. Nelson na ligaqu, ni tu o Susan e yasaqu, ka dulaka na veikacivi tabu mai Vua na Turaga ka kauta laivi saraga na noqu icegu ka sa biuti au meu tagi vakavuqa ena veisiga sa oti oqo.

Ena Sigatabu ni Siganimate oqo, au lagata ena reki, “Aleluia.” Na sere ni loloma veivueti ni noda iVakabula tucaketale2 e marautaka na veisaututaki ni veiyalayalati (ka semati keda Vua na Kalou ka vakataki keda) kei na Veisorovaki i Jisu Karisito (ka vukei keda me biuta tani na tagane kei na yalewa vakavuravura ka talairawarawa ki na veivakayarayarataki ni Yalo Tabu3).

Ni caka vata oqo, na noda veiyalayalati kei na Veisorovaki ni noda iVakabula e veivakayaloqaqataki ka veivakacerecerei. Erau vukei keda me tautauri matua ka sorova na veika me biu. Ni caka vata, e vakamikamicataka, maroroya, vakasavasavataka, ka veivueti.

E a kaya na Parofita o Josefa Simici: “Ena kena irairai beka vei ira eso ni sa rui ivunau kaukauwa eda veivosakitaka tiko oqo—e dua na kaukauwa e vola se vauca vata e vuravura ka vauca vata talega mai lomalagi. Ia, ena veitabayabaki kece ni vuravura, ni sa solia na Turaga edua na itabagauna ni matabete vua edua na tamata ena ivakatakila, se ki na dua na umatamata, sa dau soli kina na kaukauwa oqo.”4

Sa vakakina edaidai. Na veiyalayalati kei na cakacaka vakalotu tabu, ka sega ni tu vakarawarawa ena duatale na vanua, e ciqomi ena 159 na valetabu ni Turaga ena 43 na matanitu. Na veivakalougatataki yalataki e lako mai ena idola vakamatabete vakalesuimai, na ivunau, kei na lewa, ka vakavotuya noda vakabauta, talairawarawa, kei na yalayala ni Nona Yalo Tabu, kivei keda ena noda itabagauna, ena bula oqo ka tawamudu.

Kemuni na taciqu kei na ganequ lomani ena veimatanitu, veimataqali, kei na duivosavosa, ena noda Lotu e vuravura raraba, vinaka vakalevu na nomuni vakabauta bula, inuinui, kei na loloma cecere ena vei kalawa kece. Vinaka valevu na nomuni yaco mo ni tiki ni soqoni vata vaka taucoko ni ivakadinadina kei na veika sotavi ena kosipeli vakalesuimai oqo.

Kemuni na taciqu kei na ganequ lomani, eda sa duavata kece vakataki keda. E rawa ni da semati ena “duavata ena veilomani”5 ena veika kecega kei na veivanua kecega eda na tu kina.6 Me vaka sa sureti keda yadua o Jisu Karisito, ena vanua cava ga eda tiko kina, kei na ituvaki cava ga eda tu kina, yalovinaka “lako mai ka mai raica.”7

Ena siga oqo au yalataka ena yalomalua “ena igu taucoko ni yaloqu,”8 se vakacava na ituvaki se ena yaco, ki vua noqu iVakabula, kivei Susan kei na noqu matavuvale, ki na Veitacini, ka vei kemuni yadua, kemuni na taciqu kei na ganequ.

Na veika kece e yaga ka tawamudu e yavutaki ena dina bula ni Kalou, na Tamada Tawamudu, kei na Luvena, o Jisu Karisito, kei na Nona Veisorovaki, ka vakadinadinataka na Yalo Tabu.9 Nikua na Sigatabu ni Siga ni Mate Au vakadinata ena vakarokoroko ka vakadinadinataka na Karisito bula—“ni a mate o Koya, a bulu, ka tucake tale ena ikatolu ni siga, ka lako cake ki lomalagi.”10 O Koya na Alifa kei na Omeka11—kei keda ena ivakatekivu, o Koya e tiko kei keda ki na ivakataotioti.

Au vakadinadinataki ira na parofita edaidai, mai vua na Parofita o Josefa Simici ki vei Peresitedi Russell M. Nelson, o koya eda tokona ena reki ena siga oqo. Me vaka era dau lagata na noda Lalai, “Muria na parofita; ni kila na sala.”12 Au vakadinadinataka, me vaka e parofisaitaki ena ivolanikalou tabu, oka kina ena iVola i Momani: E Dua Tale Ai Vakadinadina i Jisu Karisito“esa tauyavutaki tale ena vuravura na matanitu ni Turaga, ena vakavakarau ki na iKarua ni Lako Mai ni Mesaia.11 Ena yaca savasava ka tabu i Jisu Karisito, emeni.